Génesis 38

Naj Judá Yetoj Ix Tamar

1Jaꞌ yet jun tiempoal tuꞌ, jaꞌ naj Judá jix spoꞌoel sbꞌa xol ebꞌ yuẍtaj, catuꞌ jix too caey naj bꞌey sna jun swatxꞌil ánima chi yij Hirá, a conobꞌ Adulam naj. 2Jaꞌ tituꞌ jix yiloc yin jun scutzꞌin naj a Canaán chi yij Súa, catuꞌ jix nupi naj yetoj ix, 3jix yijon oc yuneꞌ ix; jaꞌ yet jix ali jun yuneꞌ ix tuꞌ, jix yakꞌon yij sbꞌi Er. 4Jix lawi tuꞌ, jix yijon pax oc yuneꞌ ix junelxa, jaꞌ yet jix ali yuneꞌ ix tuꞌ, jix yakꞌon yij sbꞌi Onán. 5Jix ali pax junxa yuneꞌ ix yet eyecꞌ naj Judá bꞌey Quezib. Jix yakꞌon yij sbꞌi naj unin tuꞌ, Selá.

6Jaꞌ yet jix oc naj Er yin achꞌeal, naj sbꞌabꞌel cꞌaal tuꞌ, jix seyle yistil yu naj Judá tuꞌ, jix nupi naj yetoj ix chi yij Tamar. 7Caw pena jix yute sbꞌa naj Er sattaj Jehová, yuxan jix iꞌle el skꞌinal naj. 8Jix lawi tuꞌ, jix yalon naj Judá tet naj Onán jaxca tiꞌ:

—Chi skeꞌ cha wiꞌle ja bꞌa yetoj ix yistil naj camom ja wuẍtaj tiꞌ, yet cha jijen jaxca cu bꞌeybꞌal#38:8 Jaꞌ yin jun versículo tiꞌ chi yaltej ebꞌ ánima yet tuꞌ. Ta ey junoj winaj eyxa yistil yet chi cami, cꞌam tocꞌal pax yuninal chi ali, sowalil jaꞌ junojxa yuẍtaj jun chi camtoj tuꞌ, jaꞌ chi iꞌon can ix ix yistiloj. tol sowalil cha wiꞌle ja bꞌa yetoj ix ja muꞌ tuꞌ, yet watxꞌ oj aloj junoj yuneꞌ ix, jaxca tol yuninal naj camom ja wuẍtaj tuꞌ chi yun can ocoj, ẍi naj Judá tuꞌ.

9Jaꞌ naj Onán tuꞌ, yotaj xa naj tol jaꞌ jun unin oj aloj tuꞌ, man yetoj naj yetoj ix smuꞌ tuꞌ, yuxan junjuntaj cꞌal el chi wey naj yetoj ix yet chi sjunbꞌane sbꞌa ebꞌ, sat txꞌotxꞌ chi ey can yinatil naj, yet watxꞌ cꞌam chi oc unin yin ix snaꞌon naj, yet watxꞌ cꞌam yicꞌaal naj camom yuẍtaj tuꞌ chi elcanoj. 10Caw jix tit sjowal scꞌul Jehová yu tzet jix swaꞌne naj Onán tuꞌ, yu jun tuꞌ, yuxan jix iꞌle el skꞌinal naj yu Jehová. 11Jix lawi tuꞌ, jix yalon naj Judá tet ix yalibꞌ tuꞌ jaxca tiꞌ:

—Jaꞌ tinaniꞌ watxꞌ chach pax toj bꞌey sna naj ja mam, cꞌal ja txutx; cꞌam ojabꞌ junojxa winaj cha wiꞌ, jato cꞌal yet oj tzꞌajna yabꞌilal naj jin cꞌaal chi yij Selá tiꞌ, catuꞌ chach nupi yetoj naj, ẍi Judá.

Tucꞌal jix yal naj jaxca tuꞌ, yutol chi snaꞌ naj tala cꞌuxan chi cam naj Selá jaxca jix yun scam ebꞌ naj cawan yuẍtaj naj tuꞌ. Queytuꞌ jix yun stoo ix Tamar scꞌatan smam xutx.

12Peyxa tax tuꞌ, jix cam pax ix yistil naj Judá tuꞌ, ix scutzꞌin naj Súa. Jaꞌ yet jix lawi ecꞌtoj scuscꞌulal naj, catuꞌ jix too naj bꞌey conobꞌ Timnat, bꞌey ey ebꞌ naj chi tzujon el xil noꞌ smeꞌ naj. Tzajan oc jun swatxꞌil ánima naj yintaj, jaꞌton naj chi yij Hirá, a conobꞌ Adulam. 13Jaꞌ yet jix yabꞌen skꞌumal ix Tamar tol lalan stoo naj yalibꞌ ix tuꞌ bꞌey Timnat, yu stoo naj yilon stzujle el noꞌ smeꞌ tuꞌ, 14yin eymanil jix yiꞌon el an pichile ix chi yaoc ebꞌ ix ix tol camnajxa yichamil. Jix yaoc jun kꞌap ix yin sat, yet watxꞌ cꞌam mac chi naꞌcha el yu, ta tol jaꞌ ix, catuꞌ jix ey chotan ix bꞌey stiꞌel conobꞌ bꞌey chi apni oc sbꞌeal conobꞌ Enaim, bꞌey sbꞌeal Timnat. Jaxca tuꞌ jix yute sbꞌa ix yutol jaꞌ naj Selá tol tzꞌajan xa yabꞌilal naj, cꞌam tocꞌal chi nupi naj yetoj ix.

15Jaꞌ yet jix yilontoj naj Judá tuꞌ xin, jix cꞌoli snaꞌoni, amul ix mi jun ix tuꞌ, yutol jix smajche el sat ix. 16Catuꞌ jix elcan naj Judá tuꞌ yul bꞌe, jix too naj yilon ix. Ma naꞌcha el yu naj ta tol jaꞌ ix yalibꞌ naj, jix yalon naj tet ix jaxca tiꞌ:

—¿Cꞌam mi chi yal ja cꞌul chin wey ja wetoj? ẍi naj.

—Ta chi yal jin cꞌul, ¿tzetyetal junoj cha wakꞌ ey jin? ẍi ix.

17—Chi watej junoj yuneꞌ ja chiw, ẍi naj Judá tuꞌ tet ix.

—Chi skeꞌ xin, asan tol sowalil ey junoj tzet cha wakꞌcan ey jin tinaniꞌ, jaꞌ yet chi jul noꞌ yuneꞌ chiw tuꞌ, catuꞌ chi wakꞌon meltzo ey jaach an, ẍi ix.

18—¿Tzet wal cha woche chi wakꞌcan ey jaach xin? ẍi naj Judá.

—Akꞌ can ja sello yetoj xꞌanil, yetoj cꞌal ja kꞌojoch iꞌbꞌil oc tuꞌ, ẍi ix tet naj.

—Chi skeꞌ, can ojabꞌi, ẍi naj. Catuꞌ jix wey naj yetoj ix, queytuꞌ jix yun yijon oc yuneꞌ ix. 19Jix lawi tuꞌ, jix too ix Tamar tuꞌ, catuꞌ jix yiꞌon el jun kꞌap jix yaoc yin sat tuꞌ, jix yaon pax cꞌal oc ix an pichile chi ya cꞌaltaꞌ oc ebꞌ ix camnajxa yichamil.

20Jaꞌ yet jix apni oc naj Judá bꞌey eyecꞌ noꞌ smeꞌ tuꞌ, catuꞌ jix ẍejontoj jun swatxꞌil ánima naj chi yij Hirá, a Adulam. Jaꞌ naj jix bꞌet akꞌon can noꞌ yuneꞌ chiw tuꞌ tet ix ix tuꞌ, catuꞌ chi yiꞌontej naj tzet ey can tet ix yu naj Judá tuꞌ yaloni. Jaxa jix yunne, ma xa ilcha oc ix yu naj chejabꞌwom tuꞌ. 21Catuꞌ jix skꞌanlen ecꞌ naj tet ebꞌ caan bꞌey jun conobꞌ tuꞌ jaxca tiꞌ:

—¿Bꞌeytuꞌ eyoc jun ix amul ix titiꞌ, jun ix chi ey cꞌaltaꞌ chotan bꞌey stiꞌ bꞌe chi too bꞌey Enaim tiꞌ? ẍi naj.

—Jix takꞌwi ebꞌ naj: Cꞌam junoj amul ix titiꞌ, ẍi ebꞌ.

22Jix lawi tuꞌ, jix meltzotej naj bꞌey naj Judá jix yalon jaxca tiꞌ:

—Ma ilcha oc ix wu an, jix yal ebꞌ naj caan tituꞌ tol cꞌam junoj amul ix ey tituꞌ, ẍi naj.

23Jix takꞌwi naj Judá jaxca tiꞌ:

—Can ojabꞌ ix yetoj wan tzetyetal tuꞌ, yet watxꞌ cꞌam mactxequel chi cu alon penail. Jix jin jije waontoj noꞌ yuneꞌ chiw, asan tol ma ilcha oc ix ja wu, ẍi naj Judá tuꞌ.

24Oxebꞌ xam wal xꞌaaw tuꞌ, catuꞌ jix bꞌet al-le tet naj Judá jaxca tiꞌ:

—Jaꞌ ix ja walibꞌ Tamar, ey mi junoj mactxequel jix kꞌanabꞌ yetoj ix, yuxan mimejalxa ix tinaniꞌ, ẍi ebꞌ tet naj.

Catuꞌ jix yalon naj jaxca tiꞌ:

—Iꞌwej eltoj ix stiꞌel conobꞌ, catuꞌ che nuson tzꞌaꞌ ix, ẍi naj.

25Jaꞌ yet lalan yiꞌle eltoj ix yu ebꞌ naj tuꞌ, catuꞌ jix yaontoj kꞌane ix tet naj Judá, jaꞌton naj yalibꞌ ix tuꞌ, jaꞌ naj ey yet wan tzetyetal chi watoj tiꞌ, jaꞌton naj ey yet jun unin eyoc win tiꞌ an. Naꞌwej yibꞌan, mactxequel ey yet jun sello tiꞌ, cꞌal xꞌanil tiꞌ, yetoj cꞌal jun kꞌojoche tiꞌ, ẍi toj ix tet naj. 26Jaꞌ yet jix yilon oc naj Judá, tol yet naj masanil wan tzetyetal tuꞌ, catuꞌ jix yalon naj jaxca tiꞌ: Jaꞌ ix ix tuꞌ watxꞌ tzet jix el yunen ix, jain pena tzet jix el wunen an, jix oc jin penail, ma wakꞌ nupoj naj jin cꞌaal Selá yetoj ix, ẍi naj. Yu jun tuꞌ ma nusle tzꞌaꞌ ix. Catuꞌ cꞌamxa cꞌal tzet jix yun naj Judá tuꞌ yetoj ix junelxa.

27Jaꞌ yet jix waꞌxi scꞌul ix Tamar tuꞌ, tioẍ unin ebꞌ naj jix ali. 28Jaꞌ yet lalan yali ebꞌ unin tuꞌ, yet jix elol skꞌabꞌ jun bꞌabꞌel unin tuꞌ, jaꞌ ix sicꞌom unin tuꞌ jix yaoc jun cajin txꞌal ix yin snukꞌ skꞌabꞌ jun unin tuꞌ, jix yalon ix jaxca tiꞌ: Jaꞌ jun bꞌabꞌel tiꞌ, ẍi ix. 29Lalantocꞌal wal tuꞌ, catuꞌ jix yiꞌon pax meltzo octoj skꞌabꞌ jun neneꞌ tuꞌ, jaꞌ junxa yuẍtaj tuꞌ jix ali yin sbꞌabꞌelal, yuxan jix yij sbꞌi Fares,#38:29 Fares chi yal yeloc apnoj, “jajom bꞌe”. yu ix sicꞌom unin tuꞌ. Jix yalon ix yin jun unin tuꞌ jaxca tiꞌ: ¿Tzet yuxan jix jaach bꞌabꞌi ja poꞌoeltej ja bꞌa? ẍi ix. 30Jix lawi tuꞌ, jix ali naj neneꞌ eyoc an cajin txꞌal tuꞌ yin snukꞌ skꞌabꞌ, Zérah jix yij sbꞌi naj yu ix.

Currently Selected:

Génesis 38: knj

Highlight

Copy