2 Tesalonika 3
3
Tulombeleleni
1Akukotoka, vakwetu, netu tulombeleleniko lalo ngeci lijwi lya Mwene liye kulutwe nakushandoka vwasi-vwasi ngeci valitambule na kalemeso, ngwe mumwalitambwile akati keni. 2Tulombeleleni lalo ngeci Njambi atwamene ku vanu va kupenga-penga vaka-vuvi, omwo kesi ngwe vanu voshe vanapu vaka-kukulaela ku lijwi embwe.
3Oloni Mwene ikeye wa kulongwa, co akamitakamesa nakuminyunga kuli uje Muka-vuvi. 4Co Mwene natwana kukulaela muli yeni, mwa vushunga vene tunakulaela ngwetu mulinakupanga, co mutwalao kupanga vije vitwamilekele.
5Mwene atwamenene vimbunge vyeni mukuzivisisa cizemo ca Njambi na lukakateya luje lwanamyana Kilistu.
Catupande kupanga vipangi
6Mu lizina lya Mwene Yesu Kilistu tulinakumishika, vakwetu, ngwetu, litengeni kuli voshe vanu vaje valinakuyoya ayoyesi ya vulwa, vaje kuvesi nakukavangeya vilongesa vitwamilongesele. 7Yeni vavenya mwazivuka mwamuvwa ngweni munapande kupanga ngwe muje mutwapangele yetu. Kutwakele na vulwa omo twakele amo neni. 8Kutwatambwile vukwaso vumo kuli munu umo kwakujeneka kumwilwisila lalo vyeka. Oloni twapangele nakuundangana, mutanya na vutsiki twatwaleleo nakupanga ngeci kesi tumitwike citele cimo. 9Twalingile eci, kesi ngwe omwo kutwakele na moko yakuyoyela a vyuma vya vukwaso embwe, oloni twacilingile mukumimwesa ngila ngeci muyikave. 10A simbu ije omo twakele amo neni, twamilekele ngwetu, “Woshe avyana kupanga kesi vamutavese kulya.”
11Tunendeka eci omwo twazivi ngwavo akati keni kuli vamo vanu valinakuyoya mu ngila ya vulwa, vaje kuvesi nakupanga nacimo cai kuvanga kukundama lika mu vipangi vya vakwavo veka. 12Mu lizina lya Mwene Yesu Kilistu tulinakushika ava vanu nakuvanangula ngeci vanapande kuyoya mwamuvwa nakupanga vipangi vyakuvayoyesa mukuyoya kwavo vavenya.
13Oloni yeni, vakwetu, kumwapandele kujuka kulinga mwamuvwa. 14Amo kuli umo uje kashaka kwononoka lijwi lyetu lije twatumu kuli yeni mu mukanda ou. Nga ngoconi, mukengeni, co mushondolokeni, ngeci shwamwa imukole. 15Kesi mumupangese ngwe napu citozi embwe, oloni munanguleni lika ngwe musamba.
Majwi akumanesela
16Mwene vavenya, uje wapwa nsina ya kwoloka kwetu, amyane kwoloka a simbu yoshe na mu vingila vyoshe. Mwene akale neni muvavoshe.
17Na livoko lyange vavenya njasoneka ngwange, “Ciindu cakutunda kuli yange Paulu.” Eyi ikeyo ngila ya cimweso ca mikanda yange yoshe, omu mukemwo njikasoneka.
18Kutetela kwa Mwene yetu Yesu Kilistu kukale neni voshe.
Currently Selected:
2 Tesalonika 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006