Kushangumuka 41

Yosefa anungulula vinjozi vya mwene wa Ingito

1Omo kwetile myaka ivali yamutunu, mwene wa Ingito walotele njozi. Mu njozi yendi walotele nemana ku ngenge ya Ndonga ya Nailo, 2co vingombe va lwavo vatanu na vavali vakununa vavavwa vatuukile mu ndonga valile mwila. 3Co vingombe va lwavo lalo vatanu na vavali vatuukile mu ndonga, vakukonya nakungwangama, vemanene na vingombe vakwavo va lwavo ku ngenge ya ndonga. 4Vaje vingombe va lwavo vakukonya vatanu na vavali valile vaje vingombe vakwavo va lwavo vakununa vatanu na vavali. Aje vene mwene wakasumukile. 5Co walalele lalo, walotele njozi ikwavo, mitwe itanu na ivali ya tiliku yakulongela mwamuvwa yakuhya, yamenene a cishati cimolika. 6Mitwe ikwavo itanu na ivali yamenene lalo, yakwekwiya nakwenya na lihunzi lya ntwima lya mu mambo. 7Ije mitwe yakwekwiya itanu na ivali yaminine ije mitwe itanu na ivali yakulongela mwamuvwa. Co mwene wakasumukile, wamwene ngeci kuma naloto njozi. 8#Ndan 2:2 Alikaki mutondo wendukile nakwombwa, ngeci wasanene vaka-manseno voshe na vanalume vaka-mana va mu Ingito. Wavalekele vinjozi vyendi, oloni naumo wai wamunungulwililevyo.

9Asinoni mwata wakwana vinyu kuli mwene walekele mwene ngwendi, “Lelo njinanuka, njilitavela milonga yange. 10Yove waluvalele na mwata wa vaka-kwoca makende amo nange, co watwakele mu kamenga mu njuvo ya uje mukulunu muka-kunyunga vinzinda. 11Vutsiki vumo akati ketu twalotele vinjozi, oloni vije vinjozi kuvyalifwile. 12Co mukwenje wa kaHevelu wakele amo netu kuje, ikeye wapwile ngamba ya mukulunu muka-kunyunga vinzinda. Omo twamulekele vinjozi vyetu, co ikeye watunungulwililevyo. 13Omo wavinungulwile calingiwile ngwe muje mwendekele, yange mwene wanjiilwisilile ku vipangi vyange, oloni uje mwata wa vaka-kwoca makende vamutapele mutwe.”

14Ngecivene, mwene wasanene Yosefa, co vamutundisile mu kamenga vwasi-vwasi. Omo naliteula laja nakuzala vuzalo vweka, wezile ku mesho a mwene. 15Asinoni mwene wendekele kuli Yosefa ngwendi, “Njaloto njozi, co naumo wai nasa kunjinungulwilayo oloni njazivi ngwavo yove wasa kuyinungulula omo vakulekayo.”

16Yosefa wakumbulwile mwene ngwendi, “Vulye shukulu, yange kunjasa kuyinungulula kuvanga Njambi ikeye akakunungulwilayo mwamuvwa.”

17Mwene walekele Yosefa ngwendi, “Mu njozi yange, kenga njalotele njinemana ku ngenge ya Ndonga ya Nailo, 18co njamwene vingombe va lwavo vatanu na vavali vakununa vavavwa vatuukile mu ndonga nakulya mwila. 19Co lalo vingombe vakwavo va lwavo vatanu na vavali vatuukile mu ndonga, vapwile vakukonya nakungwangama. Vapwile vingombe vavavi manene vaje kanda njivamone mu lifuti lyoshe lya Ingito. 20Vaje vingombe va lwavo vakukonya valile vaje vingombe vakununa. 21Omo vanavali laja naumo wai wazivukile ngeci vanali vingombe vakununa omwo anga vapwile vakukonya ngwe muje mwalaja vene. Co njakasumukile ku tulo. 22Co lalo njalotele njozi ya mitwe ya tiliku itanu na ivali yakulongela mwamuvwa yakuhya, yamenene a cishati cimolika. 23Asinoni mitwe itanu na ivali ya tiliku yamenene lalo, yakwekwiya nakujujwama nakwenya na lihunzi lya ntwima lya mu mambo. 24Co mitwe ije yakwekwiya yaminine ije yakulongela mwamuvwa. Njalekele vinjozi vyange kuli vaka-manseno, oloni naumo wai wasele kunjinungulwilavyo.”

25Asinoni Yosefa wendekele kuli mwene ngwendi, “Vinjozi evi vivali vinapu cuma cimolika. Njambi nakulekela cimweja vyuma vyakalinga. 26Vaje vingombe va lwavo vakununa vatanu na vavali vanapu myaka itanu na ivali, co lalo ije mitwe itanu na ivali ya tiliku yakulongela mwamuvwa inapu myaka itanu na ivali, kununguluka kwavyo kunapu kumolika. 27Co vaje vingombe va lwavo vatanu na vavali vakukonya vatuukile mu ndonga akukotoka, na mitwe ya tiliku itanu na ivali yakwekwiya nakwenya na lihunzi lya ntwima lya mu mambo, vinapu myaka itanu na ivali ya njala ya lyangengela. 28Ngwe omo njinakuleka vene, Njambi nakumwesa vyuma vije vyakalinga. 29Kukakala myaka itanu na ivali ya cindambo mu Ingito mwoshe. 30Co munima ya myaka eyi, kukaija njala ya lyangengela ya myaka itanu na ivali, co myaka yoshe ya cindambo vakaivala omwo njala ya lyangengela ikaama mu lifuti lyoshe. 31Simbu ya cindambo vakaivala omwo njala ya lyangengela ikapwa yakukomokesa. 32Co omo mwene naloto njozi luvali, eci cinanunguluka ngeci vin̄anda evi wavivwaesele laja Njambi ngeci ikeye akavipwisemo, vili muyehi nakulingiwa.

33“Ngecivene, ololo mwene aangule munu umo muka-mana wakunyanyama, ngeci apwe ntwama mu lifuti lyoshe lya Ingito. 34Mwene emike veka lalo vamyata vambateko mutambela wamucitanu ku vimbuto ngwe kukutuma kwavyo a myaka eyi itanu na ivali ya cindambo. 35Co vashike ngeci vakungulule vyakulya vyavingi a simbu ya myaka ya cindambo ije ilinakwija, vashike lalo kulonga vimbuto mu vishete vya mu vinganda nakuvinyungilamo. 36Vyakulya vije vikevyo vikapwa vyavavenya lifuti mu myaka ije itanu na ivali ya njala ya lyangengela ikaija kulutwe, ije ikakala mu lifuti lya Ingito mwoshe, ngeci vanu kesi vakalanduke.”

Yosefa vamupwisa mwata wakama mu Ingito

37Mwene na vamyata vendi vatavele vutumbe ovu, 38mwene wendekele kuli vakevo ngwendi, “Kutukasa kuwana munu weka wamuvwa wakutuvakana Yosefa, muli ikeye muli Munzinzime wa Njambi.” 39Co mwene wendekele kuli Yosefa ngwendi, “Omwo Njambi nakumwesa vyoshe evi, ngecivene, kukwesi weka ali na mana nakunyanyama kutuvakana yove. 40#Vil 7:10 Yove ukapwa muka-kushika mu lipela lyange, co vanu vange voshe vakononoka kushika kwove, kuvanga a litanda lyange lika lya vumwene, akeo njikakutuvakanena.” 41Co mwene wendekele kuli Yosefa ngwendi, “Kenga, ololo njinakupwisa mwata wakama wa lifuti lyoshe lya Ingito.” 42#Ndan 5:29 Ngecivene, mwene watundisile kanzeya ka cizivukiso ca vumwene vwendi ku mulavo wendi, wakaakele ku mulavo wa Yosefa. Vamuzikile lalo cikoveyo cacilaja cacivwa ca linyu, co vamuzikile lalo lilyenge lya ngolinde mu mukoshi wendi. 43Wamwanene likalu lyamucivali lya vumwene ngeci endelemo, na vaka-kumunyunga va kasingimiko vaile kulutwe nakuleka vanu ngwavo, “Mutsikameneni! Mutsikameneni!” Co Yosefa wapwile mwata wakama mu lifuti lyoshe lya Ingito. 44Mwene wendekele kuli Yosefa ngwendi, “Yange njinapu nji mwene, naumo wai muno mu lifuti lyoshe lya Ingito akavyana kushika kwove.” 45Ngecivene, mwene walukile Yosefa lizina lya ciIngito ngwendi Zafenate Panea, co wamwanene munakazi Asenate, muna Potifela muka-kukombelela mu nganda ya Helyopolise. 46Yosefa wakele na myaka makumi atatu omo washangumukile kupangela mwene wa Ingito. Watuukile mu lipela lya mwene, co waile nakwitangana mu lifuti lyoshe lya Ingito. 47Co a myaka yoshe ije itanu na ivali ya cindambo kwakele kuteja kwakama manene, 48vyoshe vije vyakungulwile Yosefa wavitulikilile mu vinganda. Co mu nganda imo na imo watulikililemo vyakulya vije vya mu mahya aje azengelekele nganda. 49Kwakele tiliku yaingi manene ije Yosefa kasele kuyeseka, yapwile ngwe lishen̄avu lya ku mema a kalunga.

50Omo myaka ya njala ya lyangengela kanda icete, Yosefa wakitile vana vavali va vanalume kuli Asenate muna Potifela muka-kukombelela mu nganda ya Helyopolise. 51Yosefa walukile munendi wa ntwatwa lizina lyendi Manase, wendekele ngwendi, “Njambi nanjivalesa tuyando twange twoshe amo na naanga yoshe ya tate.” 52Yosefa walukile munendi wamucivali lizina lyendi Efalime, wendekele lalo ngwendi, “Njambi nanjana vana mu lifuti lya tuyando twange.”

53Myaka ije itanu na ivali ya cindambo yakuvwaelela mu lifuti lya Ingito yahwile, 54#Vil 7:11 ngeci ije myaka itanu na ivali ya njala ya lyangengela yashangumukile, ngwe muje vene mwendekele Yosefa. Co kwakele njala ya lyangengela mu mafuti oshe eka, oloni vyakulya vyakele lika mu Ingito mwoshe. 55#Yow 2:5 Omo vaka-Ingito vakele na njala, valombele vyakulya kuli mwene. Co ikeye wavashikile kuya kuli Yosefa nakuvaleka ngwendi, “Vyoshe vyamileka vilingeni”. 56Co omo njala ya lyangengela yaamene manene mwaya lifuti lyoshe lyamutunu, Yosefa washokolwele vishete vyoshe, co walandesele vaka-Ingito tiliku. 57Vanu voshe vakele nakuya ku Ingito, vatundile mu kaye mwoshe vaile nakulanda tiliku kuli Yosefa, omwo njala ya lyangengela yapwile yakama manene mu kaye mwoshe.

Currently Selected:

Kushangumuka 41: MBB

Highlight

Copy