Génesis 49

Slawubꞌal Skꞌane Naj Jacob Yibꞌan Ebꞌ Yuninal

1Jix lawi tuꞌ, jix yawtetej masanil ebꞌ yuninal naj Jacob, jix yalon tet ebꞌ jaxca tiꞌ: Jitzwejtej je bꞌa jin cꞌatan jex cha cꞌaal; abꞌwej tzet oj jul je yibꞌan cu sattajto tuꞌ:

2Jex wuninal jitzwejtej je bꞌa jin cꞌatan an, yet oj je yabꞌen tzet oj walaꞌ.

3Jaach Rubén, jin bꞌabꞌel cꞌaal jaach an, xꞌoxbꞌanil wip yet wachꞌeal ja weocoj; jaach tiꞌ caw wal oj jaach bꞌinaoj, catuꞌ miman ja weloc apnoj.

4Jaꞌ tinaniꞌ, manxa jaxca oj tuꞌ oj jaach elocoj, yutol laan jaach jaxca junoj jaꞌ elom jaꞌ, jix ja wiꞌel jin qꞌuixwil an, yutol jix jaach wey yetoj ix scaabꞌ wistil.

5Jaach Simeón, cꞌal jaach Leví, je yuẍtaj je bꞌa, jaꞌ je mitxꞌkꞌabꞌ yet jowal, yin spenail jix yun je kꞌanbꞌalne.

6Junelne ma woche jix jin apni oc bꞌey jix je yambꞌa je bꞌa, yutol jaꞌ yet chi tit numna che yilaꞌ, jix je makꞌon cam ebꞌ ánima, yu wal je pena naꞌbꞌal tuꞌ, catuꞌ jix je makꞌon kꞌatoj yajan noꞌ achꞌe wacax.

7¡Caw wal cꞌam swatxꞌil je yet! ¡Cꞌam niꞌoj swatxꞌil je naꞌbꞌal, cꞌuun stit je jowal! Yu je naꞌbꞌal cꞌam swatxꞌil tuꞌ, yuxan tucꞌal oj jex sajlem cantoj xol ebꞌ je yet Israelal.

8Jaach jin cꞌaal Judá, caw wal oj al-le watxꞌ kꞌane ja win yu ebꞌ ja wuẍtaj tiꞌ, oj ja wakꞌ eyqꞌuey ebꞌ chi jowi oc ja win, catuꞌ oj ey noan ebꞌ ja wuẍtaj tiꞌ ja sattaj.

9Laan wal jaach jaxca junoj achꞌe bꞌalam, jaꞌ yet chi ẍiꞌon eytoj junoj noꞌ yet noꞌal, catuꞌ chi meltzo pax toj noꞌ yul snachꞌen. Chi ey noanoj, catuꞌ chi a pakꞌan sat txꞌotxꞌ jaxca wal junoj noꞌ icham miman bꞌalam. ¿Mac wal junoj chi stecꞌbꞌa sbꞌa jaach xꞌemoni?

10Cꞌam junoj mac chi skeꞌ yiꞌon ecꞌ ja jelanil jaach Judá; cꞌam junoj mactxequel chi skeꞌ yiꞌon ecꞌ ja kꞌojoch yet ja wopiso yul ja kꞌabꞌ, masantaꞌcꞌal chi jul Naj ey yet, jun mactxequel tol masanil conobꞌ oj jijen tet Naj.

11Jaꞌ oj pixon oc noꞌ bꞌuru yin junoj bꞌocꞌan teꞌ uva yel xacꞌal watxꞌ, catuꞌ oj xꞌaon el spichil yetoj yal an uva tuꞌ, cꞌal yetoj skꞌabꞌ.

12Jaꞌ sbꞌakꞌ sat, caw cajin yili jaxca yal uva, jal yee, yel xacꞌal saj yili yintaj noꞌ lech.

13Jaach Zabulón, jaꞌ tituꞌ oj jaach caey ecꞌ stiꞌlaj jaꞌ mar bꞌey chi skeꞌ yapni oc teꞌ barco, jata cꞌal bꞌey Sidón oj apnoj oc ja majul txꞌotxꞌ.

14Jaach Isacar, laan jaach jaxca junoj noꞌ bꞌuru tol ijtzom chi xew yul colal.

15Jaꞌ yet oj ja wiloni tol caw watxꞌ txꞌotxꞌ bꞌey watxꞌ ja xewi, catuꞌ cha waon oc ja wichin yalan ijatz, cꞌamxa cꞌal tzet cha walaꞌ chach oc can yin yakꞌomaloj servilal.

16Jal jaach Dan, jaach oj ja waꞌne yeoc ebꞌ conobꞌ yin sjichanil, jaxca wal junoj tujan ebꞌ ja wet Israelal.

17Laan jaach jaxca junoj noꞌ labꞌa chi ecꞌ yul bꞌe, yet chi ẍiꞌon yajan noꞌ che, catuꞌ chi eyqꞌuey mactxequel eyoc yibꞌan noꞌ che tuꞌ.

18¡Jaach Jehová jin Diosal, chi wechbꞌane tol chin ja coloꞌ!

19Jaach Gad, oj apnoj oc ebꞌ naj pena snaꞌbꞌal yakꞌon jowal ja wetoj, tucꞌaltaꞌ oj eyqꞌuey ebꞌ ja wu.

20Jaach Aser, oj yakꞌ xacꞌal sobra tzet oj ja loꞌ; catuꞌ oj ja wakꞌon pax tzet oj sloꞌ ebꞌ naj rey.

21Jaach Neftalí, jajbꞌil jaach el jaxca noꞌ xutx scꞌultajil che, caw wal watxꞌ naꞌbꞌale oj ja walaꞌ.

22Jaach José, laan jaach jaxca junoj teꞌ teꞌ chi chꞌibꞌ stiꞌ jaꞌ jaꞌ, caw miman sat chi yakꞌa, chi too xacꞌal luan skꞌabꞌlaj teꞌ yibꞌan satlaj chꞌen.

23Caw pena oj yute snaꞌbꞌal ebꞌ ánima ja win, oj julwa ebꞌ yetoj sjulbꞌal ja win, catuꞌ oj oc cꞌal ian ebꞌ naj xꞌemwa ja win.

24Jaach tiꞌ caw ey yip ja kꞌabꞌ, watxꞌ cꞌal yeoc ja julbꞌal tuꞌ. Yetoj yipalil Jehová, yel xacꞌal cha wiꞌ ja wip, jaꞌton Naj Wilomal, cꞌal jin Colomal jain Israel jin tiꞌ.

25Yuwal dios tet jin Diosal chach coloni, Naj Chi Skeꞌ Yu Masanil. Jaꞌ chi akꞌon syaaxilal ja wibꞌan, syaaxilal tol chi tit bꞌey satcan, cꞌal syaaxilal txꞌotxꞌ txꞌotxꞌ, cꞌal syaaxilal yet jix chꞌibꞌa ebꞌ ja wuninal.

26Jaꞌ masanil wan watxꞌ kꞌane chi wal can el ja wibꞌan, jain ja mam jin tiꞌ, yel xacꞌal miman yeloc apnoj yintaj wan watxꞌ kꞌane jix yal can jin mam wibꞌan, catuꞌ yel xacꞌal ecꞌal tzet chi yakꞌ yintaj awo chi yakꞌ bꞌey sjolomlaj wonan. Jaꞌ masanil wan tiꞌ, chi wal can el ja wibꞌan jaach José, tol sicꞌbꞌil jaach el xol ebꞌ ja wuẍtaj.

27Jal jaach Benjamín, laan jaach jaxca junoj noꞌ ooj caw jow. Jaꞌ yet skꞌinibꞌalil chi ẍiꞌon eytoj ẍiꞌbꞌe chi smakꞌ camoj; jaxa yet skꞌejbꞌintajil xin, chi spoꞌon can ecꞌ tzet cꞌam chi lawi yu, ẍi naj Israel tuꞌ.

28Jaꞌton xolilal ebꞌ lacawan scꞌaal naj Israel tiꞌ, jaꞌ masanil wan kꞌane tiꞌ jix yal can naj yet jix yalon can watxꞌ kꞌane yibꞌan junjun ebꞌ scꞌaal tuꞌ.

Scamichal Naj Jacob

29Jix lawi tuꞌ xin, jix yalon naj Jacob tet ebꞌ scꞌaal: Janicꞌxane catuꞌ chin cam an; yu jun tuꞌ xin, jaꞌ tituꞌ chin je mujcan eytoj bꞌey mujan ebꞌ jin mam icham, bꞌey jun jolan chꞌen bꞌey xꞌotxꞌ taꞌ naj Efrón, Hitita, 30jaꞌton bꞌey yul yet Canaán; chi yal yeloc apnoj, jaꞌton bꞌey chꞌen jolan chꞌen yul yet Macpelá, scawilal txꞌotxꞌ yet naj Mamré yul yet Canaán, jun manbꞌil can yu naj kichmam Abraham, jaꞌton txꞌotxꞌ manbꞌil tet naj Efrón yu yet chi oc can txꞌotxꞌ bꞌey chi mujle ebꞌ. 31Jaꞌ tituꞌ jix mujle Abraham yetoj yistil, jaꞌton ix Sara; jaꞌ tituꞌ jix mujle je mam icham Isaac cꞌal je txutx ixnam Rebeca. Jaꞌ tituꞌ jix jin mujcan eytoj ix Lía. 32Jaꞌ jun txꞌotxꞌ txꞌotxꞌ tuꞌ, cꞌal chꞌen jolan chꞌen tuꞌ, manbꞌil tet ebꞌ naj Hitita, ẍi naj Jacob tet ebꞌ scꞌaal tuꞌ.

33Jaꞌ yet jix lawi yalon can wan kꞌane tuꞌ tet ebꞌ scꞌaal tuꞌ, jix yalon can pax tzet oj yun smujlei. Jix lawi tuꞌ, jix ey telan sat xꞌat, catuꞌ jix cami.

Currently Selected:

Génesis 49: knj

Highlight

Copy