Kushangumuka 42
42
Vandolome va Yosefa vaya ku Ingito nakulanda tiliku
1Omo Yakomba wazivile ngeci ku Ingito kuli tiliku, co wendekele kuli vana vendi ngwendi, “Vikajo mwalikengelela ngoco ngacije? 2#Vil 7:12 Njazivi ngwavo ku Ingito kuli tiliku. Yeniko mukalandeko vyakulya ngeci kesi tulanduke ku njala.” 3Ngecivene, vandolome va Yosefa likumi vaile ku Ingito nakulanda tiliku. 4Oloni Yakomba katumine Mbenjemani shongo ya Yosefa amo na vandolome vendi, omwo wakele na lyova ngwendi amo kukakala cuma cimo cikalingiwa ali ikeye.
5Vana va Yakomba vaile amo na vakwavo nakulanda tiliku, omwo kwakele njala ya lyangengela mu lifuti lya Kanana. 6Yosefa wapwile mwata wakama mu lifuti lya Ingito, ikeye wakele nakulandesa tiliku kuli vanu voshe va mu kaye. Co vandolome va Yosefa vezile nakutsikama a mavuli nakulemesa ku mesho endi. 7Omo Yosefa wamwene vandolome vendi, wavazivukile, oloni walingile ngwe kavazivuka, wavehwile na vukalu ngwendi, “Yeni mutunda kulijo?”
Co vamukumbulwile ngwavo, “Tulinakutunda ku Kanana tunaija nakulanda vyakulya.”
8Nameme Yosefa wazivukile vandolome vendi, oloni vakevo ni kuvamuzivukile. 9#Kus 37:5-10 Yosefa wanukile vije vinjozi vyalotele ali vakevo, co wendekele ngwendi, “Yeni munapu vaka-kunenga lifuti, ngeci muwane akukovelela.”
10Vamukumbulwile ngwavo, “Embwe shukulu. Yetu vindungo vove tunaija kuno nakulanda vyakulya. 11Yetu voshe tunapu vana va munu umo. Kesi yetu vaka-kunenga lifuti, embwe shukulu. Twapwa vanu va vushunga.”
12Yosefa wendekele kuli vakevo ngwendi, “Embwe! Yeni munaija mukuwana vukovelelo mu lifuti lyetu.”
13Vakevo vendekele ngwavo, “Yetu vangamba vove twapwile mu vundolome vwetu likumi na vavali. Tuvavoshe tu vana va munu umo mu lifuti lya Kanana. Ndolome yetu umo watsa, co mutinikila wetu nasala na tate.”
14Oloni Yosefa wavakumbulwile ngwendi, “Ngwe omo vene njinendeka, yeni munapu tunenga va lifuti. 15Eyi ikeyo ngila njikamyeseka nayo. Njilisinga mu lizina lya mwene ngeci yeni kumwiluka kuvanga shongo yeni naija kuno. 16Tumeni umo weni ngeci aye akamushake. Co yeni munasalao vakaminyungila mu kamenga noo kunasholoka vushunga ngwe omwo mulinakwendeka. Nga ngoconi, mwa vushunga ngwe mwayoya mwene, mwa vushunga vene yeni munapu tunenga va lifuti.” 17Asinoni Yosefa wavaakele mu kamenga matangwa atatu.
18Co a litangwa lyamucitatu Yosefa wendekele kuli vandolome vendi ngwendi, “Yange nji munu wakuzivila Njambi lyova, njikamena myonyo yeni a cuma cimo. 19Nga munapu mu vanu va vushunga, umo weni asale mu kamenga muje mumunakele, co yeni munasalao ilukeni mutwale tiliku eyi munalanda ku naanga yeni, vaje valinakutsa ku njala. 20Munapande kwija na shongo yeni kuno kuli yange, ngeci vukaleo vweni vwakusholoke ngeci mwanjileke vushunga, cooni kunjikamitsii.”
Vakevo vatavele a cuma eci, 21co valyendekesele akati kavo ngwavo, “Eyo, ololo tulinakuyanda ali vije vitwalingile kuli ndolome yetu. Twamumwene ali mu tuyando twakama manene omo watulombele ngeci tumukwase, oloni kutwamutolililile. Ngecivene, tuli mu tuyando otu ololo.”
22 #
Kus 37:21-22
Co Luvena wavakumbulwile ngwendi, “Kunjamilekele ngwange, kesi muvulumune ou mukwenje ndi? Oloni yeni mwavyanene kunjitolilila. Co ololo tulinakutambula fweto omwo a kutsa kwendi.” 23Yosefa wazivile vije vakele nakwendeka, oloni vakevo kuvacizivukile omwo vakele nakwendeka kuli ikeye mukuvanungulwila. 24Yosefa wavasezele, co waile nakulila. Co welukile kuli vakevo nakwendeka navo lalo, ngeci waangwileo Simyoni, co wamukutile oku vakevo vanakengeko.
Vandolome va Yosefa veluka ku Kanana
25Asinoni Yosefa washikile vangamba vendi ngeci vashulise vinjeke vya vandolome vendi na tiliku, co vavelwisilile vimbongo vyavo munu na munu ku njeke yendi, nakuvana vyakulya vya mu vungenzi vwavo. Co mukemwo vene muvalingile. 26Vandolome vendi valongekeyeye tiliku ije ivalandele a vimulu vyavo, ngeci vaile. 27Omo vetele ku mwela uje uvakalalelele, umo wavo wazitwile ku njeke yendi ngeci aane cimulu cendi vyakulya, co wawaneneko vimbongo ku kanwa ka njeke yendi. 28Wasanene vandolome vendi ngwendi, “Kengeni yange vananjiilwisila vimbongo vyange. Evi, vili muno mu njeke yange!” Co vimbunge vyavo vyavupukile, valihozwele na lyova ngwavo, “Vikajo evi vyanalingi Njambi kuli yetu?”
29Omo vetele kuli ishavo Yakomba mu Kanana, vamulekele vyoshe vije vyalingiwile kuli vakevo ngwavo, 30“Mwata wakama wa lifuti lya Ingito nendekele netu na vukalu nakututumbula ngwendi tunapu vaka-kunenga lifuti lyendi. 31Co twamukumbulwile ngwetu, ‘Kesi yetu vaka-kunenga lifuti embwe. Yetu tu vanu va vushunga. 32Twapwile likumi na vavali mu vundolome vwetu tuvavoshe. Tatetu umolika. Ndolome yetu umo watsa, co mutinikila kwacili ku Kanana amo na tatetu.’ 33Co uje munu watukumbulwile ngwendi, ‘Njikamikulaela a ngila eyi, nga cili yeni mwapwa vanu va vushunga, umo weni asale nange kuno, co yeni mwasalao twaleleni tiliku vavushoko vweni valinakutsa ku njala, katukeni muye. 34Yeni mukashake mutinikila weni mumunene kuli yange. Asinoni njakuzivuke ngwange kuma kesi yeni vaka-kunenga lifuti, oloni munapu vanu va vushunga. Co njikamiilwisila ndolome yeni, ngeci mukapwe vaka-kulandulula mu lifuti lino.’ ”
35Omo vazitwile ku vinjeke vyavo, kengeni munu na munu wawanene ngeci vanamwilwisila vimbongo vyendi. Co omo vamwene vimbongo, vakevo na ishavo Yakomba vazivile lyova. 36Ngecivene, ishavo Yakomba wendekele kuli vakevo ngwendi, “Yeni mushaka kunjinyeka vana vange voshe ndi? Yosefa wai, Simyoni wai, co yeni mushaka muye lalo na Mbenjemani! Mwa vushunga vene njili mu vukalu!”
37Luvena wendekele kuli ishe ngwendi, “Nga yange kunjikelwisa Mbenjemani kuli yove, co yove ukatsiya vana vange va vanalume vavali. Njaneye lika njimunyunge, co njikamwilwisa.”
38Oloni Yakomba wavakumbulwile ngwendi, “Munange kasa kuya neni. Mukulunu wendi watsa, endi lika nasala. Amo cuma cimo lalo cikalingiwa kuli ikeye a ngila, co mukanjikokela vusiwa vwakunjilya omwo yange njinakuluvala laja.”
Currently Selected:
Kushangumuka 42: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
