Ebedeo 5

1Nuquin Papambi: Nadoquid icta, cac aton matses bëdambuen ismenuen nëish iua cuessunneshun pichicaquidon chuiquid tapa nuquin matses isadaidbo utsi utsiec icpampic. Adquid Nuquin Papan icmiac: Cun matses icsambuen naquido icshobi ma Nuquin Papan bëdambuen isnu, queshun nëish iua cuessunnequin pichicadednepampic. Adembidi: Mibi bëdambo iquec, Papa, quequin aton matsesën meniaid Nuquin Papa menedednequid nepampic. 2-3Aden aton matses nashunec nëish iua cuessunneshun pichicaquidon chuiquid tapan aton matses: Icsambuen nanu, quenquiocquidëmbi icsambuen naquidbëtan icsambuen nasho isash nëishenquio icquin: Cun matsesbëdi icsambuen naquid nebi, quequin Nuquin Papa bëdambuen ismenuen nëish iua cuessunneshun pichicapanëdash.#5.2-3 D.N.Ch. 16.6 bimbuen nëid dada uapanëdash.

4Abibi Nuquin Papa matses bëdambuen ismenuen nëish iua cuessunneshun pichicaquidon chuiquid tapa icnu, quesa icpampic. Nuquin Papambi: Min matses Ubi bëdambuen ismenuen nëish iua cuessunneshun pichicaquidon chuiquid tapa icta, caid icpampic. Nuquin Papan Adon cuëmëdquidba aden naquid icmepampic. Aid uënësan abi tsibanquid abi tsibanquidquien Nuquin Papan nëish iua cuessunneshun pichicaquidon chuiquid tapa icmedednepampic.#5.4 Buan. 28.1 tantiaquin nëid dada uapanëdash. 5Adembidi Nuquin Papan nëish iua cuessunneshun pichicaquidon chuiquid tapa icmiacbimbuen: Ubi bëdambuen ismequid tapa icta, caid Esuquidistu nepondash. Abibi: Adquid icnu, quenquio Esuquidistu icpanëdash. Aton Papambien:

Mibi Cun Madombo nec.

Nëbi Min Papa nebi,

quequin Esuquidistu chuipanëdash.#5.5 Cuëd. 2.7 tantiaquin nëid dada uapanëdash. 6Adembidi Ambi Chiaid chuiquin dada uamiampid utsi nad iquec:

Matses ubi bëdambuen ismenuen nëish iua cuessunneshun pichicaquid Medquisedecpadquid mibi nendac.

Adquid yec nibëdantiapimbo ictequidquio mibi nendac.#5.6 Ene. 14.17-20 issun chotaquën onqueten Cuëd. 110.4 isbanta.

7Esuquidistu matsesash nidaidën tabadec: Ubi uënës uamequin mëyanquiendac, quequin tantiec shubiquioquin naden chuidonepanëdash: Nadatiambocquid icquin ubi uënës uamenda, Papa, quequin chuidoniaqui: Ai, quenquio icsho Aton Madon naden chiec: Papa, mimbi chiacpadombuen naindambi, quequin abi chuisho tantiashun aton Papan adombuen namepanëdash. 8Nuquin Papan Madombo icshobi mëyanquin natiamiaqui Nuquin Papan chiacpadombuen ënenquio icquin nate tantiabempanëdash. 9Aden tantiabenash matsesën icsambuen naid bedshunash abided cuidadquid icquin matses Nuquin Papan chiacpadombuen naquido Nuquin Papa yacno ënëdenquio icnuc tabadmequid yanquiopanëdash. 10Adquid yanacsho issun: Ubi matses bëdambuen ismenuen nëish iua cuessunneshun pichicaquidon chuiquid tapa Medquisedecpadquid icta, quequin Nuquin Papan Esus chuipanëdash.

IV. NUQUIN PAPA MATSES BËDAMBUEN ISMEQUID ICQUIN ESUQUIDISTUN NATEQUID

(5.11—10.39)

Esus bëdambuen tantiamete chiaid

11Aden Esus Nuquin Papa bëdambuen ismequid nec, quequin tantiamete dadpen chuitiadquio icquimbi daëdpactsëc chiaqui badedquio mibitedishun tantienquio icsho issun abitedi chienquio iquembi. 12Ënden mibi utsin Esus tantiamiaid icquin bëdambuen dadpen tantiabenshun utsibo tantiamequin chuibanquid ictiadquidi mibitedi nec. Padambo icsho mibi padpiden Nuquin Papan Chiaid tantiamequin mimbi badedquio tantiatequid chuibanaqui mimbi baded tantiabenenquio iquec. Adquid yec Bacuëmpin shuma chishquidën pete petiapimbo yacbimbuen Nuquin Papan Chiaid badedquio tantiatiapimbo yaid mibi chiac mimbi tantiatiapimbo iquec. 13Shuma chishquid bacuëmpi: Bëdambuen nata, quequin chiaid tantiesa nec. Adquidbimbuecquid mibi nec. 14Padnuen caniaidën petembo piacbimbuen bëdambuen tantiendac. Adquidën: Naden nac bëdambo ictsiash. Naden nac icsambo ictsiash, quequin tantiaquidquio nendac.

Currently Selected:

Ebedeo 5: mcfNT

Highlight

Copy