Luka 19

Yesu na Sangeo

1Yesu wakovelele mu Yeliko, co watuvakanene. 2Kuje kwakele mukulunu umo muka-kutambula lisimu lizina lyendi Sangeo, uje wapwile muka-kufuka. 3Ikeye washakele kumona Yesu, oloni kasele kumumona omwo Sangeo wapwile munalume wamwihi, co lalo omwo mbunga yaingi. 4Ngecivene, washatukilike kulutwe lwa mbunga, co walondele ku muti wa linongo ngeci amone Yesu uje wetilile mu ngila ije. 5Omo Yesu wetele a mutambela uje, wakengele kwilu, co wendekele kuli Sangeo ngwendi, “Shuluka vwasi Sangeo, omwo litangwa lyalelo njikakala ku njuvo yove.”

6Co Sangeo washulukile vwasi nakutambula Yesu nakujolela kwakama. 7Vanu voshe vaje vacimwene vangungutile ngwavo, “Munalume ou nai ngwe mungenzi ku njuvo ya muka-vuvi!”

8Co Sangeo wemanene nakwendeka kuli Mwene ngwendi, “Tolilila Shukulu, njikana litambelo lya vufuko vwange kuli tuutu, nga njatambwile cimo kuli umo mu ngila ya makuli, co njikamufweta visimbu viwana.”

9Yesu wendekele kuli ikeye ngwendi, “Kwovoka kunete ku njuvo ino ku litangwa lyalelo, omwo munalume ou ikeye lalo muna Avilahama. 10#Mat 18:11 Muna Munu wezile nakushakezeka nakwovola vaka-kuzimbala.”

Cisimo ca vimbongo vya ngolinde

(Mateo 25:14-30)

11 # Mat 25:14-30 Omo vanu vakele nakutolilila ku vyuma evi, Yesu wavatelele cisimo. Ikeye wakele kuyehi na Yelusalema, co vayongwele ngeci Vumwene vwa Njambi ololo vusholoka. 12Co wendekele ngwendi, “Kwakele munu wa vulemu uje waile ku lifuti lyakulyala ngeci vakamupwise mwene, asinoni eluke kwimbo lyendi. 13Omo kanda aye, co wasanene vangamba vendi likumi, co wavanene umo na umo mbongo ya ngolinde nakuvaleka ngwendi, ‘Moneni vika mukawanao a vyuma evi a simbu ije omo yange njinai.’ 14Oloni vanu va mu lifuti lyendi vamuzindile manene, co vatumine miluwa munima yendi ngwavo, ‘Ou munalume kutumushaka apwe mwene yetu embwe.’

15“Co uje munalume vamupwisile mwene, co welukile. Aje vene washikile ngeci vamusanene vaje vangamba vaanene vimbongo, ngeci azivuke vingai vivanawanenao. 16Co wakulivanga wezile wendekele ngwendi, ‘Shukulu, njinawanenao likumi lya vimbongo vya ngolinde a mbongo imolika ije mwanjanene.’ 17Co wendekele kuli ikeye ngwendi, ‘Unalingi mwamuvwa manene, u ngamba wamuvwa! Omwo walongwele mu vyuma vyavindondo, ngecivene, njikakupwisa muka-kutwamenena vinganda likumi.’ 18Co wamucivali wezile wendekele ngwendi, ‘Shukulu, njinawanenao vimbongo vya ngolinde vitanu a mbongo imolika ije mwanjanene.’ 19Co kuli ou lalo wendekele ngwendi, ‘Njikakupwisa muka-kutwamenena vinganda vitanu.’ 20Co ngamba mukwavo wezile wendekele ngwendi, ‘Shukulu, mbongo yove eyi, njaitulikile a lilesu. 21Njakuzivilile lyova, omwo wapwa u munu wamukalu. Ukanono cije kesi cove nakuteja kuje kuwakuvile.’ 22Co Shukulu yendi wamulekele ngwendi, ‘Ove ngamba wamuvi! Njikakuhisa na majwi akutunda mu kanwa kove! Ngwange wanjizivukile ngwove yange nji munu wa mukalu, njikanono cije kesi cange, nakuteja cije kunjakuvile. 23Omwo vika kuwaanene oyo mbongo yange kuli vaka-kusekasana? Ngeci yange omo njinaija nga njinawana mbongo yange amo nakakondweso kayo.’ 24Co ikeye wendekele kuli vaje vemaneneko ngwendi, ‘Munyekeni oyo mbongo ya ngolinde muyane kuli ngamba uje ali na vimbongo likumi.’ 25Oloni vakevo vendekele kuli ikeye ngwavo, ‘Shukulu, ali laja na vimbongo likumi!’ 26#Mat 13:12; Mak 4:25; Luk 8:18 Ikeye wavakumbulwile ngwendi, ‘Mwa vushunga njimileka ngwange, uje alinavyo vakamuwezelelako, oloni uje kesi navyo, nameme vene vije vyavindondo vyalinavyo vakamutambulavyo. 27Ngecivene, ngwe ava vitozi vange vaje kuvashaka ngeci yange njipwe mwene yavo, vaneneni kuno nakuvatsiila ku mesho ange!’ ”

Yesu akovela na vumpau mu Yelusalema

(Mateo 21:1-11; Mako 11:1-11; Yowano 12:12-19)

28Omo Yesu wamanesele kwendeka evi, co waile kulutwe lwavo ku Yelusalema. 29Omo wetele kuyehi na Mbetefanje na Mbetaniya ku Munkinda wa Oliveta, co watumine vandongisi vavali kulutwe, 30wavashikile ngwendi, “Yeni ku limbo lije lili kulutwe lweni, omo mukovelamo mukawana muna cimulu vanamukutu, uje kanda alondeo munu. Co muzituleni munjineneleye. 31Nga munu umo amihula ngwendi vika mumuzitwila, mulekeni ngweni Shukulu#19:31 SHUKULU: Nambe, vavenya. amushaka.”

32Co vaje vavatumine vaile vakawanene vyuma vyoshe ngwe muje mwavalekele Yesu. 33Co omo vakele nakuzitula uje muna cimulu, co vavenyaye wavehwile ngwendi, “Vika mumuzitwila owo muna cimulu?”

34Co vakumbulwile vendekele ngwavo, “Shukulu alinakumushaka,” 35co vatwalele uje muna cimulu kuli Yesu. Co vajalele vikoveyo vyavo a mwongo wa uje muna cimulu, co vakwasele Yesu ngeci alondeo. 36Omo walondeleo, co vanu vajalele vikoveyo vyavo mu ngila.

37Omo Yesu wetele kuyehi na Yelusalema, ku mutambela kuje ngila yashelumukilile ku Munkinda wa Oliveta, co mbunga yakama ya vandongisi vendi vashangumukile kukandelela kuli Njambi nakumushangala mu majwi akutambeka omwo a vyuma vyoshe vyakama vije vivamwene 38#Mya 118:26 ngwavo, “Njambi avezikise mwene ou aija mu lizina lya Shukulu Kalunga! Kwoloka kukale mwilu na vumpau kuli Njambi!”

39Co vaFaliseo vamo vaje vakele mu mbunga vendekele kuli Yesu ngwavo, “Mulongisi, leka vandongisi vove voloke kuluu!”

40Yesu wavakumbulwile ngwendi, “Mwa vushunga njimileka ngwange, nga ava voloka kuluu, co mamanya awa akatambeka.”

Yesu alilila Yelusalema

41Yesu wetele kuyehi na nganda, co omo waimwene, walilile manene 42wendekele ngwendi, “Nga wazivukile lika lelo ngwove vika vishakiwa ngeci kukale kwoloka! Oloni ololo kuwasa kucimona! 43Simbu ikaija omo vitozi vove vakakuzengeleka mu cimpaka, nakukwaka mukati kavo, nakukushetwila mukati ku mitambela yoshe noku-noku. 44Co vakevo vakakunyongesa njwa amo na vanu vove vaje vali mu vivumbe vyove, kuvakaseza limanya limo mu mutambela walyo, omwo yove kuwazivukile simbu omo Njambi wezile nakukwovola!”

Yesu aya ku Njuvo ya Shukulu Kalunga

(Mateo 21:12-17; Mako 11:15-19; Yowano 2:13-22)

45Yesu wakovelele mu Njuvo ya Shukulu Kalunga, co washangumukile kushekamo voshe vaje vakele nakulanda nakulandulwilamo, 46#Isa 56:7; Njele 7:11 wendekele kuli vakevo ngwendi, “Vanasoneka mu Visoneka ngwavo Njambi wendekele ngwendi, ‘Njuvo yange vakaitumbula Njuvo yakulombelela.’ Oloni yeni munaipwisa mwela mwakuvanda vezi!”

47 # Luk 21:37 Yesu wakele nakulongesa mu Njuvo ya Shukulu Kalunga a litangwa na litangwa. Co vakulunu va vaka-kukombelela na valongisi va majwi a Lishiko na vantwama va vanu vashakele kumutsiya, 48oloni kuvasele kuwana ngila muka vasa kucilinga, omwo vanu voshe vakele nakumutolilila ngeci kesi valojeo nambe lijwi limo.

Currently Selected:

Luka 19: MBB

Highlight

Copy