Hebreos 8

Jaꞌ Jesús Yaawil Yakꞌomal Cu Xaambꞌal Tet Dios Yin Jun Acꞌ Wa Kꞌane

1Jaꞌ jun tiꞌ chi wal ey jex an, yu snaꞌcha el je yu. Ey jun yaawil yakꞌomal cu xaambꞌal chotan ey Naj tinaniꞌ bꞌey swatxꞌ kꞌabꞌ Dios bꞌey sdespacho bꞌey satcan. 2Lalan smulna Naj yin yakꞌomaloj xaambꞌal bꞌey jun sna Dios jaꞌcaw. Jaꞌ Naj Kaawil jix waꞌnen jun na tuꞌ, man ánima oj jix waꞌneni. 3Junjun cꞌal yaawil yakꞌomal xaambꞌal ey yopiso chi yakꞌ saꞌbꞌeal, chi yakꞌon pax xaambꞌal, yuxan quey pax tuꞌ Naj Jesucristo, sowalil ey tzetyetal chi yakꞌ Naj. 4Ta chi ecꞌ Naj yul yibꞌankꞌinal tiꞌ, cꞌam yopiso Naj yin yakꞌomaloj xaambꞌal, yutol eyto cꞌal ecꞌ ebꞌ ey yopiso yakꞌomal xaambꞌal yu sley Moisés. 5Jaꞌ tzetyetal chi yun ebꞌ bꞌey yul yibꞌankꞌinal tiꞌ, txꞌoxbꞌanile ye yu tzetyetal ey bꞌey satcan. Kotaj tol txꞌoxbꞌanile ye wan tiꞌ, yutol jaꞌ yet cꞌamto chi waꞌxi jun Kꞌap Na yet Dios tuꞌ* yu naj Moisés tuꞌ, catuꞌ jix al-le tet naj yu cu Mam Dios jaxca tiꞌ:

—Moisés, abꞌ tzet chi wal an. Waꞌne masanil jaxca jun yechel jix jin txꞌox ja wil bꞌey sjolom jun wonan an, ẍi Dios tet naj Moisés.#Éxodo 25:40. 6Jal pax Naj Kaawil chi akꞌon cu xaambꞌal tinaniꞌ xin, yel xacꞌal watxꞌ smulnail tet tzet chi yun ebꞌ naj tuꞌ, yutol jaꞌ jun acꞌ swa kꞌane Dios jix waꞌxi yetoj ánima, yel xacꞌal watxꞌ tet jun bꞌabꞌel swa kꞌane Dios yetoj ánima, yutol jaꞌ tzetyetal jix yakꞌ can stiꞌ Dios yin jun acꞌ wa kꞌane yel xacꞌal watxꞌ tet yet jun bꞌabꞌel wa kꞌane. 7Ta tzꞌajan jun bꞌabꞌel wa kꞌane tuꞌ, cꞌamxa sowalil jun acꞌ wa kꞌane. 8Jix il-le spenail yin ebꞌ ánima yu cu Mam Dios. Jaxca chi yal yul An Juun:

Jix yalon Naj Kaawil:

—Ey jun ánima oj juloj. Oj jin waꞌne junoj acꞌ wa kꞌane yetoj ebꞌ a Israel cꞌal yetoj ebꞌ a Judá.

9Jaꞌ jun wa kꞌane tiꞌ, man jaxca jun jix jin waꞌne yetoj yichmam ebꞌ an yet jix wiꞌon eltej ebꞌ yetoj jin kꞌabꞌ bꞌey txꞌotxꞌ Egipto an. Ma cꞌal pax sjije ebꞌ jun wa kꞌane jix jin waꞌne yetoj ebꞌ tuꞌ an. Yuxan jix jin bꞌejcan ebꞌ an.

10Jaꞌ yet oj lawoj jun tiempoal tuꞌ, oj jin waꞌne jun acꞌ wa kꞌane yetoj ebꞌ a conobꞌ Israel an.

Oj yal jaxca tiꞌ: Oj waoc jin chejbꞌanil yin snaꞌbꞌal ebꞌ an, catuꞌ oj jin oc sDiosaloj ebꞌ an, catuꞌ oj oc ebꞌ jin conobꞌoj an.

11Man sowalil oj chi yal-le ebꞌ tet yet cꞌal tet yuẍtaj yu jin yotajne el ebꞌ an. Yutol masanil ebꞌ icham ánima cꞌal ebꞌ unin oj jin yotajne el ebꞌ an.

12Oj wakꞌ mimancꞌulal yin spenail ebꞌ an, catuꞌ manxa oj jin naoꞌtane spenail ebꞌ tuꞌ an, ẍi Naj Kaawil yul An Juun.#Jeremías 31:31-34.

13Jaꞌ yet jix yalon cu Mam Dios yu jun acꞌ wa kꞌane tiꞌ, chi cu naꞌeloj tol lalan xilbꞌi el jun bꞌabꞌel wa kꞌane tuꞌ. Ta ey junoj tzetyetal lalan xilbꞌi eloj, cꞌamxa tzet chi oqui, tuxa oj qꞌueyeloj.

Currently Selected:

Hebreos 8: knj

Highlight

Copy