Uan 1 3
3
1Tantia. Chuinu. Abi tantiaquido icsho nuqui tantiaquioquin Nuquin Papan: Cun bacuëbo nec, caidombo nuqui nendac. Adoaido icquin: Adquid nebi, quequin nuqui tantiec. Adquid icsho Nuquin Papa tantiesabon nuqui tantienquio iquendac. 2Cun utsibo, Nuquin Papan: Cun bacuëbo nec, quequin tantiaidombo nuquitedi nec. Adquid icshobi Nuquin Papan nëbi: Nadquid icmendambi, quesho tantiabi nuqui iquec. Naden nuqui tantiec: Esuquidistu nidaidën padpidec chouasho isash: Adquidshenda caposh, quequin nuqui isquin tantiendac. Aden isash aidpadquid nuqui yanendac. 3Adquid yantequid nebi, quequin caimbudec Esuquidistu icsambuen nainquio yec tabadondacpadquiec nuqui icsambuen nainquio yec tabadendac.
4Icsambuen naic tabadquidoen Nuquin Papan Chiaid niacquido nendac. Ma Icsambuen naid Nuquin Papan Chiaid niacte neyoc. 5Adquid icnuc Esuquidistu matsesash nuqui icsambuen nabanaidtedi bedshunec abided cuidadec uënëspanëdash, quequin mibitedishun tantiec. Adembidi icsambuen naisambo Esuquidistu nec, quequin mibitedishun tantiauaic. 6Adec Esus tantiaquido iquec aidbëd abentsëc yacbimbuec tabadquidën ambi icsambuen naidtedi ënendac. Padnuen icsambuen nabanquidon Esus tantiabenabicquin Ambi Chiaid tantienquio iquendac.
7Cun bacuëbobimbuecquido icsho umbi tantiaido mibi neque. Utsibon mibitedi muaquin chienquio icpashun. Naden tantiata. Nuquin Papan: Naden nac bëdambo ictsiash, caid tantiaquin nabanec bëdambocquid iquec Esuspadquid mibi iquendac. 8Padnuen ënenquiocquin icsambuen nabanquido Mayan Icsa Satanasën namiaido nec. Ënden Nuquin Papan abitedi uabi icnubi Mayan Icsa Satanasën tauaquin icsambuen nampid yequi abi icsambuen namequid nec. Aidën namiaido matses icsho isash Nuquin Papan iuabo icmequin Mayan Icsa Satanas bedshunnuec Nuquin Papan Madombo Esus chopanëdash.#3.8 Satanas quequin chiaid utsi utsien iste bunquin nëidtedi isbanta. Nëidic Ene. 3.1-7. Nëidic Mat. 4.1-11. Nëidic E.U.I. 12.7-9. Aidtedi isbanta. 9Nuquin Papan: Cun bacuëbo nec, caido icquin ambi icsambuen naid abi nabantiapimbo iquendac. Nuquin Papan aton Mayambëd tabadmiaido yec icsambuen naic tabadtiapimbo iquendac. 10Nuquin Papan: Cun bacuëbo nec, caido adquid nec, quequin nuqui tantiec. Adembidi Mayan Icsa Satanasën namiaidotsen nuqui tantiauaic. Nuquin Papan Chiaid niacquidën utsibo tantienquiocquido Nuquin Papan: Cun bacuëbo nec, caido ictiapimbo iquendac.
Esuquidistu tantiaquido utsibobëd tantianante chiaid
11Ënden bedanquin chuisho mimbi tantianëdaid nad iquec: Esuquidistu tantiaquid yec Esus tantiaquid utsibobëd tantiananquionona, quequin mibitedi chuipanëdash. 12Ëndenquimbo aton utsimbobi chieshënquid Cain icpampic. Aidpadquidpenquio icnuna. Mayan Icsa Satanasën tantiamiacpaden aton utsibi cuessunnepampic. ¿Atotsi queshun cuessunnepampic? Aton utsin bëdambuen nasho issun nëishtanquin icsambuen naquid icquin cuessunnepampic.#3.12 Cainën aton utsi cuessuniampid iste bunquin Ene. 4.1-8 isbanta.
13Tantia, cun utsibo, umbi tantiaido icsho mibi chuinu. Nuquin Papa tantiesabon Esus tantiaquid icsho mibi chieshënendac. Adoac: ¿Atotsi queshun ubi chieshëmpec? quequin tantienda. 14Cuidadtequido icbuedëmbi Esuquidistu tantiaquid yec tantiananquin naden nuqui tantiendac: Adec tantiananquid yec Nuquin Papabëd tabadtequid nebi, quequin nuqui tantiendac. Utsibobëd tantiananesa yec uënësacbimbuec tabadquidoen Nuquin Papan cuidtequido nendac. 15Padnuen abëtan Esus tantiaquid chieshënquid aton utsibi cuessunnequidbimbuecquid nec. Adec cuessunnianquid Nuquin Papabëd tabadtiapimbo iquendac, quequin nuqui tantiec.
16Adquid icnuc utsibobëd tantiananec tabadte nuqui tantiec. Esuquidistu nuquitedi tantiaquiec abided cuidadec uënëspanëdash. Adecbidi nuquibëtan Esus tantiaquido caic: Cuessunnenu, casho issun: Padi, ubiquien cuessunne, canuna. 17Aton piucquid dadpen icquidën abëtan Esuquidistu tantiaquidëna nibëdquiocsho isec: Cun utsi menenu, quenquio icquid Nuquin Papan matses tantiacpadombuen matses tantienquio icquid nec. 18Cun bacuëbobimbuecquido icsho umbi tantiaido mibi neque. Utsibo tantiaquin nashunquid nebi, quec onqueuidequi onquenda. Utsi tantiembi, quequin mimbi tantiacpadombuen aid tantiaquin nashunquin ismeta. 19Adec utsibo nashunquid icquin: Nuquin Papan abimbo chuiquidën namiaid nebique. Ubi cuidenquio iquendac, quequin tantiaquin dacuëdenquio icquin Nuquin Papa nuqui chiannendac. 20Aden chiannequid iquequi: Icsambuen nachitombi, quequin tantiaquid icshobi Nuquin Papan abitedimbo tantiaquidquio icquin icsambuen naisabimbuecnuc mibi bëdambuen isendac. Adoac Nuquin Papa dacuëdënenquio icquin chiannequid nuqui iquendac.
21Tantia, cun utsibo, umbi tantiaido icsho mibi chuinu. Icsambuen nëbi nambo iccombi, quequin abimbo tantiaquid icquin dacuëdenquio icquin Nuquin Papa nuqui chiannendac. 22Aden: Umbi chiacpadombuen ubi nashun, quequin chianniac nuqui nashunendac. Ambi chiacpadombuen naquin abi bëdambo icmiac Nuquin Papan nuqui chianniacpaden nuqui nashunendac. 23Nadembidi Nuquin Papan Chiaid nuqui tantiondac: Cun mado Esuquidistu tantiata. Aden tantiabenash aidën chiacpadec utsibobëd tantiananta, quequin chiaid nuqui tantiec. 24Aden ambi chiacpadombuen naquidbëd abentsëc yacbimbuec Nuquin Papa iquec. Adecbidi matses Nuquin Papabëd abentsëc yacbimbuecbidi icuaic, quequin Nuquin Papan aton Mayan meniaid nuquibëd icquin nuqui abimbo chiaid tantiamec.
Currently Selected:
Uan 1 3: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.