Efesios 5
5
Tento teꞌcua̱nk saꞌ xya̱lal li ralal xcꞌajol li Dios
1La̱ex chic li ralal xcꞌajol li Dios ut raro̱quex xban. Joꞌcan nak chetzolak e̱rib riqꞌuin li Dios re nak te̱ba̱nu joꞌ naraj aꞌan. 2Cherahak e̱rib chi ribil e̱rib joꞌ nak coxra la̱o li Cristo ut quixmayeja rib chiru li cruz re kacolbal. Ut li Dios quisahoꞌ xchꞌo̱l riqꞌuin xban nak chanchan li sununquil ban chiru. 3La̱ex chic li ralal xcꞌajol li Dios. Joꞌcan nak incꞌaꞌ chic chicua̱nk li coꞌbe̱tac yumbe̱tac saꞌ e̱ya̱nk chi moco tex-a̱tinak chirix. Incꞌaꞌ ta̱cua̱nk li ma̱usilal saꞌ e̱ya̱nk. Ut incꞌaꞌ te̱rahi ru li jalan aj e. Moco xcꞌulub ta chic laj pa̱banel xba̱nunquil aꞌan. 4Incꞌaꞌ ta̱yema̱nk saꞌ e̱ya̱nk li yibru aj a̱tin chi moco li to̱ntil a̱tin chi moco cheye li ma̱yehecꞌ naraj xban nak incꞌaꞌ us. Chexbantioxi̱nk ban chiru li Dios. 5Te̱nau chi tzꞌakal nak li nequeꞌxba̱nu ma̱usilal incꞌaꞌ teꞌtzꞌako̱nk saꞌ lix nimajcual xcuanquilal li Cristo ut li Dios. Chi moco eb laj coꞌbe̱t ut eb laj yumbe̱t chi moco li nequeꞌxrahi li jalan aj e xban nak li ma̱c aꞌan juntakꞌe̱t riqꞌuin xlokꞌoninquil li jalanil dios. 6Me̱qꞌue e̱rib chi balakꞌi̱c xbaneb li nequeꞌa̱tinac ut nequeꞌxye nak moco nimla ma̱c ta xba̱nunquil li cꞌaꞌak re ru aꞌin, xban nak nachal xjoskꞌil li Dios saꞌ xbe̱neb li nequeꞌkꞌetoc re li ra̱tin. 7Me̱junaji e̱rib riqꞌuineb aꞌan xban nak incꞌaꞌ useb xnaꞌleb. 8Junxil quexcuan chak saꞌ xkꞌojyi̱nal ru li ma̱c. Abanan, anakcuan rehex chic li Ka̱cuaꞌ ut cuanquex chic saꞌ xcutan saken. Joꞌcan nak chexcua̱nk saꞌ xya̱lal. 9Li ani quicutanobresi̱c lix chꞌo̱l xban li Dios naxnau lix ya̱lal ut nacuan saꞌ cha̱bilal ut saꞌ ti̱quilal. 10Chetauhak xya̱lal li cꞌaꞌru naraj li Ka̱cuaꞌ. 11Me̱junaji chic e̱rib riqꞌuineb li incꞌaꞌ nequeꞌxnau xya̱lal ut nequeꞌxba̱nu li cꞌaꞌak re ru ma̱cꞌaꞌ na-oc cuiꞌ. La̱ex ban chic texchꞌoloba̱nk re lix ya̱lal chiruheb nak incꞌaꞌ us yo̱queb. 12Xuta̱nal chokꞌ ke la̱o a̱tinac chirix li incꞌaꞌ us li nequeꞌxba̱nu chi mukmu. 13Nak ta̱chꞌoloba̱k lix ya̱lal chiruheb na-el chi cutanquil nak incꞌaꞌ us li yo̱queb ut nequeꞌxqꞌue ajcuiꞌ retal eb aꞌan nak incꞌaꞌ us li nequeꞌxba̱nu. 14Nak ta̱cutanobresi̱k lix chꞌo̱leb cutan saken chic chanru nak cuanqueb. Joꞌcaꞌin tzꞌi̱banbil saꞌ li Santil Hu:
Ajsi a̱cuu, la̱at li yo̱cat chi cua̱rc. Matcana chi camenak saꞌ la̱ ma̱c, ut li Cristo tixcutanobresi la̱ cꞌaꞌux. (Isa. 60:1)
15Cheqꞌuehak retal chanru le̱ yuꞌam. Me̱ba̱nu joꞌ nequeꞌxba̱nu li incꞌaꞌ useb xnaꞌleb. Cheba̱nuhak ban joꞌ nequeꞌxba̱nu li cuanqueb xnaꞌleb. 16Me̱numsi li cutan chi ma̱cꞌaꞌ xya̱lal. Cheba̱nu ban li us nak ta̱ru̱k te̱ba̱nu xban nak chꞌaꞌaj li cua̱nc saꞌ eb li cutan aꞌin. 17Joꞌcan nak moco joꞌcakex ta li ma̱cꞌaꞌeb xnaꞌleb. Chetauhak ban ru li cꞌaꞌru naraj li Ka̱cuaꞌ. 18Mexcala chic xban nak napoꞌoc chꞌo̱lej. Chinujak ban le̱ chꞌo̱l riqꞌuin li Santil Musikꞌej. 19Cheserakꞌi chi ribil e̱rib lix lokꞌal li Dios, ut te̱ye li salmos ut texbicha̱nk re xlokꞌoninquil li Ka̱cuaꞌ. Chexbicha̱nk ut chelokꞌoni li Ka̱cuaꞌ chi anchal e̱chꞌo̱l. 20Ut junelic chexbantioxi̱nk chiru li Acuabej Dios saꞌ xcꞌabaꞌ li Ka̱cuaꞌ Jesucristo riqꞌuin chixjunil li cꞌaꞌru nequecꞌul.
Chepa̱bak e̱rib chi ribil e̱rib
21Chepa̱bak e̱rib chi ribil e̱rib re xqꞌuebal xlokꞌal li Cristo. 22Ex ixakilbej, chepa̱bak le̱ be̱lom joꞌ nak nequepa̱b li Ka̱cuaꞌ Jesucristo. 23Chexpa̱ba̱nk chiru xban nak aꞌan li najolomin re li rixakil joꞌ nak li Cristo najolomin reheb laj pa̱banel. Abanan li Cristo, aꞌan ajcuiꞌ laj Colol reheb laj pa̱banel ut eb laj pa̱banel joꞌ li rok rukꞌ li Cristo. 24Joꞌ nak nequeꞌpa̱ban laj pa̱banel chiru li Cristo, joꞌcan ajcuiꞌ nak li ixakilbej teꞌpa̱ba̱nk chiruheb lix be̱lom riqꞌuin chixjunil. 25Joꞌcan ajcuiꞌ la̱ex be̱lomej, cherahak le̱ rixakil joꞌ nak li Cristo quixraheb laj pa̱banel nak quixkꞌaxtesi rib chi ca̱mc re xcolbaleb. 26Li Jesucristo quixmayeja rib re xsantobresinquileb laj pa̱banel riqꞌuin nak teꞌxcꞌul li cubi haꞌ saꞌ xcꞌabaꞌ li Cristo ut riqꞌuin li ra̱tin li Dios. 27Li Cristo quixba̱nu aꞌan re nak tixcꞌuleb li ralal xcꞌajol chi kꞌaxal nim xlokꞌal, chi ma̱cꞌaꞌ xma̱c ut chi ma̱cꞌaꞌ xpaltil chiru. 28Joꞌcan ajcuiꞌ eb li be̱lomej, tento nak teꞌxra li rixakil joꞌ nak nequeꞌxra ribeb aꞌan. Li ani naxra li rixakil, naxra ajcuiꞌ rib aꞌan. 29Ma̱ ani xicꞌ naril rib. Naxra ban rib ut naxchꞌolani rib joꞌ nak li Cristo naxra ut naxchꞌolani li ralal xcꞌajol. 30Nocoxra ut nocoril xban nak la̱o joꞌ rok rukꞌ li Cristo. La̱o joꞌ lix quiqꞌuel ut joꞌ lix bakel. 31Li be̱lomej ut li ixakilbej junaj chic ruheb joꞌ tzꞌi̱banbil saꞌ li Santil Hu li naxye chi joꞌcaꞌin: Nak ta̱sumla̱k, li cui̱nk tixcanab lix naꞌ xyucuaꞌ re nak tixlakꞌab rib riqꞌuin li rixakil. Ut junajak chic ruheb chi xcabichaleb. 32Kꞌaxal lokꞌ lix ya̱lal li naꞌleb aꞌin. Abanan la̱in ninye e̱re nak naxcꞌut ajcuiꞌ chiku nak la̱o aj pa̱banel junajo chic riqꞌuin li Cristo. 33Joꞌcan nak tinye cuiꞌchic e̱re nak li be̱lomej chixrahak li rixakil joꞌ nak naxra rib aꞌan. Ut li ixakilbej chix-oxlokꞌi lix be̱lom.
Currently Selected:
Efesios 5: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.