Mateo 11

Yowano Muka-kumbwitika atuma miluwa

(Luka 7:18-35)

1Co omo Yesu wamanesele kushika vandongisi vendi likumi na vavali, watundile ku mutambela kuje kwakele waile nakulongesa nakwambulula mu membo aje akele kuje.

2Omo Yowano Muka-kumbwitika wakele mu kamenga wazivile a vipangi vya Kilistu, watumine vandongisi vendi vamo kuli ikeye, 3nakumwihula ngwavo, “Tuleke, yove vene uje yatumbwile Yowano ngwendi akaija, nambe tucivandamene weka lalo?”

4Co Yesu wavakumbulwile ngwendi, “Yeni mukaleke Yowano vyuma evi vimunazivi nevi vimunamono, 5#Isa 35:5-6; 61:1 tupuputwa vatona, vilema venda, vaka-mbumba vajela,#11:5 VAKA-MBUMBA VAJELA: Kenga 8:2. tusinda-matwi vaziva, vatsi vasanguka, tuutu vavambulwila Vin̄anda Vyavivwa. 6Co vanavezika vaje kuvesi na vimata ali yange!”

7Omo vandongisi va Yowano vatundile kuli ikeye, Yesu walekele ije mbunga ali Yowano ngwendi, “Omo mwaile kuli Yowano mu mambo, mwakamwene cuma mukajo? Cishoni citepozoka na lihunzi ndi? 8Mwaile nakumona vikajo? Munu nazala vuzalo vwasenga ndi? Vanu vakuzala ngacije vakala mu mapela! 9Njilekeni, mwaile nakumona vikajo? Muka-kwimanena ndi? Eyo, oloni mwakamwene uje natuvakana muka-kwimanena. 10#Mal 3:1 Omwo Yowano ikeye uje ivasonekele mu visoneka ngwavyo, ‘Njambi wendekele ngwendi, kenga, njikatuma muluwa wange kulutwe lwove, ikeye akavwaesa ngila yove.’ 11Mwa vushunga njimileka ngwange, akati ka vanu voshe vaje vanakalako, kukwesi umo natuvakana Yowano Muka-kumbwitika. Oloni uje wamundondo mu Vumwene vwa mwilu ikeye natuvakana Yowano. 12#Luk 16:16 Kutunda ku matangwa a Yowano Muka-kumbwitika kweta na ku lelo, Vumwene vwa mwilu vanakala nakuvulwisa, co vaka-muuka vavutambula na nzili. 13Omwo vaka-kwimanena voshe na majwi a Lishiko a Mosesa, vambulwile vya Vumwene noo a simbu ya Yowano. 14#Mal 4:5; Mat 17:10-13; Mak 9:11-13 Co nga muli na cizango cakukulaela muzimbu wavo, Yowano ikeye vene Elinja uje ivatumbwile ngwavo akaija. 15Uje woshe ali na matwi, azive!

16“Yanini vanu va matangwa ano njasa kuvesekesa na vikajo? Vakevo vanafu ngwe vanike vaje vanatumbama ku mutambela wakulandesela vyuma, co vatambekela ku vakwavo ngwavo, 17‘Twamimbilile myaso ya vushombolwa, oloni kumwakinine! Twamimbilile myaso ya vusiwa, oloni kumwalilile!’ 18Omwo Yowano wezile, kalile vyakulya nambe kunwa vinyu, co vendekele ngwavo, ‘Ali na munzinzime wakujwala!’ 19Omo Muna Munu wezile, ikeye walile nakunwa, co vanu vendekele ngwavo, ‘Kengeni ou munalume! Watsa akulya na akunwa vinyu, musamba wa vaka-kutambula lisimu na vaka-vuvi!’ Oloni mana a Njambi anasholoka kupwa a vushunga a vilinga vyawo.”

Vinganda vya vaka-kujeneka kukulaela

(Luka 10:13-15)

20Asinoni Yesu washangumukile kwendeka a vinganda vije kuje kwalingilile vizivukiso vyendi, omwo vanu kuvatengulukile mu vimbunge vyavo, co wendekele ngwendi, 21#Isa 23:1-18; Ezek 26:1—28:26; Njwe 3:4-8; Amo 1:9-10; Zak 9:2-4 “Ngongo yove Kolazine! Ngongo yove Mbetesainda! Omwo vizivukiso evi vanalingi kuli yeni, nga vavilingilile mu Tile na mu Sindone, nga vanu vamwo vazalele vikeleya nakulikwita lito kumwesa ngeci vanatenguluka ku vivi vyavo! 22Oloni njimileka ngwange, a Litangwa Lyakusompa Njambi akatetela manene vanu va ku Tile na Sindone kutuvakana yeni! 23#Isa 14:13-15; Kus 19:24-28 Co nove lalo Kapenauma! Washakele kulijundwila yove vavenya mwilu ndi? Ukashelumuka ku vukalo vwa vatsi! Omwo vizivukiso vije vyalingiwile muli yove, nga vyalingiwile mu Sondoma, nga nganda ije anga kuyicili nakweta kulelo lino. 24#Mat 10:15; Luk 10:12 Oloni njimileka ngwange, a Litangwa Lyakusompa Njambi akatetela manene vanu va ku Sondoma kutuvakana yeni.”

Ijeni kuli yange muhwime

(Luka 10:21-22)

25A simbu ije vene Yesu wendekele ngwendi, “Njikukandelela yove Tate, Mwene wa lilu na ano asi! Omwo vyuma evi wavishwekele kuli vaka-mana na kuli vaka-kulilongesa, co unavisholola kuli vaka-kujeneka mana. 26Mukemwo vene Tate, mucavwaela ku mesho ove.

27 # Yow 3:35; 1:18; 10:15 “Vyuma vyoshe Tate nanjanavyo. Co lalo naumo wai azivuka Mwana kuvanga Ishe, co lalo naumo wai azivuka Ishe kuvanga Mwana, na vaje voshe vashaka Mwana kuvasholwelaye.

28“Ijeni kuli yange, yeni voshe munajuka nakwambata vyakulema, co njikamihwimisa. 29#Njele 6:16 Lilemekeni mandauluwa yange, co lilongeseni kuli yange, omwo yange njimukalyovwa-ovwa na kulikeesa mu mbunge, co mukawana kuhwima ku myonyo yeni. 30Omwo mandauluwa yange yayasi, na citele cange cacehu.”

Currently Selected:

Mateo 11: MBB

Highlight

Copy