Kushangumuka 39

Yosefa na munakazi wa Potifalo

1Co vaIshimaela vatwalele Yosefa ku Ingito nakumulandesa kuli Potifalo, uje wapwile umo wa vamyata va mwene, mukulunu wa mashwalale wa ku lipela. 2#Vil 7:9 Shukulu Kalunga wakele amo na Yosefa, co wamuvezikisile mu vyoshe, ngecivene, ikeye wakele mu njuvo ya shukulu yendi kaIngito. 3Co shukulu yendi wamwene ngeci Shukulu Kalunga ali amo na Yosefa, lalo Shukulu Kalunga namuvezikisa mu vyuma vyoshe vije vyalingile. 4Potifalo wavwaelelele nendi, wamupwisile ngamba yendi wakumwata, ngeci wamwanene moko ya vyuma vyendi vyoshe vya mu njuvo yendi. 5Ngeci kutunda a simbu ije omo wapwisile Yosefa ngamba yendi wakumwata, Shukulu Kalunga wavezikisile njuvo ya uje kaIngito na vyuma vyoshe vije wakele navyo mu njuvo yendi na mu mahya endi. 6Potifalo waakele vyuma vyendi vyoshe a mavoko a Yosefa ngeci avinyunge, ku vyoshe vije vyakele navyo kaakeleko mbunge kuvanga vyakulya vyendi lika. Yosefa wapwile wamuvwa na muvila wendi na cihanga cendi. 7Omo kwetile simbu yaindondo lika, munakazi wa shukulu yendi washangumukile kukenga Yosefa na lishungu, wamwihwile ngeci asimutwiye nendi. 8Oloni Yosefa wavyanene, wendekele kuli munakazi wa shukulu yendi ngwendi, “Kenga, shukulu yange kazivuka vyuma vyoshe vili muno mu njuvo yendi, omwo ikeye naaka vyuma vyoshe evi alinavyo a mavoko ange. 9Njili na moko yakama manene muno mu njuvo ngwe ije yalinayo, co kanjivindikile cuma cimo kuvanga yove munakazi wendi. Vatijo njasa kulinga cuma cacivi ngacije nakuvulumuna kuli Njambi?” 10Nameme ikeye wakele nakwihula Yosefa a litangwa na litangwa, oloni Yosefa wavyanene kusimutwiya nendi.

11Oloni litangwa limo omo Yosefa wakovelele mu njuvo nakupanga vipangi vyendi, muje mu njuvo kumwakele vanu vai. 12Co munakazi wa Potifalo wamukwatele ku cikoveyo cendi cacilaja wendekele ngwendi, “Ija tusimutwiye nange.” Oloni Yosefa wapusunukile nakutewela anja, co wasezele cikoveyo cendi mu livoko lyendi. 13Omo wamwene ngeci Yosefa natewela anja naseza cikoveyo cendi mu livoko lyendi, 14co munakazi wa Potifalo wasanene vangamba vendi nakwendeka ngwendi, “Kengeni a cuma eci! Munalume wange wanenele ou kaHevelu muno mu njuvo mukutushaula. Ikeye nezile muno mu mulili wange nakwendeka nange ngwendi njisimutwiye nendi, oloni njatambekele na lijwi lyakama ngwe munjinasela. 15Omo ikeye nanjizivi njitambeka, ngeci natewela anja naseza cikoveyo cendi kuli yange.”

16Co watulikile cije cikoveyo noo shukulu ya Yosefa wetele ku njuvo. 17Asinoni wamulekele vin̄anda evi ngwendi, “Uje ndungo wa kaHevelu iwanenele muno nezile ku mulili wange nakunjishaula. 18Oloni omo yange njatambekele, co natewelele anja nakuseza cikoveyo cendi kuli yange.”

19Ngecivene, shukulu ya Yosefa waluvalele manene akuziva evi, 20co vakwatele Yosefa nakumwaka mu kamenga muje vakele nakunyungila vinzinda va mwene, co wakele muje. 21#Vil 7:9 Oloni Shukulu Kalunga wakele amo na Yosefa wamumwesele cizemo cendi cije kucesi kutenguluka, nakumulingisa ngeci uje muka-kunyunga kamenga amuzivile ngozi. 22Muka-kunyunga kamenga waanene Yosefa moko ya vinzinda voshe va mu kamenga nakumupwisa wakama mu vyuma vyoshe vije valingile mu kamenga. 23Muka-kunyunga kamenga kakengele ku cuma nacimo cai, cije cakele ku mavoko a Yosefa, omwo Shukulu Kalunga wakele amo nendi, co mu vyuma vyoshe vije vyalingile Yosefa, Shukulu Kalunga wavivezikisile.

Currently Selected:

Kushangumuka 39: MBB

Highlight

Copy