Roma 11

Judeu'krẽ pipir ag vỹ tỹ Topẽ tũ nỹtĩ

1Kỹ ãjag hỹn: “kỹ Topẽ mỹ ti povo tỹ Israel tovãnh kãn kỹ nĩ?“ he sór mũ, ãjag tỹ inh carta tag ve kỹ. Vó, ag tovãnh kãn tũ ti nĩ. Ha vé, tỹ sóg Judeu nĩ gé, hã ra sóg ti ki rã. Abraão krẽ'krẽ ũ vỹ tỹ inh nĩ gé, ti kósin'kósin tỹ Benjamim krẽ'krẽ ũ mỹr. 2Isovãnh ja tũ ti nĩ, Topẽ ti, hã kỹ tóg ti povo tovãnh kãn ja tũ nĩ. Nén kar han tũg ki tóg ẽg kuprẽg ja nĩ, ẽg tỹ tỹ ti tũ nỹtĩ jé.

Elias to jykrén nĩ. Ti kãme tóg rán kỹ nĩ, Topẽ vĩ rá ki. Elias tỹ ga kri tĩ mũ ẽn kã Judeu ag tóg Topẽ kato tẽ mũ. Kỹ ag tóg Elias kato tẽ mũ gé, ti tén jé. Kỹ tóg Topẽ mỹ: 3“Senhor',” he mũ. “Ã vĩ tó tĩ ag kãgtén kãn ag huri. Ã mỹ pũn jafã kókén kãn ag huri ke gé. Inh pir mỹ sóg kren, kỹ ag tóg vãhã isén sór mũ ha ke gé. Ã tovãnh kãn kỹ ag nỹtĩ,” he ja tóg nĩ, Elias ti, Topẽ mỹ, Judeu ag to. 4Hã ra Topẽ tóg ti mỹ: “krĩ kufy han tũg nĩ,” he mũ. “Ũ tỹ 7 mil (ke) vỹ ki nỹtĩ, ũ tỹ isovãnh tũ ag, sỹ ũn kuprẽg ja ag. Tag ag vỹ vẽnh kãgrá tỹ topẽ tỹ Baal mỹ: “Topẽ vỹ tỹ ã nĩ,” he ja tũ nĩ,” he ja tóg nĩ, Topẽ ti, Elias mỹ.

5Ge ti nĩgtĩ, ũri. Pir ag nỹtĩ, Judeu tỹ Topẽ to há nỹtĩ ag. Topẽ vỹ ẽg jagãgtãn, kỹ tóg ẽg kuprẽg. Hã kỹ ẽg tóg ti to há nỹtĩ, ẽg pipir nỹtĩ ra, ẽg tỹ tỹ Judeu nỹtĩn kỹ. 6Ẽg tỹ vẽsóg ki han pijé'. Ẽg tỹ vẽsóg ki to vãsãn pijé'. Topẽ tỹ ẽg jagãgtãn hã vẽ, hã kỹ tóg tó ja nĩ.

7Ge ti nĩ, ha mẽ. Judeu ag vỹ ve sór ja nĩgtĩ, Topẽ tỹ ẽg mỹ nén ũ há ven ke ẽn ti. Hã ra ag tóg venh ke tũ nĩ. Topẽ tỹ ũn kuprẽg mũ ag hã mỹ tóg ven tĩ. Jãvo ũ ag tóg kutu nỹtĩ sir, ag tỹ Topẽ vĩ mẽ jãvãnh nỹtĩn kỹ. 8Hã kỹ tag tóg rán kỹ nĩ, Judeu ag to, ha mẽ: “Topẽ vỹ ag krĩ tũ han, hã kỹ ag tóg ti vĩ rá vég mũ ra to jykrén tũ nĩgtĩ. Mẽg tũ ag nĩgtĩ, ag nĩgrẽg ra. Ũri ag tóg gen kỹ nỹtĩnh mũ ver,” he ja ti nĩ, Topẽ vĩ rán ki. 9Kỹ Davi vỹ Judeu ag to tag tó ja nĩ gé, ha mẽ: “Topẽ mỹ ag tóg fénhta han tĩ. Hã ra ag tóg ón kỹ ti mỹ fénhta han tĩ. Kỹ ag tóg to sigse kỹ nỹtĩnh mũ. Kỹ tóg ag vóg kónãn ke mũ, Topẽ ti. Krenkren ke tũ ag tóg nĩ. 10Kutu ag nỹtĩ, to jykrén ke tũ pẽ ag nĩ, kỹ ag tóg vẽjykre kufy hã venh ke mũ, hã to ag jagtar nỹtĩnh mũ,” he ja tóg nĩ, Judeu ag to, Davi ti.

Judeu ag to é henh ke tũ ẽg tóg nĩ

11Kỹ ãjag hỹn inh mỹ: “kỹ Topẽ mỹ Judeu ag tỹ nũgme ki vár ke tag ve sór mũ? Hã jén mỹ ag mỹ Jesus jẽnẽ ja nĩ, ag tỹ ti tỹ prãnh ke jé?“ he sór mũ. Vó. Hã ra ag tóg Topẽ kato tẽgtẽ tĩ. Ti vĩ mranh ja ag tóg nĩgtĩ, hã kỹ Topẽ tóg fóg ag mré kanhgág ag krenkren han sór mũ, Judeu ag tỹ ag ve kỹ ti ki ge to én jé, fag ke gé. 12Kỹ Judeu ag tỹ ti vĩ mranh kỹ Topẽ tóg fóg mré kanhgág kar to há nĩ. Kỹ Judeu ag vỹ jagtar nỹtĩ. Ag nỹtĩg ja ki ũ ag tóg Topẽ tỹ ag to há nĩ vég mũ. Há ti nĩ, tag. Kỹ tóg Topẽ tỹ Judeu ag to há' he mãn ra ga kri mũ kar mỹ hapẽ tãvĩ tĩnh mũ vẽ. Hã ra tóg ag to há tũ nĩ ver.

13Kỹ sóg fóg ag mỹ, kanhgág ag mỹ: “ãjag apóstolo vỹ tỹ inh nĩ, sỹ ãjag mỹ Topẽ vĩ tó jé,” he mũ. Inh rãnhrãj vỹ inh mỹ sér pẽ tĩ. 14Isỹ ãjag mỹ Topẽ vĩ tó kỹ inh mré ke ag vỹ hẽn ri ke mũn ãjag kóm Jesus ki ge sór mũ gé, kỹ ag krenkren ke mũ sir, Judeu ag. 15Ha vé, Topẽ tỹ inh mré ke ag tovãnh to tóg povo ũ ag to há nĩ ha. Ag to jũ mãn tũ tóg nĩ sir. Topẽ tỹ Judeu ag to há' he mãn mũ ra tóg vẽnh kar mỹ há tãvĩ tĩnh mũ vẽ. Kỹ vẽnh kar vỹ rĩnrĩr mãn ke mũ vẽ, ũn kãgter mũ ag mré hã. Hã ra tóg ag to há tũ nĩ ver.

16Ẽmĩ to jykrén nĩ. Ẽmĩ kupar ko há nĩn kỹ tóg ko há kar nĩ. Ge ti nĩgtĩ gé, ka ti. Ti jãre há nĩn kỹ ka vỹ há kar nĩ. Judeu ag vỹ tag ri ke nỹtĩ. Ag jógjóg ve ag vỹ ka jãre ri ke nỹtĩ. Topẽ mỹ ag há nỹtĩ ja nĩgtĩ. Hã kỹ ag krẽ vỹ Topẽ mỹ há nỹtĩnh ke mũ gé. 17Povo tỹ Israel vỹ ka tỹ Oliveira há ri ke nỹtĩ. Ti jãre vỹ há nĩ. Hã ra ti pẽ ũ tóg kórég nỹtĩ. Hã kỹ Topẽ tóg kykym kỹ vãvãm mũ. Ti tỹ Judeu kórég ag tugvãnh to ken hã vẽ. Ka pẽ kórég tag nỹtĩg ja ki tóg ka ũ pẽ vin. Ãjag hã vẽ sir, ãjag tỹ tỹ fóg nỹtĩn kỹ, kanhgág ke gé. 18Kỹ Judeu ag to é he sór tũg nĩ, Topẽ tỹ ag vãm mũ ra, ẽg tỹ ka pẽ kórég vãm ri ke. Ag nỹtĩg ja ki ãjag nỹtĩ. Hã ra ka jãre vỹ tỹ Judeu ag jógjóg ve nỹtĩ. Ãjag jógjóg ve pijé', fóg pijé', kanhgág pijé'. Judeu ag vẽ.

19Hẽn ri ke mũn ãjag tóg inh mỹ: “hã ra tóg Judeu ag vãm, ẽg to há nĩ jé,” he sór mũ. “Hã kỹ tóg ẽg to há nĩ,” he ãjag hỹn mũ. 20Hỹ, ag vãm tóg. Hã ra ag tóg ti ki ge jãvãnh ja nỹtĩgtĩ, hã kỹ tóg ag vãm. Jãvo tóg ãjag to há nĩ, ãjag tỹ ti ki ge to. Hã kỹ ag to é he sór tũg nĩ. Topẽ kamẽg nĩ mỹr. 21Judeu ag tỹ ti ki ge jãvãnh tugnĩn tóg ag vãm. Ag jagãgtãn jãvãnh tóg nĩ ha. Kỹ tóg ãjag jagãgtãn ke tũ nĩ gé, ãjag tỹ ti ki ge to tar tũ nỹtĩn kỹ. Hã kỹ ti hã kamẽg nĩ.

22Hã ki Topẽ tỹ tỹ ũn há nĩ tóg ve há tĩ, hã ra tóg ũ ag vóg kónãn jagy han tĩ gé. ũ tỹ ti vĩ mranh mũ ag. Hã ra tóg sir ãjag to há nĩ, ãjag tỹ ti tovãnh tũ nĩn kỹ. Ãjag tỹ ti tovãnh kỹ tóg ãjag vãm ke mũ gé, ha vem nĩ. 23Judeu ag tỹ ti ki ge kỹ tóg ag to há nĩ mãn ke mũ gé sir. Kỹ tóg ẽg tỹ ka pẽ kym kỹ ki jógon mãn ẽn ri ke nĩ sir. 24Ha vé, ãjag hã vỹ tỹ ka kanẽn vãnh pẽ ri ke nỹtĩ'. Hã ra tóg ẽg tỹ ka pẽ kym kỹ ki jógon ẽn ri ke han, hã vỹ: Judeu ag tỹ Jesus ki ge, he mũ. Ẽg pijé ka kanẽn vãnh pẽ tỹ ka kanẽn há ki vin tĩ'. Ka pẽ tỹ ẽg tỹ kym kỹ ki jógon mãn tag vỹ jagy tũ nĩ vẽ. Hã kỹ tóg Topẽ mỹ jagy tũ tĩ, ti tỹ Judeu ag to há nĩ mãn kỹ.

Topẽ tỹ Judeu ag krenkren han sór

25Isỹ ãjag mỹ nén ũ kãmén sór vẽ, ãjag tỹ mẽ ja tũ ũ, ha mẽ, ãjag tỹ Judeu ag to é he tũ nĩ jé. Ha vé, Judeu ũ ag vỹ ver mẽ sór tũ nĩgtĩ. Ũ ag tóg mẽ sór mũ. Kejẽn vẽnh kar tóg hã ra mẽ kãn ke mũ, fóg ag kar, kanhgág ag kar ke gé, Judeu ag kar ke gé. 26Ẽn kã Judeu tỹ mẽg mũ ag tóg krenkren ke mũ gé. Hã kỹ tag tóg ag to rán kỹ nĩ, ha mẽ: “ag krenkren han tĩ vỹ jun ke mũ. Jerusalém tá tóg vẽnh ven ke mũ. Ẽn vỹ Jacó krẽ ag tỹ inh vĩ mranh ja ẽn tỹ vẽnh pãte fón ke mũ,” he tóg. 27“Sỹ ag mré jykrén jan hã vẽ. Ag tỹ inh vĩ mranh tỹ sóg tũ' he mũ,” he ja tóg nĩ, Topẽ vĩ rán ki, Judeu ag to. 28Jesus kato tẽ ag tóg mũ ver. Ti kãme sér mẽ jãvãnh ag nỹtĩ ver. Hã kỹ ãjag tóg ag nỹtĩg ja ki Topẽ vĩ sér mẽg mũ. Hã ra ag jógjóg ve ag vỹ Topẽ to há nỹtĩ ja nĩgtĩ. Hã kỹ Topẽ tóg ag krẽ'krẽ to há nĩnh ke mũ gé kejẽn, ti tỹ vãsỹ ag kuprẽg ja nĩn kỹ. 29Topẽ tỹ ũ to há nĩn kỹ tóg ti to há nĩ. Ti tỹ ũ kuprẽg kỹ tóg kuprẽg kỹ jẽ gé. Tỹ tũ' henh ke tũ tóg nĩ, Topẽ ti.

30Vãsỹ ãjag tóg Topẽ vĩ ki kagtĩg ja nỹtĩgtĩ gé. Hã ra Topẽ tóg ũri ãjag jagãgtãn, ãjag tỹ ti ki ge jé, Judeu tỹ ti vĩ mranh mũ ag nỹtĩg ja ki. 31Kỹ ẽn ag tóg ti vĩ mranh mũgtĩ ver, Topẽ tỹ kar kỹ ag jagãgtãn jé, ti tỹ ũri ãjag jagãgtãn ri ke. 32Kỹ Topẽ tóg ẽg kar mỹ ẽg tỹ ti vĩ mranh mũ tag ven kãn sór mũ, ẽg tỹ to jykrén mãn jé. Ti tỹ ẽg jagãgtãn sór vẽ, ẽg tỹ ti ki ge jé. Hã jé tóg ẽg mỹ ẽg tỹ ti vĩ mranh mũ ven sór mũ.

Topẽ jykre tỹ ẽg jykre kãfór nĩ

33Topẽ vỹ tỹ ũn mág pẽ nĩ, mỹr, ha mẽ. Ti jykre vỹ vẽnh kar kri nĩ kar nĩ. Ve kãn jãvãnh ẽg nỹtĩ. Nén ũ kar ki kanhró ti nĩ mỹr, nén ũ kar to jykrén há han ti tĩ mỹr. Ti tỹ nén to jykrén mũ ve kãn ke tũ pẽ ẽg nĩ. “Ti hỹn hẽ ri ken kỹ tag han?“ henh ke tũ ẽg tóg nĩ gé. To jykrén kórég ẽg tóg nỹtĩ. 34Ũ nỹ Topẽ tỹ nén to jykrén mũ ki kanhró nĩ'? Ki kagtĩg kar ẽg nỹtĩ. Ũ nỹ Topẽ mỹ: “tag han ra, tag han tũg ra,” he tĩ'? Ũ vỹ ti jyvẽn ke tũ pẽ nĩ. 35Ũ nỹ ti mỹ nén ũ nĩm', Topẽ tỹ ti mỹ kajãm jé'? Nén kar vỹ tỹ ti tũ nỹtĩ mỹr. Hã kỹ tóg ẽg hã mỹ nén ũ kar nĩm tĩ, ẽg jagãgtãn kỹ. 36Topẽ hã ne nén kar hynhan'. Ti hã jamẽn kỹ ẽg tóg nỹtĩ. Nén ũ kar vỹ ti jamẽn kỹ nỹtĩ gé. Hã kỹ ẽg tóg ti hã mỹ vĩ há han ke mũ. To krónh kenh ke tũ ẽg nĩ, ga kri, kanhkã tá ke gé. Hã vẽ.

Currently Selected:

Roma 11: kgp

Highlight

Copy