Luka 21

Mulambu wa fwile

(Mako 12:41-44)

1Yesu wakengezekele, co wamwene vaka-kufuka valinakulambula vwana vwavo mu mbango ya mu Njuvo ya Shukulu Kalunga, 2co wamwene lalo fwile umo wa kautu walambwile tumo tumbongo tuvali twatundondo twa vunengu. 3Co Yesu wendekele ngwendi, “Mwa vushunga njimileka ngwange ou fwile wa kautu nalambula vyavingi kutuvakana voshe. 4Omwo veka vanakala nakulambula vyakusalao ku vufuko vwavo, oloni ikeye nalambula vyose vyanakele navyo ngwe ku vuutu vwendi, nalambula vyoshe vyanakele navyo vyakulikwasa navyo.”

Yesu endeka a kunyonga kwa Njuvo ya Shukulu Kalunga

(Mateo 24:1-2; Mako 13:1-2)

5Vandongisi vamo vakele nakwendeka a Njuvo ya Shukulu Kalunga, vuvwa vwayo na vuvwa vwa mamanya, na vwana vakele nakulambula kuli Njambi. Co Yesu wendekele ngendi, 6“Vyoshe evi munamono, simbu ikaija omo vitozi veni vakatundisa limanya lyoshe lya njuvo mu mutambela walyo, co vinjuvo vyoshe vikasiwuka.”

Tuyando na mapakeso

(Mateo 24:3-14; Mako 13:3-13)

7Co vamwihwile ngwavo, “Mulongisi, mwaka uka evi vyoshe vikasholoka? Na cizivukiso mukajo tukazivuka naco ngwetu simbu inete ngeci vyuma vyoshe evi vilingiwe?”

8Yesu wendekele ngwendi, “Nyanyameni kesi vamikwise. Vanu vavangi vakaija mu lizina lyange nakwendeka ngwavo, ‘Yange vene ikeye!’ Co lalo ngwavo, ‘Simbu inete!’ Oloni kesi mukavakavangeye. 9Omo mukaziva vinzita nakulitengulukila, kesi mukajujeke, vyuma evi vinapande kusholoka, oloni kuvilumbununa ngeci kukotoka kwa kaye kunete.”

10Co wendekele lalo ngwendi, “Lifuti limo likalwa nzita na lifuti likwavo, co vumwene vukalwisa vumwene vukwavo. 11Kukakala mandunduma akama, na njala ya lyangengela, na mishongo yakulitambwisa kwoshe-ikwoshe, kukakala vyuma vyakujujwisa nakukomokesa vikatunda mwilu. 12Omo simbu kanda vyuma evi visholoke, vakamikwata nakumiyandesa, vakamitwala ku masinangonge avo nakukamisompa nakumyaka mu tumenga, co vakamitwala kuli vimyene na kuli vaka-kushwana omwo lizina lyange. 13Co eyi ikapwa simbu yaivwa kuli yeni yakwambulula Vin̄anda Vyavivwa. 14#Luk 12:11-12 Ngecivene, vyakeni mu vimbunge vyeni kesi muyongwele cimweja ngweni vati tukendeka, 15omwo njikamyana majwi na mana ngeci vitozi veni kuvakasa kumivayesa nambe kuvyana vimukendeka. 16Oloni visemi veni, na vandolome veni, na vavushoko vweni, na vasamba veni vakevo vakamisholola, co vamo akati keni vakavatsiya. 17Voshe vakamizinda omwo lizina lyange. 18Oloni nambe cin̄ambu cimo ca ku mutwe weni kucikazimbala. 19Koleseni, co mukaamena myonyo yeni.

Yesu endeka a kunyonga kwa Yelusalema

(Mateo 24:15-21; Mako 13:14-19)

20“Omo mukamona Yelusalema vanaizengeleka ku mbunga ya mashwalale, zivukeni ngweni kunyonga kwayo kuli muyehi. 21Asinoni vaje vali mu Yundeya vakatewela ku malundu, co vaje vali mu nganda vanapande kutundamo, co vaje vali anja ya nganda ku mahya kesi vakovelemo. 22#Hoz 9:7 Omwo aje akewo matangwa akunyanyamesa ngeci vyuma vyoshe vije vivendekele mu visoneka vipwe vya vushunga. 23Oloni luvinda ku vanakazi vaje vakakala na tufumba na vanakazi vaje vakajamwesa a simbu ije! Tuyando twakama tukaija a lifuti eli, na vukalu vwa Njambi vukaija ali vanu ava. 24Vamo vakavatsiya na mukwale, co vakwavo vakavatwala vunzinda ku mafuti eka, co vaka-kujeneka kukulaela vakalyatangela Yelusalema noo simbu yavo inete.

Kwija kwa Muna Munu

(Mateo 24:29-31; Mako 13:24-27)

25 # Isa 13:10; Ezek 32:7; Njwe 2:31; Kuj 6:12-13 “Co vyuma vyakukomokesa vikalingiwa ku litangwa na ku ngonde na ku vingongonosi. Miyati yoshe ya asi vakajeneka cinyangavili, vakaziva lyova lya kuluma kwa mema a kalunga nakukuma kwa mankimba ao. 26Vanu vakatsa kavela-vela omo vakavandamena vije vikasholoka ano asi oshe, omwo vyuma vyoshe vya nzili vyakala mwilu vikatunda mu myela yavyo. 27#Ndan 7:13; Kuj 1:7 Asinoni Muna Munu akasholoka akaija a mashelwa na nzili yakama na vumpau. 28Omo vyuma evi vikashangumuka kulingiwa, katukeni mukenge kwilu, omwo kupatuka kweni kuli muyehi.”

Cilongesa ca muti wa mukuyu

(Mateo 24:32-35; Mako 13:28-31)

29Asinoni Yesu wavatelelele cisimo eci ngwendi, “Singanyekeni a muti wa mukuyu na miti yeka yoshe. 30Omo mumona maputa ayo ashangumuka kujovelela, mwazivuka ngweni nyangao ili muyehi. 31Mu cifwa eci vene, omo mukamona vyuma evi vilingiwa, mukazivuka ngeci Vumwene vwa Njambi vuli muyehi.

32“Anukeni ngeci vyuma vyoshe evi vikalingiwa simbu kanda vanu voshe ava valinakuyoya ololo vatse. 33Lilu na asi vikaita, oloni majwi ange kuwakaiti.

Munapande kukengelela

34“Nyanyameni! Kesi mushote manene vimbunge vyeni akulya na akunwa na a vishoti vya mwonyo ou, kutewa Litangwa lije likamikasumuna ngwe muukamwashuka mweto. 35Omwo litangwa lije likaija ku vanu voshe vali ano asi. 36Nyanyameni nakulombela simbu yoshe ngeci mukakale na nzili yakuhyana vyoshe vije vikalingiwa nakwimana ku mesho a Muna Munu.”

37 # Luk 19:47 Yesu wakele nakulongesa mu Njuvo ya Shukulu Kalunga matangwa aje, co ku simbu ya cingwezi, watundilemo waile ku Munkinda wa Oliveta kukakalako vutsiki vwoshe. 38Co mutondo-tondo vanu voshe vakele nakuya ku Njuvo ya Shukulu Kalunga nakumutolilila.

Currently Selected:

Luka 21: MBB

Highlight

Copy