San Mateo 18

Li nim xcuanquil, aꞌan aj cꞌanjel chiru li ras ri̱tzꞌin

1Saꞌ li cutan aꞌan queꞌcuulac lix tzolom riqꞌuin li Jesús ut queꞌxye re: —¿Ani li kꞌaxal nim xcuanquil saꞌ lix nimajcual cuanquilal li Dios?— 2Ut li Jesús quixbok jun li chꞌina al riqꞌuin ut quixxakab chiruheb. 3Ut quixye reheb: —Relic chi ya̱l tinye e̱re cui incꞌaꞌ te̱jal e̱naꞌleb ut cui incꞌaꞌ kꞌunak e̱chꞌo̱l joꞌ li chꞌina al aꞌin, incꞌaꞌ tex-oc saꞌ lix nimajcual cuanquilal li Dios. 4Joꞌcan nak li ani narecꞌa nak ma̱cꞌaꞌ xcuanquil joꞌ li chꞌina al aꞌin, aꞌan li kꞌaxal nim xcuanquil saꞌ lix nimajcual cuanquilal li Dios. 5Ut li ani ta̱cꞌuluk re junak chꞌina al joꞌ aꞌin saꞌ incꞌabaꞌ chanchan ajcuiꞌ nak la̱in xinixcꞌul. 6Ut li ani ta̱poꞌok xchꞌo̱leb li toj kꞌuneb xchꞌo̱l li nequeꞌpa̱ban cue, kꞌaxal raj us chokꞌ re aꞌan nak ta̱cutekꞌ saꞌ xchamal li palau chi bacꞌbo junak nimla pec chixcux. 7Tokꞌob ruheb li cuanqueb saꞌ ruchichꞌochꞌ xban nak cuan cꞌaꞌ re ru napoꞌoc re lix chꞌo̱leb. Ac chꞌolchꞌo nak cuan li cꞌaꞌru napoꞌoc chꞌo̱lej. Abanan raylal cha̱lel saꞌ xbe̱n li ani ta̱yoꞌoba̱nk re li cꞌaꞌ re ru ta̱poꞌok chꞌo̱lej.

Chetzꞌekta̱na li yibru naꞌleb li naqꞌuehoc e̱re chi ma̱cobc

8Cui la̱ cuok malaj ut la̱ cuukꞌ ta̱qꞌuehok a̱cue chixba̱nunquil li cꞌaꞌru incꞌaꞌ us, us raj cui ta̱yocꞌ ut ta̱tzꞌek. Kꞌaxal us chokꞌ a̱cue nak cua̱nk la̱ yuꞌam chi junelic riqꞌuin jun ajcuiꞌ la̱ cuok ut la̱ cuukꞌ chiru nak tatxic chi cuib la̱ cuok chi cuib la̱ cuukꞌ saꞌ li xbalba bar cuiꞌ incꞌaꞌ ta̱chupk li xam. 9Cui li xnakꞌ a̱cuu ta̱qꞌuehok a̱cue chixba̱nunquil li incꞌaꞌ us, us raj cui ta̱cuisi ut ta̱tzꞌek. Kꞌaxal us nak ta̱cua̱nk la̱ yuꞌam chi junelic riqꞌuin jun ajcuiꞌ li xnakꞌ a̱cuu chiru nak tatxic riqꞌuin cuib li xnakꞌ a̱cuu saꞌ li xam re li xbalba.

Li carner sachenak

10La̱in ninye e̱re cheqꞌuehak retal me̱tzꞌekta̱na junak reheb li kꞌuneb xchꞌo̱l saꞌ lix pa̱ba̱l xban nak eb aꞌan cꞌacꞌalenbileb xbaneb li ángel, li cuanqueb riqꞌuin lin Yucuaꞌ cuan saꞌ choxa. 11La̱in li Cꞌajolbej quincꞌulun arin saꞌ ruchichꞌochꞌ chixcolbaleb li sachenakeb saꞌ li ma̱c. 12¿Cꞌaꞌru nequecꞌoxla la̱ex chirix li naꞌleb aꞌin li oc cue xyebal e̱re? Cuan ta junak li cui̱nk cuan oꞌcꞌa̱lak (100) xcarner ut cui ta̱sachk junak reheb, ¿ma incꞌaꞌ raj tixcanabeb li bele̱laju roꞌcꞌa̱l (99) chic ut ta̱xic chiruheb li tzu̱l chixsicꞌbal li jun li xsach? 13Relic chi ya̱l tinye e̱re nak tixtau chak li sachenak, kꞌaxal ta̱sahokꞌ saꞌ xchꞌo̱l riqꞌuin li jun aꞌan chiruheb li bele̱laju roꞌcꞌa̱l li incꞌaꞌ queꞌsach. 14Joꞌcan ajcuiꞌ le̱ Yucuaꞌ cuan saꞌ choxa incꞌaꞌ naraj nak ta̱sachk junak reheb li toj kꞌuneb xchꞌo̱l saꞌ lix pa̱ba̱l.

Tento takacuy xma̱queb li kas ki̱tzꞌin

15Cui junak la̱ cuech aj pa̱banelil ta̱ma̱cobk cha̱cuu, ayu riqꞌuin ut nak cua̱nkex e̱junes, ta̱chꞌolob chiru lix ma̱c. Ut cui ta̱rabi li xnaꞌleb li ta̱qꞌue, la̱at xatenkꞌa la̱ cuech aj pa̱banelil re nak tixcꞌam rib saꞌ usilal a̱cuiqꞌuin. 16Cui ut incꞌaꞌ naraj nacatrabi, cꞌam jun malaj cuib li herma̱n a̱cuochben re nak riqꞌuin li ra̱tin cuib oxib chi testigo, ta̱chꞌola̱k ru chixjunil li a̱tin. 17Ut cui incꞌaꞌ naraj ta̱rabiheb aꞌan, ta̱ye re li iglesia re nak li herma̱n teꞌxchꞌolob xya̱lal chiru. Ut cui incꞌaꞌ ajcuiꞌ naraj abi̱nc chiruheb aꞌan, aꞌan chic ta̱cua̱nk che̱ru joꞌ chanchan li ma̱cuaꞌak aj pa̱banel ut chanchanak laj titzꞌol toj li incꞌaꞌ us nequeꞌxba̱nu. 18Relic chi ya̱l tinye e̱re nak chixjunil li cꞌaꞌru te̱cꞌu̱b ru saꞌ xya̱lal saꞌ ruchichꞌochꞌ, li Dios tixcꞌu̱b ajcuiꞌ ru saꞌ choxa. Li cꞌaꞌru te̱ye us arin saꞌ ruchichꞌochꞌ, li Dios tixye ajcuiꞌ nak us. Ut li cꞌaꞌru te̱ye incꞌaꞌ us, li Dios tixye ajcuiꞌ nak incꞌaꞌ us. 19Tinye e̱re cui cuan cuibak saꞌ e̱ya̱nk teꞌxcꞌu̱b ru saꞌ cuibal chirix cꞌaꞌru teꞌtijok cuiꞌ, ut teꞌxtzꞌa̱ma chiru lin Yucuaꞌ cuan saꞌ choxa, li cꞌaꞌru teꞌxtzꞌa̱ma ta̱qꞌuehekꞌ reheb. 20Yalak bar cua̱nkeb cuib oxib chꞌutchꞌu̱keb saꞌ incꞌabaꞌ, aran ajcuiꞌ cua̱nkin la̱in saꞌ xya̱nkeb aꞌan, chan li Jesús. 21Ut laj Pedro quia̱tinac ut quixye re li Jesús: —Ka̱cuaꞌ, ¿jarub sut ta̱ru̱k tincuy xma̱c li ta̱ma̱cobk chicuu? ¿Ma tento nak cuukub sut tincuy xma̱c?— 22Ut li Jesús quixye re: —Incꞌaꞌ ninye a̱cue nak caꞌaj cuiꞌ cuukub sut ta̱cuy xma̱c. Tinye ban a̱cue nak ta̱cuy xma̱c cuukub sut chi laje̱tk xca̱cꞌa̱l sut (70), chan.

Li jaljo̱quil ru a̱tin chirix laj cꞌanjel li incꞌaꞌ quiraj xcuybal xma̱c li rech aj cꞌanjelil

23Lix nimajcual cuanquilal li Dios tinjuntakꞌe̱ta riqꞌuin jun li rey quixbir rix lix cꞌaseb laj cꞌanjel chiru. 24Nak quixtiquib xbirbal rix lix cꞌaseb, quicꞌameꞌ chak chiru li rey jun li cui̱nk laje̱b mil talentos#Saꞌ li versículo 18:24 cuan li a̱tin “talento”. Saꞌ eb li cutan aꞌan, li talento aꞌan jun li tumin kꞌaxal terto xtzꞌak. Na-oc cuakib mil (6,000) denarios saꞌ xtzꞌak jun chi talento. lix cꞌas. 25Ut xban nak ma̱cꞌaꞌ cꞌaꞌru cuan re li cui̱nk aꞌan re tixtoj cuiꞌ lix cꞌas, joꞌcan nak li rey quixtakla xcꞌayinquil aꞌan rech xxiquic li rixakil, ut li ralal xcꞌajol ut chixjunil li cꞌaꞌru cuan re, re xtojbal lix cꞌas. 26Ut laj cꞌanjel aꞌan quixcuikꞌib rib chiru li rey ut quixpatzꞌ xcuybal chiru ut quixye re: —Ka̱cuaꞌ, china̱cuy cuan chic caꞌchꞌinak, ut la̱in tintoj chixjunil lin cꞌas cha̱cuu.— 27Ut li rey quiril xtokꞌoba̱l ru laj cꞌanjel chiru. Quirachꞌab ut quixsach li retalil lix cꞌas. 28Ut nak qui-el chak laj cꞌanjel riqꞌuin li rey, quixcꞌul jun li rech aj cꞌanjelil cuan oꞌcꞌa̱l (100) denarios#Saꞌ li versículo 18:28 cuan li a̱tin “denario”. Saꞌ eb li cutan aꞌan, jun denario aꞌan xtzꞌak lix tojbal jun laj cꞌanjel chiru li jun cutan (Mat. 20:2). lix cꞌas riqꞌuin li cui̱nk aꞌan. Ut laj cꞌanjel, li quicuyeꞌ xma̱c, quixchap chi xcux li jun li cuan xcꞌas riqꞌuin ut qui-oc chixyatzꞌbal ut quixye re: —Toj la̱ cꞌas, chan. 29Ut li rech aj cꞌanjelil quixcuikꞌib rib chiru, quixpatzꞌ xcuybal ut quixye re: —China̱cuy cuan chic caꞌchꞌinak ut la̱in tintoj ajcuiꞌ chixjunil lin cꞌas, chan re. 30Abanan li jun incꞌaꞌ quiraj xcuybal xma̱c. Co̱ ban ut coxqꞌue chak saꞌ tzꞌalam toj retal quixtoj rix lix cꞌas. 31Nak eb li rech aj cꞌanjelil queꞌril li cꞌaꞌru quixba̱nu, cꞌajoꞌ nak queꞌrahoꞌ saꞌ xchꞌo̱l. Ut queꞌchal coleꞌxchꞌolob chiru li rey chixjunil li cꞌaꞌru quicꞌulman. 32Tojoꞌnak quibokeꞌ cuiꞌchic laj cꞌanjel li quicuyeꞌ xma̱c xban li rey. Ut li rey quixye re: —At tzꞌekbe̱tal aj cꞌanjel, chixjunil la̱ cꞌas xinsach retalil xban nak xapatzꞌ a̱cuybal chicuu. 33¿Ma incꞌaꞌ raj xru xatokꞌoba ru la̱ cuech aj cꞌanjelil joꞌ nak xintokꞌoba a̱cuu la̱in? chan. 34Cꞌajoꞌ nak quipoꞌ li rey ut quixkꞌaxtesi saꞌ rukꞌeb laj ilol tzꞌalam toj retal quixtoj chixjunil lix cꞌas. 35Ut joꞌcaꞌin ajcuiꞌ tixba̱nu e̱re la̱ex lin Yucuaꞌ cuan saꞌ choxa cui incꞌaꞌ te̱cuy xma̱queb le̱ ras e̱ri̱tzꞌin chi anchal e̱chꞌo̱l che̱junju̱nkalex, chan li Jesús.

Currently Selected:

San Mateo 18: kek

Highlight

Copy