Roma 12

Topẽ mỹ ẽg vẽnh fẽg ke mũ

1Inh kanhkã', Topẽ vỹ ãjag jagãgtãn. Hã kỹ sóg ãjag mỹ: “ti mỹ vẽnh fẽg,” he mũ. Kỹ tóg ẽg tỹ ti mỹ nén ũ pũn ri ke nĩ, ẽg tỹ ti mỹ vẽnh fẽg kỹ. Judeu ag vỹ ag mẽg tãnh kỹ pũn tĩ. Ag jãvo ẽg tóg ẽg rĩnrĩr nỹtĩn kỹ ti mỹ vẽnh fẽg tĩ. Gen kỹ ãjag tóg Topẽ jykre han ke mũ. 2Ẽprã ke ag jykre han sór tũg nĩ. Topẽ vỹ ãjag krĩ tãg han sór mũ. Kỹ ãjag tóg nén há han ki kanhró nỹtĩnh mũ. Vẽjykre kuryj han jé ãjag tóg ke mũ. Kygnẽnh ke tũ ãjag tóg nĩ. Tag ve sór tóg mũ, Topẽ ti. Tag hã to tóg ẽg kanhrãn ke mũ.

3Ha vé, Topẽ vỹ isar han, kỹ sóg ãjag jyvẽn há han ki kanhró nĩ. Hã kỹ sóg ãjag kar mỹ tag tó mũ. Vẽsỹ ũn mág han sór tũg nĩ. “Tỹ inh ũn mág nĩ,” he tũg nĩ, ã tỹ tỹ ũn mág tũ nĩn kỹ. Ẽg kar vỹ Topẽ ki ge kỹ nỹtĩ. Kỹ tóg ẽg kar tỹ nén ũ to tar han tĩ, ẽg kar tỹ ti rãnhrãj han jé. Tag to jykrén kỹ jagnẽ to é he tũg nĩ.

4Ẽg há to jykrén nĩ. Ti ki nỹtĩ vỹ e nỹtĩ, ẽg pẽn, ẽg nĩgnó, ẽg kanẽ, ẽg nĩgrẽg, ti kar ti. Ẽg há ki nỹtĩ vỹ jagnẽ kóm rãnhrãj nỹtĩ kar nỹtĩ, vyr mỹ. 5Ge ẽg nỹtĩ gé. E ẽg nỹtĩ. Hã ra ẽg tóg ẽg tỹ Cristo ki ge kỹ nỹtĩn kỹ ẽg há ri ke nỹtĩ. Kỹ ẽg tóg jagnẽ ki rĩr ke mũ sir, ẽg há ki nỹtĩ tỹ jagnẽ ki rĩr tĩ ẽn ri ke. 6Hã ra ũ tóg nén ũ han há nĩgtĩ. Kỹ ũ tóg nén ũ ũ han há nĩgtĩ gé, Topẽ tỹ to ẽg tar han kỹ. Ẽg kã mĩ ũ mỹ tóg: “ag jyvẽn nĩ,” he tĩ, Jesus ti. Kỹ Topẽ tỹ ã mỹ nén tó mũ hã tỹ ẽg jyvẽn nĩ. 7Ẽg kã mĩ ũ mỹ tóg: “ũn jagãgtar ag jagãgtãn nĩ,” he ti gé. Ti tỹ ã mỹ tag tó kỹ ẽg jagãgtãn há han to tar nĩm nĩ. Ẽg kã mĩ ũ mỹ tóg: “inh vĩ kãmén nĩ,” he tĩ gé. Kỹ to krónh ke tũg nĩ. 8Ẽg kã mĩ ũ mỹ tóg: “ag mỹ ag tỹ nén han ke mũ kãmén nĩ,” he tĩ gé. Kỹ ã rãnhrãj tag ki rĩr há han nĩ. Ẽg kã mĩ ũ mỹ tóg: “ã tỹ nén ũ nĩm mág nĩ, inh mỹ,” he tĩ gé. Kỹ ón kỹ ti mỹ nĩm sór tũg nĩ. Ẽg kã mĩ ũ mỹ tóg: “culto to pã'i vỹ tỹ ã nĩ,” he tĩ gé. Ã tỹ tỹ to pã'i nĩn kỹ to jykrén há han nĩ. Ẽg kã mĩ ũ mỹ tóg: “ag jagãgtãn nĩ,” he tĩ gé. Kỹ ti tỹ ã mỹ ã tỹ ẽg jagãgtãn ke tag tó kỹ to mỹ sér nĩm nĩ. Ẽg tỹ jagnẽ ki rĩr to ken hã vẽ.

9Jagnẽ to há tãvĩ nỹtĩm nĩ. Ón kỹ jagnẽ to há nỹtĩ sór tũg nĩ. Vẽjykre pãno to kórég tãvĩ nỹtĩm nĩ, kỹ tovãnh kãn nĩ. Vẽjykre há hã mĩ mũm nĩ. 10Jagnẽ to há tãvĩ nỹtĩm nĩ, ãjag tỹ ãjag mré pafa mũ ag to há ri ke nỹtĩm nĩ, jagnẽ to. Jagnẽ mỹ komẽr hã vĩm nĩ, ẽg tỹ pã'i mỹ komẽr hã vĩ ẽn ri ke. 11Topẽ jykre to krónh ke tũg nĩ. Ti tỹ ãjag mỹ: “tag han ra,” he to jẽnjẽr nỹtĩ tũg nĩ gé. To vãsãn nĩ. Ti kuprĩg tỹ ãjag mỹ nén tó mũ ẽn han nĩ. Kỹ tóg ãjag mỹ sér tĩnh mũ. Ẽg Senhor tũ han nĩ. 12Topẽ vỹ ẽg mỹ nén ũ há kar han ke mũ. Tag to mỹ sér nỹtĩm nĩ. Kejẽn ãjag tóg nén ũ jagy venh ke mũ, ti tugnĩn. Hã ra to krónh ke tũg nĩ. Topẽ mré vẽmén kỹ nỹtĩm nĩ. 13Ãjag mré Topẽ ki rã ũ jagtar nĩn kỹ ti jagãgtãn nĩ. Ũ tỹ ãjag to pasa kỹ ti mỹ: “inh mré nĩ,” hem nĩ.

14Kejẽn ũ tóg ãjag vóg kónãn sór mũ. Ẽn to Topẽ mỹ: “ti jagãgtãn nĩ,” hem nĩ. Ti to: “ti vóg kónãn nĩ,” he tũg nĩ. 15Kejẽn tóg ũ mỹ sér tĩ. Kỹ ti mré mỹ sér nỹtĩm nĩ gé. Kejẽn ũ tóg fỹ tĩ. Kỹ ti mré fỹm nĩ gé. 16Jagnẽ mré vẽjykre pir hã han nĩ, hã vỹ: jagnẽ to há, he mũ. Vẽsỹ ũn mág han sór tũg nĩ. Tỹ ũn kãsir ag mré ke nỹtĩm nĩ. “Ag mré ke vỹ tỹ inh nĩ,” hem nĩ, ũn kãsir ag to. Hẽn ri ke mũn ãjag kã mĩ ũ tóg vẽnh kanhrãn mág to tar nĩ, ãjag kãfór. Ti jé: “ag kãfór inh nĩ, vẽnh kanhrãn mág ja tag to,” he tũg.

17Kejẽn ũ tóg ãjag mỹ nén ũ kórég han tĩ. Ge ra ti mỹ nén ũ há hã han nĩ. Vẽnh kar mỹ vĩ há tãvĩ han nĩ, ũ tỹ ãjag to: “kygnẽ ti huri,” he tũ nĩ jé. 18Vãsãn nĩ, ãjag tỹ ũ to krĩ rỹ han tũ nĩ jé, ãjag tỹ vẽnh kar to krĩ kuprã nỹtĩ jé.

19Inh kanhkã, ũ tỹ ãjag mỹ nén ũ kórég han mũ ra vẽnh kajãm sór tũg nĩ. Topẽ hã tóg ti to jũnh ke mũ. Hã kỹ tag vỹ rán kỹ nĩ, ha mẽ: “inh hã ne ãjag kajãm ke mũ'. Inh hã ne ag mỹ ven ke mũ', ag tỹ ag jykre kórég to jagãgtar ke ti, he tóg, ẽg Senhor ti,” he ja tóg nĩ, Topẽ vĩ tỹ rán kỹ nĩ ki. 20Kỹ ũ tỹ ãjag kato tẽ mũ mỹ nén ũ há kar han nĩ. Ti kókĩr nĩn kỹ ti mỹ vẽjẽn ven nĩ. Ti hãghã kỹ ti mỹ goj ven nĩ. Gen kỹ ã tóg ti mỹ'a han ke mũ, ha vem nĩ, ã tỹ ti to há nĩn kỹ, ti tỹ ã to kórég nĩ ra. 21Vẽnh jykre há to krónh ke tũg nĩ. Kỹ ẽg tóg tỹ vẽjykre pãno tỹ tũ' henh ke mũ, ẽg tỹ ũn kuryj mĩ mũn kỹ.

Currently Selected:

Roma 12: kgp

Highlight

Copy