Kushangumuka 28

1Asinoni Isake wasanene Yakomba, wamuvezikisile, co wamushikile ngwendi, “Kesi ukambate munakazi kaKanana. 2Livwaese uye ku Mesopotamya, kwimbo lya kuku yove Mbetwele, ukambate munakazi, muna nyokono Lambani. 3Njambi Muka-nzili yoshe akavezikise vulo vwove nakukwana vana vavangi, ngeci ukapwe cisemi ca miyati yaingi! 4#Kus 17:4-8 Njambi akakuvezikise yove na vatekulwila vove ngwe mwavezikisile Avilahama, ngeci ukafuke lifuti eli muno muunakala, lifuti eli Njambi walyanene kuli Avilahama!” 5Omu mukemwo Isake mwatuminine Yakomba kulyala ku Mesopotamya kuli Lambani, uje wapwile muna Mbetwele kaAlama, ikeye ndolome ya Lembeka vaina ya Yakomba na Isau.

Isau ambata munakazi weka

6Isau wanangukile ngeci Isake navezikisa laja Yakomba nakumutuma kulyala ku Mesopotamya mukwambata munakazi. Co Isau wanangukile lalo ngeci omo Isake navezikisa Yakomba, co Isake washikile Yakomba ngeci kesi akambate munakazi kaKanana. 7Isau wamwene ngeci Yakomba wononokele ishe na vaina mukemwo Yakomba waile ku Mesopotamya. 8Co omo Isau wazivile ngeci ishe Isake kashakele vanakazi va mu Kanana, 9waile kuli Ishimela muna Avilahama, wakambatele munendi lizina lyendi Mahalate, uje wapwile ndokazi ya Nembayote.

Njozi ya Yakomba ku Mbetele

10Yakomba watundile ku Mbeleshemba, waile ku Halane. 11Co omo litangwa lyatokele, wezile ku mutambela umo, walalele kuje. Walalele oku nasindamena a limanya. 12#Yow 1:51 Ngecivene, walotele njozi, wamwene ndendelo yakama yatundu asi nakweta mwilu, na tungelo vakele nakulonda mwilu nakushuluka asi a ikeyo. 13#Kus 13:14-15 Asinoni Yakomba wamwene Shukulu Kalunga nemana kuyehi nendi, co wendekele ngwendi, “Yange njapwa Kalunga, Njambi ya Avilahama na Isake. Njikana kuli yove na kuli vatekulwila vove lifuti eli muunalala. 14#Kus 12:3; 22:18 Vatekulwila vove vakapwa vavangi manene ngwe livu lya ano asi. Co vakatuma nakushulisa lifuti eli lyoshe mu mitambela mwoshe, muli yove na muli vatekulwila vove njikavezikisilamo miyati yoshe. 15Kenga, njikakala amo nove nakukunyunga kwoshe kuukaya, co njikakwilwisa lalo mu lifuti lino. Kunjikakuseze nalumo lwai noo njinalingi evi vyoshe njinakukulaesavyo.”

16Asinoni Yakomba wakasumukile ku tulo, wendekele ngwendi, “Mwa vushunga Shukulu Kalunga ali kuno! Ikeye ali mu mutambela uno vene, oloni yange kunjazivukile!” 17Co Yakomba wakele na lyova, wendekele ngwendi, “Mutambela uno unapu wakuzivisa lyova! Unapande kupwa Njuvo ya Njambi, cinapande kupwa cikolo cakushokoloka ca mwilu.”

18Ngecivene, Yakomba wendukile mutondo-tondo, wanonele lije limanya lyasindamenene, walimikile kupwa canukiso. Asinoni wetilileo mazi a olive mukukundika lije limanya kuli Njambi. 19Ngecivene, walukile mutambela uje Mbetele.#28:19 MBETELE: Eli lizina mu ciHevelu lyanunguluka ngwalyo, Njuvo ya Njambi. Oloni akulivanga lije limbo valitumbwile ngwavo Luze. 20Asinoni Yakomba walisingile kuli Shukulu Kalunga ngwendi, “Nga yove ukakala nange nakunjinyunga a vungenzi vwange ovu, nakunjana vyakulya na vyakuzala, 21cooni nga njikeluka lalo mwamuvwa kwimbo lya tate, co ukapwa Njambi yange. 22Co eli limanya lya canukiso njinemika kuno likapwa mutambela wakukulemesela, njikakwana lalo camulikumi ku vyuma vyoshe vije viwukanjana.”

Currently Selected:

Kushangumuka 28: MBB

Highlight

Copy