San Mateo 19

Li Jesús quixye nak incꞌaꞌ naru teꞌxjach rib li sumsu̱queb

1Ut nak quirakeꞌ chixyebal li a̱tin aꞌin, li Jesús qui-el Galilea ut co̱ jun pacꞌal li nimaꞌ Jordán saꞌ eb li naꞌajej xcue̱nt Judea. 2Ut quita̱ke̱c xbaneb li qꞌuila tenamit ut nabaleb li yaj quixqꞌuirtesiheb aran. 3Cuanqueb laj fariseo queꞌcuulac chi patzꞌoc riqꞌuin yal re xyalbal rix ut queꞌxye re: —¿Cꞌaꞌru nacaye la̱at? ¿Ma ta̱ru̱k tixjach rib li cui̱nk riqꞌuin li rixakil yal riqꞌuin cꞌaꞌak re ru?— 4Quichakꞌoc li Jesús ut quixye reheb: —¿Ma incꞌaꞌ e̱rilom li tzꞌi̱banbil saꞌ li Santil Hu nak li Dios quiyoꞌobtesin chak re li cristian saꞌ xticlajic, cui̱nk ut ixk nak quixyoꞌobtesiheb chak? 5Joꞌcan nak li cui̱nk tixcanab xnaꞌ xyucuaꞌ ut tixlakꞌab rib riqꞌuin li rixakil. Ut chi xcabichaleb junajakeb aj chic. 6Joꞌcan nak moco cuibakeb ta chic. Junajakeb aj ban chic. Joꞌcan ut nak li ani naxlakꞌab li Dios, ma̱ ani chic naru najachoc re, chan. 7Ut queꞌxye cuiꞌchic re li Jesús: —¿Cꞌaꞌut nak quixye laj Moisés nak ta̱ru̱k xyi̱banquil junak li hu re nak tixjach rib li cui̱nk riqꞌuin li rixakil?— 8Li Jesús quichakꞌoc ut quixye: —Xban nak kꞌaxal cau e̱chꞌo̱l, joꞌcan nak laj Moisés quixsume che̱ru nak ta̱ru̱k te̱jach e̱rib riqꞌuin le̱ rixakil. Aban moco joꞌcan ta chak saꞌ xticlajic nak li Dios quixyoꞌobtesiheb li cristian. 9Ut la̱in tinye e̱re nak yalak ani tixcanab rixakil chi ma̱cuaꞌ xma̱c yumbe̱tac, ut tixcꞌam jalan chic ixk, li jun aꞌan tixmux ru lix sumlajic. Ut li ani tixcꞌam chokꞌ rixakil li ixk li canabanbil, li jun aꞌan tixmux ajcuiꞌ ru lix sumlajic, chan li Jesús. 10Ut eb lix tzolom queꞌxye: —Cui ya̱l nak joꞌcan ta̱cꞌulma̱nk, kꞌaxal us raj nak incꞌaꞌ tixsicꞌ rixakil li cui̱nk, chanqueb. 11Ut li Jesús quixye reheb: —Moco chixjunileb ta nequeꞌxcꞌul xchꞌo̱l li a̱tin aꞌin, caꞌaj cuiꞌ li ani qꞌuebil re xban li Dios re xtaubal ru lix ya̱lal aꞌin. 12Cuanqueb cui̱nk chalen saꞌ xyoꞌlajiqueb ac reheb nak incꞌaꞌ teꞌcua̱nk rixakil, ut cuanqueb yal pokꞌbileb xbaneb li rech cui̱nkilal re incꞌaꞌ teꞌcua̱nk rixakileb, ut cuanqueb cuiꞌchic yal incꞌaꞌ nequeꞌxcꞌul xchꞌo̱leb nak teꞌxcꞌam rixakil xban nak nequeꞌxkꞌaxtesi rib chi cꞌanjelac chiru li Dios. Li ani ta̱ru̱k tixtau ru lix ya̱lal aꞌin, chixtauhak ru, chan li Jesús.

Li Jesús quirosobtesi li cocꞌal

13Ut chirix chic aꞌan cuanqueb cocꞌal queꞌcꞌameꞌ chak riqꞌuin li Jesús re nak tixqꞌue li rukꞌ saꞌ xbe̱neb ut ta̱tijok. Ut eb lix tzolom queꞌxkꞌus li queꞌcꞌamoc chak reheb li cocꞌal. 14Nak li Jesús quiril li yo̱queb chixba̱nunquil, quixye reheb lix tzolom: —Canabomakeb chi cha̱lc cuiqꞌuin li cocꞌal. Me̱ram chiruheb xban nak lix nimajcual cuanquilal li Dios, aꞌan reheb li kꞌuneb xchꞌo̱l joꞌ li cocꞌal, chan. 15Ut li Jesús quixqꞌue li rukꞌ saꞌ xbe̱neb ut quitijoc. Ut chirix aꞌan qui-el saꞌ li naꞌajej aꞌan.

Jun cui̱nk biom quia̱tinac riqꞌuin li Jesús

16Ut quicuulac jun li cui̱nk riqꞌuin li Jesús ut quixye re: —At cha̱bil tzolonel, ¿Cꞌaꞌ raj ru us tinba̱nu re nak tincue̱chani li junelic yuꞌam? chan. 17Ut li Jesús quixye re: —¿Cꞌaꞌut nak nacaye cha̱bil cue cui incꞌaꞌ nacanau anihin? Jun ajcuiꞌ li cha̱bil cuan ut aꞌan li Dios. Cui ta̱cuaj nak ta̱cua̱nk la̱ yuꞌam chi junelic ba̱nu li cꞌaꞌru naxye li chakꞌrab.— 18Ut li cui̱nk quixye: —¿Cꞌaꞌru li chakꞌrab li nacaye?— Ut li Jesús quixye re: —Ma̱camsi a̱cuas a̱cui̱tzꞌin. Matmuxuc caxa̱r. Mat-elkꞌac. Matkꞌaban. 19Cha-oxlokꞌi la̱ naꞌ a̱yucuaꞌ ut chara la̱ cuas a̱cui̱tzꞌin joꞌ nak nacara a̱cuib la̱at, chan. 20Ut li cui̱nk quichakꞌoc ut quixye: —At tzolonel, chixjunil aꞌin xinba̱nu chalen chak saꞌ incaꞌchꞌinal. ¿Cꞌaꞌ chic ru ma̱jiꞌ ninba̱nu?— 21Quixye li Jesús re: —Cui ta̱cuaj nak tzꞌakalak re ru la̱ yuꞌam, ayu ut cꞌayi li cꞌaꞌru cuan a̱cue ut si lix tzꞌak li ta̱cꞌul reheb li nebaꞌ. Ut ta̱cua̱nk a̱biomal saꞌ choxa. Ut nak ac xaba̱nu aꞌan tatcha̱lk ut tina̱ta̱ke, chan li Jesús re. 22Ut nak quirabi aꞌan, li cui̱nk co̱ chi ra saꞌ xchꞌo̱l xban nak nabal lix biomal cuan. 23Tojoꞌnak quixye li Jesús reheb lix tzolom: —Relic chi ya̱l tinye e̱re, kꞌaxal chꞌaꞌaj chokꞌ re junak biom nak ta̱oc rubel xcuanquil li Dios. 24Tinye ajcuiꞌ e̱re nak incꞌaꞌ raj chꞌaꞌaj nak ta̱numekꞌ junak nimla xul camello saꞌ ru junak cu̱x chiru nak ta̱oc junak biom rubel xcuanquil li Dios. 25Ut eb lix tzolom nak queꞌrabi aꞌan, cꞌajoꞌ nak queꞌsach xchꞌo̱l ut queꞌxye: —¿Ani put ta̱ru̱k ta̱colekꞌ? chanqueb. 26Ut li Jesús quixcaꞌyaheb ut quixye reheb: —Chiru junak yal cui̱nk aꞌan ma̱min ta̱ru̱k, abanan chiru li Dios chixjunil naru xba̱nunquil. 27Quichakꞌoc laj Pedro ut quixye re: —La̱o xkacanab chixjunil li cꞌaꞌru cuan ke xban a̱ta̱kenquil. ¿Cꞌaꞌru ta̱cua̱nk ke?— 28Ut li Jesús quixye reheb: —Relic chi ya̱l tinye e̱re nak la̱in li Cꞌajolbej tincꞌojla̱k saꞌ lin lokꞌlaj cꞌojariba̱l saꞌ li acꞌ ruchichꞌochꞌ, la̱ex li xexta̱ken cue, texcꞌojla̱k ajcuiꞌ saꞌ li cablaju chi cꞌojariba̱l re texrakok a̱tin saꞌ xbe̱neb li cablaju xte̱paleb laj Israel. 29Li ani naxcanab rochoch, ras ri̱tzꞌin, xnaꞌ xyucuaꞌ, rixakil, ralal xcꞌajol, malaj xchꞌochꞌ saꞌ incꞌabaꞌ la̱in, li jun aꞌan kꞌaxal cuiꞌchic nabal li tixcꞌul chiru li quixcanab ut ta̱re̱chani li junelic yuꞌam. 30Ut nabaleb li nequeꞌxsicꞌ xcuanquil anakcuan, mokon ma̱cꞌaꞌak chic xcuanquileb. Ut li ani incꞌaꞌ nequeꞌxsicꞌ xcuanquil anakcuan, aꞌaneb chic li teꞌcua̱nk xcuanquil mokon, chan li Jesús.

Currently Selected:

San Mateo 19: kek

Highlight

Copy