Hebreos 12

1Ecꞌal ton ebꞌ xꞌoxnaj el sbꞌa tol jix ya ton oc Dios ebꞌ yin scꞌul. Jaꞌ ebꞌ jix yaoc yin scꞌul tuꞌ, jaxca tol joyan oc ebꞌ kinlaj tinaniꞌ, tol chi yakꞌ testigoal sbꞌa ebꞌ tol yel caw jichan ton Dios. Jaon lalan kakꞌon ani jaxca ebꞌ chi yakꞌ ani, yuxan sowalil chi kiꞌel kijatz iꞌbꞌil ku tuꞌ, yutol yu wan tuꞌ, yuxan pena cu bꞌeyi. Yetoj cꞌal pax oj, sowalil chi cu bꞌejcan cu penail, yutol jaꞌ cu penail tuꞌ, laan jaxca tzet chi too bꞌakꞌan xol kajan, catuꞌ chi cu telcꞌo yu, yuxan tecꞌan ojabꞌ chi kute kakꞌon jun ani chi akꞌle ey jon. 2Kawej oc cu naꞌbꞌal yin Jesús. Yu Naj yuxan chi skeꞌ kaon oc cu cꞌul yin, catuꞌ yu Naj yuxan tzꞌajaji chi kute kaon oc yin cu cꞌul. Jaꞌ Naj jix yabꞌ syaꞌil yin teꞌ culus. Cꞌam niꞌoj tzet jix yal scꞌul Naj, caxcꞌal mi caw qꞌuixwiltaj jix yun scami, yutol yotaj Naj tol jaꞌ yet oj lawoj yabꞌen syaꞌil tuꞌ, oj ẍaꞌ miman tzalacꞌulal yin spaj oj. Jaꞌ tinaniꞌ, chotan ey Naj bꞌey swatxꞌ kꞌabꞌ sdespacho Dios. 3Yuxan naꞌwejtej sbꞌeybꞌal Jesús, tzet jix yute yakꞌon techaoj yet jix yabꞌen syaꞌil yu ebꞌ penawom, yu tuꞌ xin, cꞌam ojabꞌ chex cꞌuumbꞌi aoj, yet watxꞌ cꞌam chi lawi ey je tecꞌanil. 4Tecꞌan cꞌal che yute je bꞌa tet jantaj tzet man watxꞌoj, yutol cꞌam tocꞌal chex cam yu. 5Tejan jix too qꞌueycꞌulal je yu tzet jix yal can Dios ey jon yet jix yakꞌon snaꞌbꞌal ey jon yet jix yalon can jaxca junoj mame chi yal tet yuninal. Chi yal yul An Juun jaxca tiꞌ:

Jex wuninal, jaꞌ yet chex tenchanele yu Naj Kaawil, ma yet chex yakꞌon cuenta Naj, manche je yintajne can eloj. Manche jex cajtza aoj yet chex tenchanelei.

6Yutol jaꞌ Naj Kaawil tiꞌ, chi akꞌon cuenta ebꞌ camcꞌulnebꞌil. Jaꞌ ebꞌ chi chaꞌle oc yuninal oj yu Dios chi tenchanele ebꞌ yu, ẍi yul An Juun.#Proverbios 3:11, 12.

7Sowalil chi kakꞌ techa wan syaꞌilal chi al-le tiꞌ. ¿Tumi ey junoj uninale cꞌam chi akꞌle cuenta yu smam xin? 8Kꞌinaloj ta cꞌam chi cu yakꞌ cuenta jaxca chi yute yakꞌon cuenta masanil yuninal, ¿man jon mi yuninal oj, chi yal tuꞌ, comon unin jon mi yul sat? 9Jaꞌ yet chi cu yakꞌon cuenta ebꞌ cu mam yul yibꞌankꞌinal tiꞌ, cꞌam chi kintajne can el scuenta ebꞌ tuꞌ. Yuxan caw jijem ojabꞌ chi kute cu bꞌa tet jun cu Mam cꞌam chi kiloc yin tuꞌ, yet watxꞌ oj cu chaꞌ cu kꞌinal tol ey cꞌal yin tobꞌalkꞌinal. 10Jaꞌ cu mam junjun jon yul yibꞌankꞌinal tiꞌ, chi cu yakꞌ cuenta ebꞌ yin niꞌoj tiempoal jaxca yin swatxꞌilal chi snaꞌ ebꞌ. Jal pax Dios chi cu yakꞌ cuenta yu cu waꞌxi eloj, yet watxꞌ chi waꞌxi oc cu naꞌbꞌal jaxca snaꞌbꞌal Dios. 11Yel toni, jaꞌ yet chi ale oc cu tzꞌuumal, cꞌam junoj jon chi cu tzala yu syaꞌilal tuꞌ yet chi ale oc kibꞌan. Chi waꞌxi pax oc cu naꞌbꞌal yu, cꞌuancꞌulal chi cu jichlo oc yu, catuꞌ chi jul cu watxꞌcꞌulal. 12Jaex tiꞌ, jaxca tol cꞌam yip je kꞌabꞌ, jaxca tol sicbꞌinaj el je yajan, yutol cꞌam je tecꞌanil, yuxan akꞌwej je yip je waꞌnen oc je naꞌbꞌal. 13Seywej junoj bꞌeybꞌale jichan che bꞌeybꞌalne. Jaxca tuꞌ oj yun swaꞌxi oc je naꞌbꞌal jaxca chi yun swaꞌxi junoj coxoꞌ yajan tol asan bꞌey junoj bꞌe tol watxꞌ yeqꞌui jatuꞌ chi eqꞌui.#Proverbios 4:26. 14Akꞌwej je yip je yeecꞌ yin swatxꞌilal yetoj masanil ánima. Waꞌnewej oc je naꞌbꞌal yin Naj Kaawil. Yutol jaꞌ ebꞌ cꞌam chi yaoc snaꞌbꞌal yin Naj, ma skeꞌ yilon yin Naj ebꞌ. 15Che yil cꞌal je bꞌa xin, yet watxꞌ cꞌam jex junoj jex chex el yalan swatxꞌcꞌulal Dios, catuꞌ cꞌam chi pitzcꞌu a chichoncꞌulal snan je xol, catuꞌ chi somcha el je naꞌbꞌal yu. Catuꞌ ecꞌal jex chex etextoj yu jun chichoncꞌulal tuꞌ. Jaꞌ jun chichoncꞌulal tuꞌ, jaxca junoj sat teꞌ teꞌ kꞌaꞌ chi chꞌibꞌ snan je xol. 16Cꞌam ojabꞌ junoj jex chi oc je mul yul skꞌabꞌ je yetbꞌi, jacꞌalaꞌ jex cꞌam je yetbꞌi, manche yaoc je mul. Cꞌam ojabꞌ jex cꞌam yeloc apnoj Dios yul je sat, jaxca jix yute sbꞌa naj Esaú. Jaꞌ naj Esaú tuꞌ, bꞌabꞌel unin naj yu smam, yuxan ey yalon yet naj ẍaꞌon wan tzetyetal tet smam tuꞌ. Tol jix sqꞌuextoj wan tzet ey yalon yet ẍaꞌon tuꞌ yu jun loꞌbꞌe. 17Kotaj tol tzunan to wal catuꞌ chi yochen tol chi akꞌle jun swatxꞌcꞌulal tet naj yu smam, cꞌamxa cꞌal pax tzet jix akꞌle tet. Caxcꞌal caw jix okꞌi, cꞌamxa cꞌaltaꞌ tzet jix yun skeꞌon sqꞌuexle tzet jix yun tuꞌ.#Génesis 25:27-34. 18Jaon tiꞌ, man laan oj chi kun jaxca ebꞌ ket conobꞌ Israel yet peyxa, yutol jaꞌ ebꞌ tuꞌ jix bꞌetecꞌ bꞌey jun wonan bꞌey yul yibꞌankꞌinal tiꞌ, bꞌey ey jun kꞌakꞌ chi chaw xaj, jaꞌton wonan Sinaí. Jaꞌ bꞌey tituꞌ caw kꞌej jolinaj catuꞌ jix ecꞌ jun cajxuchum kaꞌeꞌ. 19Jix yabꞌ ebꞌ yokꞌ jun trompeta, catuꞌ jix yabꞌen pax ebꞌ yel yaw yul snukꞌ Dios yet jix kꞌanabꞌ eytej Dios tet ebꞌ. 20Yutol ma techa yabꞌen ebꞌ yet chi yalon eytej jun ẍejbꞌanil Dios tuꞌ, jun chi alon jaxca tiꞌ: “Ta ey junoj mactxequel chi jul bꞌey jun wonan tiꞌ, caxcꞌal noꞌ, sowalil chi kꞌojchꞌennele camoj, ma tol chi tejle cam yetoj jun lanza xin,” ẍi jun ẍejbꞌanil Dios tuꞌ.#Éxodo 19:12, 13. 21Caw chi xiw ebꞌ yet jix yilon wan tuꞌ, catuꞌ chi xiw pax naj Moisés. Jix yal naj jaxca tiꞌ: “Caw chin lujlon yu xiwcꞌulal an,” ẍi naj Moisés tuꞌ.#Deuteronomio 9:19. 22Jal jon jaon tiꞌ, manaj bꞌey jun sat txꞌotxꞌal wonan tuꞌ eytoj cu naꞌbꞌal. Yutol jaꞌ bꞌey wonan Sión bꞌey sconobꞌ Dios iquis, jatuꞌ eyatoj cu naꞌbꞌal. Jaꞌ jun tuꞌ, jaꞌton jun Jerusalén ey bꞌey satcan, bꞌey manxa jantajoj ebꞌ ángel. 23Junne eytoj cu naꞌbꞌal yetoj ebꞌ chi alon watxꞌ kꞌane tet Dios, yetoj bꞌey eyecꞌ ebꞌ yuninal xa Dios, ebꞌ tzꞌibꞌebꞌil xa sbꞌi bꞌey satcan. Jaꞌ bꞌey tituꞌ eyecꞌ Dios, Juez yeoc yibꞌan masanil ánima. Jaꞌ tituꞌ eyecꞌ spixan ebꞌ watxꞌ jix yute sbꞌa, jaꞌton ebꞌ tzꞌajan ye yu Dios. 24Catuꞌ jaꞌ pax tituꞌ eyecꞌ Jesús. Jaꞌ Naj chi akꞌon jun acꞌ swa kꞌane Dios. Jaꞌ ẍiqꞌuil Jesús tuꞌ, jaꞌ tzꞌicbꞌiltoj cu yaꞌiloj. Jaꞌ ẍiqꞌuil Jesús tiꞌ, yel miman yeloc apnoj tzet jix yunne yintaj yet naj Abel. 25Yuxan kilwej cꞌal cu bꞌa, yet watxꞌ manche kintajnewej el jun mac chi kꞌanabꞌ ey jon tiꞌ. Jaꞌ ebꞌ intajnen el Dios yet peyxa tuꞌ, yet stenchanele ebꞌ yu yul yibꞌankꞌinal tiꞌ, man colchanaj oj ebꞌ. Jajxam wal jaon tiꞌ, ma cꞌaltaꞌ cu colcha xin, ta chi kintajne el jun chi kꞌanabꞌ eytej ey jon satcan. 26Jaꞌ yet jix kꞌanabꞌ yet peyxa tuꞌ, caw jix bꞌilwi txꞌotxꞌ txꞌotxꞌ tiꞌ yet jix el yaw yul snukꞌ. Jal tinaniꞌ, chi yal jaxca tiꞌ: “Jaꞌ yet junelxa, man asanne oj txꞌotxꞌ txꞌotxꞌ tiꞌ oj wakꞌ bꞌilwoj an, oj wakꞌ cꞌal pax bꞌilwoj satcan an,” ẍi cu Mam Dios.#Hageo 2:6. 27Jaꞌ jun chi yal junelxa tiꞌ, chi yal yeloc apnoj tol jaꞌ masanil wan waꞌnebꞌil yu tuꞌ oj yakꞌ bꞌilwoj, catuꞌ oj yakꞌon tan eloj. Jal pax wan cꞌam chi skeꞌ sbꞌilwi xin, oj can ebꞌ junelne. 28Jaꞌ wan cꞌam chi bꞌilwi tuꞌ, jaꞌton jun lugar chi yakꞌ Dios ey jon, bꞌey eyecꞌ Naj Kaawil. Yuxan kalwej yu diosalil tet Dios. Kiꞌwej ey cu bꞌa tet. Kalwej cu bꞌa tet jaxca chi yoche scꞌul. Xiwojonwej tet Dios. 29Yutol jaꞌ cu Diosal tiꞌ, laan jaxca junoj kꞌakꞌ kꞌakꞌ chi tzꞌaꞌtoj masanil yu.

Currently Selected:

Hebreos 12: knj

Highlight

Copy