Efesios 3
3
Laj Pablo bokbil xban li Dios chi cꞌanjelac saꞌ xya̱nkeb li ma̱cuaꞌeb aj judío
1La̱in laj Pablo. Cuanquin chi pre̱xil xban nak nincꞌanjelac chiru li Cristo, ut xban nak ninye resil li colba-ib e̱re la̱ex li ma̱cuaꞌex aj judío. 2Ac xerabi ta na resil nak tenebanbil saꞌ inbe̱n xban li Dios xyebal e̱re nak li ruxta̱n li Dios e̱re ajcuiꞌ la̱ex li ma̱cuaꞌex aj judío. 3Li Dios, aꞌan quicꞌutuc re chicuu li naꞌleb aꞌan, li mukmu nak quicuan chak junxil. Ac xintzꞌi̱ba caꞌchꞌin resil e̱re chirix li naꞌleb aꞌin. 4Nak te̱ril xsaꞌ li hu li xintzꞌi̱ba e̱riqꞌuin, te̱nau nak ninnau chi tzꞌakal lix ya̱lal chirix li Cristo, li mukmu nak quicuan. 5Junxil ma̱ ani nataꞌoc ru lix ya̱lal li mukmu nak quicuan chak. Abanan anakcuan li Santil Musikꞌej quixcꞌut lix ya̱lal chiruheb li profeta ut chiku ajcuiꞌ la̱o lix apóstol. 6Li xya̱lal li naꞌleb li mukmu nak quicuan chak junxil, aꞌan aꞌin: nak la̱ex li ma̱cuaꞌex aj judío, textzꞌako̱nk li colba-ib li naxqꞌue li Dios kochben la̱o aj judío. La̱ex ralal xcꞌajolex ajcuiꞌ li Dios ut textzꞌako̱nk ajcuiꞌ riqꞌuin li yechiꞌinbil ke xban li Dios xban nak colbilex chic saꞌ xcꞌabaꞌ li Cristo. 7Yal rusilal li Dios nak quixqꞌue saꞌ inbe̱n xyebal resil li colba-ib ut quixqꞌue incuanquil re tinba̱nu lix cꞌanjel. 8La̱in li kꞌaxal cubenak incuanquil saꞌ xya̱nkeb chixjunileb li ralal xcꞌajol li Dios. Abanan yal xban lix nimal ruxta̱n li Dios quixqꞌue cue li cꞌanjel aꞌin re xchꞌolobanquil che̱ru lix ya̱lal chirix lix nimal ruxta̱n li Cristo ut li lokꞌlaj colba-ib saꞌ xcꞌabaꞌ aꞌan. 9Joꞌcan nak tento tinchꞌolob yalak bar lix ya̱lal li naꞌleb li mukmu nak quicuan chak junxil. Chalen chak saꞌ xticlajic chixjunil li naꞌleb aꞌin mukmu chak xban li Dios li quiyi̱ban re chixjunil. 10Li Dios quixba̱nu chi joꞌcaꞌin re xcꞌutbal chiruheb li cuanqueb xcuanquil saꞌ choxa nak numtajenak xnaꞌleb li Dios. Teꞌxnau nak numtajenak xnaꞌleb nak teꞌxqꞌue retal nak quixjunaji ruheb laj judío riqꞌuineb li ma̱cuaꞌeb aj judío chokꞌ ralal xcꞌajol. 11Ac cꞌu̱banbil chak junxil chi joꞌcaꞌin xban li Dios nak li Ka̱cuaꞌ Jesucristo tixjunajiheb ru li ralal xcꞌajol. 12Xban nak ac xkapa̱b li Cristo, junajo chic riqꞌuin. Joꞌcan nak nakanau chi tzꞌakal nak naru chic tocua̱nk chi sum a̱tin riqꞌuin li Dios. 13Joꞌcan nak nintzꞌa̱ma che̱ru nak incꞌaꞌ ta̱chꞌina̱nk e̱chꞌo̱l xban nak yo̱quin chixcꞌulbal li raylal xban xyebal e̱re xya̱lal li colba-ib. Chisahokꞌ ban e̱chꞌo̱l xban nak re e̱tenkꞌanquil xincꞌul li raylal.
Cꞌajoꞌ nocoxra li Cristo
14Nak nincꞌoxlac chirix lix naꞌleb li Dios riqꞌuin chixjunil li quixba̱nu, nincuikꞌib cuib ut ninbantioxin chiru li Acuabej Dios. 15Li Acuabej Dios aꞌan xyucuaꞌeb chixjunil li cuanqueb saꞌ choxa, joꞌ ajcuiꞌ saꞌ ruchichꞌochꞌ. 16Kꞌaxal nim li rusilal li Dios. Joꞌcan nak nintzꞌa̱ma chiru nak li Santil Musikꞌej chiqꞌuehok e̱cuanquilal ut xcacuilal e̱chꞌo̱l saꞌ le̱ pa̱ba̱l. 17Ut nintzꞌa̱ma ajcuiꞌ chiru nak chicua̱nk le̱ pa̱ba̱l re nak cua̱nk li Cristo e̱riqꞌuin chi tzꞌakal. Te̱tau taxak xcacuil le̱ chꞌo̱l riqꞌuin xra̱bal li Dios joꞌ eb ajcuiꞌ le̱ ras e̱ri̱tzꞌin. 18Nintzꞌa̱ma chiru li Dios nak chetauhak taxak ru, joꞌ ajcuiꞌ chixjunileb laj pa̱banel, nak kꞌaxal nim li kara̱bal xban li Cristo. Numtajenak lix rahom li Cristo. Ma̱cꞌaꞌ xbisbal ut ma̱ ani ta̱taꞌok ru lix lokꞌal lix rahom li Cristo. 19Ma̱ jokꞌe ta̱ru̱k takatau ru chi tzꞌakal lix rahom xban nak ma̱cꞌaꞌ rosoꞌjic ut kꞌaxal lokꞌ. Nintzꞌa̱ma chiru li Dios nak tixcꞌut che̱ru nak cꞌajoꞌ nequexra li Cristo, ut chinujak taxak le̱ chꞌo̱l riqꞌuin xnimajcual xcuanquil. 20Lokꞌoninbil taxak li Dios li kꞌaxal nim xcuanquil chixba̱nunquil nabal chiru li nakatzꞌa̱ma. Riqꞌuin xnimal xcuanquil nacꞌanjelac saꞌ li ka̱m ut kꞌaxal nim xcuanquil chixba̱nunquil nabal chiru li nakoybeni. 21Lokꞌoninbil taxak li Dios anakcuan ut chi junelic kꞌe cutan kaban la̱o aj pa̱banel xban nak junajo chic riqꞌuin li Cristo. Joꞌcan taxak.
Currently Selected:
Efesios 3: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.