Hechos 19

Jaꞌ Yet Eyecꞌ Naj Pablo Bꞌey Éfeso

1Jaꞌ yet eyecꞌ Apolo bꞌey Corinto, jix cꞌoli yecꞌ Pablo bꞌey wan conobꞌ tzalquiltaj scawilal. Catuꞌ jix apni naj bꞌey conobꞌ Éfeso. Jaꞌ tituꞌ jix yil-le el sbꞌa yetoj wan ebꞌ creyente.

2Catuꞌ jix skꞌanlen el tet ebꞌ jaxca tiꞌ:

—¿Jix mi eyol Santo Espíritu je yin yet jix je yaon oc je cꞌul yin Cristo? ẍi Pablo tet ebꞌ.

—Cꞌamaj, cꞌam bꞌey chi kabꞌe ta ey Santo Espíritu, ẍi ebꞌ.

3—Jaꞌ yet jix je yakꞌon bautizar je bꞌa, ¿tzet jix je yaoc yin je cꞌul? ẍi Pablo tuꞌ tet ebꞌ.

—Jaꞌ wan scuybꞌanil naj Juan jix cu jije jon, ẍi ebꞌ tet naj.

4Yuxan jix yal pax tet ebꞌ jaxca tiꞌ:

—Jaꞌ naj Juan tuꞌ, yakꞌnaj bautizar ánima, yu txꞌoxbꞌanileal, tol chi snaꞌ sbꞌa ebꞌ yin spenail. Yalnaj can pax tet ebꞌ, tol ey jun mactxequel tzajan sjul yintaj naj. Sowalil jaꞌ yin jun mactxequel tuꞌ chi yaoc scꞌul ebꞌ. Jaꞌ jun mactxequel tuꞌ, jaꞌton Jesús, Naj Cristo,* ẍi Pablo tet ebꞌ.

5Jaꞌ yet jix yabꞌen wan tiꞌ ebꞌ, catuꞌ jix yakꞌon bautizar sbꞌa ebꞌ yin sbꞌi Naj Kaawil Jesús. 6Catuꞌ jix yaon atoj skꞌabꞌ naj Pablo yibꞌan sjolom junjun ebꞌ, catuꞌ jix eyol Santo Espíritu yin ebꞌ. Jix kꞌanabꞌ a ebꞌ yin wan txꞌoj tiꞌeal, catuꞌ jix akꞌle yal wan scuybꞌanil Dios ebꞌ. 7Jaꞌ ebꞌ jix aon oc yin scꞌul tuꞌ, ey mi lacawanoj ebꞌ.

8Oxebꞌ xꞌaaw jix bꞌetecꞌ naj Pablo yalel skꞌane Dios yul snail sculto ebꞌ yet Israelal tuꞌ. Tecꞌan jix yute sbꞌa yalon el tet ebꞌ. Jix akꞌle yotajne el ebꞌ yu naj tzet utbꞌil chi yun yoc Dios Yaawiloj ebꞌ. 9Ey pax wan ebꞌ caw caw snaꞌbꞌal. Tutun cꞌam chi yal scꞌul ebꞌ chi yaoc yin scꞌul. Chi yal ebꞌ tet ebꞌ ánima, tol cꞌam swatxꞌil jun cuybꞌanile bꞌey eyoc ebꞌ creyente tuꞌ. Yuxan jix el Pablo snan xol ebꞌ. Catuꞌ jix iꞌletoj ebꞌ creyente tuꞌ yu bꞌey yescuela jun naj chi yij Tirano. Jaꞌ tituꞌ jix bꞌet cuyle ebꞌ creyente yin junjun cꞌu. 10Caabꞌ abꞌil yunnaj ebꞌ jaxca tuꞌ. Yuxan, masanil ebꞌ a lugar bꞌey Asia tuꞌ jix yabꞌ skꞌaneal Naj Kaawil Jesús ebꞌ. Ebꞌ Israel cꞌal ebꞌ man Israeloj, masanil ebꞌ jix yabꞌ skꞌaneal tuꞌ. 11Catuꞌ jix kꞌanbꞌalnele Pablo yu Dios yin xꞌoxon wan milagro* caw miman yeloc apnoj. 12Ey ebꞌ iꞌbꞌil oc txꞌambꞌale yu, cꞌal pichile yu, catuꞌ jix tenle oc yin naj Pablo yu ebꞌ. Catuꞌ jix bꞌet yaon oc ebꞌ yin ebꞌ yaꞌey, catuꞌ jix waꞌxi can scꞌul ebꞌ yu. Ey pax pena espíritu jix elcan yin ebꞌ ánima yu.

13Ey wan ebꞌ ecꞌabꞌwom Israel, jix yakꞌle yiꞌon el pena espíritu yin ánima. Jix yakꞌle yawten sbꞌi Naj Kaawil Jesús ebꞌ, yet jix yiꞌon el pena espíritu ebꞌ tuꞌ. Jix yal ebꞌ tet ebꞌ pena espíritu jaxca tiꞌ:

—Yin Sbꞌi Jesús chi kaloni: Elanwej. Jaꞌ Jesús tuꞌ, jaꞌton naj chi ecꞌ yalel skꞌaneal naj Pablo, ẍi ebꞌ jix yalon ebꞌ.

14Ey jujwan scꞌaal jun naj Israel chi yij Esceva, naj yaawil yakꞌomal xaambꞌal ebꞌ Israel tet Dios. Jix yakꞌle ebꞌ naj yiꞌon el jun pena espíritu yin ánima. 15Jal yet jix takꞌwi tet ebꞌ naj jix yal jun pena espíritu jaxca tiꞌ:

—Jaꞌ Jesús che yal tuꞌ wotaj an. Wotaj pax Pablo tuꞌ an. Jal jex jaex tiꞌ, ¿mac jex txequel? ẍi jun pena espíritu tuꞌ tet ebꞌ.

16Jaꞌ naj bꞌey eyoc jun pena espíritu tuꞌ, jix tit jucna naj yin ebꞌ, catuꞌ jix akꞌle ganar yeyqꞌuey ebꞌ masanil yu naj. Jix el ebꞌ scꞌatan naj. Jix yasitoj ebꞌ. Jix el ebꞌ bꞌey na bꞌey eyecꞌ ebꞌ tuꞌ, catuꞌ jix el jininoj ebꞌ yin tꞌiran el ebꞌ. 17Jix yabꞌ masanil ebꞌ a Éfeso skꞌaneal tzet jix yun tuꞌ, ebꞌ Israel cꞌal ebꞌ man Israeloj, jix yabꞌ masanil ebꞌ. Yuxan jix xiwa ebꞌ masanil. Jix yalon watxꞌ kꞌane ebꞌ tet Naj Kaawil Jesús.

18Ecꞌal ebꞌ yanaj xa oc scꞌul yin Cristo. Catuꞌ jix yalon atej tzet man watxꞌoj jix el yunen masanil ebꞌ. 19Ey cꞌal ebꞌ xin, jix yakꞌle yin atxumal. Jix yiꞌtej slibro ebꞌ chi yakꞌbꞌalne yet chi txumli ebꞌ tuꞌ, catuꞌ jix nuson tzꞌaꞌ ebꞌ sattaj masanil ebꞌ. Jix yiꞌ cuenta ebꞌ yin jantaj stool an, ey mi junoj 50,000#19:19 Chi yal titiꞌ; “50,000 piezas de plata” man kotajoj jantaj jun tumin tuꞌ, chi yal yeloc apnoj caw miman tumin. chꞌen tumin plata eyoc yin an. 20Ecꞌal ánima jix yaoc scꞌul yin skꞌane Dios yet tuꞌ, yuxan, jaxca ton tiꞌ jix yun xeclo eloj tol caw miman yipal skꞌane tuꞌ.

21Jaꞌ yet jix lawi wan tuꞌ xin, jix snaꞌon Pablo, tol oj ecꞌ bꞌey jun lugar chi yij Macedonia yetoj bꞌey Acaya, catuꞌ chi too bꞌey Jerusalén. Catuꞌ jix yalon jaxca tiꞌ:

—Oj lawoj tuꞌ, sowalil oj jin apnoj bꞌey Roma an, ẍi naj.

22Jix ẍejon bꞌabꞌojtoj cawan ẍejabꞌ tuꞌ bꞌey Macedonia, jaꞌton Timoteo yetoj Erasto jix toi. Jal naj Pablo tuꞌ xin, jix toocan jayebꞌ xa xꞌaaw bꞌey Asia tuꞌ.

Jaꞌ Yet Jix A Uchna Conobꞌ Éfeso

23Jaꞌ yet jun tiempoal tuꞌ, caw jix a uchna masanil ebꞌ conobꞌ yu jix tit sjowal yin scuybꞌanil Naj Kaawil. 24Ey jun naj chi ijon Demetrio, chacꞌom plata naj. Jaꞌ naj chi waꞌnen yechel sna jun ix chi yaloc ebꞌ sdiosaloj tuꞌ, jun chi yij Artemisa. Miman tumin chi yakꞌ ganar ebꞌ yet chacꞌom platail yetoj yin wan echele tuꞌ. 25Jix yawte oc bꞌulan wanxa ebꞌ naj, ebꞌ chi waꞌnen wan echele tuꞌ yetoj, cꞌal wanxa ebꞌ yet chacꞌom chꞌenal. Catuꞌ jix yalon naj tet ebꞌ jaxca tiꞌ:

—Jex wet chacꞌom chꞌenal, je yotaj, tol miman cu tumin chi kakꞌ ganar yin jun kopiso tiꞌ. 26Che yil pax oj, catuꞌ che yabꞌen pax tzet lalan yunen Pablo. Tol jaꞌ wan dios waꞌnebꞌil yu ánima, man dios oj yalon naj. Ecꞌalxa mactxequel jix akꞌcha scꞌul yu naj. Man asanne oj bꞌey Éfeso tiꞌ, tol qꞌuey pax tuꞌ jix yun yakꞌle scꞌul masanil ebꞌ bꞌey yul yet Asia tiꞌ yu naj. 27Caw ey smey jun tiꞌ. Tejan ma xa toj cu txon yu tzet chi yal naj yin tuꞌ. Yetoj pax oj, tejan cꞌamxa yeloc apnoj sna ix cu diosal Diana yul sat ánima. Jaꞌ ix cu diosal tiꞌ, caw miman yeloc apnoj ix yul sat masanil ánima bꞌey Asia tiꞌ, cꞌal bꞌey masanil yul yibꞌankꞌinal tiꞌ. Jal tinaniꞌ, caw ey smey, tejan cꞌamxa yopiso yul sat ebꞌ, ẍi naj tet ebꞌ.

28Jaꞌ yet jix yabꞌen wan tuꞌ ebꞌ, caw jix tit sjowal ebꞌ sicꞌlebꞌil. Catuꞌ jix a yaw ebꞌ yin ipal, catuꞌ jix yalon ebꞌ jaxca tiꞌ:

—Caw miman yeloc apnoj ix cu diosal Diana, jaon a Éfeso jon tiꞌ, ẍi ebꞌ.

29Jix a uchna conobꞌ tuꞌ masanil yu stit sjowal. Catuꞌ jix smitxꞌon jun naj chi ijon Gayo ebꞌ yetoj jun naj chi ijon Aristarco. A Macedonia ebꞌ scawanil. Yetbꞌi naj Pablo ebꞌ yet jix apni ebꞌ bꞌey Éfeso tuꞌ, catuꞌ jix jechletoj ebꞌ scawanil yu conobꞌ bꞌey jun na bꞌey chi bꞌet ánima matzꞌloj. 30Jix yoche Pablo jix too yal tet ebꞌ ánima tuꞌ, ma pax chaꞌletoj yu ebꞌ creyente. 31Ey jaywan ebꞌ yaaw bꞌey Asia tuꞌ, yamigo sbꞌa yetoj Pablo. Jix bꞌet yakꞌ al-le ebꞌ tet Pablo tuꞌ, tol manche to xꞌoxel sbꞌa tet ebꞌ ánima tuꞌ. 32Txꞌoj txꞌoj xacꞌal tzet jix yal ebꞌ ánima yaman oc tuꞌ, yutol somchanajtoj snaꞌbꞌal ebꞌ. Ecꞌbꞌan snan ebꞌ man yotaj oj tzet yuxan yaman ecꞌoj. 33Ey pax jun naj chi yij Alejandro. Jix tenle eltej naj sattaj conobꞌ yu ebꞌ yet Israelal. Jix al-le tet naj tzet yuxan yaman ecꞌ ánima, catuꞌ jix yakꞌon yechel yetoj skꞌabꞌ tet ánima yet watxꞌ chi tzꞌini ebꞌ. Yutol jix yoche naj jix yal sbꞌa yetoj ebꞌ yet Israelal. 34Jaꞌ yet jix yilon ebꞌ ánima tuꞌ tol Israel naj, caw jix a yaw ebꞌ masanil. Ey mi caabꞌoj hora jix a yaw ebꞌ yalon jaxca tiꞌ:

—Caw miman yeloc apnoj ix cu diosal Diana, jaon a Éfeso jon tiꞌ, ẍi ebꞌ.

35Jaꞌ naj sat tzꞌibꞌlom yeoc yul conobꞌ tuꞌ, jix monten ebꞌ yin cꞌuancꞌulal, yet watxꞌ chi tzꞌini ey ebꞌ, catuꞌ jix yalon naj tet ebꞌ jaxca tiꞌ:

—Jex wet conobꞌ, masanil ánima otajneni, tol jaon a Éfeso jon tiꞌ, jaon eyoc kibꞌan cu teynen sna ix cu diosal Diana tol miman yeloc apnoj, yetoj jun yechel ix Diana tuꞌ titnaj satcan.#19:35 Jaꞌ jun sdiosal ebꞌ tiꞌ, chi yij sbꞌi Diana tuꞌ, jaꞌ ebꞌ chi aloni, tol tucꞌal jix tit satcan. Cꞌam mac jix waꞌneni, cꞌam pax mac jix manoni, yuxan “caw miman yeloc apnoj cu diosal,” ẍi ebꞌ. 36Cꞌam junoj mac chi skeꞌ yaloni tol lekꞌtiꞌal wan chi wal tiꞌ an. Yuxan, tzꞌinwej je chi. Naꞌwej sicꞌlebꞌil, yet watxꞌ cꞌam ojabꞌ junoj tzetyetal comon cꞌal che yunne. 37Yutol jaꞌ ebꞌ naj che yiꞌtej tiꞌ, cꞌam junoj spenail chi el yunen ebꞌ naj yin cu diosal. Cꞌam ebꞌ naj chi bꞌuchwa yin ix. 38Ta chi yoche Demetrio yetoj ebꞌ yet chacꞌom chꞌenal chi yalel spenail junoj mactxequel, chi skeꞌ stoo ebꞌ sattaj yaaw, yu stoo yalon ebꞌ. 39Ta ey junojxa tzet che yoche, chi skeꞌ je yaon oc junoj yambꞌabꞌail yetoj ebꞌ yaaw, catuꞌ che waꞌnen yeoc sattaj ebꞌ. 40Yutol caw ey smey, ta chi yabꞌ ebꞌ yaaw jun chi kun titiꞌ. Ta chi skꞌanle ebꞌ ey jon jaxca tiꞌ: “¿Tzet yuxan chex a uchna je yakꞌon jowal?” ta ẍi ebꞌ, cꞌam tzet watxꞌ kalon tet ebꞌ yu cu colbꞌanil oj, ẍi naj tzꞌibꞌlom yeoc yul conobꞌ tuꞌ tet ebꞌ.

41Yet jix lawi yalon tet ebꞌ jaxca tuꞌ xin, catuꞌ jix chejle paxtoj masanil ebꞌ ánima tuꞌ bꞌey sna.

Currently Selected:

Hechos 19: knj

Highlight

Copy