Efesios 4
4
Saꞌ xcꞌabaꞌ li Cristo junajo chic la̱o aj pa̱banel
1La̱in cuanquin chi pre̱xil xban xyebal resil li Ka̱cuaꞌ Jesucristo. La̱in xintijoc che̱rix ut anakcuan nintzꞌa̱ma che̱ru nak cha̱bilak le̱ yuꞌam joꞌ xcꞌulubeb li ralal xcꞌajol li Dios. 2Checubsihak e̱rib ut chexcua̱nk saꞌ tu̱lanil ut cha̱bilakex. Checuyak e̱rib chi ribil e̱rib ut cherahak e̱rib chiribil e̱rib. 3Junajak chic e̱ru xban li Santil Musikꞌej. Joꞌcan nak qꞌuehomak e̱chꞌo̱l chi cua̱nc saꞌ usilal chi ribil e̱rib re nak chexcua̱nk chi junaj e̱ru. 4La̱o li ralal xcꞌajol li Dios chanchan nak jun chi tzꞌejcualej nak cuanco ut jun ajcuiꞌ li Santil Musikꞌej naberesin ke. Jun ajcuiꞌ li kama̱tan li nakayoꞌoni saꞌ comonil, la̱o li sicꞌbil ku. 5Jun ajcuiꞌ li Ka̱cuaꞌ cuan ut jun ajcuiꞌ li kapa̱ba̱l cuan ut jun ajcuiꞌ li cubi haꞌ nakacꞌul saꞌ xcꞌabaꞌ li Cristo. 6Jun ajcuiꞌ li Dios cuan ut aꞌan li kaYucuaꞌ chikajunilo. Aꞌan li cuan saꞌ kabe̱n chikajunilo. Aꞌan li nacꞌanjelac saꞌ li ka̱m chikajunilo ut aꞌan ajcuiꞌ li cuan kiqꞌuin chikajunilo. 7Abanan jalan jala̱nk li kalokꞌlaj ma̱tan li naqꞌueheꞌ ke chikaju̱nkal xban li Cristo, aꞌ yal chanru naraj aꞌan. 8Aꞌin qui-uxman joꞌ tzꞌi̱banbil saꞌ li Santil Hu, li naxye chi joꞌcaꞌin:
Nak quitakeꞌ saꞌ choxa li Ka̱cuaꞌ, quixcꞌutbesi nak aꞌan kꞌaxal nim xcuanquil saꞌ xbe̱n laj tza joꞌ ajcuiꞌ saꞌ xbe̱neb li nequeꞌcꞌanjelac chiru. Ut li Ka̱cuaꞌ quixqꞌue xma̱taneb li ralal xcꞌajol. (Sal. 68:18)
9¿Cꞌaꞌru xya̱lal nak naxye nak li Ka̱cuaꞌ quitakeꞌ saꞌ choxa? Naraj naxye nak xbe̱n cua quicube takꞌa saꞌ li ruchichꞌochꞌ. 10Quicube saꞌ ruchichꞌochꞌ ut quitakeꞌ ajcuiꞌ toj saꞌ li Santil Choxa re nak ta̱cua̱nk xcuanquil saꞌ xbe̱n chixjunil saꞌ choxa joꞌ ajcuiꞌ saꞌ ruchichꞌochꞌ. 11¿Cꞌaꞌru xya̱lal nak tzꞌi̱banbil nak quixqꞌue xma̱taneb li ralal xcꞌajol li Dios? Naraj naxye nak cuan li quiqꞌueheꞌ xma̱taneb chi cꞌanjelac joꞌ apóstol. Cuan li quiqꞌueheꞌ xma̱taneb chi cꞌanjelac joꞌ profeta. Cuan li quiqꞌueheꞌ xma̱taneb chixyebal resil li colba-ib. Cuan li quiqꞌueheꞌ xma̱taneb chi cꞌamoc be chiruheb laj pa̱banel ut cuan ajcuiꞌ li quiqꞌueheꞌ xma̱taneb chixcꞌutbal lix ya̱lal chiruheb laj pa̱banel. 12Quiqꞌueheꞌ xma̱taneb re nak tzꞌakalakeb ru saꞌ xpa̱ba̱leb ut re nak teꞌcꞌanjelak chiru li Dios ut re nak teꞌxtenkꞌaheb laj pa̱banel chi qꞌui̱c saꞌ xpa̱ba̱leb. 13Qꞌuebil ke li kama̱tan re nak takatenkꞌaheb laj pa̱banel chi cacuu̱c saꞌ lix pa̱ba̱leb toj ta̱cuulak xkꞌehil nak ta̱tzꞌaklok ke ku riqꞌuin lix cuanquil li Cristo ut junajak chic ku xban nak nakapa̱b li Ralal li Dios. Tzꞌakalak ke ku joꞌ li Cristo tzꞌakal re ru. 14Moco joꞌcakex ta chic li cocꞌal. Li cocꞌal nequeꞌxpa̱b li cꞌaꞌak re ru nequeꞌyeheꞌ re. La̱ex ma̱cuaꞌex chic cocꞌal. Joꞌcan nak me̱qꞌue e̱rib chi balakꞌi̱c xbaneb li nequeꞌbalakꞌin riqꞌuin jalanil tijleb. 15Ut chixjunil li nakaba̱nu, chikaba̱nu xban nak nocorahoc. Ut junajak chic ku riqꞌuin li Cristo. 16Li Cristo, aꞌan najolomin ke la̱o aj pa̱banel ut la̱o joꞌ li rok rukꞌ. Li Cristo, aꞌan nacꞌamoc be chiku ut junajo chic. Chikajunilo chikatenkꞌa kib chi kibil kib re nak toqꞌui̱k saꞌ li kapa̱ba̱l xban nak nakara kib chi kibil kib. 17Aꞌan aꞌin li tento tinye e̱re. Saꞌ xcꞌabaꞌ li Ka̱cuaꞌ ninye e̱re nak me̱ba̱nu chic joꞌ nequeꞌxba̱nu li incꞌaꞌ nequeꞌpa̱ban. Eb aꞌan nequeꞌxqꞌue xchꞌo̱l chirix li ma̱cꞌaꞌ na-oc cuiꞌ. 18Incꞌaꞌ nequeꞌxtau xya̱lal. Ma̱cꞌaꞌ riqꞌuineb li junelic yuꞌam li naxqꞌue li Dios xban nak incꞌaꞌ nequeꞌraj xnaubal lix ya̱lal ut kꞌaxal cauheb xchꞌo̱l. 19Incꞌaꞌ nequeꞌxnau xuta̱nac ut nequeꞌxqꞌue rib chixba̱nunquil li ma̱usilal. Nequeꞌxba̱nu chixjunil li joꞌ ma̱joꞌil aj naꞌleb. 20Abanan la̱ex aj pa̱banel ma̱cuaꞌ li naꞌleb aꞌan li xetzol riqꞌuin li Cristo. 21La̱ex xerabi li quixye li Cristo ut xetzol lix ya̱lal li quixcꞌut che̱ru. 22Joꞌcan nak chetzꞌekta̱na chi junaj cua le̱ najter naꞌleb. Me̱qꞌue chic e̱rib chi balakꞌi̱c xban li ma̱usilal li quixrahi ru le̱ chꞌo̱l junxil. 23Ut acꞌobresinbilak taxak le̱ ra̱m ut le̱ cꞌaꞌux. 24Acꞌobresinbilak le̱ yuꞌam ut chexcua̱nk taxak joꞌ naraj li Dios. Santakex ut cha̱bilakex xban nak nequenau chic lix ya̱lal. 25Incꞌaꞌ chic chexticꞌtiꞌik. Saꞌ xya̱lal ban tex-a̱tinak chi ribil e̱rib xban nak junaj chic ku ut kachaꞌal chic kib chi kibil kib. 26Cuan nak nequexjoskꞌoꞌ. Abanan me̱numsi li cutan chi toj cuan le̱ joskꞌil saꞌ le̱ chꞌo̱l re nak incꞌaꞌ texma̱cobk xban. 27Moco yal xban ta le̱ joskꞌil nak te̱qꞌue e̱rib chi a̱le̱c xban laj tza. 28Li ani na-elkꞌac incꞌaꞌ chic chi elkꞌac. Chi cꞌanjelac ban saꞌ xya̱lal re nak cua̱nk li cꞌaꞌru tixsi reheb li ma̱cꞌaꞌ cuanqueb re. 29Mex-a̱tinac yibru aj a̱tin. Riqꞌuin ban cha̱bil a̱tin tex-a̱tinak re nak teꞌxqꞌue retal li ani yo̱quex cuiꞌ chi a̱tinac ut te̱tenkꞌaheb. 30Me̱ba̱nu chic li incꞌaꞌ us re nak incꞌaꞌ ta̱rahokꞌ xchꞌo̱l li Santil Musikꞌej e̱ban. Li Dios quixqꞌue e̱re li Santil Musikꞌej chokꞌ e̱retalil nak rehex chic aꞌan toj saꞌ li cutan nak tixtzꞌakobresi le̱ colbal. 31Isihomak saꞌ le̱ chꞌo̱l chi junaj cua li cꞌahi̱nc, li joskꞌil, ut li poꞌoc ib. Joꞌcan ajcuiꞌ li choki̱nc ib ut li majecua̱nc. Checanabak chi junaj cua chixjunil li ma̱usilal. 32Cha̱bilakex che̱ribil e̱rib. Cheruxta̱na e̱ru chi ribil e̱rib. Ut checuyak e̱ma̱c chi ribil e̱rib joꞌ nak li Dios quixcuy e̱ma̱c saꞌ xcꞌabaꞌ li Cristo.
Currently Selected:
Efesios 4: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.