Kutuuka 35
35
Mashiko aa Litangwa Lyakuhwima
1Mosesa wasanene mbunga yoshe ya vanu va Isalele amolika, co wavalekele ngwendi, “Evi vikevyo vyanashiki Shukulu Kalunga ngeci muvilinge. 2#Kut 20:8-11; 23:12; 31:15; 34:21; VaLe 23:3; Kwi 5:12-14 Mukapanga vipangi vyeni a matangwa atanu na limo, oloni a litangwa lyamucitanu na avali linapu lyakujela, Litangwa Lyakuhwima valikundika kuli Shukulu Kalunga. Woshe akapanga vipangi a litangwa eli vanapande kumutsiya. 3Co nambe tuhya kesi mutuvweke mu vinjuvo vyeni a Litangwa Lyakuhwima.”
Milambu yakutungisa Mbalaka yakujela
(Kut 25:1-9)
4Mosesa wendekele kuli vanu va Isalele voshe ngwendi, “Evi vikevyo vyanashiki Shukulu Kalunga. 5Lambuleni kuli Shukulu Kalunga. Munu woshe uje ashaka kulinga ngacije alambule ngolinde, na siliva, na vunengu, 6na vinanga vyavivwa vya linyu, vyakuzivuluka, na vyakuvenguluka, na vyakuvenga, na vinanga vyakutonga na maka a vimembe, 7na vilambu vya majamba a vimembe vyakulomba na mushumbelo wakuvenga, na vilambu vyavivwa, na mavaya a mungongo, 8na mazi a mu vindeya, na n̄undu yakwaka mu mazi akuvwavesa, nakwaka a insense yakunika lwengo lwaluvwa, 9na tumamanya twa kanelya, na tumamanya tukwavo twa seo yakama twakwaka a kangamuna naa kananga ka a nulo ya Muka-kukombelela Wakama.
Vyuma vya mu Mbalaka Mwakuliwanena
(Kut 39:32-43)
10“Vanalume voshe vaka-vutongwe vaje vali akati keni vaije, ngeci vakupange vyuma vyoshe vije vyanashiki Shukulu Kalunga. 11Mbalaka na vyakufwikao, na vikwateso vyakweteka ngwe malovo, na vivuliko vyayo, na mambanze ayo, na vimanda vyayo, na masanda ayo. 12Cikasa ca Cikumiiyo, na mikambo yaco na cifwiko caco, co na livamba lije lyakuvambako. 13Mesa na mikambo yayo, na vivala vyayo vyoshe, na makende akulambula kuli Njambi. 14Citumbikilo ca vindeya cakwaka ndeya na vivala vyavyo, na vindeya na mazi avyo. 15Mutula wakwenyekela insense, na mikambo yawo, na mazi akuvwavesa, na insense yakunika lwengo lwaluvwa, na livamba lya ku cikolo ca Mbalaka. 16Mutula wa milambu ya kwenyeka, na mishele yawo ya vunengu, na mikambo yawo, na vivala vyawo vyoshe, na mbashiya yakujwelela na lisanda lyayo. 17Mavamba a cipango, na vimanda vyaco na masanda aco, na livamba lya ku cikolo ca cipango. 18Vipampalingo na mikole vya Mbalaka na vya cipango. 19Vuzalo vwavuvwa vwa vaka-kukombelela vwakuzala omo vapanga mu Mwela Wakujela, vuzalo vuje vwakujela vwa Alone muka-kukombelela novu vwa vana vendi.”
Vanu vanena milambu yavo
20Mbunga yoshe ya vanu va Isalele vaile vasezele Mosesa, 21co munu woshe uje mbunge yendi yamusindiiye na woshe uje wakele na cizango cakulinga ngacije wanenele mulambu kuli Shukulu Kalunga yakutungisa Mbalaka Mwakuliwanena. Co vanenele vyuma vyoshe vije vyashakiwile mukupangesa Mbalaka Mwakuliwanena, na vipangi vyayo vyoshe, amo na vuzalo vwakujela vwa vuka-kukombelela. 22Voshe vaje vatavele kulambula na mbunge yoshe, vanalume na vanakazi, vanenele vimande vyakuvalama, na vimbilingwa, na tunzeya, na sungu na vyuma vyoshe vya ngolinde, co vavikundikile kuli Shukulu Kalunga. 23Co munu na munu uje wakele na nanga yaivwa ya linyu, na yakuzivuluka, na yakuvenguluka, nambe yakuvenga, na nanga ya maka a vimembe, na vilambu vya majamba a vimanga vyakulomba na mushumbelo wakuvenga, nambe vilambu vyakufutungula mwamuvwa, vavinenele. 24Voshe vaje vasele kulambula siliva nambe vunengu, vanenele mulambu wavo kuli Shukulu Kalunga, na voshe vaje vakele na mavaya a mungongo akupangesa ku vipangi vyoshe-ivyoshe vaanenele. 25Vanakazi voshe vatongwe vanenele vwanda vuje vombwele na mavoko avo vwa linyu yaivwa, na vwanda vwakwombola vwakuzivuluka, na vwakuvenguluka, na vwakuvenga. 26Lalo vombwele vwanda vwa maka a vimembe. 27Vantwama vanenele tumamanya twa kanelya na tumamanya tukwavo twa seo twakwaka a kangamuna naa kananga ka a nulo, 28na n̄undu na mazi a mu vindeya, na mazi akuvwavesa, na mazi insense akunika lwengo lwaluvwa. 29Co vanu voshe va Isalele, vanalume na vanakazi, vaje vimbunge vyavo vyavasindiiye, vanenele milambu yavo ya cizango kuli Shukulu Kalunga yakupangesa vipangi vyoshe ngwe muje mwashikile Shukulu Kalunga Mosesa kulingamo.
Kusana Mbezalele na Oholyave
(Kut 31:1-11)
30Co Mosesa wendekele kuli vaIsalele ngwendi, “Shukulu Kalunga naangula Mbezalele muna Uli, mutekulu wa Hule wa ku muyati wa Yunda. 31Njambi namushulisa na Munzinzime wendi, namwana vutongwe, nakunanguka, nakuzivisisa a cipangi coshe ca vutongwe, 32nakuyongola vutumbe vwa vutongwe vwakushova nakushovasana, nakupangesa ngolinde, na siliva, na vunengu, 33nakulamozola tumamanya twa seo yakama, nakutwaka mu tukwatelo, nakushonga mavaya, amo na cipangi coshe ca vutongwe. 34Shukulu Kalunga naana kuli Mbezalele na kuli Oholyave muna Ahisamake wa ku muyati wa Ndani, kunanguka kwa kulongesa vakwavo vutongwe vwa vipangi vyoshe. 35Co Shukulu Kalunga navaana vutongwe vwakama vwakupanga vyuma vyakuliseza-seza vije vakalingi vaka-kutaleka a tumamanya, na vaka-kushova nakushoveya, na vaka-kushela vinanga vyavivwa vya linyu, na ulu yakuzivuluka, na yakuvenguluka, na yakuvenga, na vinanga vikwavo. Vakevo vapange vipangi vyakuliseza-seza vya vutongwe.
Currently Selected:
Kutuuka 35: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
