Vilinga vya Miluwa 1

1 # Luk 1:1-4 Kuli mukwetu Teofilo.

Mu mukanda wange wakulivanga njasonekele vyuma vyoshe vije vyalingile Yesu nakulongesa kwendi kwoshe kutunda a simbu ije washangumuikle vipangi vyendi 2nakweta a litangwa lije vamutwalele mwilu. Simbu kanda vamutwale mwilu, washikile na nzili ya Munzinzime Wakujela vanalume vaje vaangwile kupwa miluwa vendi. 3A matangwa makumi awana kutunda a kutsa kwendi walisholwele kuli vakevo visimbu vyavingi mu vingila vije vyasholwele vukaleo kujeneka vimata ngeci ikeye wakele nakuyoya. Vamumwene, co wendekele navo vya Vumwene vwa Njambi. 4#Luk 24:49 Co omo vakungulukilile amo, wavashikile ngwendi, “Kesi mutunde mu Yelusalema, oloni vandameneni vwana vuje njamilekele, vwana vuje vwaakulaesele Tate. 5#Mat 3:11; Mak 1:8; Luk 3:16; Yow 1:33 Yowano wambwitikile na mema, oloni a matangwa amandondo lika vakamimbwitika na Munzinzime Wakujela.”

Yesu vamutwala mwilu

6Omo miluwa valiwanene amo na Yesu, vamwihwile ngwavo, “Mwene, kuma ukelwisa Vumwene ku Isalele ku simbu ino vene ndi?”

7Yesu wendekele kuli vakevo ngwendi, “Kesi kuli yeni kuzivuka visimbu na myaka vije vyanavwaesa ku moko ya Tate vavenya. 8#Mat 28:19; Mak 16:15; Luk 24:47-48 Oloni omo Munzinzime Wakujela akaija ali yeni, mukashula na nzili, co mukapwa vakaleo vange mu Yelusalema na mu Yundeya na mu Samaliya mwoshe, na ku mamaneselelo a asi.” 9#Mak 16:19; Luk 24:50-51 Omo vamanesele kwendeka vyuma evi, vamutwalele mwilu oku vamukengelela, co lishelwa lyamufwikile kuvamumwene.

10Co omo vakengele mwilu shwii omo Yesu wakele nakuya, vamo vanalume vavali vazalele vuzalo vwakutoka vemanene kuyehi navo 11co vendekele ngwavo, “Eni vanalume va ku Ngalileya, omwo vikajo munemanena kuno nakukenga mwilu? Yesu ou vene, ivanatwala mwilu kutunda kuli yeni, akeluka lalo mu cifwa cije vene munamumono ayanaco mwilu.”

Uje wengile mu mwela wa Yundasa

12Asinoni miluwa velukile ku Yelusalema kutunda ku Munkinda wa Oliveta, kapwile ngwe kanunda ka kilomita imolika kutunda mu nganda. 13#Mat 10:2-4; Mak 3:16-19; Luk 6:14-16 Vakovelele mu Yelusalema valamatele kwilu ku mulili uje kuvakele va Petulu, na Yowano, na Yakomba na Anduleo, Filipu na Tomasi, Mbatolomeo na Mateo, Yakomba muna Alufeya, Simoni Zelote na Yundasa muna Yakomba. 14Valikungulwilile amo na cizango cimo mukulombela, amo na vanakazi na Maliya vaina ya Yesu na vishongo vendi.

15Omo kwetile matangwa amandondo lika, co kwakele cikungulukilo ca vaka-kukulaela, voshe vapwile 120, co Petulu wemanene nakwendeka ngwendi, 16“Vakwetu, visoneka vinapande kupwa vya vushunga muje Munzinzime Wakujela wasesele Ndaviti kutumbula vya Yundasa, uje watwamenenene vaje vakwatele Yesu. 17Yundasa wapwile wa mu munga yetu, omwo vamwangwile kupwa wa ku vipangi vyetu.”

18(Na vimbongo vije vyatambwile Yundasa a vilinga vyendi vyavuvi wavilandele lihya, muje mwawilililile na kutsa, watavukile lifu na mila yendi yatutulukile. 19#Mat 27:3-8 Vanu voshe vakele mu Yelusalema vacizivile, co mu muyati wavo vatumbwile lije lihya ngwavo, Akalundama, kulumbununa ngwavo, “ Lihya lya Maninga.”)

20 # Mya 69:25; 109:8 “Omwo vanasoneka mu livulu lya Myaso ngwavo,

‘Njuvo yendi ipwe ya mupulungwa,

kesi mukale umo mu njuvo yendi.’ Vanasoneka lalo ngwavo,

‘Munu weka akahinge a vipangi vyendi.’

21“Ngecivene, munu umo napande kulikumbasana netu mukupwa mukaleo wakusanguka kwa Mwene Yesu. Napande kupwa umo wa vanalume vaje vakele mu munga yetu a simbu ije yoshe Mwene Yesu wendanganene netu, 22#Mat 3:16; Mak 1:9; 16:19; Luk 3:21; 24:51 kushangumuka ku simbu ije Yowano wambulwile muzimbu wendi wakumbwitika nakweta ku litangwa lije vatundisile Mwene Yesu kuli yetu nakuya mwilu.”

23Ngecivene, vemikile vanalume vavali, Yosefa, uje ivalukile Mbalasambase (vamutumbwile lalo ngwavo Njasitase), na Maseyase. 24Asinoni valombelele ngwavo, “Mwene, yove uzivuka viyongola vya vanu voshe, ngecivene, tusholwele iya umo akati kaava vanu vavali iwunaangula 25ngeci apange vipangi vya muluwa mu mwela wa Yundasa, uje waasezele nakuya ku mutambela wendi.” 26Asinoni vatele n̄ela mukwangula akati ka vanalume ava vavali, co uje vaangwileo wapwile Maseyase, co vamukumbasanene ku munga ya miluwa likumi na umo.

Currently Selected:

Vilinga vya Miluwa 1: MBB

Highlight

Copy