Génesis 37

1Jaꞌ naj Jacob jix caey ecꞌ bꞌey Canaán bꞌey ecꞌnaj caan smam. 2Jaxca tiꞌ yoc skꞌaneal ebꞌ yicꞌaal Jacob tiꞌ.

Sweyich Naj José

Jaꞌ naj José ey 17 abꞌil skꞌinal, teyne meꞌ chi yun naj yetoj ebꞌ yuẍtaj, ebꞌ naj yuneꞌ ix Bilhá, yetoj cꞌal ebꞌ naj yuneꞌ ix Zilpá, jaꞌton ebꞌ ix scaabꞌ yistil naj Jacob. Jaꞌ naj José chi iꞌontoj kꞌane tet naj mame tuꞌ ta cꞌam swatxꞌil chi yute sbꞌa ebꞌ naj yuẍtaj tuꞌ.

3Caw chi ochele naj José yu smam yintaj pax wanxa ebꞌ yuẍtaj tuꞌ, yutol caw icham winajxa naj Jacob yet jix ali jun scꞌaal tuꞌ, yuxan jix waꞌnele jun spichil naj, tol caw sakꞌal xacꞌal yili. 4Jaꞌ yet jix yilon oc ebꞌ naj yuẍtaj naj tuꞌ, tol yel xacꞌal chi camcꞌulnele naj yu smam tuꞌ, yuxan caw chi chichon oc scꞌul ebꞌ naj yin, pena xacꞌal jix yute kꞌanabꞌ sbꞌa ebꞌ tet naj.

5Jaꞌ yet junel ey jun sweyich naj José tuꞌ jix oqui, jix yalon yabꞌ ebꞌ yuẍtaj tuꞌ, yu jun tuꞌ, yel xacꞌal jix tit sjowal ebꞌ yin naj. 6Jix yalon tet ebꞌ jaxca tiꞌ:

Abꞌwej, ey jun jin weyich chi wal ey jex. 7Jix jin weyichne tol lalan cu kꞌupwi tiriw, junjun jon cꞌal yetoj junjun topan ket, jaꞌ yet jun txolan tuꞌ jix a waan ixim wet yetoj ixim je yet, jaꞌ ixim je yet jix ey noan ixim, yinlaj ixim wet tuꞌ, ẍi José. 8Catuꞌ jix takꞌwi ebꞌ naj yuẍtaj tuꞌ tet naj jaxca tiꞌ:

¿Jaꞌ tzet chi yal yeloc apnoj jun ja weyich tuꞌ, tol oj jaach oc cu reyaloj, jaach xam oj jon ja chejaꞌ? ẍi ebꞌ naj. Caw jix tit sjowal ebꞌ naj yin José tuꞌ, yutol jix yal sweyich tuꞌ tet ebꞌ.

9Jix lawi tuꞌ, jix oc junxa sweyich naj José tuꞌ, jix yalon pax naj tet ebꞌ yuẍtaj tuꞌ jaxca tiꞌ:

—Ey wal junxa jin weyich jix oqui; jaꞌ yin jun jin weyich tuꞌ jix wilaꞌ, tol jaꞌ cꞌu yetoj xꞌaaw, cꞌal jusluqꞌuebꞌ weycan jix ey noan ebꞌ ey jin, ẍi naj José tuꞌ.

10Jaꞌ yet jix yalon José jun sweyich tuꞌ tet smam, yetoj cꞌal tet ebꞌ yuẍtaj tuꞌ, caw jix tzule naj yu smam, jix yal naj mame tuꞌ jaxca tiꞌ:

—¿Tzet la chi yal yeloc apnoj jun ja weyich tuꞌ? ¿Tumi oj jin ey noan yetoj ix ja txutx tiꞌ, yetoj cꞌal ebꞌ naj ja wuẍtaj tiꞌ ja sattaj, chi yal tuꞌ? ẍi naj.

11Jaxca tuꞌ jix yun ẍichon cꞌal oc scꞌul ebꞌ naj yuẍtaj tuꞌ yin; jaꞌ naj mame tuꞌ, caw miman tzet jix snaꞌ naj yibꞌan tzet chi yal yeloc apnoj jun sweyich naj José tuꞌ.

Jix Txonletoj Naj José Yu Ebꞌ Yuẍtaj

12Ey jun cꞌual, jix too ebꞌ yuẍtaj naj José bꞌey txꞌotxꞌ Siquem, yu seyon ebꞌ ta watxꞌ chi low noꞌ smeꞌ smam ebꞌ naj tituꞌ. 13Jix lawi tuꞌ, jix yalon naj Israel tet naj José tuꞌ jaxca tiꞌ:

—Jaꞌ tinaniꞌ, jaꞌ bꞌey Siquem, jatuꞌ eytoj ebꞌ naj ja wuẍtaj teyne meꞌ; chi woche tol chi too ja wil ebꞌ naj, ẍi naj Israel tuꞌ tet naj.

—Ye xin, ti chin to an, ẍi naj José tuꞌ.

14—Watxꞌ xin, asiꞌ, yet watxꞌ cha wilaꞌ tzet chi yun ebꞌ naj, cꞌal noꞌ cu meꞌ, catuꞌ chi jul ja walon wabꞌ an, ẍi naj.

Jix chejletoj naj José yu naj Israel tuꞌ masantaꞌcꞌal bꞌey spananil stiꞌ sjobꞌeal txꞌotxꞌ Hebrón. Jaꞌ yet jix apni oc José bꞌey yul yet Siquem, 15jix seyon ecꞌ ebꞌ yuẍtaj tituꞌ. Jaꞌ jix yunne, ey jun winaj jix ẍaꞌle sbꞌa yetoj naj, jix skꞌanle naj winaj tuꞌ tet jaxca tiꞌ:

—¿Tzet cha seyaꞌ? ẍi naj tet José.

16—Tol chin seyecꞌ ebꞌ naj wuẍtaj an. ¿Cꞌam mi cha wil bꞌey chi ilwi oc meꞌ ebꞌ naj? ẍi José.

17—Xax to ebꞌ naj titiꞌ, jix wabꞌ yalon ebꞌ naj an, watxꞌ chi cu too bꞌey Dotán, ẍi ebꞌ naj jix wabꞌ an, ẍi naj winaj tuꞌ.

Catuꞌ jix too cꞌal José tuꞌ xin, jix ilcha ebꞌ yu naj bꞌey Dotán. 18Naat to wal yapni oc naj scꞌatan ebꞌ, jix yilontej ebꞌ tol jaꞌ naj José chi apni, catuꞌ jix swa alne ebꞌ tzet chi yun smakꞌon cam naj ebꞌ. 19Jix yalon ebꞌ jaxca tiꞌ:

—Ilwej ton abꞌ sjul naj weyichwom tuꞌ la. 20Cu makꞌwej camoj, catuꞌ chi cu kꞌojon eytoj yul junoj xabꞌ, catuꞌ oj kaloni tol jix chiꞌle eytoj naj yu junoj noꞌ xol-laj teꞌal noꞌ, catuꞌ oj kiloni tzet oj yal yeloc apnoj sweyich tuꞌ, ẍi ebꞌ naj.

21Jaꞌ yet jix yabꞌen naj Rubén wan kꞌane tuꞌ, jix snaꞌon naj tzet chi yun scolon el naj yul skꞌabꞌ wan yuẍtaj tuꞌ, jix yalon jaxca tiꞌ:

—Cꞌam ojabꞌ chi cu makꞌwej cam naj kuẍtaj tiꞌ. 22Cꞌam ojabꞌ chi oc cu penail yu kiꞌon el ẍiqꞌuil naj, asan tol che yaeytoj naj yul junoj kꞌobꞌ bꞌey cusiltaj txꞌotxꞌ tiꞌ, catuꞌ cꞌam cꞌal junoj jon chi kaoc cu kꞌabꞌ yin, ẍi naj Rubén tuꞌ.

Jix yal jun kꞌane naj tuꞌ, yutol chi yoche naj chi scol can el naj José tuꞌ, yet watxꞌ chi yun smeltzo naj bꞌey smam junelxa. 23Jaꞌ yet jix apni oc naj José scꞌatan ebꞌ yuẍtaj tuꞌ, eyman jix mitxꞌle ey naj yu ebꞌ, jix iꞌle el spichil naj yu ebꞌ, an caw wal watxꞌ yili. 24Jix lawi tuꞌ, jix ale eytoj naj yul jun tajin kꞌobꞌ caw naat yich yu ebꞌ naj, jal naj Rubén tuꞌ xin, jix el naj scꞌatan ebꞌ naj. 25Catuꞌ jix ey chotan ebꞌ yuẍtaj tuꞌ lowoj.

Jaꞌ yet jun txolan tuꞌ, jix yilon ebꞌ naj stit jun bꞌulan ebꞌ naj Ismaelita jix tit bꞌey Galaad. Ey yanil xil jolome, cꞌal bálsamo, yetoj wan teꞌ teꞌ chi yij mirra eyoc yibꞌan scamello ebꞌ naj, chi too ebꞌ txonwoj bꞌey Egipto. 26Jix yalon naj Judá tet ebꞌ yuẍtaj tuꞌ jaxca tiꞌ:

—¿Tzet chi kiꞌ yin cu makꞌon cam jun kuẍtaj tiꞌ yin ewantajil? 27Yel mi watxꞌ tol chi cu txonwej el naj tet ebꞌ naj Ismaelita chi jul tiꞌ. Cꞌam ojabꞌ chi cu makꞌwej cam naj, yutol kuẍtajwej cu bꞌa yetoj naj, ẍi Judá.

Catuꞌ jix ẍaꞌon scꞌul masanil ebꞌ yuẍtaj naj tuꞌ, yin tzet jix yal naj. 28Jaꞌ yet jix ecꞌtoj ebꞌ naj a Madián#37:28 Jaꞌton jun sbꞌi ebꞌ Ismaelita, jaꞌton chi bꞌina yin wan nacionlaj tol jobꞌom meꞌ ey bꞌey cusiltaj txꞌotxꞌ, yicꞌaal Abraham cꞌal pax ebꞌ, jaxca yeoc ebꞌ yicꞌaal Madián. tuꞌ xin, yin eymanil jix bꞌet iꞌle atej naj José tuꞌ yu ebꞌ naj yul jun tajin kꞌobꞌ tuꞌ, catuꞌ jix txonletoj naj yin 20 siclo chꞌen plata tet ebꞌ naj Ismaelita tuꞌ. Queytuꞌ jix yun yiꞌle cantoj naj José bꞌey conobꞌ Egipto.

29Jaꞌ yet jix meltzo naj Rubén jix too yilon ecꞌ bꞌey stiꞌ jun kꞌobꞌ tuꞌ, cꞌamxa naj José tuꞌ eeytoj tituꞌ; catuꞌ jix stzilontoj stiꞌ spichil bꞌey snukꞌ yet chi xꞌoxon eloj tol ey scuscꞌulal; 30catuꞌ jix too jininoj yalon tet ebꞌ naj yuẍtaj tuꞌ, jix yalon jaxca tiꞌ:

—Cꞌamxa naj kuẍtaj eeytoj yul kꞌobꞌ. ¿Tzet to wal oj yun walon tet naj cu mam tinaniꞌ? ẍi naj.

31Jaꞌ yet jun txolan tuꞌ, jix snaꞌon ebꞌ tzet chi yute sbꞌa ebꞌ, jix smakꞌon cam jun noꞌ yuneꞌ chiw ebꞌ, jix yiꞌon el ẍiqꞌuil noꞌ ebꞌ naj, catuꞌ jix sbꞌonon oc ebꞌ yin spichil José tuꞌ. 32Catuꞌ jix yiꞌontoj ebꞌ naj tet smam, jix yalon ebꞌ jaxca tiꞌ: Jix ilcha jun pichile tiꞌ cu jon, jaxca wal tol jaꞌ an spichil naj ja cꞌaal ma cꞌamaj xin, ẍi ebꞌ naj.

33Jaꞌ yet jix yilon naj Jacob, tol jaꞌton an spichil naj José tuꞌ, jix yalon naj jaxca tiꞌ: ¡Ay… jaꞌton wal an spichil naj jin cꞌaal tiꞌ an! Ey mi wal junoj noꞌ xol-laj teꞌal noꞌ jix kocꞌtzilnentoj naj, catuꞌ jix chiꞌle can eytoj naj jin cꞌaal tuꞌ yu noꞌ, ẍi naj Jacob. 34Jix lawi cꞌal tuꞌ, catuꞌ jix stzilontoj stiꞌ spichil naj Jacob tuꞌ, jix yaon oc jun eel pichile yet cuscꞌulal; caw naatil jix okꞌ naj yu scamichal scꞌaal tuꞌ. 35Masanil ebꞌ scꞌaal cꞌal ebꞌ scutzꞌin, chito wal yakꞌle smimanil scꞌul smam ebꞌ tuꞌ; jal pax naj xin, cꞌamxa chi yoche naj chi akꞌle smimanil scꞌul. Jix yalon naj jaxca tiꞌ: Caw chin cus yu naj jin cꞌaal tuꞌ, watxꞌ mi tol chin cam xacꞌal tinaniꞌ yet chi too wilon naj jin cꞌaal tuꞌ xol ebꞌ camnaj, ẍi naj.

36Jaꞌ yet jix apni oc ebꞌ naj a Madián tuꞌ bꞌey Egipto, catuꞌ jix txonle cantoj naj José yu ebꞌ tet naj Potifar, naj syaawil ebꞌ chi teynen naj rey Faraón bꞌey Egipto.

Currently Selected:

Génesis 37: knj

Highlight

Copy