Loma 11
11
Mema ku mbunge a Njambi ali Isalele
1 #
Fili 3:5
Njihula ngwange, kuma Njambi navyana vanu vendi ndi? Embwe kesi ngoco! Yange vene njapwa kaIsalele, mutekulwila wa Avilahama, njapwa wa ku muyati wa Mbenjemani. 2Njambi kavyanene vanu vendi, vaje vaangwile kutunda ku san̄ulu. Yeni mwazivuka muvinendeka visoneka mu mutambela kuje vendeka Elinja alambelela Njambi ali Isalele ngwendi, 3#1 Vim 19:10,14 “Shukulu Kalunga, vanatsii vaka-kwimanena vove, co vanasiwula mitula yove, kuvanga yange lika njinasalao, co vashaka kunjitsiya.” 4#1 Vim 19:18 Njambi wamukumbulwile vatijo? Wamukumbulwile ngwendi, “Njinatulika vanalume vakupwa 7,000 vaje kanda valemese kamponya Mbale.” 5Ngecivene, cinapu cuma cimo vene na ololo, kuyicili mbunga yaindondo vanasalao vaje vaangwile Njambi omwo kutetela kwendi. 6Kwangula kwendi kunajendamena a kutetela kwendi, kesi ngwe a vije vivanalingi embwe. Omwo nga kwangula kwa Njambi kwapwa kwa a vije vivalinga vanu, nga kutetela kwendi kukwapwile kutetela kwa vushunga.
7Vationi? Vanu va Isalele kuvawanene cije civakele nakushakezeka. Yapwile mbunga yaindondo lika vaje vaangwile Njambi vakevo vaciwanene, co vaje vasaleleo vapwile tusinda-matwi kukusana kwa Njambi. 8#Kwi 29:4; Isa 29:10 Ngwe muvyendeka visoneka ngwavyo, “Njambi nazivalesa vimbunge na mana avo, nakweta ku litangwa lyalelo kuvasa kumona nambe kuziva.” 9#Mya 69:22-23 Co Ndaviti alinakwendeka ngwendi,
“Viwano vyavo vipwe myeto, co vatsemo,
vanapande kuwa, vanapande kuvanyanyamesa!
10Mesho avo apwe a vupuputwa ngeci kesi vase kumona,
co vakulame myongo yavo simbu yoshe mu tuyando twavo.”
11Ngecivene, njihula ngwange, omo vaYunda vatanukile, kuma vawile nakunyonga ndi? Embwe kesi ngoco! Omwo valingile vuvi, kwamena kunaija kuli vaje kesi vaYunda, ngeci vaYunda vazivile lifuwa vaje kesi vaYunda. 12Vuvi vwa vaYunda vwanenele vivezikiso vyakama mu kaye, co kuutwa kwavo kwa mu munzinzime kwanenele vivezikiso vyakama kuli vaje kesi vaYunda. Ngecivene, vikapwa vatijo vivezikiso vyakama manene omo vungi vwa vaYunda vanavawezelela!
Kwamena kwa vaje kesi vaYunda
13Njilinakwendeka ololo kuli yeni kesi vaYunda ngwange, ngwe omo njinapu muluwa kuli vaje kesi vaYunda, njikalyalesa mu vipangi vyange. 14Amo njasa kulingisa vanu va ku muyati wange lifuwa, ngeci njase kwamenako vamo. 15Omwo nga vavayengwile, co vaka-kaye vavatengulwile mukujeneka kupwa vitozi va Njambi, co ololo vanapu vasamba va Njambi. Cikapwa vatijo omo vanavatambula? Cikapwa mwonyo ku vatsi!
16Nga mbazuvwila yakulivanga ya likende vayana kuli Njambi, ngecivene, na mukasha woshe wamutunu unapu wendi lalo, nga mizi ya muti vaikombelela kuli Njambi, co na minango lalo inapu yendi. 17Oloni nga minango imo ya ku muti wa olive wakukuna vanaijokolako, co munango wa olive wa mu shwata vanaunungilako. Yeni kesi mu vaYunda munapu ngwe uje muti wa olive wa mu shwata, co ololo munalipangela yoyesi yaivwa ya munzinzime ya vaYunda. 18Ngecivene, kumwapandele kuyengula vaje vavajokwele ngwe minango. Vatijo mwasa kulyalesa? Yeni munapu lika mu minango, kumwesi kukwata mizi, oloni mizi ikeyo ilinakumikwata.
19Oloni mwendeka ngweni, “Eyo, oloni minango vaijokwele ngeci kusale mwela wetu.” 20Eci cinapu ca vushunga. Vavajokweleko omwo kuvakulaelele, oloni yeni munatumbama mu mwela weni omwo munakulaela. Oloni kesi mulyalese a viyongola evi, munapande kuziva lyova. 21Omwo nga Njambi katetelele vaYunda, vaje vanalifu ngwe minango ya cisemwa, muyongola ngweni akamitetela ndi? 22Ano tumona cizemo ca Njambi nakukaluwa kwendi. Ikeye napu muka-kukaluwa kuli vaje vanau, oloni napu muka-cizemo kuli yeni, nga mutwalao mu cizemo cendi. Oloni nga kumulingimo, co neni lalo vakamijokolako. 23Nga vaYunda vakashangumuka kukulaela lalo, co vakavelwisila lalo mu mutambela muje muvakele, omwo Njambi asa kulinga ngacije lalo. 24Omwo nga yeni kesi vaYunda munalifu ngwe munango wa ku muti wa olive wa mu shwata uje uvanajokolako, co ngwe kesi mu cifwa cawo, vanaunungila ku muti wa olive wakukuna. VaYunda vanalifu ngwe ou muti wakukuna, co cikapwa cacasi manene kuli Njambi kunungilako eyi minango ivajokwele ku muti wayo lalo.
Mema ku mbunge a Njambi kuli voshe
25Kuli vushunga vwakushwekesa, vakwetu, vuje vunjishaka ngeci muvuzivuke, omwo vukamivindika kuyongola ngweni munapu vakunyanyama. Oku kukaluwa kwa vimbunge vya vanu va Isalele kesi ngwe kwa myaka yoshe embwe, oloni kukakalako lika noo vaje kesi vaYunda vanapumo kwija kuli Njambi. 26#Isa 59:20 Eyi ikeyo ngila vanu va Isalele voshe vakavaamena nayo. Ngwe muvyendeka visoneka ngwavyo,
“Muyoyesi akatunda ku Siyone,
co akatundisa kupenga-penga kwoshe ku vatekulwila va Yakomba.
27 #
Njele 31:33-34
Co njikalikumiiya navo cikumiiyo eci
omo njikatundisa vivi vyavo.”
28Omwo vanavyana Vin̄anda Vyavivwa, vaYunda vanapu vitozi va Njambi omwo yeni kesi mu vaYunda. Oloni omwo kwangula kwa Njambi, vanapu vasamba vendi omwo ali vakukulwila vavo. 29Omwo Njambi kesi kutengulula viyongola vyendi kuli vaje aangula nakuvavezikisa. 30Ngwe ali yeni kesi vaYunda, kumwononokele Njambi ku san̄ulu, oloni ololo munatambula mema ku mbunge a Njambi omwo akujeneka kwononoka kwa vaYunda. 31Mu ngila eyi vene, omwo a mema ku mbunge a munatambula, co ololo vaYunda kuvesi nakwononoka Njambi, ngeci na vakevo ololo vatambule mema ku mbunge a Njambi. 32Omwo Njambi napwisa vanu voshe vinzinda vakujeneka kwononoka, ngeci amwese mema ku mbunge ku voshe.
Kushangala Njambi
33 #
Isa 55:8
Vufuko vwa Njambi vwapwa vwavungi manene! Kuzivuka kwendi na mana endi vyapwa vyakulova manene! Iyajo asa kulumbununa matumbe endi? Iyajo asa kuzivuka vingila vyendi? 34#Isa 40:13 Ngwe muvyendeka visoneka ngwavyo,
“Iyajo azivuka mana a Shukulu Kalunga?
Iyajo asa kumunangula?
35 #
Yom 41:11
Nambe iyajo wamwanene cuma cimo
ngeci amwilwisile fweto?”
36 #
1 Koli 8:6
Omwo ikeye watangele vyuma vyoshe, co vyuma vyoshe vilinakuyoya muli ikeye na ali ikeye. Kuli Njambi kukale vumpau ku myaka yoshe! Ewa.
Currently Selected:
Loma 11: MBB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006