Génesis 35

Jix Yal Watxꞌ Kꞌane Jehová Yibꞌan Jacob Bꞌey Betel

1Jix lawi tuꞌ, jix yalon Jehová tet naj Jacob jaxca tiꞌ: Elan titiꞌ catuꞌ chach too bꞌey Betel, jaꞌ tituꞌ cha waꞌne a junoj yet xaambꞌal ey jin an. Yutol jaꞌ tituꞌ jix jin txꞌox jin bꞌa ey jaach an, yet ipan ja wela tet naj ja wuẍtaj Esaú, ẍi Jehová tet naj.

2Catuꞌ jix oc ian naj Jacob yalon tet ebꞌ yistil cꞌal tet ebꞌ yuninal, cꞌal yetoj tet masanil ebꞌ ánima jaꞌjun yetoj, jix yalon jaxca tiꞌ:

—Iꞌwej el masanil wan yechel comon dios eyecꞌ je xol, catuꞌ chex aẍni, che qꞌuexon el je pichil je masanil. 3Toonwej yin eymanil bꞌey Betel, jaꞌ tituꞌ oj jin waꞌne a junoj yet xaambꞌal yu wiꞌon a can sbꞌi Jehová, Naj jix colwa wetoj yet caw ey jin oc yin bꞌiscꞌulal, catuꞌ jix colwa cꞌal Naj wetoj bꞌey cꞌal jix jin eqꞌui, ẍi Jacob.

4Jaxca tuꞌ jix yun yiꞌontej wan yechel sdiosal ebꞌ tuꞌ tet naj Jacob, cꞌal yetoj chꞌen ome yet txiquine bꞌey chi yaoc yipoj scꞌul ebꞌ, jaꞌ naj Jacob jix mujon can eytoj masanil wan tuꞌ bꞌey yich jun teꞌ jii, bꞌey scawilal Siquem. 5Jaꞌ yet jix el ebꞌ tituꞌ, jaꞌ Jehová jix aon oc jun xiwcꞌulal yin snaꞌbꞌal ebꞌ conobꞌ ey scawilal tuꞌ, yuxan cꞌam junoj mactxequel jix ujten ecꞌ ebꞌ.

6Jaꞌ naj Jacob yetoj masanil ebꞌ ánima jaꞌjun yetoj, jix apni oc ebꞌ bꞌey jun txꞌotxꞌ chi yij Luz, yul yet txꞌotxꞌ Canaán, jacꞌal pax oc chi yij Betel. 7Jaꞌ tituꞌ jix swaꞌne a jun yet xaambꞌal naj, jix yakꞌon yij sbꞌi jun txꞌotxꞌ tuꞌ jaxca tiꞌ: El-betel,#35:7 El-betel chi yal yeloc apnoj, “sDiosal Betel”. yutol jaꞌ yet jix el tet yuẍtaj, jaꞌ tituꞌ jix xꞌox sbꞌa Jehová tet naj. 8Jaꞌ tituꞌ jix cam ix Débora, jaꞌton jun jix ilon chꞌibꞌ ix Rebeca yin syaliẍal, jaꞌ tituꞌ jix smujcan eytoj smimanil ix ebꞌ yich jun teꞌ jii, scawilal Betel; jaꞌ naj Jacob, jix yakꞌ yij sbꞌi jun txꞌotxꞌ tuꞌ, teꞌ Jii yet Cuscꞌulal.

9Jaꞌ yet jix meltzo naj Jacob bꞌey Padán-aram, jix xꞌox sbꞌa Dios tet naj junelxa, jix yalon watxꞌ kꞌane Dios yibꞌan naj. 10Jix yalon Dios tet naj jaxca tiꞌ:

Jaach tiꞌ Jacob ja bꞌi, jal tinaniꞌ manxa jaxca oj tuꞌ, Israel xa ja bꞌi, ẍi Dios.

Jaꞌ yet jix qꞌuexle sbꞌi naj Jacob tuꞌ yu Jehová, 11jix yalon tet jaxca tiꞌ:

Jain ton Jehová jin, chi skeꞌ wu masanil; caw ecꞌal sbꞌisil ja wuninal oj aloj, caw ecꞌal pax ebꞌ ja wicꞌaal oj eloj. Jaꞌ ja win oj pitzcꞌu el mimej conobꞌ, caw ecꞌal conobꞌal oj yun yeloc ebꞌ, jaꞌ xol ebꞌ ja wicꞌaal tuꞌ oj eltej ebꞌ oj oc yin reyal.

12Jaꞌ txꞌotxꞌ txꞌotxꞌ jix wakꞌ tet Abraham, cꞌal tet Isaac, chi wakꞌcan txꞌotxꞌ ey jaach. Catuꞌ chi wakꞌon pax can txꞌotxꞌ tet ebꞌ ja wicꞌaal, ẍi Jehová tet naj Jacob.

13Jaꞌ yet jix el Jehová bꞌey jix kꞌanabꞌ yetoj naj Jacob tuꞌ, 14jix seyon jun chꞌen cꞌatan ye chꞌen naj, catuꞌ jix slinbꞌa a bꞌey jix kꞌanabꞌ yetoj Jehová. Catuꞌ jix secon ey aceite olivo cꞌal yal uva yibꞌan chꞌen, yu yakꞌon saꞌbꞌeal tet Jehová. 15Jix yakꞌon can yij sbꞌi, Betel jun txꞌotxꞌ tuꞌ naj, yutol jaꞌ tituꞌ jix kꞌanabꞌ Jehová yetoj.

Scamichal Ix Raquel

16Jix lawi tuꞌ, jix el ebꞌ bꞌey txꞌotxꞌ Betel tuꞌ. Eyto wal yapni oc ebꞌ bꞌey Efrata, catuꞌ jix waꞌxi scꞌul ix Raquel; yin wal syaꞌtajil jix yun yali jun unin tuꞌ. 17Jaꞌ yet lalan yabꞌen syaꞌil jun unin tuꞌ ix, jix yalon ix sicꞌom unin tuꞌ jaxca tiꞌ: Manche jaach xiwi, tuxa jix ali junxa ja winaj unin, ẍi ix. 18Jaꞌ yet tuxa chi cam ix yu syaꞌil jun unin tuꞌ, jix yal can ix tzet sbꞌi jun unin tuꞌ, Ben-oní;#35:18 Ben-oní chi yal yeloc apnoj “wuneꞌ jix akꞌon jin cuscꞌulal” jaꞌ jun bꞌie Benjamín chi yal yeloc apnoj, “jin cꞌaal yet jin watxꞌ kꞌabꞌ”, ma “jin cꞌaal chi txꞌoxon el wipalil”. jaxa naj Jacob xin, Benjamín jix yakꞌ yij sbꞌi naj.

19Queytuꞌ jix yun scam ix Raquel, jaꞌ tituꞌ jix mujle can eytoj ix bꞌey yul sbꞌeal Efrata, jaꞌton bꞌey jun conobꞌ chi yij Belén tinaniꞌ. 20Catuꞌ jix swaꞌnen can a latzꞌan wan chꞌen chꞌen naj Jacob tuꞌ yibꞌan bꞌey jix mujle can smimanil ix tuꞌ, jaꞌton jun tuꞌ chi txꞌoxon can bꞌey mujan can ix Raquel tinaniꞌ.

21Jaꞌ yet jix bꞌey cꞌaltoj naj Israel tuꞌ, catuꞌ jix swaꞌne a sna naj bꞌey sattajto jun Torre de Éder. 22Jaꞌ yet caan ecꞌ naj Israel bꞌey jun txꞌotxꞌ tuꞌ, ey jun scꞌaal naj chi yij Rubén, jix oc naj wey yetoj ix Bilhá scaabꞌ yistil smam tuꞌ, jix yabꞌtej naj Jacob tzet jix el yunen jun scꞌaal tuꞌ.

Ebꞌ Naj Scꞌaal Naj Jacob

(1a Crónicas 2:1-2)

Lacawan ebꞌ scꞌaal naj Jacob: 23Ebꞌ scꞌaal naj yetoj ix Lía jaꞌton ebꞌ tiꞌ, Rubén naj bꞌabꞌel winaj, naj Simeón, Leví, Judá, Isacar cꞌal Zabulón. 24Jaꞌ ebꞌ scꞌaal naj yetoj ix Raquel jaꞌton; José cꞌal naj Benjamín. 25Jaꞌ ebꞌ scꞌaal naj yetoj ix Bilhá, ix yakꞌomal servil ix Raquel, jaꞌton Dan cꞌal Neftalí. 26Cꞌal ebꞌ scꞌaal naj yetoj ix Zilpá, ix yakꞌomal servil ix Lía, jaꞌton Gad cꞌal Aser. Jaꞌton ebꞌ yuninal naj Jacob tiꞌ alinaj bꞌey Padán-aram.

Scamichal Naj Isaac

27Jix too naj Jacob yil smam, jaꞌton Isaac, caan naj bꞌey txꞌotxꞌ xꞌotxꞌ naj Mamré, bꞌey conobꞌ Arbá, jacꞌal pax oc chi yij Hebrón. Jaꞌ tituꞌ jix caey ecꞌ naj Abraham yetoj Isaac yet yalantoj. 28Ey 180 abꞌil skꞌinal naj Isaac yet jix cami. 29Caw icham winajxa yet jix cami. Jaꞌ Jacob yetoj Esaú, ebꞌ scꞌaal naj, jaꞌ ebꞌ jix mujon can smimanil.

Currently Selected:

Génesis 35: knj

Highlight

Copy