Hechos 4
4
Uambëta Petedo aton matsesën chuiquidon chuimiaid
1Aden Uambëtan Petedon chuibannubien isadaidbon chuiquido nëidtedi chochopanëdash. Nuquin Papa ismequin nëish iua cuessunneshun pichicaquidon chuiquido yec Nuquin Papa tabadte shubu dapa yacnoshon isquid sondadon chuiquido yec saduseobo yec quec chochopanëdash. 2Naden chuisho tantiash nëishquiopanëdash: Esus uënës uacsho Nuquin Papan uincuenmiacpadembi matsestsen uënësacsho uincuenmeuaindac, quequin Petedobëtan Uanën chuibansho tantiash adec nëishcuededpanëdash. 3Adshun Petedobëta Uan bedash: Inchësheque. Nëbi chuimetiapimbo iquebi. Badiadshun nëidën chiaid tantianush nidnunid, quianec nidshun Uambëta Petedo quënën tsadunmepanëdash isadaidbon chuiquidon. 4Aden bedabi icquin Uambëtan Petedon chuibansho tantiash Esus tantiaquido yansho dadauidtsëqui tambanac 5 midted yampanëdash.
5Adashic badiadash isadaidbon chuiquido yec chuiquid utsibo tsësiobo yec Moisesën chiampid tantiamequido yec quec Edusaden yacno chochoash onquec iccuededpanëdash. 6Auëshquiobidi onquec iccuedednuec nëidtedi chochopanëdash. Nëidic nëish iua cuessunneshun pichicaquidon chuiquid tapambo daëd Anasbëd Caipas. Nëidic aton shubun icquido abipadquid Uan utsibëd Adejando. Aidtedi chochoash onquec iccuededpanëdash. 7Ambo iccuededquimbi Uambëta Petedo chomeshun aidon nënantanquio nidtomeshun: ¿Tsuntsin namiac caputiapimbocquid bëdanmio? ¿Tsutsi tantiaquin nao? capanëdash.
8Adoaquien Petedo Nuquin Papan Mayan Bëdan cumapenen tantiamiac nadpanëdash: Cun matses chuiquidobëta isadaidbon chuiquido tsësiobo icsho mibitedi chuinu. Tantia. 9Caputiapimbocquid tantiaquin bëdanmiaid isec: ¿Mitsipaden bëdanmepash? ¿quecta mibitedi tabadpe? 10Tantia, isadaidbotedi, nëid dada caputiapimbocquid Esuquidistu Nasaded yacno iccondaidën nadatiambocquin bëdanmiaid nec. Aidi mibitedishun cueste napotiaidën dectanquin uënës uamiacsho Nuquin Papan uincuenmiaidën bëdanmiac nëid caputiapimbocbuedi nëbi nidtoash capusho mimbi isec. 11Aid bëdanmequid mimbi tantienquio iquec. Shubu uaquidën buintad bëdamboshëcquidi isuidacbimbuen mimbi Esus tantienquio iquec. Utsibombien aid buintad isuidaidi bedshun bëdambuenshë shubu uaquid. Adoacbimbuen mimbi: Icsambo iquec, caidi Nuquin Papan matses bëdambuen isquin bëdambo icmequidquio Esus icmiac.#4.11 Chotaquën onqueten dada uaid iqueque. Cuëd. 118.22 isbanta. 12Abi yacno iuedanquid aid abentsëqui icnuc utsi nibëdec. Nuquin Papa yacno tabadte bunec aid tantiaquid icta, quepanëdash Petedo Uambëd.
13Adec Uambëd Petedo dacuëdenquio yec cumapenec onquesho tantiash tantiadempambo yec tabadec: Aid daëdi chuiquidpenquio iquequi adecbidi Nuquin Papan Chiampid ismiabicquid iquequi Esusbëd ictennedo aid daëdien nechitec, quequin tantiec chuiquido tabadpanëdash. 14Aden ambi bëdanmebuedbëdi tabadsho isash: Icsambuen mimbi naoc, quequin chuitiapimbo yec chuiquido tabadpanëdash. 15Adshun Petedobëta Uan umanuc nidmiash chuiquido nadec onquecuededpanëdash: 16¿Mitsipadombuen aid daëdi natiad? Nadatiambocquin nasho Edusaden yacnocquidtedishun ma tantiabededpaboc. Ad icnuc: Caputiapimbocquid bëdanmiambo iquec, ubitedi quetiapimbo iquec. 17Dadpenshun tantianushe, queshun: Padpiden Esus chuibanuainda. Cuidmechitomane, quequin aid daëdi chuinuna, quecuededpanëdash chuiquido. 18Adshumbic Petedobëta Uan chomeuashun: Padpiden Esus chuibanuainda. Aidën chiaid chuiquin utsibo tantiamenda, capanëdash chuiquidon.
19Adoaquien Petedobëtan Uanën: ¿Mitsicquidën chiaid umbi natequid icpec? ¿Nuquin Papan Chiaid niacquindambi mimbi chiacpaden nape? 20Umbi isbuedbëta umbi tantiabued chuitequidquio nec. Aidi chuibanquin ëntiapimbo iquebi, quepanëdash Petedobëd Uan. 21-22Adoaquien: Umbi chiacpaden nainquiocsho issun mibi daëdi mëyanmetsiambique. Baded nidec nid, capanëdash chuiquidon. Ambi dada caputiapimbo icbuedi bëdanmiaidën seta 40ted icpanëdash. Aid bëdanmiacsho isash utsibo: Nuquin Papa bëdamboshë iquec, quec cuëdëncuededpanëdash. Adsho tantiash Petedobëta Uan cuesmete bunquimbi adometiapimbo yec tabadpanëdash chuiquido.
Petedobëtan Esus tantiaquidon Nuquin Papa chianniaid
23Chuiquidon nidmiac nidash Esus tantiaquido iccuededacno choec puduedshun aton matses chuiquidon: Cuessunnenu, quequin abi chuibued Uambëtan Petedon chuipanëdash. 24Adoac abentsëc onquiacbimbuen Esus tantiaquidon naden Nuquin Papa chuibededpanëdash: Cun Icbombo mibi nec. Abubëta nidaid acte chedo uashun aidën icquidtedimbo mimbi uapampic.#4.24 Nëid chiacbimbuen chiaid utsi iste bunquin Buan. 20.11bëta Nem. 9.6 ista. 25Ëndenquimboshë mimbi tantiacpaden min Mayan Bëdan tantiamequin oncamiac cun tsusedpa Dabidën naden chuiquin dada uapampic:
¿Atotsi quiash ubi dëniactiapimbo icquidobi isadaidpembo cumapenec nëishash ubi dëniacte buncuededpec?
Adecbidi ¿atotsi quiash Umbi Chomiaid icsambuen mëyanmenuec isadaidbo abembi onqueuapec?
26Chuiquid tapabobëd chuiquid utsibo Umbi Chomiaid Quidistu
aton Icbobi chieshënquin mëyanmenuec onquecuededec, quequin mimbi dada uamepampic.#4.25-26 Cuëd. 2.1-2 tantiaquin nëid chedo dada uapanëdash.
27Aden chiaid mimbi Dabid dada uamiampicpadembi nëbi Edusaden yacno isadaidpembon chuiquid daëd Edodesbëd Ponsio Pidato aton matsesbëd icnubi isadaidbo chedo iccuededquin Mimbi Chomiaid icsaisambo Esus mimbi Mesias icmiaid chieshënquin uënës uamenuec onqueuapanëdash. 28Mimbi ëndenquimbo tantiampicpadembi Esusded uënës uamepondash, Papa. 29Adquid icquin nëbi Uambëta Petedo chushcasho mimbi tantioc. Cuesambocquid ubitedi icmequin mimbi chiaidquio ubitedi chuibanmeta, Papa. 30Icsaisa icquin Esusën nadatiambocquin nabanquin nënquidotedi bëdanmiondacpaden aid tantiaquid icsho ubitsen nadatiambocquin name Papa, quepanëdash Esus tantiaquido Nuquin Papa chuibededec.
31Aden chuiquin ënnubi abi iccuededacno ishcudishcudpanëdash. Adec ishcudnuc ambocquidtedi Nuquin Papan Mayan Bëdan cumapenen tantiamiaido yampanëdash. Adshun dacuëdenquio icquin Nuquin Papan Chiaid chuibampanëdash.
Shubu abentsëquën tabadacbimbuec tabadaid
32Aden chuibanequi shubu abentsëquën tabadacbimbuec tabadec Esus tantiaquido dadpenquio: Cunauidtsëqui nec, quenquio yec menenampanëdash. Adecbidi: Abitedishuna nec, quec tabadcuededuapanëdash. 33Adec tabadsho Nuquin Papan Mayan Bëdan tantiamiac Esus chuibennequidon: Esuquidistu uincuenacsho isondambi, quequin chuibennepanëdash. Adsho issun Nuquin Papan abitedi bëdamboshë icmepanëdash. 34Adembidi aton nidaid icquidën utsin utsinquien aton nidaid menequin piucquid bedshun Esus chuibennequido menepanëdash. Adembidi aton shubu icquidën utsin utsinquien aton shubu menequin piucquid bedshun ambi bedaidtedi menepanëdash. 35Aden meniac atona nibëdquid icsho issun Esus chuibennequidon menebanac bunenquio yec tabadpanëdash. 36Adecbidi tsusedpa Debin tsiuecquid acte utsi nënantanquio nidaid nacnëdquid Chipide caid yacnoshon tishaid Edusaden yacno choash Ose tabadpanëdash. Aidi: Utsibo shubisho issun bëdambo icmequid nec, quequin Bednabe cuëmpanëdash Esus chuibennequidon. 37Aidëmbi aton nidaid menequin piucquid bedshun ambi bedaidtedi Esus chuibennequido meneuapanëdash.
Currently Selected:
Hechos 4: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.