Vilinga vya Miluwa 2

Kwija kwa Munzinzime Wakujela

1 # VaLe 23:15-21; Kwi 16:9-11 Omo litangwa lya Pentekosita lyetele, vaka-kukulaela voshe vakungulukile mu mwela umolika. 2Vwasi-vwasi kwilu kwatundile cililimo ngwe kuhuwa kwa lihunzi lyakama, co cashulisile njuvo yoshe muje muvatumbamene. 3Asinoni vamwene vije vyafwile ngwe vindaka vya milangi ya tuhya vyalyangunukile, co vyakele ali umo na umo. 4Co voshe vashulile na Munzinzime Wakujela, co vashangumukile kwendeka mu vindaka vyeka ngwe omo Munzinzime wavasesele ngeci vendeke.

5Kwakele vaYunda vakele mu Yelusalema, vanalume vaka-kulemesa Njambi vaje vatundile ku vifuti vyoshe vya ano a kaye. 6Omo vazivile muyoyo ou, mbunga yakama vakungulukile. Voshe vavwaelelele, omwo munu woshe wazivile vaje vaka-kukulaela valinakwendeka mu ndaka yendi. 7Co voshe valikomokelele nakwendeka ngwavo, “Kuma ava valinakwendeka ngeci kesi vaNgalileya ndi? 8Co vatijo twasa kuvaziva yetu voshe umo na umo mu ndaka yendi vavenya? 9Vamo vetu vatunda ku Palitiya, Mendiya na ku Elame, vakwavo ku Mesopotamya, Yundeya na ku Kapandosiya, vakwavo ku Pontiyasi na ku Asiya, 10vamo ku Filingiya na ku Pampiliya, vakwavo ku Ingito naku mitambela ya Limbiya kuyehi na Silene. Co vamo vetu vatunda ku Loma, 11vaYunda na ava kesi vaYunda vaje vakakava futisi ya vaYunda, co vamo vetu vatunda ku Kelete na ku Alambiya, yetu tuvavoshe tulinakuziva vendeka mu vindaka vyetu vyuma vyakukomokesa vije vyanalingi Njambi!” 12Co voshe valikomokelele nakukala na citanga, valihozwele umo na mukwavo, ngwavo, “Eci cinalumbunuka vika?”

13Oloni veka vashendumwine vaka-kukulaela ngwavo, “Ava vanu vanapende!”

Muzimbu wa Petulu

14Oloni Petulu wemanene na vakwavo miluwa likumi na umo wendekele na lijwi lyakama ku mbunga ije ngwendi, “Eni vakwetu vaYunda neni voshe mwakala mu Yelusalema, njitolilileni ngeci njimileke mucinalumbunukila cuma eci. 15Omwo vanu ava kuvapendele, ngwe omo mumuli nakuyongwelamo, ino inapu simbu yamucitanu na viwana ku mutondo. 16Oloni, evi vikevyo vyendekele Njwele muka-kwimanena ngwendi,

17 # Njwe 2:28-32 ‘Njambi alinakwendeka ngwendi,

Evi vikevyo njikalinga ku matangwa akukotoka,

njiketila Munzinzime wange ali munu na munu.

Vana veni va vanalume na ava va vanakazi vakambulula vuka-kwimanena,

co vakwenje veni vakamona vimona, co tukulukazi veni vakalota vinjozi.

18Eyo, nameme ali vangamba vange, va vanalume na ava va vanakazi,

ku matangwa aje njiketila Munzinzime wange, co vakambulula vuka-kwimanena.

19Co njikalinga vikomokeso mwilu

na vizivukiso ano asi.

Kukakala kwitila maninga, tuhya, na vwisi vwakama,

20litangwa likazivala, co ngonde ikavenga ngengu ngwe maninga,

omo Litangwa lya Shukulu Kalunga lije lyakama lya vumpau kanda lyete.

21Co woshe akatambakana lizina lya Shukulu Kalunga akovoka.’

22“Tolilileni ku majwi awa, yeni vakwetu vaIsalele! Yesu wa ku Nazaleta wapwile munalume uje moko yendi ya vuNjambi yasholwele mwamuvwa kuli yeni vikomokeso na vizivukiso vije vyalingile Njambi muli ikeye. Yeni vavenya mwazivuka evi, omwo vyuma evi vyalingiwile akati keni. 23#Mat 27:35; Mak 15:24; Luk 23:33; Yow 19:18 Njambi mu cizango cendi vavenya wayongwele laja ngeci Yesu vakamwana ku mavoko eni, co yeni mwamutsiile akutava vaka-vivi ngeci vamushukike a cilindakano. 24#Mat 28:5-6; Mak 16:6; Luk 24:5 Oloni Njambi wamusangwile ku vatsi, wamupatwile ku nzili ya kutsa, omwo kucatavele ngeci kutsa cimupwise cinzinda. 25#Mya 16:8-11 Omwo Ndaviti wendekele ali ikeye ngwendi,

‘Njamwene Shukulu Kalunga kulutwe lwange simbu yoshe,

ali muyehi nange, co kunjikazivi lyova.

26Ngecivene, mbunge yange ivwaelela,

na majwi ange anashulu nakujolela.

Co yange, munu uje atsa,

njikahwima mu cinyangavili,

27omwo kuukanjiseze mu vukalo vwa vatsi,

nameme kutava muka-kujela wove ngeci avolele mu mbumbo.

28Unanjimwesa vingila vitwala ku mwonyo,

co njivwaelela kukala kuyehi nove.’

29“Vakwetu, njendeka kuli yeni nakusimpa ali kukulwila yetu Ndaviti. Watsile, co vamutsindile, co mbumbo yendi anga tucili nayo na lelo lino. 30#Mya 132:11; 2 Sam 7:12-13 Wapwile muka-kwimanena, co wazivukile vije vyamukulaesele Njambi, Njambi nalisingi ngwendi akapwisa umo wa vatekulwila va Ndaviti mwene, ngwe mwapwile Ndaviti. 31Ndaviti wamwene vika Njambi akapanga kulutwe, co wendekele akusanguka kwa Wakuvwavesa omo wendekele ngwendi,

‘Ikeye kuvamusezele mu vukalo vwa vatsi,

muvila wendi kuwavolelele mu mbumbo.’

32Njambi nasangula ou Yesu ku vatsi, ngeci yetu voshe tunapu vakaleo va vyuma evi. 33Ikeye namusangwila ku livoko lya cilyo lya Njambi, Ishe, co natambula Munzinzime Wakujela kuli ikeye, ngwe muje mwakulaesele. Vije mulinakumona ololo nakuziva vinapu vwana vwendi vuje netila ali yetu. 34Omwo kesi Ndaviti uje walondele mwilu, oloni ikeye wendekele ngwendi,

‘Shukulu Kalunga wendekele kuli Shukulu yange ngwendi,

Tumbama ku livoko lyange lya cilyo,

35 # Mya 110:1; 1 Koli 15:25,27 noo njifungulula vitozi vove.’

36“Vanu voshe va Isalele, asinoni vanapande kuzivuka mwamuvwa ngeci ou ikeye Yesu, uje imwashukikile a cilindakano, ikeye yanapwisa Njambi Mwene na Wakuvwavesa!”

37Omo vanu vazivile evi, vazivile mu vimbunge vyavo longoto, co vendekele kuli Petulu na kuli miluwa vakwavo ngwavo, “Eni vakwetu, tunapande kulinga vika?”

38Co Petulu wendekele kuli vakevo ngwendi, “Munu na munu napande kutenguluka ku vivi vyendi nakumumbwitika mu lizina lya Yesu Kilistu, ngecivene, amisambese ku vivi vyeni, co mukatambula vwana vwa Njambi, Munzinzime Wakujela. 39Omwo cikulaeso ca Njambi vacilingile kuli yeni na kuli vana veni, na kuli voshe vali kulyala, vaje voshe vanasana Shukulu Kalunga Njambi yetu vaije kuli ikeye.”

40Petulu wendekele kuli vakevo na majwi amangi eka nakuvalambelela ngwendi, “Lyameneni yeni vavenya ku kunyanyamesa kulinakwija ali vanu ava va vilinga vya kupenga-penga!” 41Vavangi vavo vakulaelele muzimbu wa Petulu, co vavambwitikile, ku litangwa lije vawezeleleleko vanu vakupwa 3,000 ku mbunga ya vaka-kukulaela. 42Co vakakateyeye kulilongesa kuli miluwa na mu kulitombola na mukulipangela makende na mukulombela.

Vuyoye akati ka vaka-kukulaela

43Co vikomokeso na vizivukiso vyavingi vivalingile miluwa, co vanu voshe vazivile lyova. 44#Vil 4:32-35 Co vaka-kukulaela voshe vakele amo mu kulitombola, co valipangelele vufuko vwavo akati kavo. 45Co valandesele vyuma vyavo na vufuko vwavo, co valipangelele vimbongo akati kavo, ku munu na munu ngwe kukujeneka kwendi. 46Co a litangwa na litangwa valikungulwile mu Njuvo ya Shukulu Kalunga, co valile vyakulya amolika mu vinjuvo vyavo, vakele nakulya na vimbunge vyakujolela na kulikeesa, 47nakushangazala Njambi, nakuvashangazala ku vanu voshe. Co Mwene wawezeleleleko a litangwa na litangwa ku mbunga yavo vanu vaje vakele nakwovoka.

Currently Selected:

Vilinga vya Miluwa 2: MBB

Highlight

Copy