Génesis 50

1Catuꞌ jix okꞌa naj José tuꞌ, jix oc lakꞌan naj yin smam, catuꞌ jix stzꞌubꞌon el stiꞌ. 2Jix lawi tuꞌ, jix yalon naj José tet ebꞌ anwam chi mulna bꞌey sna, tol chi oc ambꞌal yin smimanil smam tuꞌ, jaꞌton naj Israel. Jix ale oc ambꞌal yin, yet watxꞌ cꞌam chi etextoj. 3Cawinaj cꞌu chilan cꞌal yale oc ambꞌal yin smimanil smam tuꞌ, yutol jaxca tuꞌ sbꞌisil cꞌu chi yiꞌtoj yet chi ale oc ambꞌal yin junoj mimanile tol camnajxa. Jix cus ebꞌ naj a Egipto junoj 70 cꞌu yu scamichal naj Jacob tuꞌ. 4Jix lawi ecꞌ jun 70 cꞌual tuꞌ, catuꞌ jix too naj José kꞌanabꞌ yetoj ebꞌ naj ey yopiso bꞌey sdespacho naj rey Faraón, jix yalon tet ebꞌ naj jaxca tiꞌ:

—Ta watxꞌ jin yul je sat, okꞌ ojabꞌ je cꞌul win an, chi too je yal tet naj rey tuꞌ wu an, 5yutol jaꞌ yet tuxa chi cam naj jin mam, jix yalon can naj ey jin, tol chi wakꞌ jin tiꞌ, yutol jaꞌ tituꞌ chin muj jin mam tuꞌ bꞌey jun smujbꞌanil camom, tol jaꞌ jix waꞌnen canoj. Jaꞌ tituꞌ ey yul yet txꞌotxꞌ Canaán. Yu jun tuꞌ, yuxan chi wal ey jex an, tol chi too jin mujcan jin mam tuꞌ; asan chi lawi jin mujon can jin mam tuꞌ, catuꞌ chin meltzotej, ẍi naj José tuꞌ tet ebꞌ.

6Jix yalon naj rey tet naj jaxca tiꞌ:

—Asiꞌ, mujcan smimanil ja mam tuꞌ, jaxca wal jix yute yalon can ey jaach, ẍi naj rey tuꞌ.

7Jix lawi tuꞌ xin, jix too naj José smujon can smam tuꞌ. Masanil ebꞌ eyoc yin yopiso yetoj naj rey, jaꞌton ebꞌ ey yopiso yul yet Egipto tuꞌ, jix too ebꞌ mujwal yetoj naj José. 8Jix too masanil ebꞌ yuninal naj Jacob tuꞌ, cꞌal ebꞌ yuninal naj José, cꞌal masanil yuninal ebꞌ yuẍtaj naj José tuꞌ. Asanxane ebꞌ yaliẍ unin jix can bꞌey Gosen yetoj noꞌ jobꞌbꞌeal noꞌ. 9Ey pax ebꞌ eyoc yul carruaje yet jix too ebꞌ mujwal tuꞌ, ey pax mactxequel eyoc yibꞌan che, yuxan caw ecꞌal ebꞌ ánima jix too yetoj José tuꞌ. 10Jaꞌ yet jix apni oc ebꞌ bꞌey Goren-ha-atad yetcꞌulal bꞌey chi aol cꞌu sattaj eltoj jaꞌ miman Jordán, jaꞌ tituꞌ jix steyne yakꞌbꞌalil smimanil Jacob ebꞌ, naj José caw wal jix cus naj sicꞌlebꞌil yin jujebꞌ cꞌu yu smam tuꞌ, yetoj masanil cꞌal ebꞌ jaꞌjun yetoj tuꞌ, jix cus ebꞌ yu scamichal Jacob.

11Jaꞌ yet jix yilon ebꞌ Cananeo eyecꞌ bꞌey jun txꞌotxꞌ tuꞌ, tzet chi yun steynen yakꞌbꞌalil scamom ebꞌ a Egipto tuꞌ, jix yalon ebꞌ jaxca tiꞌ: Jaꞌ ebꞌ a Egipto tiꞌ, caw wal eyxa smey chi yun yilon yakꞌbꞌalil scamom ebꞌ, ẍi ebꞌ. Yu jun tuꞌ xin, jix yakꞌon ebꞌ yij sbꞌi jun txꞌotxꞌ tuꞌ Abel-Misraim.#50:11 Abel-Misraim laan chi yun yeloc apnoj yetoj jun kꞌane, “scuscꞌulal ebꞌ a Egipto”. Jaꞌ tituꞌ ey yetcꞌulal bꞌey chi aol cꞌu bꞌey jaꞌ miman Jordán.

12Jaꞌ masanil tzet jix yal can naj Jacob tet ebꞌ naj scꞌaal, jix sjije yuneni. 13Jix yiꞌontoj smimanil smam ebꞌ naj bꞌey yul yet Canaán, jix smujon can ebꞌ naj yul chꞌen jolan chꞌen bꞌey Macpelá, jaꞌton chꞌen manbꞌil can yu Abraham tet naj Efrón, Hitita; jaꞌ jun tuꞌ jix oc can smujbꞌaniloj scamom ebꞌ naj. Jaꞌ jun txꞌotxꞌ bꞌey ey chꞌen jolan chꞌen tuꞌ, jatuꞌ ey yetcꞌulal bꞌey chi aol cꞌu bꞌey xꞌotxꞌ naj camom Mamré. Jaxca wal tuꞌ jix yun yeloc jaxca yochwan naj camom Jacob. 14Yet jix lawi smujon can smam naj José tuꞌ, catuꞌ jix meltzo yetoj ebꞌ yuẍtaj cꞌal yetoj masanil ebꞌ a Egipto jaꞌjun yetoj.

Jix Yakꞌ Mimancꞌulal Naj José Yin Ebꞌ Yuẍtaj

15Jaꞌ yet jix camtoj naj Jacob tuꞌ, jix cꞌoli snaꞌon ebꞌ yuẍtaj naj José, jix yalon ebꞌ naj jaxca tiꞌ: Jaꞌ tinaniꞌ tejan oj tit sjowal naj José tiꞌ kin, tejan oj yaecꞌ spaj naj ey jon jaxca yet jix ketnen naj, ẍi ebꞌ naj. 16Yu jun tuꞌ xin, jix yatoj kꞌane ebꞌ tet José, jix yalontoj ebꞌ naj jaxca tiꞌ: Jaꞌ yet cꞌamto chi cam cu mam, jix yalon canoj, tol chi kal ey jaach jaxca tiꞌ: 17Chin oc tean ja win, tol cha wakꞌ mimancꞌulal yibꞌan ebꞌ naj ja wuẍtaj tiꞌ, yu tzetyetal pena jix jaach yute ebꞌ naj, queytuꞌ jix yute yalon can naj. Yu jun tuꞌ, jaon ẍejabꞌ jon cu Diosal yetoj cu mam tuꞌ, chi kal ey jaach tol cha wakꞌ mimancꞌulal kibꞌan jon bꞌey jantaj spenail jix jaach el kuteni, ẍi toj ebꞌ naj.

Jaꞌ yet jix yalon ẍejbꞌanil ebꞌ naj chejabꞌwom tuꞌ, catuꞌ jix okꞌa naj José tuꞌ. 18Jaꞌ yet jix apni oc ebꞌ naj yuẍtaj tuꞌ sattaj, jix ey noan ebꞌ naj, jix yaon xacꞌal ey spalan ebꞌ naj sat txꞌotxꞌ, jix yalon ebꞌ naj jaxca tiꞌ:

—Jaon tiꞌ wuẍtaj, ja wakꞌomal servil keoc jon, ẍi ebꞌ naj.

19Catuꞌ jix takꞌwi naj José jaxca tiꞌ:

—Cꞌam cꞌal chex xiwi, cꞌam chi skeꞌ waon oc jin bꞌa sqꞌuexeloj Jehová. 20Jaex tiꞌ, pena tzet jix je naꞌ win an, jaꞌ Jehová jix qꞌuexon jun je pena naꞌbꞌal tuꞌ yin swatxꞌil, yet watxꞌ miman ánima chi colcha eloj, jaꞌton wal lalan kilon tiꞌ. 21Yu jun tuꞌ xin, jaꞌ tinaniꞌ cꞌam chex xiw yu jun tiꞌ, jain oj wakꞌ je loꞌbꞌe yetoj ebꞌ je yuninal, ẍi José tet ebꞌ yuẍtaj tuꞌ. Jaxca tuꞌ jix yun smimancꞌulnele ebꞌ, yuxan caw watxꞌ jix yute kꞌanabꞌ sbꞌa ebꞌ yin camcꞌulal.

Scamichal Naj José

22Jix too eecꞌal naj José yetoj ebꞌ yican bꞌey Egipto. Ey 110 abꞌil skꞌinal naj José yet jix cami. 23Jaꞌ naj José tuꞌ, jix too yiloc ebꞌ scaabꞌ yitxiquin, ebꞌ yuninal naj Efraín, jacꞌalaꞌ pax ebꞌ yuninal naj Maquir, scꞌaal Manasés, jix too yil naj José ẍꞌibꞌa ebꞌ scaabꞌ yitxiquin yul sna.

24Ey jun cꞌual, jix yalon naj José tet ebꞌ yuẍtaj: Janicꞌxane wal tiempo catuꞌ chin cami. Jaꞌ Jehová oj colwa je yetoj, catuꞌ oj jex yiꞌon el bꞌey jun conobꞌ tiꞌ, catuꞌ oj jex yiꞌontoj Jehová bꞌey txꞌotxꞌ txꞌotxꞌ jix stakꞌe can tet naj kichmam Abraham, cꞌal tet cu mam icham Isaac, cꞌal tet cu mam Jacob, ẍi naj José. 25Jix lawi tuꞌ, jix yalon can tet ebꞌ yican tuꞌ, tol chi yakꞌ stiꞌ ebꞌ naj tet José, jix yaloni: Wal yel, jaꞌ Jehová oj jul colwa je yetoj. Jaꞌ yet oj yunen jaxca tuꞌ, jaꞌ yet chex too tuꞌ che yiꞌtoj jin mimanil tiꞌ, cꞌam cꞌal che bꞌejcan titiꞌ, ẍi naj José.

26Ey 110 abꞌil skꞌinal naj José yet jix cam bꞌey Egipto. Watxꞌ jix yun yoc ambꞌal yin smimanil, catuꞌ jix ale eytoj smimanil naj yul scaẍail.

Currently Selected:

Génesis 50: knj

Highlight

Copy