Mateo 10
10
Mazina a miluwa va Mwene Yesu likumi na vavali
(Mako 3:13-19; Luka 6:12-16)
1Co Yesu wasanene vandongisi vendi likumi na vavali, vaije kuli ikeye, co wavanene moko yakutundisa minzinzime yakujwala, nakukangwisa mishongo yoshe nakuvinja kwoshe. 2Awa akewo mazina a vaje miluwa likumi na vavali. Wakulivanga, Simoni (uje vatumbula Petulu) na ndolome yendi Anduleo, Yakomba na ndolome yendi Yowano vana va Zembendeo. 3Filipu na Mbatolomeo, Tomasi na Mateo muka-kutambula lisimu, Yakomba muna Alufeya, na Tandeo, 4Simoni Zelote, na Yundasa Isikalyote uje wendele Yesu vungungu.
Yesu atuma vandongisi likumi na vavali
(Mako 6:7-13; Luka 9:1-6)
5Yesu watumine ava miluwa likumi na vavali, wavashikile ngwendi, “Kesi muye mu mafuti a vanu vaje kesi vaYunda embwe, nambe mu limbo limo lya vaka-Samaliya embwe. 6Oloni mwapande kuya ku vimanga vakuzimbala va muyati wa Isalele. 7#Luk 10:4-12 Co yeni mukambulule ngweni, ‘Vumwene vwa mwilu vuli muyehi!’ 8Kangwiseni vaka-kuvinja, sanguleni vatsi, jeleseni vaka-mbumba, co nakutundisa minzinzime yakujwala. Yeni munavitambula vyangoco kujeneka kufweta, ngecivene, neni lalo aneni ngoco kujeneka kutambulao cimo. 9Kesi mwambate vimbongo vya ngolinde, nambe vya siliva, nambe vimbongo vya vunengu mu vinkombe vyeni. 10#1 Koli 9:14; 1 Tim 5:18 Kesi mwambate lipakumuna mu vungenzi vweni, nambe vikoveyo vivali, nambe vin̄aku, nambe mulamu. Omwo muka-kupanga napande kutambula fweto yendi.
11“Omo mweta mu nganda nambe mwimbo, kovelenimo, co seteleni munu iya uje napande kumitambula mwamuvwa, co tumbameni nendi noo mukatundako. 12Omo mukakovela mu njuvo, endekeni ngwendi, ‘Kwoloka kukale neni.’ 13Co nga vanu va mu njuvo ije vamitambula mwamuvwa, taveni kwoloka kweni kukalemo, oloni nga kuvakamitambula mwamuvwa, kwoloka kweni kwiluke kuli yeni vavenya. 14#Vil 13:51 Co nga naumo wai amitambula nambe kutolilila ku vije vimwendeka, asinoni tundeni mu njuvo ije nambe mu nganda ije, totomoneni likungu ku myanja yeni. 15#Mat 11:24; Kus 19:24-28 Mwa vushunga njimileka ngwange, a Litangwa Lyakusompa Njambi akamwesa vaka-Sondoma na vaka-Ngomola mema ku mbunge kutuvakana nganda ije!
Mapakeso aje alinakwija
(Mako 13:9-13; Luka 21:12-17)
16 #
Luk 10:3
“Kengeni, njilinakumituma ngwe vimanga akati ka tungunga. Ngecivene, nyanyameni ngwe manyoka, co likongomekeni ngwe mayembe. 17#Mak 13:9-11; Luk 12:11-12; 21:12-15 Toneni, omwo kukakala vanu vaje vakamikuta nakumitwala ku vimbanja mukumisompa, co vakamipupa makote mu masinangonge avo. 18Co vakamitwala ku mesho a vaka-kushwana, na ku mesho a vimyene, omwo lizina lyange, ngeci mukambulule Vin̄anda Vyavivwa kuli vakevo na kuli vanu vaje kesi vaYunda. 19Omo vakamitwala mukumisompa, kesi mushote vimbunge vyeni ngweni vikajo tukendeka nambe vatijo tukendeka, omwo a simbu ije vene vakamileka vati munapande kwendeka. 20Omwo majwi amukendeka kesi eni embwe, oloni akatunda kuli Munzinzime wa Ishweni ikeye akendeka muli yeni.
21 #
Mak 13:12; Luk 21:16 “Vanu vakatwala vasamba vavo ku kutsa, co vaishavo vakalinga kuli vana vavo cifwa eci lalo, co vana vakatengulukila visemi vavo nakuvatwala ku kutsa. 22#Mat 24:9,13; Mak 13:13; Luk 21:17 Co vanu voshe vakamizinda omwo lizina lyange. Oloni uje akakateya nakweta ku shongo akovoka. 23Omo vakamiyandesa mu limbo limo, teweleni ku limbo likwavo. Omwo mwa vushunga njimileka ngwange, kumukamanesa vipangi vyeni vyoshe mu membo a Isalele simbu kanda Muna Munu aije.
24 #
Luk 6:40; Yow 13:16; 15:20 “Kukwesi ndongisi atuvakana mulongisi wendi, nambe ndungo naumo wai natuvakana shukulu yendi. 25#Mat 9:34; 12:24; Mak 3:22; Luk 11:15 Ngecivene, ndongisi napande kulilongesa ngeci apwe amo na mulongisi wendi, co ndungo lalo napande kupanga ngeci apwe amo na shukulu yendi. Nga vavenya njuvo vamutumbula ngwavo Mbelezembulu, cooni naanga ya mu njuvo ije vakavatumbula mazina amavi manene!
Uje itunapande kukomoka
(Luka 12:2-7)
26 #
Mak 4:22; Luk 8:17 “Ngecivene, kesi muzivile vanu lyova. Omwo kukwesi cuma cakufwika civakonwa kufukula, nambe cuma cakwendekela mu vushweke kuvanga cikajomboloke. 27Evi vinjilinakumileka mu vushweke, mukavyendeka mu mbunga, co nevi mulinakuziva vyakuyeveta, vyambululeni ku lifuti lyoshe. 28Kesi muzivile lyova vaje vatsiya muvila oloni kuvasa kutsiya mwonyo, oloni zivileni lyova Njambi, uje asa kunyongesa vyoshe mwonyo na muvila muje mu mbulu ya tuhya. 29Kuma kuvesi kulanda tunzilili vavali na mbongo imo indi? Co kanzilili naumo wai akatsi kujeneka cizango ca Ishweni. 30Oloni Ishweni walava vin̄ambu vyoshe vya ku mitwe yeni. 31Ngecivene, kesi muzive lyova, yeni muli na seo yakama kutuvakana tunzilili vavangi!
Kutava Yesu nambe kumuvyana ku mesho a vanu
(Luka 12:8-9)
32“Ngecivene, woshe akanjitava ku mesho a vanu, nange lalo njikamutava ku mesho a Tate ali mwilu. 33#2 Tim 2:12 Oloni woshe akanjivyana ku mesho a vanu, nange lalo njikamuvyana ku mesho a Tate ali mwilu.
Yesu kanenele kwoloka oloni nzita
(Luka 12:51-53; Yowano 14:26-27)
34“Kesi muyongole ngweni njinaija nakunena kwoloka ano a kaye embwe. Kunjezile nakunena kwoloka embwe, oloni moko ya mukwale. 35#Mik 7:6 Omwo yange njinaija nakunena kwangunuka kwa vana va vanalume kuli vaishavo, nakwangunuka kwa vana va vanakazi kuli vainavo, na vainamweno kulyangunuka lalo kuli vainamweno, 36co vitozi vakama va munu vapwa vavushoko va mu njuvo yendi vavenya.
37“Woshe uje azema ishe nambe vaina kutuvakana yange kapandele kupwa ndongisi yange, co woshe uje azema munendi wa munalume nambe wa munakazi kutuvakana yange kapandele kupwa ndongisi yange. 38#Mat 16:24; Mak 8:34; Luk 9:23 Woshe uje kambata cilindakano cendi nakukavangeya mu myanja yange kapandele kupwa ndongisi yange. 39#Mat 16:25; Mak 8:35; Luk 9:24; 17:33; Yow 12:25 Woshe uje ashaka kunyunga mwonyo wendi vavenya auzimbalesa, oloni woshe uje azimbalesa mwonyo wendi omwo lizina lyange akauwana.
Cikandelela
(Mako 9:41)
40 #
Mak 9:37; Luk 9:48; 10:16; Yow 13:20 “Woshe uje amitambula, natambula yange, co woshe uje natambula yange, natambula uje wanjitumine. 41Woshe uje atambula muluwa wa Njambi, omwo wapwa muluwa wa Njambi akatambula cikandelela ca muluwa. Co woshe uje atambula muka-vushunga, omwo ikeye napu muka-vushunga akatambula cikandelela ca muka-vushunga. 42Co woshe uje aana nganja ya mema akutonola kuli umo wa ava vavandondo omwo napu muka-kunjikava, mwa vushunga njimileka ngwange, akatambula cikandelela.”
Currently Selected:
Mateo 10: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
