Kushangumuka 38

Yunda na Tamale

1A simbu ije Yunda wasezele vandolome vendi, waile nakukala na munalume umo lizina lyendi Hila, wa mu nganda ya Andulame. 2Co Yunda wamwene mumbanda kaKanana, lizina lya ishe lyapwile Shuwa, ngeci wamwambatele, 3co wakele na kafumba wakitile mwana wa munalume, vamulukile lizina lyendi Ele. 4Co wakele na kafumba lalo, wakitile mwana mukwavo wa munalume, vamulukile lizina lyendi Onane. 5Co wakele na kafumba lalo, wakitile mwana wa munalume lizina lyendi Shela. Yunda wakele ku Akezimbe omo mwana ou wasemukile.

6Yunda wambatelele munendi wa ntwatwa Ele munakazi lizina lyendi Tamale. 7Oloni vilinga vya Ele vyapwile vyavivi ku mesho a Shukulu Kalunga, ngeci Shukulu Kalunga wamutsiile. 8Asinoni Yunda wendekele kuli Onane ngwendi, “Inga fwile ya ndolome yove. Umulingileko ngwe mwaya cilika ca munakazi na munalume wendi, ngeci ndolome yove akale na vatekulwila.” 9Oloni Onane wazivukile ngeci naanga ije kuyikapu yendi, co omo walalele na fwile ya ndolome yendi, co wakele nakwitila mbuto yendi asi ngwendi, “Kutewa njikitila ndolome yange vana.” 10Ngecivene, vyuma evi vyalingile Onane vyapwile vyavivi ku mesho a Shukulu Kalunga, co Shukulu Kalunga wamutsiile lalo. 11Asinoni Yunda wendekele kuli vainamweno Tamale ngwendi, “Iluka ku njuvo ya isho mu vufwile vwove noo munange wa munalume Shela nakolo.” Wendekele ngeci omwo ikeye wakele na lyova ngwendi amo Shukulu Kalunga akatsiya Shela ngwe mwanatsii vandolome vendi. Ngecivene, Tamale welukile ku njuvo ya ishe.

12Omo kwetile matangwa amangi, munakazi wa Yunda muna Shuwa watsile. Omo Yunda wamanesele kulila, co ikeye na musamba wendi Hila wa ku Andulame vaile ku Timena, kuje vakele nakuteula vimanga vendi. 13Co munu umo walekele Tamale ngwendi, “Vaishomweno valinakuya ku Timena nakuteula vimanga vavo.” 14Ngecivene, Tamale washulwile vuzalo vwendi vwa vufwile, walifwikile lilesu ku mesho, waile nakutumbama ku cikolo ca ku Enaime, nganda ije yakele ku tapalo yakuya ku Timena, omwo ikeye wazivukile ngeci Shela muna Yunda wa munalume ololo nakolo, oloni kanda vacimwaneye ngeci amwinge.

15Omo Yunda wamumwene, wayongwele ngwendi amo cikwizi, omwo walifwikile ku mesho endi. 16Ngecivene, waile kuli ikeye kumukulo wa tapalo nakwendeka nendi ngwendi, “Vanana, mwane vati nga njisimutwiya neni?” Oloni ikeye kazivukile ngeci uje wapwile vainamweno.

Co Tamale wendekele ngwendi, “Vikajo mukanjana nga musimutwiya nange?”

17Yunda wendekele ngwendi, “Njikamitumisa muna membe wa ku vutanga vwange.”

Co Tamale wendekele ngwendi, “Mwamuvwa nga munjana cishimbikiya noo mukanjituminaye.”

18Co Yunda wehwile ngwendi, “Cooni njimyana cishimbikiya ca cuma mukajo?”

Tamale wakumbulwile ngwendi, “Cisateso ceni na mukole waco na mulamu ou mulinakwenda nawo.” Co wamwanenevyo. Asinoni walimwene nendi, co Tamale wakele na kafumba. 19Ngecivene, Tamale welukile kwimbo, watundisile lilesu lyendi, wazalele vuzalo vwendi vwa vufwile.

20Yunda watumine musamba wendi Hila wa ku Andulame, kutwala muna membe kuli uje munakazi ngeci akashake cije cishimbikiya cendi, oloni Hila kakamuwanene. 21Co wehwile vanu vamo va ku Enaime ngwendi, “ali kuli uje cikwizi nakele kumukulo wa tapalo?”

Co vakevo vamukumbulwile ngwavo, “Kuno kukwakele cikwizi wai.”

22Ngecivene, Hila welukile kuli Yunda, co wamulekele ngwendi, “Kunjamuwanene, vanalume va ku mwela uje vanendeka ngwavo, ‘Kuno kukwakele cikwizi wai.’ ”

23Yunda wendekele ngwendi, “Akale navyo ngano, kutewa vanu vatujola. Kenga, njinatumine muna membe, oloni kuwakamuwanene.”

24Omo kwetile vingonde vitatu, munu umo walekele Yunda ngwendi, “Vanyokomweno Tamale valipwisile cikwizi, vali na kafumba.”

Yunda washikile ngwendi, “Mutuwiseni anja ya nganda nakumwenyeka atse.”

25Co omo vanamutuwisa anja, Tamale watumine lijwi kuli vaishemweno ngwendi, “Ou munalume wanjanene vyuma evi ikeye nanjana kafumba. Vikengeni vinapu vyeyajo evi, cisateso na mukole na mulamu ou.”

26Co Yunda wavizivukile, wendekele ngwendi, “Mwa vushunga yange njazimbala, njapandele kumushombwesa kuli munange Shela.” Co Yunda kalimwene nendi lalo.

27Co omo simbu yendi yetele yakukita mwana, casholokele ngeci kuma mwimo lyendi muli vana vampasa. 28Co omo wetele a simbu yakukita, mwana umo watuwisile livoko, co cifungwizi walikutile vwanda vwakuvenga wendekele ngwendi, “Ou ikeye nalivanga kusemuka.” 29Oloni welwisile livoko lyendi, co ndolome yendi walivangele kusemuka. Asinoni cifungwizi wendekele ngwendi, “Vika unafwashumukila vwasi!” Co vamulukile lizina lyendi Peleze. 30Asinoni ndolome yendi wasemukile uje ivakutile vwanda vwakuvenga ku livoko, co vamulukile lizina lyendi Zela.#38:30 ZELA: Eli lizina linalifu na lijwi lya mu ciHevelu linalumbunuka ngwalyo, mungulungengu.

Currently Selected:

Kushangumuka 38: MBB

Highlight

Copy