Kushangumuka 27
27
Isake avezikisa Yakomba
1Omo Isake nakuluvala laja na mesho endi akele na kavwivwivwi, wasanene Isau munendi wa mukulunu, wendekele kuli ikeye ngwendi, “Munange!”
Co Isau wamukumbulwile ngwendi, “Yange uno shukulu.”
2Isake wendekele ngwendi, “Kenga, yange njakuluvala laja, njili muyehi na kutsa. 3Ambata vuta vwove na mikili yove, ya mu shwata ukanjitsiileko kasitu, 4ngeci wakunjitelekele vyakulya vya lwengo lwaluvwa ngwe muje munjashaka. Co wakunjinenelevyo, ngeci omo njakumanesa kulya, asinoni njakukuvezikise simbu kanda njicitse.”
5Simbu Isake acili nakwendeka na Isau, kuma Lembeka namutolilila. Co omo Isau waile mukuyomba, 6Lembeka wendekele kuli munendi Yakomba ngwendi, “Ololo njazivi isho nendeka na ndolome yove Isau ngwendi, 7‘Njinenele situ ya mu shwata, unjitelekeleyo. Co omo njinali, njakukuvezikise civezikiso cange ku mesho a Shukulu Kalunga simbu kanda njicitse.’ ” 8Co Lembeka wendekele lalo ngwendi, “Ololo munange njitolilile ngeci ulinge vyuma evi vinjendeka. 9Ya ku vutanga ukashakeko vana va vimembe vavali, njakuvateleke nakulinga vyakulya vije vyazema isho manene. 10Omo njamanesa kuteleka, co wakutwalela isho ngeci akalye, co akakuvezikise simbu kanda acitse.”
11Oloni Yakomba wendekele kuli vaina ngwendi, “Mwazivuka ngweni Isau wakala na vukupa a muvila wendi, oloni yange kunjesi navwo. 12Omo tate akanjipapateya, amo akawana ngeci njilinakumukwisa, co a ngila eyi, njilinakulishakela lika cisingo yange vavenya kutuvakana civezikiso.”
13Co vaina vamukumbulwile ngwavo, “Munange, cisingo eci ciije ali yange, linga ngwe omwo njinendeka, ya lika ukashake vana va vimembe.” 14Yakomba waile nakukashaka vana va vimembe, co wavanenele kuli vaina, co vaina vatelekele vyakulya vije vyazemene Isake. 15Asinoni Lembeka wanonele vuzalo vwavuvwa vwa Isau, vuje vwatulikile mu njuvo, wavuzikile Yakomba. 16Co wamwakele vilambu vya vana va vimembe a mavoko endi na a mukoshi aje ajenekele vukupa. 17Co wamwanene vyakulya vyakutovala amo na makende aje ocele.
18Asinoni Yakomba waile kuli ishe nakwendeka ngwendi, “Tate!”
Co ishe wamukumbulwile ngwendi, “Ewa munange iyajo owo?”
19Yakomba wamukumbulwile ngwendi, “Yange munove wa mukulunu Isau, njinalingi ngwe muje muwanjilekele. Indukeni mwane mulye situ eyi njinaminenela, ngeci munjivezikise.”
20Co Isake wamukumbulwile ngwendi, “Munange, navwasi mukajo unawana situ?”
Yakomba wamukumbulwile ngwendi, “Shukulu Kalunga Njambi yove ikeye nanjikwasa ngeci njiiwane.”
21Co Isake wendekele kuli Yakomba ngwendi, “Munange shwenya muyehi ngeci njikupapateye, nga mwa vushunga yove munange Isau ndi weka.” 22Co Yakomba washwenyele kuyehi na ishe. Co Isake wamupapateyeye nakwendeka ngwendi, “Lijwi lyove ni lilinakusholoka ngwe lya Yakomba, oloni mavoko ove ni analifu ngwe mavoko a Isau.” 23Oloni Isake kanangukile ngeci ou alinakwendeka nendi napu Yakomba omwo mavoko a Yakomba akele na vukupa ngwe mavoko a Isau. Co Isake wavezikisile Yakomba, 24oloni wamwihwile lalo ngwendi, “Mwa vushunga yove Isau ndi?”
Co Yakomba wamukumbulwile ngwendi, “Yange vene.”
25Co Isake wendekele ngwendi, “Njineneleko situ imo njilye. Co omo njinamanesa kulya, asinoni njikuvezikisa.” Co Yakomba wanenele situ kuli ishe, wamunenelele lalo vinyu, co Isake wanwile. 26Asinoni Isake wendekele kuli ikeye ngwendi, “Njishwenye muyehi unjitsembe munange.” 27Omo Yakomba washwenyele muyehi na kumutsemba, co Isake wanikile a vuzalo vwendi, co wamuvezikisile, wendekele ngwendi,
“Vweko vwavuvwa vwa munange
vunalifu ngwe vweko vwa lihya
lije lyanavezikisa Shukulu Kalunga.
28Njambi akwane nyonzi yakutunda mwilu,
mahya ove apwe a vwilo,
akwane vimbuto vyavingi na vinyu!
29 #
VaHe 11:20; Kus 12:3 Miyati yoshe vakapwe vangamba vove,
co vanu voshe vakakulemese.
Ukashwane vavushoko vwove voshe,
na vatekulwila va vaka-nyoko vakakulemesa.
Vaje vakakusinga, navo vakasingiwe,
co vaje vakakuvezikisa,
vakapwe vakuvezika.”
Isau alomba civezikiso kuli Isake
30Co capwile ngeci omo Isake namanesa kuvezikisa Yakomba, na Yakomba natunduko laja, co ndolome yendi Isau wetele kutunda mu shwata mukuyomba. 31Co ikeye lalo watelekele vyakulya vyakutovala, wavitwalele kuli ishe, wendekele ngwendi, “Tate indukeni mutumbame mulye situ eyi njinaminenela, ngeci munjivezikise.”
32Isake wamwihwile ngwendi, “Yove iyajo?”
Isau wamukumbulwile ngwendi, “Yange munove wa mukulunu Isau.”
33Ngecivene, Isake walikomokelele nakujaja, co wehwile ngwendi, “Kuma iyajo ou natsiile kasitu nakunjinenelaye? Njamanesa kulya vene omo simbu kanda wije. Co njinamuvekisa laja, cili akapwa wakuvezika.”
34Omo Isau wazivile majwi awa, co walilile manene nakutambeka nakuviilila manene. Wendekele ngwendi, “Tate njivezikiseko nange lalo!”
35Co Isake wamukumbulwile ngwendi, “Ndolome yove nezile nakunjikwisa. Ikeye natambula civezikiso cove.”
36 #
Kus 25:29-34
Co Isau wendekele lalo ngwendi, “Eyi ikeyo simbu yamucivali Yakomba nanjikwisa. Kunjasa kukomoka omo lizina lyendi lyapwa Yakomba. Ikeye wanjitambwile moko ya vu ntwatwa vwange, co ololo lalo nanjitambula civezikiso cange. Kuma yange kuunjivezikisa lalo civezikiso cimo ndi?”
37Isake wamukumbulwile ngwendi, “Kenga, njinapwisa laja Yakomba shukulu yove, co njinapwisa vavushoko vwove voshe kupwa vindungo vendi. Njinamwana vimbuto na vinyu. Co ololo nacimo cai njasa kulinga kuli yove munange!”
38 #
VaHe 12:17
Oloni Isau wendekele lalo ngwendi, “Tate, kuma ukavezikisa lumolika ndi? Nange lalo tate njivezikiseko!” Co walombele nakulila manene.
39Asinoni Isake wendekele kuli ikeye ngwendi,
“Kukwesi nyonzi ikatunda mwilu ikaija ali yove,
kuukakala na mahya a vwilo.
40 #
VaHe 11:20; Kus 36:8; 2 Vim 8:20 A mukwale wove akeo ukayoyela,
co ukapwa ndungo ya ndolome yove.
Oloni omo ukamutengulukila,
co ukacakunuka ku mandauluwa yendi.”
41Co Isau wazindile Yakomba, omwo ikeye Yakomba watambwile civezikiso cije capandele kupwa ca Isau. Co Isau wayongwele ngwendi, “Simbu yakulila tate ili muyehi, akeo anjikatsiila ndolome yange Yakomba.”
42Oloni omo Lembeka wazivile vutumbe vwa Isau, wasanene Yakomba nakumuleka ngwendi, “Tolilila, ndolome yove Isau ali na vutumbe vwakukuwana ngeci akutsiye. 43Ngecivene, ololo munange, linga eci cinjikuleka. Ano vene, ya kuli ndolome yange Lambani ku Halane, 44ukakale kuje kasimbu, noo litoto lya ndolome yove linatulu, 45mu ngila eyi, Isau akevala evi viwunalingi kuli ikeye. Asinoni njikatuma munu akakushaka ngeci wiluke kuno. Omwo vikajo njikajena yeni muvuvali vweni a litangwa lyangongo?”
Isake atuma Yakomba kuli Lambani
46Lembeka wendekele kuli Isake ngwendi, “Njinajuka ali vanakazi va Isau va vaHiti. Nga na Yakomba lalo akambata umo wa vanakazi va vaHiti ngwe ava, mwamuvwa kuli yange nga kutsa vene.”
Currently Selected:
Kushangumuka 27: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
