Génesis 34
34
Skꞌaneal Ix Dina
1Jaꞌ ix Dina, yuneꞌ ix Lía yetoj naj Jacob, jix too ix paẍal xol ebꞌ ix ix caan bꞌey jun conobꞌ tuꞌ. 2Jaꞌ naj Hamor, a Ferezeo naj, yaaw yeoc yul jun conobꞌ tuꞌ. Ey jun scꞌaal chi yij sbꞌi Siquem; jaꞌ naj jix ilon oc ix Dina tuꞌ, catuꞌ jix mulwi naj yetoj ix yin akꞌbꞌil puralil. 3Caw wal jix yil xacꞌal oc scꞌul naj yin ix, yuxan jix smonte yin camcꞌulalil. 4Jix yalon tet naj Hamor jaxca tiꞌ:
—Asiꞌ kꞌan jun ix kꞌopo tuꞌ, chi woche chin nupi yetoj ix, ẍi naj.
5Jix yabꞌoc naj Jacob tol jix etnelei scutzꞌin yu naj Siquem tuꞌ, cꞌam cꞌal tzet jix yal naj masantaꞌcꞌal jix meltzotej ebꞌ scꞌaal yin teyne meꞌ. 6Yajbꞌan tuꞌ, jaꞌ naj Hamor, smam naj Siquem, jix bꞌet il-le naj Jacob yu naj. 7Jaꞌ yet jix yabꞌen ebꞌ naj scꞌaal Jacob tuꞌ tzet jix utele ix yanabꞌ ebꞌ naj tuꞌ, jix meltzotej ebꞌ, caw jix tit sjowal ebꞌ naj sicꞌlebꞌil, yutol caw miman jun spenail jix yun naj Siquem tuꞌ, yin ebꞌ yicꞌaal Israel, yutol jix etnele el ix scutzꞌin Jacob tuꞌ yu naj. Caw man smoo oj chi yun jun tuꞌ. 8Jaꞌ naj Hamor jix kꞌanabꞌ yetoj ebꞌ naj, jix yalon jaxca tiꞌ:
—Jaꞌ naj jin cꞌaal Siquem, caw chi yiloc scꞌul naj yin ix je yanabꞌ tiꞌ; yu jun tuꞌ, eloj yin je cꞌul tol chi nupi naj yetoj ix. 9Jaxca ojabꞌ yin tol jaonto cꞌal oc je yetoj, chi skeꞌ cu nupi yetoj ebꞌ ix je cutzꞌin jaex tiꞌ, catuꞌ chex nupi pax yetoj ebꞌ ix cu cutzꞌin jaon tiꞌ jon. 10Watxꞌ chex caey cꞌal ecꞌ cu xol tiꞌ jon, jaꞌ txꞌotxꞌ txꞌotxꞌ tiꞌ, eyoc txꞌotxꞌ yul je kꞌabꞌ, aoc je txon, manwej je txꞌotxꞌ, ẍi naj Hamor.
11Jix yalon pax naj Siquem tuꞌ tet naj smam ix Dina tuꞌ, cꞌal tet ebꞌ naj sno ix.
—Oj wakꞌ ey jex, yal cꞌal tzet che kꞌan ey jin. 12Cꞌam cꞌal yeloc apnoj caxcꞌal miman tzet chi wakꞌ yintaj jaxca cꞌaltaꞌ chi yakꞌ ebꞌ ánima, catuꞌ miman saꞌbꞌeal chi skeꞌ wakꞌoni, asantane chi el yin je cꞌul chin nupi yetoj ix Dina tiꞌ, ẍi naj Siquem tuꞌ.
13Yutol xax etnelei yanabꞌ ebꞌ tuꞌ yu naj, catuꞌ jix takꞌwi ebꞌ naj scꞌaal naj Jacob yin caabꞌ satil tet naj Siquem cꞌal tet naj Hamor. 14Jix yalon ebꞌ jaxca tiꞌ:
—Cꞌam chi skeꞌ kakꞌon kanabꞌ tiꞌ tet junoj winaj tol man eyoj oc jun echele yin swinajil; caw qꞌuixwiltaj chi cu cancan jaxca tuꞌ. 15Asan ta chi yal je cꞌul, ta che yun jaxca keoc tiꞌ jon, tejan chi kakꞌ ix ey jex, jaon tiꞌ jon ocnaj jun echele tuꞌ yin cu winajil jon. Ta chi yal je cꞌul chi oc jun echele tuꞌ yin je winajil yin masanil ebꞌ winaj ey je xol tiꞌ, 16ta jaxca tuꞌ, chi skeꞌ je yiꞌon ebꞌ ix cu cutzꞌin jon, catuꞌ chi skeꞌ pax kiꞌon ebꞌ ix je cutzꞌin jon, catuꞌ chi skeꞌ keecꞌ je xol, catuꞌ junxane conobꞌal chi kunwej. 17Ta cꞌam chi yal je cꞌul chi oc jun yechel yin swinajil je mimanil tuꞌ xin, chi cu el titiꞌ jon, chi kiꞌontoj ix kanabꞌ tiꞌ ketoj jon, ẍi ebꞌ naj.
18Jaꞌ naj Hamor yetoj scꞌaal tuꞌ, jix ẍaꞌ scꞌul ebꞌ jaxca yalon ebꞌ naj tuꞌ. 19Ma xacꞌal ecꞌ miman tiempo, yutol jix can xacꞌal snaꞌbꞌal naj yin ix scutzꞌin naj Jacob tuꞌ. Jaꞌ naj Siquem tuꞌ asan naj miman yeloc apnoj xol yuninal naj Hamor, cꞌal xol ebꞌ yican. 20Yin eymanil jix too naj yetoj smam bꞌey spuertail conobꞌ bꞌey chi syambꞌa sbꞌa ánima, jix cꞌoli yalon el ebꞌ jaxca tiꞌ tet ebꞌ winaj:
21Jaꞌ wan winaj tiꞌ caw watxꞌ snaꞌbꞌal ebꞌ, oj caey ebꞌ naj cu xol tiꞌ, cꞌal yaon oc xon ebꞌ naj bꞌey cu conobꞌ tiꞌ. Miman txꞌotxꞌ bꞌey chi skeꞌ yeecꞌ ebꞌ naj, chi skeꞌ cu nupi yetoj scutzꞌin ebꞌ naj, catuꞌ chi skeꞌ pax snupi ebꞌ naj yetoj cu cutzꞌin. 22Asan xin, chi yoche ebꞌ naj tol cu masanil jaon winaj jon tiꞌ, chi kaoc jun echele yin cu winajil, jaxca sbꞌeybꞌal ebꞌ naj, yet watxꞌ junne conobꞌal chi kun yetoj ebꞌ. 23Jaꞌ masanil stzetyetal ebꞌ naj cꞌal masanil noꞌ sjobꞌbꞌeal noꞌ ebꞌ, ket cꞌal masanil asan tucꞌal chi cu takꞌewej cu tiꞌ tet ebꞌ, yet watxꞌ chi can ebꞌ cu xol, ẍi naj Hamor yetoj Siquem.
24Masanil ebꞌ naj tol tzꞌajan xa yabꞌilal, ebꞌ tol smoo xa chi too yin jowal, jix ẍaꞌ scꞌul ebꞌ tzet jix yal naj Hamor cꞌal naj Siquem, yuxan jix ale oc jun echele tuꞌ yin swinajil masanil ebꞌ. 25Jaꞌ naj Simeón cꞌal Leví scꞌaal naj Jacob, sno ix Dina ebꞌ, jix too ebꞌ bꞌey conobꞌ tuꞌ yet scaabꞌial, yajbꞌan yaꞌ tocꞌal ey ebꞌ winaj tuꞌ yet jix oc jun yechel tuꞌ yin swinajil ebꞌ naj, catuꞌ jix apni oc ebꞌ naj cawan tuꞌ bꞌey conobꞌ tuꞌ, jix oc ian ebꞌ naj smakꞌon cam ebꞌ naj yaꞌey tuꞌ masanil yetoj espada, yutol man naꞌanoj yu ebꞌ a conobꞌ tuꞌ. 26Catuꞌ jix makꞌle cam naj Hamor yetoj Siquem yu ebꞌ naj. Jix lawi tuꞌ, jix yiꞌon eltej ix Dina ebꞌ naj yul sna naj Siquem, catuꞌ jix pax tej ebꞌ naj. 27Jix lawi tuꞌ, jix apni masanil ebꞌ naj scꞌaal naj Jacob tuꞌ, palan cꞌal yecꞌ ebꞌ naj yibꞌan ebꞌ camnaj tuꞌ, jix iꞌle eltej masanil stzetyetal ebꞌ ánima tuꞌ yu ebꞌ naj, queytuꞌ jix yun spajtzen ebꞌ naj, yutol jix etnele ix yanabꞌ ebꞌ naj tuꞌ. 28Masanil tzet ey yul conobꞌ tuꞌ cꞌal tzet ey yinlaj, jix yiꞌtoj ebꞌ masanil, noꞌ meꞌ, noꞌ wacax cꞌal noꞌ bꞌuru. 29Jix yelkꞌanetoj masanil tzet ey yul-laj na ebꞌ, jix iꞌletoj masanil ebꞌ yaliẍ unin cꞌal ebꞌ ix ix, yu ebꞌ naj. 30Jix yalon naj Jacob tet Simeón cꞌal tet Leví jaxca tiꞌ:
—Caw wal je yu cꞌal yuxan caw pena chin can yul sat ebꞌ ánima tiꞌ. Jaꞌ tinaniꞌ, masanil ebꞌ naj caan bꞌey wan conobꞌ tiꞌ, masanil ebꞌ naj Cananeo cꞌal ebꞌ naj Ferezeo, caw oj chichon oc scꞌul ebꞌ naj win. Oj mi syambꞌa oc sbꞌa ebꞌ naj, catuꞌ oj yakꞌon jowal ebꞌ naj ketoj. Caw txenne sbꞌisil ebꞌ winaj eyecꞌ ketoj, tejan oj cu smakꞌ cam ebꞌ naj cu masanil, ẍi naj Jacob tuꞌ.
31Catuꞌ jix takꞌwi ebꞌ naj jaxca tiꞌ:
—¿Tumi smooal chi etnele ix kanabꞌ tiꞌ yu ebꞌ naj, catuꞌ chi yuten naj winaj tuꞌ jaxca xacꞌal junoj amul ix? ẍi ebꞌ naj.
Currently Selected:
Génesis 34: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
