Luka 20

Cihula ca moko ya Yesu

(Mateo 21:23-27; Mako 11:27-33)

1A litangwa limo omo Yesu wakele nakulongesa mu Njuvo ya Shukulu Kalunga nakwambulula Vin̄anda Vyavivwa kuli vanu, co vakulunu va vaka-kukombelela na valongisi va majwi a Lishiko amo na vakulunu vezile 2co vendekele kuli ikeye ngwavo, “Tuleke, na moko yeyajo ulinakulinga nayo vyuma evi? Iyajo nakwana moko eyi?”

3Yesu wavakumbulwile ngwendi, “Nange lalo njimihula cihula cimo. Njilekeni, 4moko yambwitikile nayo Yowano yatundile kuli Njambi indi yatundile kuli munu?”

5Co vashangumukile kulihozola akati kavo ngwavo, “Vatijo twendeka? Nga tukumbulula ngwetu, ‘Yatundile kuli Njambi,’ co akatwihula ngwendi, ‘Omwo vikajo kumwamukulaelele?’ 6Oloni nga twendeka ngwetu, ‘Yatundile kuli munu,’ Co eyi mbunga yoshe ilikuno vatwasha mamanya, omwo voshe vazivuka ngeci Yowano wapwile muka-kwimanena.” 7Co vamukumbulwile ngwavo, “Kutuzivuka kuje kuyatundile.”

8Yesu wendekele kuli vakevo ngwendi, “Nange kunjimileke eyi moko njilinakulinga nayo vyuma evi.”

Cisimo ca vaka-kupanga mu citungu ca mikolovozi ya vushuka vwa vinyu

(Mateo 21:33-46; Mako 12:1-12)

9 # Isa 5:1 Yesu watelelele vanu cisimo eci ngwendi, “Kwakele munalume umo wakele na citungu ca mikolovozi ya vushuka vwa vinyu, co wasezele cije citungu kuli vaka-kupanga, co waile vungenzi ku lifuti lyakulyala wakeshwaleleko simbu yakama. 10Omo simbu yakuvuya vushuka yetele, watumine ndungo yendi kuli vaje vaka-kupanga mukutambulako litambelo lyendi ku vije vanateje. Oloni vaje vaka-kupanga vapupangele uje ndungo nakumwilwisa mavoko-voko. 11Co uje vavenya citungu watumineko lalo ndungo mukwavo, oloni vaje vaka-kupanga vamupupangele nakumulinga mwamuvi, co vamwilwisile mavoko-voko. 12Watumineko lalo ndungo wamucitatu, co vaje vaka-kupanga vamuvulumwine lalo, nakumumbila anja ya citungu. 13Asinoni vavenya citungu wendekele ngwendi, ‘Vati njilinga? Njikatuma munange ou injazema, mwa vushunga vakamusingimika!’ 14Oloni omo vaka-kupanga vamumwene, co valyendekesele akati kavo ngwavo, ‘Ou ikeye mwana wa vavenya citungu. Ijeni tumutsiye, co tukafungulula vufuko vwendi!’ 15Ngecivene, vamumbilile anja ya citungu, co vamutsiile.”

Yesu wavehwile ngwendi, “Vika vyakalinga uje vavenya citungu kuli vaje vaka-kupanga? 16Akaija nakutsiya vaje vanu nakwana cije citungu ku vaka-kupanga veka.”

Co omo vanu vazivile evi, vendekele ngwavo, “Mwa vushunga vene kesi ngoco embwe!”

17 # Mya 118:22 Yesu wavakengele nakuvehula ngwendi, “Visoneka vyanunguluka vati?

‘Limanya lije livavyanene vaka-kutunga

ngwe kulyesi na seo,

likelyo ololo linapu lya seo yakama

kutuvakana mamanya oshe.’

18“Woshe uje akawila a limanya lije akapokozoka, oloni nga lije limanya likawila ali munu umo, likamutsena kupwa likungu.”

Cihula ca kufweta lisimu

(Mateo 22:15-22; Mako 12:13-17)

19Co valongisi va majwi a Lishiko na vakulunu va vaka-kukombelela vayongwele kukwata Yesu aje vene, omwo vazivukile ngwavo cisimo eci nacitela vakevo, oloni vatewele vanu. 20Ngecivene, vakengelelele simbu yaivwa. Co vaanene lizika-kanwa kuli vanu vamo valipwise ngwe vaka-vushunga, co vavatumine kuli Yesu ngeci vakamweseke na vihula ngeci vamwane ku moko na ku nzili ya Nguvulu wa vaLoma. 21Co vaje vaka-kunenga vehwile Yesu ngwavo, “Mulongisi, twazivuka ngwetu yove ukendeka vushunga, co ukalongesa vushunga vwa cizango ca Njambi ali munu kujeneka kulipesa a viyongola vya vanu. Omwo kuwesi kukenga ali munu nambe wapwa wa vulemu nambe kesi wa vulemu. 22Tuleke, kuma lishiko lyetu livindika kufweta lisimu kuli Sezale indi embwe?”

23Oloni Yesu wazivukile viyongola vyavo, co wendekele kuli vakevo ngwendi, 24“Njimweseni mbongo ya siliva. Cihanga ceya na lizina lyeya evi viliho?”

Co vamukumbulwile ngwavo, “Vya Sezale!”

25Co Yesu wendekele kuli vakevo ngwendi, “Mwamuvwa, ngecivene, aneni kuli Sezale vije vinakundama kuli Sezale, co aneni kuli Njambi vije vinakundama kuli Njambi.”

26Co kuvasele kumuwanena mulonga ku majwi awa ku mesho a vanu, co voloke kuluu valikomokelele kukumbulula kwendi.

Cihula ca kusanguka ku vatsi

(Mateo 22:23-33; Mako 12:18-27)

27 # Vil 23:8 Asinoni vaSanduki vamo, vaje vaka-kwendeka ngwavo vanu kuvakasanguka ku vatsi, vezile kuli Yesu nakumwihula ngwavo, 28#Kwi 25:5 “Mulongisi, Mosesa watusonekelele lishiko eli ngwendi, ‘Nga munalume atsa, co aseza munakazi wendi oloni kesi na vana, co ndolome yendi ambate uje fwile ngeci vakase kukala na vana va ali uje natsi.’ 29Cooni kwakele vandolome vatanu na vavali, co uje wa mukulunu wambatele munakazi, co watsile kujeneka vana. 30Co uje wamucivali wambatele uje munakazi, 31co na wamucitatu lalo. Cuma cimo cafwile ngacije kuli voshe vaje vatanu na vavali, voshe vatsile kujeneka vana. 32Co akukotoka kwa vyoshe evi munakazi watsile. 33Ngecivene, a litangwa lije omo vatsi vakasanguka, uje munakazi akapwa weya akati ka vaje voshe vamwambatele vatanu na vavali?”

34Yesu wavakumbulwile ngwendi, “Vanu va simbu ino vakambata vanakazi, co vakavashombwesa lalo, 35oloni vanalume na vanakazi vaje vanafwila kusanguka ku vatsi nakuyoya mu simbu ije ikaija kulutwe kuvakambata nambe kushomboka. 36Vakevo vakafwa ngwe tungelo kuvakasa lalo kutsa. Vakevo vanapu vana va Njambi, omwo vanasanguka ku vatsi. 37#Kut 3:6 Mosesa naana vukaleo ngeci vatsi vakasanguka. Mu muzimbu wa liputa lyakele nakwenya Mosesa alinakwendeka ali Shukulu Kalunga ngeci ikeye ‘Njambi ya Avilahama, Njambi ya Isake, na Njambi ya Yakomba.’ 38Ikeye wapwa Njambi wa vaka-kuyoya, kesi wa vaka-kutsa embwe, omwo vyoshe vilinakuyoyela muli ikeye.”

39Co vamo valongisi va majwi a Lishiko vendekele ngwavo, “Mulongisi, unakumbulula mwamuvwa!” 40Omo kuvashukile lalo kwihula Yesu vihula vyeka.

Cihula ali Wakuvwavesa

(Mateo 22:41-46; Mako 12:35-37)

41Yesu wavehwile ngwendi, “Vatijo valinakwendeka ngwavo Wakuvwavesa akapwa wa ku naanga ya Ndaviti? 42#Mya 110:1 Omwo vavenya Ndaviti nendeka mu Livulu lya Myaso ngwendi,

‘Shukulu Kalunga wendekele kuli Shukulu yange ngwendi,

tumbama ku livoko lyange lya cilyo,

43noo njikafungulula vitozi vove

nakuvapwisa ngwe kacitumbamo ka ku myanja yove.’

44“Ndaviti ikeye vavenya wamutumbwile ngwendi ‘Shukulu’, ngecivene, vatijo Wakuvwavesa apwa mutekulwila wa Ndaviti?”

Yesu anangula ngeci vanyanyame kuli valongisi va majwi a Lishiko

(Mateo 23:1-36; Mako 12:38-40)

45Omo mbunga ya vanu vakele nakumutolilila, co Yesu wendekele kuli vandongisi vendi ngwendi, 46“Nyanyameni kuli valongisi va majwi a Lishiko, vaje vazema kwenda na vikoveyo vyavo vyavilaja nakuvakandelela na kasingimiko mu mitambela yakulandesela nakwangula vitumbamo vyavivwa mu masinangonge na myela ya vanu va vulemu ku viwano, 47vakevo vakakwisi vifwile nakuvevila vinjuvo vyavo, co vafwika vilinga vyavo na malombelo amalaja! Co kunyanyamesa kwavo kukapwa kwakama manene!”

Currently Selected:

Luka 20: MBB

Highlight

Copy