Génesis 48

Yalnaj Can Watxꞌ Kꞌane Naj Jacob Yibꞌan Ebꞌ Scꞌaal José, Jaꞌton Efraín Yetoj Manasés

1Jix lawi tuꞌ jix yalon ebꞌ tet naj José tol yaꞌey smam. Yuxan jix too naj José yiloni, catuꞌ jix yiꞌontoj cawan ebꞌ scꞌaal yetoj, jaꞌton Manasés cꞌal Efraín. 2Jaꞌ yet jix al-le tet naj Jacob tol jix apni oc naj José yiloni, jix too wal yakꞌ ip ya chotan stiꞌ xꞌat. 3Jix yalon tet naj José jaxca tiꞌ:

—Jaꞌ Jehová Naj miman yeoc Yipalil, jaꞌton jix xꞌox sbꞌa ey jin bꞌey conobꞌ Luz, yul yet Canaán. Jaꞌ tituꞌ yalnaj can watxꞌ kꞌane wibꞌan an. 4Yet jix yalon wan kꞌane jaxca tiꞌ: Caw ecꞌal sbꞌisil ja wuninal oj wakꞌa, jantaj ebꞌ ja wicꞌaal oj eloj, ecꞌal conobꞌal oj eloc ebꞌ; catuꞌ oj wakꞌon pax jun txꞌotxꞌ tiꞌ tet ebꞌ ja wicꞌaal tuꞌ. Jaꞌ jun txꞌotxꞌ tiꞌ yet ebꞌ oj yun can oc yin junelne, ẍi Dios. 5Yuxan jaꞌ cawan ebꞌ ja cꞌaal jaꞌton Efraín yetoj Manasés, jix ali bꞌey Egipto tiꞌ yet cꞌamto chin juli, wet cꞌaltaꞌ yeoc ebꞌ naj, jaxca tol wuninal chi yun can oc ebꞌ, jaxca wal yeoc naj jin cꞌaal Rubén cꞌal naj Simeón. 6Jal jantaj tocꞌal ja wuninal oj aloj cu sattajto, ja wet xa oj yun oc ebꞌ, asan xin, ey yalon yet ebꞌ ẍaꞌon smajul txꞌotxꞌ tet ebꞌ yuẍtaj tiꞌ. 7Jaꞌ yet jix jin meltzo bꞌey Padán-aram, jaꞌ tituꞌ jix cam can ix ja txutx bꞌey Canaán, yet tuxa chin apni oc bꞌey Efrata; jaꞌ tituꞌ jix jin mujcan eytoj ix ja txutx tuꞌ, bꞌey yul sbꞌeal Efrata tuꞌ, ẍi naj Jacob. (Jaꞌ jun txꞌotxꞌ tuꞌ chi yij Belén tinaniꞌ.)

8Jix lawi tuꞌ, catuꞌ jix too tꞌanan naj Jacob yin ebꞌ naj cawan scꞌaal José, jix skꞌanlen naj jaxca tiꞌ:

—Jal ebꞌ naj tiꞌ, ¿mactxequel ebꞌ naj? ẍi naj.

9Jaꞌton ebꞌ naj jin cꞌaal jix yakꞌ Jehová ey jin bꞌey Egipto tiꞌ, ẍi naj José. Jix yalon smam naj tet jaxca tiꞌ:

—Chin kꞌan ey jaach an, sjitz ojabꞌtej sbꞌa ebꞌ naj jin cꞌatan tiꞌ, yet chi walon can watxꞌ kꞌane yibꞌan ebꞌ naj an, ẍi naj.

10Caw icham winajxa naj Israel tuꞌ, cꞌamxa chi skeꞌ yiloni. Jix snicꞌontej ebꞌ yuninal naj José scꞌatan smam tuꞌ, catuꞌ jix oc lakꞌan naj yin ebꞌ unin tuꞌ, jix tzꞌubꞌle el stiꞌ ebꞌ yu naj. 11Jix lawi tuꞌ, jix yalon naj Israel tet naj José jaxca tiꞌ:

—Caw cꞌamxa chin naꞌ an, ta tol oj to wiloc ja win. Jaꞌ Jehová jix akꞌon wiloc ja win yetoj ebꞌ ja wuninal tiꞌ, ẍi naj. 12Jix lawi tuꞌ, jix yiꞌon eltej ebꞌ yuninal naj José xol yajan smam tuꞌ, catuꞌ jix ey noan naj José yetoj ebꞌ scꞌaal tuꞌ sat txꞌotxꞌ sattaj smam. 13Jix yiꞌon pax tej José ebꞌ cawan scꞌaal, jaꞌ naj Efraín bꞌey swatxꞌ kꞌabꞌ, jaꞌ naj Manasés bꞌey sqꞌuexan kꞌabꞌ, catuꞌ jix yiꞌontoj bꞌey smam. Jaꞌ naj Efraín jix cancan bꞌey sqꞌuexan kꞌabꞌ naj Jacob, jal naj Manasés jix cancan bꞌey swatxꞌ kꞌabꞌ naj. 14Jaꞌ yet jix yaontoj skꞌabꞌ naj Israel tuꞌ yibꞌan sjolom ebꞌ naj, culus jix yutetoj skꞌabꞌ yibꞌan sjolom ebꞌ naj, yuxan jaꞌ swatxꞌ kꞌabꞌ jix apni oc yibꞌan naj Efraín, jaꞌ sqꞌuexan kꞌabꞌ jix oc yibꞌan sjolom naj Manasés, caxcꞌal mi tol bꞌabꞌel winaj naj tuꞌ. 15Jix yalon can watxꞌ kꞌane naj Jacob yibꞌan naj José, jaxca tiꞌ:

Jaꞌ cu Diosal bꞌey jix sjije naj jin mam icham Abraham, cꞌal naj jin mam Isaac, jaꞌ Naj chin teyneni, yet tax cꞌal jix jin ali cꞌal yet jix ecꞌ el tiempo wibꞌan.

16Jaꞌ naj ángel jix jin colon el yul skꞌabꞌ wan tzetyetal ey smey. Jaꞌ ojabꞌ Jehová, chi yakꞌ syaaxilal yibꞌan ebꞌ naj cawan tiꞌ, tol yu ebꞌ naj tiꞌ yuxan oj bꞌinale jin bꞌi yet bꞌakꞌin, cꞌal sbꞌinale ecꞌ sbꞌi jin mam icham Abraham, cꞌal jin mam Isaac. Miman oj yun sbꞌisil yicꞌaal ebꞌ naj cawan tiꞌ bꞌey yul yibꞌankꞌinal tiꞌ, ẍi naj Israel.

17Jaꞌ naj José, ma ẍaꞌ scꞌul jun tuꞌ, yutol jaꞌ yibꞌan sjolom naj Efraín jix sbꞌatxbꞌa to swatxꞌ kꞌabꞌ naj Israel, yu jun tuꞌ, jix iꞌle el swatxꞌ kꞌabꞌ yu naj José yibꞌan sjolom naj Efraín, catuꞌ jix yaon oc yibꞌan naj Manasés yaloni.

18Jix yalon naj José jaxca tiꞌ:

—Cꞌamaj mamin, man quey oj tuꞌ cha wute, tol jaꞌ yibꞌan naj bꞌabꞌel tiꞌ, jaꞌ tituꞌ cha waoc ja watxꞌ kꞌabꞌ, ẍi tet naj.

19Jaꞌ naj Jacob ma yal scꞌul jaxca tuꞌ, yuxan jix yalon jaxca tiꞌ:

—Wotajxa an cha cꞌaal. Jaꞌ naj tiꞌ miman conobꞌ oj yun yeloc yicꞌaal naj yet bꞌakꞌin, jal pax naj tzunan tiꞌ xin, yel xacꞌal ecꞌal oj yun yeloc naj. Jaꞌ xol ebꞌ yicꞌaal naj tiꞌ, yel xacꞌal ecꞌal conobꞌal oj yun yeloc ebꞌ, ẍi naj.

20Jaꞌton yet jun cꞌu tuꞌ, jix yalon watxꞌ kꞌane naj Jacob yibꞌan ebꞌ naj jaxca tiꞌ:

—Jaꞌ ebꞌ je yicꞌaal yet bꞌakꞌin, oj skꞌanbꞌalne ebꞌ je bꞌi yet oj yalon can watxꞌ kꞌane ebꞌ yibꞌan junoj ánima; oj yal ebꞌ jaxca tiꞌ: Yakꞌ ojabꞌ syaaxilal Jehová ja wibꞌan, jaxca jix yun yakꞌon can tet naj Efraín, cꞌal tet naj Manasés, ẍi ebꞌ, oj yalon ebꞌ, ẍi naj Israel.

Jaꞌ yet jix yalon can swatxꞌ kꞌane tuꞌ yibꞌan ebꞌ, bꞌabꞌel jix bꞌina naj Efraín yu naj Jacob sattaj naj Manasés. 21Jix lawi tuꞌ, yin eymanil jix yalon tet naj José:

—Jaach jin cꞌaal, jain tiꞌ tuxa oj jin camoj, jaꞌ Jehová ey cꞌal oc ja wetoj, yetoj cꞌal ebꞌ ja wicꞌaal. Jaꞌ Naj oj jex iꞌon meltzo bꞌey xꞌotxꞌ ebꞌ naj cu mam icham. 22Chi wakꞌcan jun tujan jin majul txꞌotxꞌ tiꞌ ey jaach, ecꞌbꞌan ja wet chi wakꞌcan yintaj yet ebꞌ naj ja wuẍtaj tiꞌ, jaꞌton txꞌotxꞌ eltzabꞌ jix wiꞌ can ecꞌ tet ebꞌ naj Amorreo yet jix wakꞌon jowal yetoj ebꞌ naj, ẍi smam naj José tuꞌ.

Currently Selected:

Génesis 48: knj

Highlight

Copy