Génesis 40

Jix Yal Naj José Tzet Chi Yal Yeloc Apnoj Sweyich Ebꞌ Cawan Presowom

1Jix ecꞌ jun tiempoal xin, ey cawan ebꞌ winaj eyoc preso, ey jun naj syaawil yeoc yin yaon ey teꞌ yal uva chi yucꞌ naj rey, yetoj junxa naj chi waꞌnen ixim pan chi sloꞌ naj rey tuꞌ. Jaꞌ ebꞌ cawan tiꞌ, ey tzet jix sloctej ebꞌ yibꞌan yul skꞌabꞌ naj sreyal Egipto tuꞌ. 2Caw jix tit sjowal naj rey Faraón tuꞌ yin ebꞌ scawanil. 3Yu jun tuꞌ xin, yuxan jix aletoj ebꞌ preso yu naj rey bꞌey sna naj syaawil ebꞌ soldado tuꞌ, jaꞌ tituꞌ eyoc naj José yul preso. 4Jacꞌalaꞌ yul skꞌabꞌ naj José, jix ale oc ebꞌ naj cawan tuꞌ yu naj teynem preso tuꞌ. Caw naatil jix maji ebꞌ naj tituꞌ.

5Ey jun akꞌbꞌal jix oc sweyich ebꞌ ẍejabꞌ naj rey tuꞌ scawanil, naj chi aon ey yal uva yetoj naj waꞌnem pan, junjun sweyich ebꞌ ey tzet chi yalaꞌ. 6Jaꞌ yet skꞌinibꞌalil jix apni oc José yilon ebꞌ naj, catuꞌ jix yiloni caw eyoc ebꞌ naj yin cuscꞌulal, 7catuꞌ jix skꞌanlen naj tet ebꞌ jaxca tiꞌ:

—¿Tzet yuxan cusiltaj yoc je sat chi wilaꞌ? ẍi tet ebꞌ.

8—Ey wal jun cu weyich jix oc yet akꞌbꞌalil tiꞌ jon, caw cꞌam junoj cu xol tiꞌ chi skeꞌ yalon ey jon tzet chi yal yeloc apnoj, ẍi ebꞌ naj. Yuxan jix yalon José tet ebꞌ jaxca tiꞌ:

—¿Tumi cꞌam chi skeꞌ yu Jehová yakꞌon spaj je weyich tuꞌ? Alwej ey jin tzet jix je yil yin je weyich tuꞌ, ẍi José tuꞌ tet ebꞌ.

9Yuxan jaꞌ naj yaomal ey yal uva chi yucꞌ naj rey, jix oc ian naj yalon sweyich tuꞌ tet naj José tuꞌ jaxca tiꞌ:

—Jaꞌ yin jun jin weyich tuꞌ, jix wil yin jun teꞌ xutx uva, 10ey oxebꞌ skꞌabꞌ teꞌ. Jix wil yelol swol, catuꞌ jix yakꞌon xumac, jaꞌ an xumac tuꞌ, jix oc txian sat yin catuꞌ jix kꞌanbꞌi eloj. 11Catuꞌ jix wiloni tol mitxꞌbꞌil a scopa naj rey tuꞌ wu an, catuꞌ jix wiꞌontej teꞌ uva tuꞌ, catuꞌ jix jin pitzꞌon ey yal an uva yul scopa naj rey Faraón tuꞌ, catuꞌ jix waontoj tet naj an, ẍi naj.

12Jix yalon José tet naj jaxca tiꞌ:

—Jaꞌ tzet chi yal yeloc apnoj ja weyich tuꞌ: Jaꞌ teꞌ oxebꞌ skꞌabꞌ uva jix ja wil tuꞌ, oxebꞌ cꞌu chi yalaꞌ. 13Jaꞌ yet caabꞌe tinaniꞌ oj jaach eltoj yul preso tiꞌ yu naj rey Faraón tuꞌ, catuꞌ oj jaach oc yin ja mulnail tuꞌ junelxa, jaxca cꞌaltaꞌ ja weoc yet yalantoj. 14Jaꞌ yet oj yunen jun chi wal ey jaach tiꞌ, chin ja naꞌtej, cha wal tet naj rey Faraón tuꞌ wu an, tala chin yiꞌeltoj naj yul preso tiꞌ, caw chi okꞌ ja cꞌul win an. 15Yutol jain tiꞌ, jaxca tol elkꞌanebꞌil jintej bꞌey xol ebꞌ naj Hebreo, man jin moo oj ey jin oc yul preso tiꞌ, yutol cꞌam niꞌoj spenail jix el wuneni, ẍi José.

16Jaꞌ yet jix yabꞌen naj syaawil ebꞌ waꞌnem pan tuꞌ, tol watxꞌ jix yute José yalon yu jun sweyich naj tuꞌ, jix yalon pax naj jaxca tiꞌ:

—Jain tiꞌ jix jin weyichne, tol eyatoj oxebꞌ xuc ixim saj pan yibꞌan jin jolom jix wilaꞌ. 17Jaꞌ yul jun teꞌ yaliẍ xuc eyatoj yibꞌan caabꞌxa teꞌ tuꞌ, ecꞌal tujan ixim pan eeytoj yul, ixim yet naj rey Faraón tuꞌ, jix lawi tuꞌ, jaꞌ noꞌ tzꞌiquin jix jul loꞌon atej ixim yul teꞌ xuc tuꞌ, ẍi naj.

18Catuꞌ jix yalon José tet naj jaxca tiꞌ:

—Jaꞌ tzet chi yal yeloc apnoj ja weyich tuꞌ: Jaꞌ oxebꞌ xuc tuꞌ, oxebꞌ cꞌu chi yalaꞌ, 19yet caabꞌe tinaniꞌ chach iꞌle eltoj yul preso tiꞌ yu naj rey, Oj lawoj tuꞌ, catuꞌ oj yakꞌon naj iꞌle el ja jolom, catuꞌ oj slocbꞌan a ja mimanil naj yin jun teꞌ teꞌ; jaꞌ noꞌ miij oj jul chiꞌon ja chiꞌbꞌeal, ẍi José tuꞌ tet naj.

20Caabꞌi wal yalon el naj José tzet chi yal sweyich ebꞌ naj cawan tuꞌ, catuꞌ jix snaꞌontej naj rey Faraón tuꞌ skꞌinal yabꞌilal, jix yawten naj masanil ebꞌ naj mimej yaaw eyoc yin yaawil yetoj naj. Sattaj wal ebꞌ naj mimej yaaw tuꞌ, jix yakꞌon naj bꞌet iꞌle eltej ebꞌ cawan eyoc preso tuꞌ. 21Naj chi aon ey yal uva yucꞌ naj rey Faraón tuꞌ, jix ale oc naj yin smulnail junelxa, yet chi yakꞌon pax naj yal uva tet naj rey jaxca yet yalantoj. 22Jaꞌ naj yaaw yilomal tzet chi yun swaꞌxi ixim pan tuꞌ, jix yalon naj rey tol chi locbꞌale a naj yin jun teꞌ teꞌ jaxca wal jix yun yalon naj José. 23Jaꞌ yet jix yunen el wan tuꞌ, caw ma xa naꞌletej naj José yu naj chi aon ey yal uva tet naj rey tuꞌ, yutol jix too qꞌueycꞌulal yu naj.

Currently Selected:

Génesis 40: knj

Highlight

Copy