Hechos 6
6
Niante nashunquid dada 7ted istuidaid
1Adashic badiadquidën badiadquidënquiec Esus tantiaquid dadpenquio yannubi isadaidbo quidiecon onquetenuidi onquequido cumapenec nadec cuëdcuededec: Cun matses niantebo badiadquidën badiadquidënquien pete daëdpactsëc menequimbi min matsesën onquetenuidi onquequid chidobo pete dadpen mimbi menepacboc, quepanëdash. 2Adoaquien Esus tantiaquid abitedi abi yacno chochomiash Esus chuibennequido 12ted nadpanëdash: Niante chedo nashunnuen Nuquin Papan Chiaid chuibanquin ëntiapimbo iquebique. 3Niante chedo nashunquid icta, canuen dada 7ted nadquidquio istuidta. Nuquin Papan Mayan Bëdan tantiamiac bëdambuec tabadsho mimbi bëdambuen isaidquio istuidshun: Niante chedo nashunquin menequid icta, cata. 4Aidtedi niante nashunquid icnubi ubitedishun Nuquin Papa chiannendambi. Adembidi Nuquin Papan Chiaid chuibennendambi, quepanëdash Esus chuibennequido.
5Adoaquien: Mimbi bëdambuen chioc, quepanëdash Esus tantiaquidotedi. Aidon chiacpadombuen nëidtedi niante nashunquid icmepanëdash. Nëidic Nuquin Papan Mayan Bëdan tantiamiaidquio icquin: Ambi chiacpadombuen Nuquin Papan naindac, quequin tantiaquidquio Esteban cuëmëdquid. Utsibic Uedipe. Utsibic Podocodo. Utsibic Nicanod. Utsibic Timon. Utsibic Padmenas. Utsibic isadaidpembo iquequi isadaidbo tanquid Antioquia yacnoshon tishaid Nicodas cuëmëdquid. 6Aidtedi istuidshun buanec Esus chuibennequido yacno choash puduedshun ismiac aid dada 7tedi mamishquin Nuquin Papa chiec: Nëidtedi niante bëdambuen nashunmeta Papa, quequin Esus chuibennequidon chuipanëdash.
7Adshun Edusaden yacnoshon Esus chuibennequidon Nuquin Papan Chiaid chuibennesho tantiash utsi utsiec Esus tantiaquid dadpen yampanëdash. Adecbidi isadaidbo nëish iua cuessunneshun pichicaquido dadpen bëdambuen tantiash Esus tantiaquido yampanëdash.
Esteban bedaid
8Adnubien Nuquin Papan Mayan Bëdan cumapenen tantiamiaidquio icquin Estebanën nadatiambocquin nabanquin matses dadpen ismebampanëdash. 9Aden nadatiambocquin naquin ismiaqui bëdambuen tantienquio yec utsibo nëidtedi yacnocquido cumapenec cuëdcuededpanëdash. Nëidic Nuquin Papan Chiaid chuibante shubun puduedquido iua iccondaidi iuapenquio yanaido. Nëidic shubu dadpen icquid Sidene yacnouësh choquido. Utsibic shubu dadpen icquid Adejandedia caid yacnouësh choquido. Utsibic nidaid cuëshë Sidisia caid yacnouësh choquido. Utsibic nidaid cuëshë Asia caid yacnouësh choquido. Aidtedi Edusaden yacno chochoash tabadquin Esteban chiec: Icsambuen mimbi chiec, quequin chuibededpanëdash. 10Adoaquien Esteban Nuquin Papan Mayan Bëdan bëdambuen tantiamiaid yec bëdambuec onquesho aidon ënmetiapimbo icpanëdash. 11Onquequin ënmetiapimbocquin utsibo piucquid meniac naden aidon chuipanëdash: Estebanën nuquin tsusedpa Moisesën dada uampidbëta Nuquin Papa icsambuen chuishunsho tantiombi, quequin muaquimbi matses dadpen chuibampanëdash. 12Aden chiac chuiquido yec Moisesën dada uampid tantiamequido yec isadaidbo utsibotedi yec quec nëishcuededshun Esteban bedshun isadaidbon chuiquid tapabo iccuededacno buanshun iuedquin ismepanëdash. 13Ashunquio dada utsibo chiec: Muaquin chuita, cabuedon naden chuibededpanëdash: Nëid dadan Nuquin Papa tabadte shubu dapabëta Nuquin Papan Moises dada uamiampid ënenquio icquin muaquin icsambuen chuishunosh. 14Naden Estebanën chioshe. Tantia: Nasaded yacno iccondaid Esus caidën Nuquin Papa tabadte shubu dapa chic chiquendac. Adembidi nuquin tsusedpa Moisesën: Naden nata, quequin dada uaquin chiampid utsi uaquin namenu, quequid nec, quequin Estebanën chuibanosh, quequin muaquin chuipanëdash. 15Aden muaquin chuiquin naimbudnubi chuiquid tapabobëtan utsibon Esteban bëisac Nuquin Papabëd icquidën bëtantete isadacbimbuec aton bëtantete uëshëbimbuec chënquesho bëisbededpanëdash.
Currently Selected:
Hechos 6: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
