Luka 7

Yesu akangwisa ngamba ya mukulunu wa mashwalale va Loma

(Mateo 8:5-13)

1Omo Yesu wamanesele kwendeka vyuma vyoshe evi kuli vanu, co waile ku Kapenauma. 2Mukulunu wa mashwalale va Loma wakele kuje wakele na ngamba yendi yazemene manene, co uje munu wavinjile washakele kutsa. 3Omo uje mukulunu wazivile lutsimo lwa Yesu, watumine vamo vakulunu va vaYunda kuli ikeye nakumulomba aije nakukangwisa ngamba yendi. 4Vezile kuli Yesu vamulambelelele manene ngwavo, “Ou munalume ashaka ngeci ukamukwase. 5Ikeye wazema vanu vetu, co lalo watutungilile sinangonge yetu.”

6Ngecivene, Yesu waile navo. Co omo wetele kuyehi na njuvo uje mukulunu wa mashwalale watumine vasamba vendi kuli Yesu nakumuleka ngwavo, “Shukulu, kesi ulipese omwo kucapandele yove ukakovele mu njuvo yendi. 7Nameme ikeye kapandele kwija kuli yove. Oloni endeka lika na lijwi, co ngamba yendi akakanguka. 8Omwo nendi ali mwisi ya moko ya vamyata vendi, co nendi lalo mashwalale vali mwisi yendi. Ashika umo ngwendi, ‘Ya!’ Co aya, co lalo ashika mukwavo ngwendi, ‘Ija!’ Co aija, co ashika ndungo yendi ngwendi, ‘Linga evi!’ Co alinga.”

9Yesu walikomokelele omo wazivile evi, co watengulukilile kuli ije mbunga yamukavele wendekele kuli vakevo ngwendi, “Njimileka ngwange, nakumo kwai kunjawana kukulaela kwakama ngwe oku, nameme mu Isalele kukulaela oku kwaimo.”

10Vaje miluwa omo velukile ku njuvo ya uje mukulunu vakawanene ngeci ngamba yendi nakanguka.

Yesu asangula muna fwile wa munalume

11Munima yevi#7:11 MUNIMA YEVI: Kunungulula kumo ngwavo, litangwa likwavo. Yesu waile ku nganda ya Naine, vandongisi vendi na mbunga yakama vamukavele. 12Omo ikeye wetele kuyehi na cikolo ca nganda, co tufunde vatuwile civimbi anja. Uje munalume watsile wapwile mwana umolika waumo fwile, co mbunga yakama vatundile muje mu limbo vakele amo nendi. 13Omo Mwene wamumwene, co wamuzivilileko mema ku mbunge, co wendekele kuli ikeye ngwendi, “Kesi ulile.” 14Asinoni Yesu waile wakakwatele ku vwango, co vaje tufunde vemanene. Yesu wendekele ngwendi, “Ove mukwenje! Njikuleka ngwange induka!” 15Co uje munalume watsile watumbamene washangumukile kwendeka, co Yesu wamwanene kuli vaina.

16Voshe vazivile lyova, co vashangazalele Njambi, vendekele ngwavo, “Muka-kwimanena wakama nasholoka akati ketu, Njambi naija nakwovola vanu vendi!”

17Co lutsimo olu lwa Yesu lwashandokelele mu Yundeya mwoshe na ku mafuti oshe a kulyata.

Miluwa vakutunda kuli Yowano Muka-kumbwitika

(Mateo 11:2-19)

18Omo vandongisi va Yowano vamulekele vyuma vyoshe evi, co Yowano wasanene vandongisi vavali, 19wavatumine kuli Mwene nakumwihula ngwavo, “Yove vene uje yatumbwile Yowano ngwendi akaija, indi tuvandamene weka lalo?”

20Omo vetele kuli Yesu, vendekele ngwavo, “Yowano Muka-kumbwitika natutumu kuli yove nakukwihula nga yove vene uje yatumbwile ngwendi akaija indi tucivandamene weka lalo.”

21A simbu ije vene Yesu wakangwisile vanu vavangi ku kuvinja kwavo, na ku mishongo yavo, na ku minzinzime yakujwala, co watonesele mesho a vanu vavangi. 22#Isa 35:5-6; 61:1 Co wakumbulwile miluwa va Yowano ngwendi, “Yeni mukaleke Yowano vyuma evi vimunamono nevi vimunazivi, tupuputwa vatona, vilema venda, vaka-mbumba vajela,#7:22 VAKA-MBUMBA VAJELA: Kenga 5:12. tusinda-matwi vaziva, vatsi vasanguka, co tuutu vavambulwila Vin̄da Vyavivwa. 23Vanavezika vaje kuvesi na vimata ali yange!”

24Omo miluwa va Yowano velukile, co Yesu walekele ije mbunga ali Yowano ngwendi, “Omo mwaile kuli Yowano mu mambo mwakamwene munu wa cifwa mukajo? Ikeye wafwile ngwe mwila waulaja utepozoka na lihunzi ndi? 25Mwaile nakumona vikajo? Munu nazala vuzalo vwasenga ndi? Vanu vakuzala ngacije nakukala mwamuvwa vakala mu mapela! 26Njilekeni, mwaililileko vikajo? Mwashakele kukamona muka-kwimanena ndi? Eyo, oloni mwakamwene uje natuvakana muka-kwimanena. 27#Mal 3:1 Omwo Yowano ikeye ivasonekele omwo Njambi wendekele ngwendi, ‘Kenga, njituma muluwa wange kulutwe lwove, ikeye akavwaesa ngila yove.’ 28Mwa vushunga njimileka ngwange, ku vanu voshe vaje vanakalako, kukwesi umo natuvakana Yowano. Oloni nameme ngoco uje wamundondo mu Vumwene vwa Njambi ikeye natuvakana Yowano.”

29 # Mat 21:32; Luk 3:12 Vanu voshe vamuzivile, vakevo amo na vaka-kutambula lisimu vononokele vushunga vwa Njambi, co vavambwitikile kuli Yowano. 30Oloni vaFaliseo na valongisi va majwi a Lishiko vavyanene vutumbe vwa Njambi vwa ali vakevo, co vavyanene kuvambwitika kuli Yowano.

31Yesu watwaleleo kwendeka ngwendi, “Ngecivene, vanu va matangwa ano njasa kuvesekesa na vikajo? Vanafu ngwe vika? 32Vakevo vanafu ngwe vanike vaje vanatumbama ku mutambela wakulandesela vyuma, co vatambekela ku vakwavo ngwavo, ‘Twamimbilile myaso ya vushombolwa, oloni kumwakinine! Twamimbilile myaso ya vusiwa, oloni kumwalilile!’ 33Omo Yowano Muka-kumbwitika wezile, kalile vyakulya nambe kunwa vinyu, co mwendekele ngweni, ‘Ali na munzinzime wakujwala!’ 34Omo Muna Munu wezile, ikeye walile nakunwa, co mwendekele ngweni, ‘Kengeni ou munalume! Watsa akulya na akunwa vinyu, co musamba wa vaka-kutambula lisimu na vaka-vuvi!’ 35Ngecivene, mana a Njambi anasholoka kupwa a vushunga kuli voshe vaje vaatambula.”

Yesu ali mu njuvo ya Simoni kaFaliseo

36KaFaliseo umo walanyele Yesu ngeci akalye nendi, co Yesu waile ku njuvo yendi watumbamene nakulya. 37#Mat 26:7; Mak 14:3; Yow 12:3 Co munakazi umo wamuje mu nganda, wapwile muka-vuvi. Omo wazivile ngwavo Yesu ali mu njuvo ya uje kaFaliseo nakulya, co wambatele lilulu lyakushula lya mazi a seo, 38wemanene kunima ya Yesu, ku myanja yendi nakulila, nakujulisa myanja ya Yesu na misozi. Co wasikumwine myanja ya Yesu na vin̄ambu vyendi, waitsembele, co waivwavesele na mazi aje. 39Omo uje kaFaliseo wamwene evi, wendekele mu mbunge yendi ngwendi, “Nga ou munalume mwa vushunga napu muka-kwimanena, nga nazivuka ou munakazi alinakumukwata mavoko, nga nazivuka kuyoya kwendi kwakuvi kuje alinakuyoya!”

40Yesu wendekekele kuli ikeye ngwendi, “Simoni, njishaka kukuleka vimo.” Co wamukumbulwile ngwendi, “Eyo, Mulongisi njileke.” 41Yesu wamulekele ngwendi, “Kwakele vanalume vavali vakumwine vimbongo kuli muka-kukumwisa. Umo wakumwine vimbongo vya siliva vyakupwa 500, mukwavo lalo wakumwine vimbongo vya siliva makumi atanu. 42Naumo wai wasele kumwilwisilavyo, co wavecelele voshe vavali. Cooni njileke, iya umo akati kavo wamuzemene manene?”

43Simoni wakumbulwile ngwendi, “Njayongola ngwange uje wakele na vyavingi ikeye yasambesele manene.”

Yesu wamulekele ngwendi, “Unayongola mwamuvwa.” 44Co watengulukilile kuli uje munakazi, wendekele kuli Simoni ngwendi, “Unamono ou munakazi? Njinakovela muno mu njuvo yove, oloni kuwanjanene mema akujwela ku myanja yange, oloni ou nanjijwelesa ku myanja yange na misozi yendi, co nanjisikumuna na vin̄ambu vyendi. 45Yove kuwanjitsembele omo njinezile, oloni ou munakazi anga njinezilile muno kalikelele kutsemba ku myanja yange. 46Yove kuwavwaesele mazi akuvwavesa mutwe wange, oloni ou munakazi navwavesa myanja yange na mazi a seo yakama. 47Njikuleka ngwange, vivi vyendi vyavingi vanavisambesa omwo namwesa cizemo cendi cakama. Oloni kuli uje vanecela vyavindondo, akamwesa cizemo cacindondo.”

48Yesu wendekele kuli uje munakazi ngwendi, “Vivi vyove vanavisambesa.”

49Co vaje vatumbamene ku mesa nendi vashangumukile kwendeka akati kavo ngwavo, “Iyajo ou asa kusambesa vivi?”

50Oloni Yesu wendekele kuli uje munakazi ngwendi, “Kukulaela kwove kunakwamena, ya mu kwoloka.”

Currently Selected:

Luka 7: MBB

Highlight

Copy