Génesis 39

Jaꞌ Naj José Yetoj Ix Yistil Naj Potifar

1Jaꞌ yet jix iꞌletoj naj José yu ebꞌ naj Ismaelita bꞌey txꞌotxꞌ Egipto. Ey jun naj a Egipto chi yij Potifar, jaꞌton naj jix manon el naj José. Jaꞌ jun winaj tuꞌ caw ey yopiso yintaj naj Faraón, sreyal Egipto; syaawil ebꞌ soldado yeoc naj xol ebꞌ chi teynen naj rey tuꞌ. 2Caw eyoc Jehová yetoj naj José tuꞌ, caw watxꞌ cꞌal jix yute sbꞌa naj tet bꞌey eyoc yin akꞌo servilal tuꞌ. 3Yuxan jix yiltej naj Potifar, tol caw eyoc Jehová yetoj naj José tuꞌ, yuxan watxꞌ cꞌal jix yun yeloc masanil tzet jix yunne. 4Yu jun tuꞌ, caw watxꞌ jix yun scan José yul sat naj Potifar tuꞌ, yuxan jix ale oc naj José tuꞌ yin yilomaloj sna cꞌal jantaj masanil tzetyetal ey yul skꞌabꞌ naj. 5Jaꞌ yet jix ale oc naj José yu naj Potifar tuꞌ yin yilomaloj stzetyetal bꞌey sna, caw jix yakꞌ syaaxilal Jehová yibꞌan masanil tzet ey bꞌey sna naj, yetoj yibꞌan smulnail naj. 6Jaꞌ yet jix oc naj José yilomaloj masanil mulnail tuꞌ, cꞌamxa cꞌal tzet chi snaꞌ naj Potifar tuꞌ, asan tol chi sicꞌle naj tzet chi sloꞌ.

Caw watxꞌ yili oc naj José tuꞌ, watxꞌ cꞌal naj yin masanil. 7Jix lawi tuꞌ xin, jaꞌ yet jix bꞌey cꞌaltoj jayebꞌoj abꞌil yu José tuꞌ, jaxa jix yunne, jix yaon oc snaꞌbꞌal ix yistil naj Potifar tuꞌ yin naj José. Jix yalon ix tet naj jaxca tiꞌ:

—Toloj wal chi yal ja cꞌul chach oc wey wetoj an, ẍi ix tet naj.

8Caw ma yal scꞌul José, yuxan jix yalon naj jaxca tiꞌ:

—Cꞌamaj, ja wotaj, ilaꞌ tol jain jix jin yaoc naj ja wichamil yilomaloj masanil stzetyetal ey titiꞌ. Yutol jain chin teyne masanil stzetyetal naj, cꞌam cꞌal tzet chi snaꞌ naj, yajbꞌan tol ey jin ecꞌoj. 9Jaꞌ masanil tzet ey yul na tiꞌ, eyoc yul jin kꞌabꞌ, jain chi wiltoj; jal pax ja win jaach tiꞌ, cꞌam chi skeꞌ waon oc jin kꞌabꞌ ja win, yutol yistil jaach naj chi wakꞌ servil tiꞌ. ¿Tumi oj skeꞌ wunen spenail tiꞌ ja wetoj an, catuꞌ chi oc pax jin mul sattaj Dios? ẍi naj José.

10Jix oc cꞌal ian ix yalon tet José tuꞌ junjun cꞌu, chi yoche xacꞌal ix tol chi wey naj yetoj, yet chi mulwi ix yetoj naj, jal naj José junelne ma ẍaꞌ scꞌul jaxca tuꞌ. 11Ey jun cꞌual jix octoj naj José yul na yet chi swaꞌnen smulnail, yet cꞌam junojxa mac eyoctoj yul na tuꞌ, asanne ix eyoctoj yetoj naj. 12Jaꞌ yet tuꞌ, jix oc mitxꞌan ix yin spichil naj, jix yalon ix jaxca tiꞌ:

—Weyan wetoj an xin, ẍi ix.

Jaꞌ yet jix yabꞌen naj jun tuꞌ, jix stokꞌon el sbꞌa naj yul skꞌabꞌ ix, catuꞌ jix el jininoj naj, jix cancan an spichil naj tuꞌ yul skꞌabꞌ ix. 13Jaꞌ yet jix yilon ix tol jix el jininoj naj, jix cancan an pichile tuꞌ yul skꞌabꞌ ix, 14catuꞌ jix yaon el yaw ix, jix awtele ebꞌ naj chi mulna scawilal na tuꞌ yu ix, jix yalon ix jaxca tiꞌ:

—Col jinwej an, yutol jaꞌ naj Hebreo jix bꞌet yiꞌtej naj wichamil an, jix yoche naj jix jin yetne. Jix octoj naj yul na tiꞌ, catuꞌ jix yoche xacꞌal naj jix mulwi wetoj an; yuxan caw ip jix yun yel waw an, 15jaꞌ yet jix yabꞌen naj yel waw an, catuꞌ jix el jininoj naj, yuxan asan xacꞌal spichil naj jix cancanoj, ẍi ix.

16Jix cꞌubꞌale can a an spichil naj José tuꞌ yu ix, masantaꞌcꞌal jix apni oc naj yichamil ix bꞌey sna tuꞌ. 17Jaꞌ yet jix apni oc naj Potifar tuꞌ, jix yalon ix jaxca jix yute yalon yet sbꞌabꞌelal tuꞌ.

—Jaꞌ naj Hebreo jix bꞌet ja wiꞌtej mulnail tiꞌ, jix octoj naj yul jin cuarto, jix yoche naj jix mulwi wetoj. 18Yutol jix el waw yin ipeal, yuxan jix el jininoj naj, asan xacꞌal spichil naj tiꞌ jix cancanoj. 19Jaxca wal tuꞌ jix jin yute jun naj ja chejabꞌ tiꞌ, ẍi ix. Jaꞌ yet jix yabꞌen naj Potifar jun tuꞌ, caw jix tit sjowal naj sicꞌlebꞌil yin José tuꞌ yet jix yabꞌen naj tzet jix yal ix yistil naj tuꞌ. 20Queytuꞌ jix yun smitxꞌle naj José tuꞌ, catuꞌ jix yalon naj tol chi octoj naj yul preso, jaꞌ bꞌey eyoctoj wan ebꞌ naj a presowom yu naj rey, jaꞌ tituꞌ jix ale oc José yul skꞌabꞌ naj teynem preso tuꞌ, yet chi teynele naj sicꞌlebꞌil. 21Ey cꞌal oc Jehová yetoj naj José tuꞌ, jix colwa cꞌal yetoj naj, yu jun tuꞌ, caw watxꞌ jix eloc naj José yul sat naj teynem preso tuꞌ. 22Jaꞌ naj teynem preso tuꞌ, jix ale oc naj José yilomaloj ebꞌ yet presowomal tuꞌ, jaxa naj chi aloni tzet chi swaꞌne ebꞌ tituꞌ. 23Cꞌamxa tzet chi snaꞌ naj teynem preso tuꞌ, yet chi yakꞌon cuenta ebꞌ eyoc yul preso tuꞌ, yutol eyoc ebꞌ yul skꞌabꞌ José. Caw eyoc Jehová yetoj naj, yuxan caw watxꞌ cꞌal jix yun yeloc masanil tzet jix swaꞌne.

Currently Selected:

Génesis 39: knj

Highlight

Copy