Hebreos 7

Jaꞌ Yopiso Jesús Yakꞌomal Cu Xaambꞌal Jaxca Yopiso Naj Melquisedec

1Jaꞌ naj Melquisedec, rey yeoc naj bꞌey conobꞌ Salem yet peyxa, catuꞌ yakꞌomal pax xaambꞌal naj yu ebꞌ conobꞌ tet Dios yel miman yeloc apnoj. Jaꞌ yet junel, bꞌetnaj ecꞌ naj Abraham yakꞌle jowal yetoj wanxa ebꞌ rey. Jix akꞌle ganar ebꞌ yu naj. Jaꞌ yet lalan smeltzotej naj tuꞌ, catuꞌ jix ẍaꞌlen el sbꞌa naj yul bꞌe yetoj naj Melquisedec. Catuꞌ jix kꞌanle swatxꞌcꞌulal Dios yibꞌan naj Abraham tuꞌ yu naj Melquisedec. 2Jix yakꞌ sdiezmoal masanil tzetyetal jix bꞌet yiꞌ naj bꞌey jun jowal tuꞌ tet naj Melquisedec tuꞌ.#Génesis 14:17-20. Jaꞌ jun bꞌie Melquisedec tuꞌ, chi yal yeloc apnoj, “Rey Yeoc Naj Yin Sjichanil,” sreyal pax conobꞌ Salem yeoc naj. Jun bꞌie Salem, chi yal yeloc apnoj, “Watxꞌcꞌulal.” 3Man otajnebꞌil oj smam xutx naj, cꞌal yetoj yichmam, catuꞌ cꞌam chi yaltej yin yalubꞌal yetoj scamichal. Yuxan txꞌoxbꞌanile yeoc naj yu Naj Scꞌaal Dios, jaꞌton Naj yakꞌomal xaambꞌal tet Dios yin tobꞌalkꞌinal. 4Jaꞌ tinaniꞌ xin, naꞌcha ojabꞌ el je yu xin, tol miman yeloc apnoj naj Melquisedec tuꞌ, yutol jix yakꞌ sdiezmoal masanil wan tzettaj yetal jix bꞌet yiꞌ naj kichmam Abraham tuꞌ tet naj yet jix bꞌet yakꞌon jowal tuꞌ yetoj ebꞌ yaaw. 5Chi yal sley Moisés, tol jaꞌ ebꞌ yicꞌaal naj Leví, jaꞌ ebꞌ chi oc yakꞌomaloj xaambꞌal ebꞌ ket conobꞌ tet Dios, catuꞌ albꞌilcan tet ebꞌ, tol chi akꞌle sdiezmoal masanil jantaj tzetyetal tet ebꞌ yu conobꞌ. Caxcꞌal yicꞌaal naj Abraham ebꞌ masanil, tol sowalil cꞌaltaꞌ chi yakꞌ sdiezmoal stzettaj yetal ebꞌ conobꞌ tet ebꞌ yicꞌaal naj Leví. 6Jaꞌ naj Melquisedec tuꞌ, caxcꞌal man yicꞌaal oj Leví naj, chabꞌil pax sdiezmo naj Abraham yu naj. Catuꞌ jix skꞌanon swatxꞌcꞌulal Dios naj yibꞌan naj Abraham tuꞌ, naj bꞌey jix yakꞌ can stiꞌ Dios. 7Kotaj tol jaꞌ mac chi kꞌanon swatxꞌcꞌulal Dios yibꞌan junojxa mactxequel yel miman yeloc apnoj jun chi kꞌanon swatxꞌcꞌulal Dios yintaj jun chi chaꞌon swatxꞌcꞌulal Dios tuꞌ. 8Jaꞌ ebꞌ chi chaꞌon sdiezmo ebꞌ ket conobꞌ tinaniꞌ, ánima ebꞌ, chi cam ebꞌ, chi yal pax yul An Juun, tol jaꞌ naj Melquisedec jaxca tol iquisto ecꞌoj. 9Jaꞌ naj Leví, cꞌal yicꞌaal naj, chi chaꞌon sdiezmo ebꞌ ket conobꞌ, tol chi skeꞌ pax kaloni, tol jix yakꞌ sdiezmo ebꞌ yetoj naj Abraham yet jix yakꞌon yet naj tet naj Melquisedec tuꞌ yet peyxa. 10Yutol, jaꞌ yet jix ẍaꞌlen sbꞌa naj Abraham yetoj naj Melquisedec tuꞌ, cꞌamto chi ali naj Leví tuꞌ, jaxca tol eyecꞌ naj yetoj naj Abraham tuꞌ, yutol icꞌaale yeoc naj yu naj Abraham tuꞌ. 11Jaꞌ ebꞌ chi akꞌon xaambꞌal ebꞌ ket Israelal tet Dios, yicꞌaal Leví ebꞌ, catuꞌ icꞌaale to pax yeoc ebꞌ yu naj Aarón, yuxan cannaj can sley Moisés tet ebꞌ ket Israelal. Ma pax skeꞌ swaꞌxi oc snaꞌbꞌal ebꞌ ket conobꞌ yu ebꞌ, yuxan sowalil jix jul junxa chi akꞌon cu xaambꞌal tet Dios. Jaꞌ junxa tuꞌ, man laan oj jaxca ebꞌ yicꞌaal naj Aarón, tol laan jaxca naj Melquisedec. 12Jaꞌ yet chi qꞌuexi mac chi oc yakꞌomaloj xaambꞌal tet Dios, sowalil chi sqꞌuex pax sley. 13Jaꞌ mactxequel lalan yal-le tiꞌ, jaꞌton Naj Kaawil. Jaꞌ Naj Kaawil tiꞌ, man yicꞌaal oj Leví Naj. Txꞌoj jun bꞌulan ebꞌ Israel ey yicꞌaal Naj. Cꞌam junoj yakꞌomal xaambꞌal tet Dios xol jun bꞌulan ebꞌ tuꞌ. 14Kotaj tol yicꞌaal Judá Naj Kaawil, cꞌam cꞌal tzet yalnaj can naj Moisés ta ey junoj ebꞌ yicꞌaal naj Judá chi skeꞌ yoc yakꞌomaloj xaambꞌal yu ebꞌ conobꞌ tet Dios. 15Yel xacꞌal watxꞌ snaꞌcha el wan tiꞌ ku, yutol jaꞌ junxa yakꞌomal cu xaambꞌal tet Dios jix jul tiꞌ. Laan yopiso jaxca naj Melquisedec. Jaꞌton Naj Kaawil. 16Manaj sley Moisés jix aon oc yopiso yakꞌomaloj cu xaambꞌal tet Dios, jix oc cꞌal yopiso yutol cꞌam bꞌakꞌin chi tan el skꞌinal Naj. 17Yutol albꞌil tet Naj yu Dios jaxca tiꞌ:

—Jaach tiꞌ, ey ja wopiso ja wakꞌon xaambꞌal ebꞌ ánima ey jin an yin tobꞌalkꞌinal jaxca naj Melquisedec, ẍi Dios tet Naj.#Salmos 110:4. 18Yuxan tannaj xa el jun bꞌabꞌel ley tuꞌ, yutol cꞌam yip, catuꞌ cꞌamxa yopiso. 19Cꞌam niꞌoj tzetyetal jix swaꞌne jun ley tuꞌ, jal junxa yel xacꞌal watxꞌ jix oc can sqꞌuexeloj. Jaꞌton jun tiꞌ eyoc yipoj cu cꞌul tinaniꞌ. Yu jun tiꞌ chi skeꞌ cu jitzwi oc scꞌatan Dios. 20Jaꞌ yet jix waꞌxi can jun tiꞌ yu Dios, jix yakꞌon can stiꞌ. 21Ma pax yakꞌ can stiꞌ Dios yet jix oc wanojxa ebꞌ yin yakꞌomaloj xaambꞌal. Jal yet jix ale oc yopiso Naj Jesús yakꞌon cu xaambꞌal tet Dios, jix yakꞌon can stiꞌ Dios, yutol tzꞌibꞌebꞌilcan yul An Juun jaxca tiꞌ:

—Jaꞌ Dios, Kaawil tuꞌ junel cꞌal jix yakꞌ can stiꞌ, yutol cꞌam bꞌakꞌin oj sqꞌuex tzet chi yalaꞌ. Yalnaj can jaxca tiꞌ, “Jaach tiꞌ, ey ja wopiso ja wakꞌon xaambꞌal ebꞌ ánima ey jin an yin tobꞌalkꞌinal jaxca yopiso naj Melquisedec,” ẍi Dios tet naj yul An Juun.#Salmos 110:4. 22Yu jix yun jaxca tiꞌ, yel xacꞌal watxꞌ jun acꞌ wa kꞌane tiꞌ yintaj jun bꞌabꞌel wa kꞌane. 23Ecꞌal ebꞌ ecꞌlenaj yakꞌomaloj xaambꞌal tet Dios. Cꞌam junoj ebꞌ jix can yin jun opiso tuꞌ yin tobꞌalkꞌinal, yutol chi cam ebꞌ. 24Jal pax Naj Jesús xin, iquis cꞌal ecꞌ Naj, yuxan ey yopiso Naj yakꞌomaloj cu xaambꞌal tet Dios yin tobꞌalkꞌinal. 25Yuxan jaꞌ mac chi ale oc yetoj Dios yu Naj, chi skeꞌ yakꞌle scolbꞌanil ebꞌ yu Naj yin tobꞌalkꞌinal, yutol iquis cꞌal Naj yu yaon oc cu tiꞌ tet Dios. 26Yuxan, jaꞌton jun yakꞌomal cu xaambꞌal tiꞌ, caw ey yopiso yutol caw tzꞌajan Naj. Cꞌam niꞌoj spenail eyoc yin. Man laan oj sbꞌeybꞌal jaxca ebꞌ penawom. Yel miman yeloc apnoj Naj yintaj masanil wanxa bꞌey satcan. 27Man laan oj jaxca ebꞌ chi akꞌon xaambꞌal ebꞌ ket conobꞌ tet Dios, yutol jaꞌ ebꞌ tuꞌ, sowalil chi yakꞌ xaambꞌal ebꞌ junjun cꞌu. Bꞌabꞌel chi yakꞌ yet ebꞌ yu spenail, catuꞌ chi yakꞌon pax ebꞌ yu spenail ebꞌ yet animail. Jal pax Jesús xin, junel chꞌan jix yakꞌ sbꞌa yin cu xaambꞌaloj yu cu penail yet jix yakꞌon cam sbꞌa. 28Yu sley Moisés, jaꞌ ebꞌ chi oc yin yaawiloj yakꞌomaloj cu xaambꞌal tet Dios, ánima ton ebꞌ, jaꞌ yet jix lawi yopiso jun ley tuꞌ xin, junel cꞌal jix yakꞌ can stiꞌ Dios, catuꞌ jix yaon oc yopiso junxa yaawil yakꞌomal cu xaambꞌal tet Dios, jaꞌton Naj Scꞌaal Dios. Jaꞌ Naj jix oc yin tzꞌajanil yin tobꞌalkꞌinal.

Currently Selected:

Hebreos 7: knj

Highlight

Copy