Hechos 5

Ananiasbëtan aton chido Sapidan icsambuen naid

1Adnubien dada Ananias cuëmëdquidën aton chido Sapidabëtan aton nidaid menequin piucquid bedpanëdash. 2Bedshun aton chidon isnubi musucshun ambi musucaid utsi dayun uaquimbi Esus chuibennequido yacno nidshun abitedi meniacbimbuen Ananiasën menepanëdash. 3Adnubien Petedon Nuquin Papan Mayan Bëdan tantiamiac naden Ananias chuipanëdash: Mayan Icsa Satanasën tantiamiaid icquin ¿Mitsipaden tantiaquin Nuquin Papan Mayan Bëdan isnubi muaquin abitedi meniacbimbuen ubi musuc menequin nai? 4Mimbi nidaid meniabi icnuc ¿mitsanapenquioda nediosh? Ma mitsana nepaboc. Adecbidi aid menequin piucquid mimbi bedaid ¿mitsanapenquioda nediosh? Ma mitsana nepaboc. ¿Mitsi paden tantiaquin piucquid abitedi meniacbimbuec meniano? Aden bëshun abimbo chienquio icquin ma Nuquin Papambobi mimbi muaquin chuiboc, quepanëdash Petedo. 5Adsho tantiatanequi Ananias uënësec uebudpanëdash. Adsho isash Esus tantiaquidtedi dacuëdcuededpanëdash. 6Uënësacsho issun dashcute cuëshën dataneshun buanshun caniabon chococatampanëdash.

7Bënë chococambic iuec iuecpactsëc ictanec uënësbuedën chido aton bënë uënësaid tantienquio yec chouapanëdash. 8Choacsho issumbien Petedon: Min nidaid menequin ¿nëidtedtsëquida piucquid bedo? caquien: Ai, aidtedtsëqui bedombi, quepanëdash Sapida.

9Adsho tantiashumbien Petedon: ¿Atotsi queshun Nuquin Papan Mayan Bëdan ubi muasho tantiatsiash, quequin tantienquio icquin min bënëbëtambi min piucquid abitedi menianacbimbuec meniano? Nëbi min bënë chococatambued caniabon mibitsen buanendac, quenubi 10Petedon tayumbi uebudec Sapida uënëspanëdash. Aidtsen uënësacsho caniabon puduedquimbi istuidshun aidtsen buanshun aton bënë chococaid dayun chococatampanëdash. 11Adec aid daëdi uënësaid tantiash Esus tantiaquidobëd Esus tantiesabo cumapenec dacuëdcuededpanëdash.#5.1-11 Adembidi Acanën ompoquin icsambuen nasho Nuquin Papan cuidquiopampic. Aid iste bunquin Osue capitudo 7 isbanta.

Bëbëaidtedi bëdanaid

12Adshumbic Esus chuibennequidon nadatiambocquin nabanquin dadpen ismepanëdash. Adnubi Sadomonën Nuquin Papa tabadte shubu dapa cuishubu uampid yacnouësh Esus tantiaquido iccuededpanëdash. 13Adombuen Esus chuibennequidon nabansho isash Esus tantiesabo dacuëdcuededec aidbëd ictiapimbo iquequi: Esus tantiaquido bëdamboshë iquec, quecuededpanëdash. 14Adec tabadequi utsi utsiec dadabëd chidobo Esus tantiaquido dadpenquio yampanëdash. 15Adec Esus tantiaquid yanshun daicsaidobëta nënquido bëbëshun: Petedon datannubi aton sauanën ma bëdanmenu, queshun Petedo choacno aton uetechobi nambededpanëdash. 16Adembidi Edusaden yacno pauequidon daicsaidobëta nënquido bëbënubi mayan icsa dapuduedshun mëyanaido bëbëuapanëdash. Aden bëbëaidtedi bëdampanëdash.

Esus chuibennequido isadaidbon chuiquidon quënën tsadunmiaid

17Adnubien isadaidbo nëish iua cuessunneshun pichicaquidon chuiquid tapambobëd saduseobobëd icquido otacquio tabadbuedi matses dadpen Esus chuibennequido yacno chochosho isash: Ubi yacno adec chochoenquio iccosh, quiash nëishcuededpanëdash. 18Adec nëishcuededshun Esus chuibennequido bedmeshun quënën tsadunmepanëdash. 19Adnubien aid inchëshëmbi Nuquin Papan abëd icquid budmiaidquio choshon shëcuë bëtashaid bëcadoquin abitedi puduenmec: 20Mibi puduenmiombique. Nuquin Papa tabadte shubu dapa tsicatiaidën puduedshun ambo tabadquido Nuquin Papabëd tabadte chuibanuata, cac nidannepanëdash.

21Badiadnuc Nuquin Papa tabadte shubu dapa tsicatiaidën puduedshun quënën tsadunmiacsho puduenmiaido Nuquin Papabëd tabadte chuibanuaic tabadpanëdash. Adnubien nëish iua cuessunneshun pichicaquidon chuiquid tapambo yec abëd icquid yec saduseobo yec isadaidbo tsësiobo yec quenuc chochomiash onquecuededshun: Esus chuibennequido ubitedishun quënën tsadunmebuedo bedtan, cac 22quënën tsadunaido puduennushe. Ista, quequin shëcuë isquido nidshun isaquien Esus chuibennequido nibëdec. Adsho istanec chouaquin chuituidec: 23Shëcuë bëdambuen bëtashquin quënën tsadunaid puduennushe. Ista, caido sondado shëcuë cuëman tabadsho istuidombi. Shëcuë bëcadoash puduedshun isaqui nibëdquio yec puduen puduenaccosh, quepanëdash sondadon chuiquid.

24Aden chuisho tantiash: ¿Mitsipadquidien nechitec? quecuededpanëdash Nuquin Papa tabadte shubu dapa isquidon chuiquidobëd nëish iua cuessunneshun pichicaquidon chuiquid tapabo. 25Adnubien dada utsi choshon: Mibitedishun quënën tsadunmebuedon Nuquin Papa tabadte shubu dapa yacnoshon chuibanuasho tantiombi, capanëdash.

26Adsho tantiashun: Quënën nauedaid puduennushe. Ista, quequin isquidon chuiquidën ambi namiaidobëd nidshun bedtanquin bëuapanëdash. Matsesën cuënoten ubi sesenushe, queshun mëyanenquio icquin Esus chuibennequido bëuapanëdash.

27Aden bëquin chuiquido chuinanec tabadte shubu nuntan chuiquido iccuededacno iuedpanëdash. Aden iuedsho issun nëish iua cuessunneshun pichicaquidon chuiquid tapanquio naden chuipanëdash: 28Esus chuibennenda, caqui Esus chuibanquin Edusaden yacnocquidtedi mimbi tantiamebanec. Adoquimbi: Chuiquidon Esus chieshënquin uënës uamepondash, quequin mimbi umbi naid chuibanec, quepanëdash. 29Adsho tantiashun Petedobëtan Esus chuibennequidon naden chuipanëdash: ¿Matsesën: Nata, caidoda ubitedi nedi? Nuquin Papanquio: Nata, caido icquin Aidën chiacpadombuen naimbi. 30Esus mibitedishun cueste napotiaidën dectanquin uënës uamiondaid nuquin tsusedpabon Papa campid Nuquin Papambien uincuenmepaccondash. 31Aden uincuenmeshun aton dayun abiucquio tsadmequin abitedishun Icbombo icmeshun abi yacno matses puduedmequidquio Esus icmepanëdash. Aden nabanaid tantiash isadaidbo ma aidquio tantiaquid icpanuna. Adsho issun ma aidon icsambuen naid tantienquio yec Nuquin Papa bëshumpanuna. 32Esusën nabansho ubitedishun ispondambi. Adembidi uënësash uincuenacsho isondambi. Adembidi aton Mayan Bëdan tantiec. Esus tantiaquido icquin ambi chiacpadombuen nasho Nuquin Papan aton Mayan Bëda menendac, quepanëdash Petedo.

Camadiedën chuiquid utsibo chiaid

33Aden Petedon chuisho tantiash chuiquid tapabo nëishquiec: Icsamboshë iquec, quiash Esus chuibennequido cuessunnete bumpanëdash. 34Adnubien isadaidbo utsi padiseobo Nuquin Papan Moises dada uamiampid chuibanquin tantiamequid utsibon bëdambuen isaid icquin Camadied cuëmëdquidën: Chiata. Nuquiuidtsëqui onquenun Esus chuibennequidotedi umanuc buantan, cac 35buanan naden chuipanëdash: Cun matses isadaidbo, icsambuen namane, queshun bëdambuen tantiaquioshon nata. 36Ëndenquio Teudas cuëmëdquid icpanëdash. Aidëmbi: Chuiquid tapa icnu, quequin chuisho tantiash dada dadpen 400ted abëdi capupanëdash. Teudas cuessunniacsho isash aidbëd icbuedtedi uanno uannoec nidanniash isadenquio yampanëdash. 37Adnubien iuecshun matses tambante caid uëshën tambannuc utsi Udas cuëmëdquid nidaid Cadidea yacnocquid yec ambo icquidobëd capuec aidon chuiquid nepanëdash. Adec capushobi Udastsen cuessunian aidbëd icquidtedi padpidec chochoenquio yec abi maisi niquepanëdash. 38Tantia. Bëdambuen chuinu. Umanuc buambuedon chuiquid quënën tsadunmenda. Aidbëd icbuedo mishenda. Cuessunnemenda. Aidën chuibanaidbëtabi ambi naid matsesën naiduidtsëqui icnuc badedquio ënëdendac. 39Padnuen Nuquin Papan namiac aidon chuisho mimbi ënmetiapimbo iquendac. Nuquin Papan cumapenen cuidnushe. Nidmeta, quequin Camadiedën chiac: Adonona, queshun: 40Buambuedo bedtan, cac bëacsho cueshcanten cacuesmepanëdash. Aden cacuesmetanquin: Esus chuibanuainda, quequin chuitanquin puduenmepanëdash. 41Puduenmiac: Nuquin Papan namiacpaden Esus chuibansho mëyanac bëdambo iquebi, quec cuishonquecuededpanëdash. 42Adshumbic badiadquidën badiadquidënquien Nuquin Papa tabadte shubu dapa tsicatiacnoshon puduedshun matses tantiamequin Chiaid Bëda naden chuibampanëdash: Nuquin Papan Chomiaidquio Quidistu quequin Mesias caid Esus nec, quepanëdash. Adec chiannec shubun shubunquiec puduedcuennequin adembidi chuibampanëdash.

Currently Selected:

Hechos 5: mcfNT

Highlight

Copy