Luka 8

Vanakazi vaje vaile amo na Yesu

1Munima yevi Yesu waile nakwendangana mu vinganda na mu membo, nakwambulula Vin̄anda Vyavivwa vya Vumwene vwa Njambi. Vandongisi likumi na vavali vaile amo nendi, 2#Mat 27:55-56; Mak 15:40-41; Luk 23:49 co vanakazi vamo vaje vaakangwisile ku mishongo yavo na ku minzinzime yakujwala vaile amo nendi, Maliya (uje ivatumbwile Mangandalena) uje muli ikeye mwatundile minzinzime yakujwala itanu na ivali, 3na Yowana munakazi wa Kuza uje wapwile mukulunu wa mu mbanja ya Helonde, amo na Suzana, na vanakazi veka vavangi vaje vapangesele vyavo mukukwasa Yesu na vandongesi vendi.

Cisimo ca muka-kukuva

(Mateo 13:1-9; Mako 4:1-9)

4Vanu vakele nakwija kuli Yesu vatundile ku vinganda vyoshe, co omo mbunga yakama yakungulukilile amo, Yesu wavatelelele cisimo eci ngwendi,

5“Kwakele munalume umo waile nakukuva mbuto. Co omo wakele nakukuva vimbuto mu lihya, vimo vyawililile kumukulo wa ngila, vavilyatangelele, co tuzila vezile nakuvilya. 6Vimbuto vikwavo vyawililile a mamanya, co vwasi-vwasi vije vimbuto vyashangumukile kumena oloni vyajujwamene, omwo kukwakele livu lyalingi. 7Vimbuto vikwavo vyawililile akati ka mambimbo, co aje mambimbo akulile avitivile. 8Oloni vimbuto vikwavo vyawililile ku livu lya vwilo, co vyakolele vyemine vimbuto 100.”

Co Yesu wamanesele kwendeka ngwendi, “Uje woshe ali na matwi, azive!”

Vutumbe vwa visimo

(Mateo 13:10-17; Mako 4:10-12)

9Vandongisi vendi vehwile Yesu mucalumbunukila cisimo eci, 10#Isa 6:9-10 co Yesu wavakumbulwile ngwendi, “Yeni vanamyana kuzivuka vyuma vya Vumwene vwa Njambi, oloni kuli veka, kuvanga na visimo, ngeci vamone, oloni kuvamonesesa mwamuvwa, co vazive, oloni kuvazivisisa mwamuvwa.

Yesu alumbununa cisimo ca muka-kukuva

(Mateo 13:18-23; Mako 4:13-20)

11“Omu mukemwo mucalumbunukila cisimo, vimbuto vinapu lijwi lya Njambi. 12Co vije vimbuto vyawililile kumukulo wa ngila vinemanena vaje vaziva lijwi, oloni Liyavola aija nakutundisa lijwi mu vimbunge vyavo ngeci kesi vakulaele nakwovoka. 13Co vije vimbuto vyawililile a mamanya vinemanena vaje vaziva lijwi, co valitambula nakujolela, oloni kulyasa kukovela manene muli vakevo, vakulaela lika kasimbu, oloni omo vyeseko vija, co aje vene valikela. 14Vimbuto vije vyawililile akati ka mambimbo, vinemanena vaje vaziva lijwi, oloni lipakeso na vufuko nakuvwaelela kwa mwonyo ou vishulamo nakuvitiva, co kuvaimi vushuka. 15Co vimbuto vije vyawililile ku livu lya vwilo vinemanena vaje vaziva lijwi nakulinyunga na mbunge yaivwa yakwononoka, co vakakateya noo vaima vushuka.

Ndeya ya mwisi ya lyendeko

(Mako 4:21-25)

16 # Mat 5:15; Luk 11:33 “Naumo wai ashwameka ndeya, co ayaka mwisi ya lyendeko nambe mwisi ya vulili. Oloni ayaka a citumbikilo ca vindeya, ngeci vaje vakovela mu njuvo vamone ceke.

17 # Mat 10:26; Luk 12:2 “Cuma coshe cakushweka kuvanga cisholoke, na cuma coshe cakufwika kuvanga vaciwane nakucifukula.

18 # Mat 25:29; Luk 19:26 “Ngecivene, nyanyameni omo mutolilila, omwo munu uje ali na vyuma vakamuwezelelako lalo, oloni uje kesi navyo vakamunyeka nameme vyuma vyavindondo vije alinavyo.”

Vaina ya Yesu na vandolome vendi

(Mateo 12:46-50; Mako 3:31-35)

19Vaina ya Yesu na vandolome vendi vezile kuli ikeye, oloni kuvasele kushwenya kuli ikeye omwo mbunga. 20Munu umo wendekele kuli Yesu ngwendi, “Vanyoko na vandolome vove vanemana anja, vashaka kukumona.”

21Yesu wendekele kuli vakevo voshe ngwendi, “Vanana na vandolome vange vanapu vaje vaziva lijwi lya Njambi nakulyononoka.”

Yesu olwesa lihunzi lyakama

(Mateo 8:23-27; Mako 4:35-41)

22A litangwa limo Yesu wakovelele mu vwato na vandongisi vendi, co wendekele kuli vakevo ngwendi, “Tujavukeni tuye musambwa ya lishali.” Ngecivene, vasunwine vwato. 23Omo vakele nakujavula, co Yesu waile mu tulo. Co vwasi-vwasi kwahuwile lihunzi lyakama a lishali, co vwato vwashangumukile kushula mema, voshe vakele mu vushonde vwakama manene. 24Co vandongisi vaile kuli Yesu nakumwindula ngwavo, “Shukulu, Shukulu! Tushaka kutsa!”

Co Yesu wakatukile washikile lihunzi na mankimba, co lihunzi na mankimba vyalendamene, co kwolokele kuluu.

25Asinoni wendekele kuli vandongisi ngwendi, “Kukulaela kweni kuli kulijo?”

Oloni vakevo valikomokelele nakuziva lyova, co valihozwele umo na mukwavo ngwavo, “Munu wakufwa vatijo ou? Uje nameme lihunzi na mankimba vimwononoka!”

Yesu akangwisa munalume wa minzinzime yakujwala

(Mateo 8:28-34; Mako 5:1-20)

26Yesu na vandongisi vendi vajavukile vetele ku lifuti lya Ngelasa,#8:26 NGELASA: Kunungulula kumo ngwavo, Ngandalene, (kenga Mateo 8:28), kunungulula kukwavo ngwavo, Ngelengesa. musambwa ya Lishali lya Ngalileya. 27Omo Yesu walamatele a nunda, waliwanene na munalume umo watundile ku nganda wakele na minzinzime yakujwala. Simbu yakama kazalele vuzalo, co lalo katumbamene hembo embwe, oloni wakele lika ku viilo. 28Omo wamwene Yesu, co walilile manene, wawililile ku myanja ya Yesu, co watambekele ngwendi, “Yesu, Muna Njambi wa Akamwa ya Vyoshe! Vika ushaka kulinga nange? Njilinakukulomba ngwange, kesi unjihise embwe!” 29Wendekele ngeci omwo Yesu washikile uje munzinzime wakujwala kutunda muli ikeye, uje munzinzime wakujwala wamuyandesele visimbu vyavingi, co vanu vamunyungile nakumukuta malyenge ku mavoko nakumwaka mendi mu tukunju, oloni washutwile malyenge, co uje munzinzime wakujwala wamutwalele mu mambo.

30Yesu wamwihwile ngwendi, “Lizina lyove yove iya?”

Co wamukumbulwile ngwendi, “Lizina lyange yange ‘mbunga,’ ” omwo minzinzime yakujwala yaingi yakovelele muli ikeye. 31Co ije minzinzime yakujwala yalombele Yesu ngeci kesi aitume ku mbulu yakulova manene kwisi ya kaye.

32Co kuje kwakele vutanga vwakama vwa vingulu, vakele nakulya kumukulo wa lilundu. Co ije minzinzime yakujwala yalombele Yesu aitave ikakovele mu vingulu, co Yesu waitavele. 33Co ije minzinzime yakujwala yatundile muli uje munalume yakakovelele mu vingulu. Co vutanga vwoshe vwashatukilile mu lishali, vwakanyongelelemo.

34Omo vaje vanu vaka-kunyunga vingulu vamwene vije vyalingiwile, co vashatukilile ku nganda vakambulwile vin̄anda vyoshe kuje kuli vaka-kulima. 35Co vanu vaileko nakukamona vije vyalingiwile, omo vezile kuli Yesu, co vawanene munalume uje wakele na minzinzime yakujwala natumbama ku mendi a Yesu, nazala mwamuvwa, nalikongomeka, co voshe vakele na lyova. 36Vaje vamwene vije vyalingiwile vambulwile kuli vanu mwakangukilile uje munalume. 37Asinoni vanu voshe va ku mutambela uje valombele Yesu atunde mu lifuti lyavo, omwo vazivile lyova lyakama. Co Yesu wakovelele mu vwato wavasezele. 38Oloni uje munalume yaatundisile minzinzime yakujwala walambelelele Yesu ngwendi “Njitave njiye amo nove.”

Oloni Yesu kamutavele embwe, wamulekele ngwendi, 39“Iluka kwimbo lyove ukambulule evi vyanakulingila Njambi.”

Co uje munalume waile mu nganda, walekele vanu vije vyamulingilile Yesu.

Muna Njailosi wa mumbanda na munakazi uje wakwatele ku cikoveyo ca Yesu

(Mateo 9:18-26; Mako 5:21-43)

40Omo Yesu welukile ku mutambela ukwavo wa lishali, mbunga yakama vamutambwile, omwo voshe vakele nakumuvandamena. 41Asinoni munalume umo lizina lyendi Njailosi wetele, wapwile mukulunu mu sinangonge. Watsikamene ku myanja ya Yesu, wamulambelelele aye ku njuvo yendi, 42omwo munendi umolika wa munakazi, wakele na myaka likumi na ivali, washakele kutsa.

Omo Yesu wakele nakuya, co vanu vamuzengelekele noku-noku. 43Akati kavo akele munakazi umo wakele na mushongo wakwita maninga myaka likumi na ivali, washandwele vimbongo vyendi vyoshe ku vimbanda,#8:43 WASHANDWELE VIMBONGO VYENDI VYOSHE KU VIMBANDA: Kunungulula kumo majwi awa aimo. oloni naumo wai wasele kumukangwisa. 44Wezile mu mbunga ya vanu munima ya Yesu wakwatele ku mukundwilo wa cikoveyo ca Yesu, aje vene maninga omine cau. 45Yesu wehwile ngwendi, “Iya nanjikwata?”

Voshe vavyanene, co Petulu wendekele ngwendi, “Shukulu, vanu vanakuzengeleka nakukusindakana noku-noku.”

46Oloni Yesu wendekele ngwendi, “Ali umo nanjikwata, omwo njinazivi nzili inatundu mu muvila wange.” 47Omo uje munakazi wamwene ngeci vanamuwana, wezile nakujaja na lyova wawililile ku myanja ya Yesu.Co ku mesho a mbunga ya vanu, walekele Yesu vika vyamukwatelele na muje mwendukilile a simbu ije vene. 48Yesu wendekele kuli ikeye ngwendi, “Munange, kukulaela kwove kunakukangwisa. Ya mu kwoloka.”

49Omo Yesu acili nakwendeka evi, co muluwa wezile watundile ku njuvo ya Njailosi, walekele Njailosi ngwendi, “Munove natsi, kesi upakese Mulongisi.”

50Oloni Yesu wazivileko, wendekele kuli Njailosi ngwendi, “ Kesi uzive lyova, kulaela lika, co enduka.”

51Omo Yesu wetele ku njuvo, katavesele munu weka kukovelamo kuvanga lika Petulu na Yowano na Yakomba na ishe ya uje mumbanda na vaina. 52Vanu voshe kuje valilile nakulinyenga ali uje mwanike. Co Yesu wendekele kuli vakevo ngwendi, “Kesi mulile, ou mwanike katsile embwe, oloni nalala lika tulo!”

53Vanu vamujolele, omwo vazivukile ngeci mwanike natsi.

54Oloni Yesu wamukwatele ku livoko wasanene ngwendi, “Munange, induka!” 55Mwonyo wendi welukile, co aje vene wendukile, co Yesu wavashikile ngeci vamwane vyakulya alye. 56Co visemi vendi valikomokelele, oloni Yesu wavashikile ngeci kesi valekeko munu umo vyuma vije vyalingiwile.

Currently Selected:

Luka 8: MBB

Highlight

Copy