Efesios 2
2
Colbilo xban xnimal ruxta̱n li Dios
1Junxil la̱ex li ma̱cuaꞌex aj judío chanchan camenakex xban li ma̱usilal ut li ma̱c li xeba̱nu chak. 2Xeba̱nu chak li ma̱usilal saꞌ ruchichꞌochꞌ ut xeqꞌue e̱rib chi takla̱c xban laj tza li nataklan saꞌ xbe̱neb li ma̱us aj musikꞌej. Aꞌan li nataklan saꞌ xbe̱neb li nequeꞌkꞌetoc ra̱tin li Dios. 3Joꞌcan ajcuiꞌ la̱o aj judío. Junxil xkaba̱nu chak li ma̱usilal li naxrahi ru li kachꞌo̱l xba̱nunquil. Xkaba̱nu li incꞌaꞌ us li xkaj xba̱nunquil kajunes. Joꞌcan nak tento raj takacꞌul xtojbal li kama̱c joꞌ eb chixjunileb li incꞌaꞌ nequeꞌraj pa̱ba̱nc. 4Abanan kꞌaxal nim li ruxta̱n li Dios saꞌ kabe̱n xban nak kꞌaxal nocoxra. 5Nak toj camenako chak saꞌ li kama̱c, riqꞌuin lix cuaclijic cuiꞌchic chi yoꞌyo li Cristo, li Dios quixqꞌue ke jun acꞌ yuꞌam. Yal xban rusilal li Dios nak colbilo. 6Li Dios corisi chak saꞌ li najter yuꞌam nak quixcuaclesi chi yoꞌyo li Jesucristo ut coxqꞌue chi tzꞌako̱nc saꞌ lix nimal xlokꞌal saꞌ li santil choxa xban nak reho chic li Cristo. 7Chixjunil li usilal aꞌin quilajxba̱nu ke saꞌ xcꞌabaꞌ li Jesucristo re nak ta̱cꞌutu̱nk chi junelic kꞌe cutan nak kꞌaxal nim li ruxta̱n. 8Ya̱l nak xepa̱b li Jesucristo ut colbilex chic. Abanan yal xban rusilal li Dios nak colbilex. Ma̱cuaꞌ xban e̱yehom e̱ba̱nuhom. Yal e̱ma̱tan ban xban li Dios. 9Ma̱ ani chixnimobresi rib xban nak ma̱cuaꞌ xban e̱yehom e̱ba̱nuhom nak colbilex. 10Li Dios coxyoꞌobtesi ut quixqꞌue ke li acꞌ yuꞌam saꞌ xcꞌabaꞌ li Jesucristo re nak cha̱bilak li kayuꞌam xban nak ac joꞌcan cꞌu̱banbil chak xban li Dios junxil re nak cha̱bilak li kayehom kaba̱nuhom.
Junaj chic ku la̱o saꞌ xcꞌabaꞌ li Cristo
11Chijulticokꞌ e̱re chanru nak quexcuan chak junxil. La̱ex li ma̱cuaꞌex aj judío tzꞌekta̱nanbilex xbaneb laj judío li queꞌxcꞌul li circuncisión, ut eb aꞌan queꞌxye nak incꞌaꞌ tzꞌakal e̱re e̱ru xban nak incꞌaꞌ quecꞌul li circuncisión. 12Junxil moco cuan ta li Cristo e̱riqꞌuin ut ma̱cuaꞌex xcomoneb laj Israel. Incꞌaꞌ querabi resil li contrato li quiyehoc resil lix cꞌulunic laj Colonel. Cuanquex arin saꞌ ruchichꞌochꞌ chi ma̱cꞌaꞌ cꞌaꞌru yo̱quex chiroybeninquil ut chi ma̱cꞌaꞌ li Dios e̱riqꞌuin. 13Junxil li Dios ma̱cꞌaꞌ e̱riqꞌuin. Abanan anakcuan rehex chic xban nak li Cristo quicam chiru li cruz saꞌ e̱cꞌabaꞌ. 14Li Cristo, aꞌan li naqꞌuehoc ke li tuktu̱quil usilal. Xban li Cristo junaj chic ku la̱o aj judío e̱riqꞌuin la̱ex li ma̱cuaꞌex aj judío. Xban nak quixmayeja rib saꞌ kacꞌabaꞌ, li Cristo quirisi li kajoskꞌil li naramoc re chiku li cua̱nc saꞌ xya̱lal chi kibil kib. 15Xban nak quixkꞌaxtesi rib chi ca̱mc, li Cristo quirisi xcuanquil li najter chakꞌrab. Quixba̱nu aꞌan re nak tixjunajiheb ru laj judío riqꞌuin li ma̱cuaꞌeb aj judío ut junajakeb chic riqꞌuin li Cristo ut cua̱nkeb chic saꞌ xya̱lal chi ribileb rib. 16Riqꞌuin lix camic chiru li cruz li Cristo quirisi lix joskꞌinquil kib chi kibil kib ut coxcꞌam cuiꞌchic saꞌ usilal riqꞌuin li Dios ut junaj chic ku. 17Nak quicꞌulun li Cristo saꞌ ruchichꞌochꞌ quixchꞌolob xya̱lal li colba-ib li naqꞌuehoc tuktu̱quil usilal. Quixchꞌolob xya̱lal chiku la̱o aj judío li ac nakanau xya̱lal. Ut quixchꞌolob ajcuiꞌ xya̱lal che̱ru la̱ex li ma̱cuaꞌex aj judío li toj ma̱jiꞌ nequenau xya̱lal. 18Anakcuan chikajunilo, usta la̱o aj judío usta ma̱cuaꞌo aj judío, naru nococuan chi sum a̱tin riqꞌuin li Yucuaꞌbej Dios saꞌ xcꞌabaꞌ li Cristo. Ut li junaj chi Santil Musikꞌej natenkꞌan ke. 19Ut moco jalanex ta chic anakcuan riqꞌuineb laj judío. La̱ex ban chic xcomoneb. Junaj chic e̱ru riqꞌuineb. La̱ex chic ralal xcꞌajol li Dios. 20La̱o aj pa̱banel chanchano li rochoch li Dios. Chanchano li pec li na-oc saꞌ xbe̱n li cimiento. Ut li cimiento, aꞌaneb li apóstol ut li profeta. Abanan li tzꞌakal xakxo cuiꞌ li cab, aꞌan li Jesucristo. 21La̱o aj pa̱banel chanchano li rochoch li Dios. Junajo chic saꞌ xcꞌabaꞌ li Jesucristo li tzꞌakal xakxo saꞌ kabe̱n re nak tzꞌakalak ke ku ut kꞌaxtesinbilo chiru li Dios. 22Joꞌcan ajcuiꞌ la̱ex. Xban nak rehex chic li Cristo, junajex chic riqꞌuineb laj pa̱banel. Ut la̱ex ajcuiꞌ li rochoch li Dios xban nak li Santil Musikꞌej cuan e̱riqꞌuin.
Currently Selected:
Efesios 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.