Ebedeo 6
6
1Aden ënden Esuquidistu chuibanac aid tantiabensho chuibanondaiduidtsëqui tantiec tabadenquio icnuna. Esus bëdambuen tantiaquidquio icnuen ambi chiaid utsi isban isbanec tantiaquidquio yannuna. Mibi chuibanac mimbi tantiondaid nad iquec: Esus tantiabenshun icsambuen naid ënta, quequin chuiquinc icsambuen naid ënenquiocsho Nuquin Papan cuidte chuiquinc Nuquin Papambo tantiate chuiquinc capanëdash. 2Adembidi Esus tantiabenacsho acten mentometa, quequin chiaid chuiquinc. Adembidi Esus tantiaquid nec, queshun ma Nuquin Papan aton Mayan Bëda menenu, quequin mëdanten mamishaid icta, quequin chiaid chuiquinc. Adembidi abi tantiaquid uënësacsho uincuenmete iquendac, quequin chiaid chuiquinc. Adembidi abi tantiesa icsho ënenquio icquin cuidtequid iquendac, quequin chiaid chuiquinc caidtedi mibi chuibampanëdash. 3Aidtedi chuibanac mimbi tantiondac. Nëbi Nuquin Papan: Umbi naden chiaid ma tantianu. Chuiban, cacpadombuen chuibanquin tantiamendambi.
4Aden tantiamiac Esuquidistu tantiaquid icbuedi aid tantiesa yanuash Esus tantiaquid icuatiapimbo iquendac. Ënden Nuquin Papan abi tantiaquid icsho aton Mayan Bëda meniaid icbuedi caimbi. 5Adoaidën Nuquin Papan Chiaid bëdambuen tantiashun Nuquin Papan namiaido icquin nadatiambocquin nabanaid issun: Nuquin Papa yacno Esusbëd tabadte iquec, quequin tantiabempondash. 6Aden Esus tantiabuedi tantiesa yanuashun padpiden tantiabentiapimbo iquendac. Adquid: Esus cueste napotiaidën dectan, quequidbimbuecquid icquin utsibo icsambuen oncamequin Nuquin Papan Mado mamënshunmec. Adquid icsho Nuquin Papan padpiden Esus tantiaquid icmeuatiapimbo iquendac.
7-8Adec Esus tantiaquid icbuedi tantienquio yanquid nadquio iquec. Echobëd canashëta dadpen icsho issun tetequin tsindoshon nëdëncatequid nendac. Adombuembidi Esus tantiaquid icbuedi tantienquio yanquid icsho Nuquin Papan: Umbi cuidquin nëdëncatequid nec, caindac. Padnuen utsi nadquid iquec. Baded badedquiec ue sequequin nidaid pachi uaidën tiedën pete nitsinaid bëdambuec caniacsho taneshcaquidën petequid nendac. Adecbidi Esuquidistu tantiec chieshtoenquio yec tabadquid Nuquin Papan bëdambo icmendac.#6.7-8 Ene. 3.17-18 tantiaquin nëid dada uapanëdash.
9Tantia, cun utsibo. Umbi tantiaid icsho mibitedi chuinu. Nuquin Papan cuidenquio ictequido mibi nec, quequin tantiembi. Esuquidistu tantiaquido yec Nuquin Papabëd tabadtequido mibitedi nendac. 10Abi tantiaquid icquin utsibo tantiaquin mibitedishun nashundennesho issun Nuquin Papan ambi tantiacpadombuen naquid icquin mimbi nabanaidtedi bëshunenquio icquin tantiendac. 11Adecbidi utsibobëd tantiananec tabadquin chieshtoenquio icquin Esus tantiec mibitedi bëdambuec tabadac bëdambo ictsiash. Adec tabadash: Esus tantiaquid yec Nuquin Papa yacno tabadtequid nebi, quequin mimbi cainquin tantiacpadec aid yacno mibi tabadendac. 12Aden umbi chiacpaden nabanquido yec chieshuidequi tabadenda. Adec tabadenquio icquin Nuquin Papan Chiaid tantiata. Nuquin Papan: Ubëd mibi tabadendac, quequin chiampid tantiash utsibo: Abimbo caic, queshun abi tantiasho Nuquin Papan ambi chiampicpadombuen abëdi tabadmendac. Aidon nabanquin tantiacpadombuen chieshtoenquio icquin Nuquin Papa tantiata.
Naden nanu, quec Nuquin Papa muatiapimbo iquec, quiaid
13Ëndenquimboshë Abadauan bëdambuec tabadsho issun Nuquin Papan abipadquid utsi nibëdnuc nadatiamboshëcquid yec muatiapimbocquid icquin: Umbibi tantiashun umbi tantiacpadombuen mibi bëdambo icmenu, quequin Nuquin Papan naden chuipampic: 14Mibi bëdambo icmequin bëdambuen isquin mimbi tishmiaidën tsiuecquido dadpenquioshë caidmendambi, quequin Nuquin Papan Abadauan chuipampic.#6.13-14 Ene. 22.16-17 tantiaquin nëid dada uapanëdash. 15Aden chuisho tantiashun chieshtoenquio icquin cainec Abadauan: Nuquin Papan ambi chiacpadombuen naindac, quequin abi tantiasho Nuquin Papan nashumpampic.
16Nuquin matses chushcanansho abentsëcshun: Nuquin Papan isnubi chuiquid tapabon tantianuc mibi abimbo chiombi, quequin chiac chushcanambuedi chushcananenquio iquendac. 17Adembidi Nuquin Papa ambi chiacpadombuen naquidquio nec, quequin ma tantianu, queshun Nuquin Papan: Muatiapimbocquid icquin utsi uainquio icquin nashunendambi, quequin Abadauambëta aton tsiuecquido chuipampic. 18Adec Nuquin Papa muatiapimbocquid icquin: Umbi chiacpadombuen naimbi, quequin chiaid utsi uatiapimbo iquec. Aden abimbo chuiquidquio nec. Adquid nec, quequin chiaid tantiashun nuqui: Ubi bëdambuen isquin dayun uata, Papa, quequin Ambi chiacpadombuen naindac. Adembidi abi tantiaquido caic: Ubi yacno mibi ubëd tabadendac, quequin chiampid utsi uatiapimbo iquec, quequin caimbudquid nuqui nendac.#6.18 Nuquin Papa muatiapimbocquidën tantianubi umbi chiacpadombuen naimbi, quequin chiampid iste bunquin I.T. 23.19bëta Sam.1. 15.29 isbanta. 19Aden nuqui cainaid chieshtoenquio icquin tantiaquin: Ënden aton shubumpin ëquëducquio nëish iua cuessunneshun pichicaquidon chuiquid tapa puduedampicpadombuen Nuquin Papa yacnombo puduedquin nëbi ubi bëdambuen ismequid nec, quequin nuqui Esus tantiec. Aden nuqui cainaid cano dapa uidën uate dapambo iuëmbocquidbimbuecquid nec. Utsi tantienquio nuqui iquendac. 20Adec Esuquidistu ënden Nuquin Papa yacno bëyucanec nidshun abi tantiaquido abi yacno tabadmenuen Nuquin Papa ënenquio icquin bëdambuen ismequid yec nëish iua cuessunneshun pichicaquidon chuiquid tapabimbuecquid yampanëdash. Adquid yec Medquisedecpadquid nibëdantiapimbocquid nepanëdash.#6.20 Medquisedec quequin chiaid iste bunquin Ene. 14.18-20 isbanta.
Currently Selected:
Ebedeo 6: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.