Hechos 20

Jaꞌ Yet Jix Too Pablo Bꞌey Macedonia Yetoj Bꞌey Grecia

1Jaꞌ yet jix lawi jun jowal tuꞌ, catuꞌ jix yalon naj Pablo tol chi syambꞌa oc sbꞌa ebꞌ creyente yu yakꞌle can niꞌojxa snaꞌbꞌal ebꞌ. Catuꞌ jix yalon tet ebꞌ: “Jaxa jin too yul yet Macedonia tiꞌ an,” ẍi naj. 2Jaꞌ yet jix apni tituꞌ, jix ecꞌ yil masanil ebꞌ creyente bꞌey junjun conobꞌ, catuꞌ jix ecꞌ ale can oc snaꞌbꞌal ebꞌ yu naj. Catuꞌ jix too bꞌey Grecia. 3Oxebꞌ xꞌaaw jix eecꞌ tituꞌ. Chi yoche chi oc yul barco catuꞌ chi too bꞌey Siria. Jaxa yet jix yabꞌeni, tol ey ebꞌ Israel chi yoche chi mitxꞌoni, yuxan jix snaꞌ tol yel watxꞌ chi meltzo pax bꞌey Macedonia junelxa. 4Jaꞌ yet jix too tuꞌ, ey wan ebꞌ creyente jix too yetoj. Jix too naj Sópatro a Berea, jix too naj Aristarco, jix too naj Segundo a Tesalónica, yetoj naj Gayo a Derbe, cꞌal naj Timoteo. Ey pax cawan ebꞌ a Asia jix too yetoj, naj Tíquico yetoj naj Trófimo. 5Jaꞌ yet jix apni ebꞌ bꞌey conobꞌ Filipos, jix can Pablo yu ebꞌ tituꞌ. Catuꞌ jix bꞌabꞌitoj ebꞌ bꞌey conobꞌ Tróade. Jaꞌ tituꞌ jix cu yechbꞌane ebꞌ. 6Jal jaon tiꞌ xin, jaꞌ bꞌey conobꞌ Filipos jix kechbꞌane kilon jun kꞌin, yet chi loꞌle ixim pan cꞌam yich. Yet jix lawi cꞌal ecꞌ jun kꞌin tuꞌ, catuꞌ jix cu too yul barco. Joebꞌ cꞌu jix cu bꞌey yibꞌan jaꞌ mar. Catuꞌ jix cu apni bꞌey conobꞌ Tróade. Jaꞌ tituꞌ jix kil-le cu bꞌa yetoj ebꞌ jix bꞌabꞌitoj cu sattaj tuꞌ. Jujebꞌ cꞌu jix cu ecꞌ tituꞌ.

Jaꞌ Yet Eyecꞌ Pablo Bꞌey Conobꞌ Troas

7Jaꞌ yet Domingo, jix cu yambꞌa cu bꞌa yetoj ebꞌ creyente masanil. Catuꞌ jix cu loꞌon ixim pan, snaꞌbꞌaniltej Naj Kaawil. Jaꞌ Pablo jix akꞌon cuybꞌanile tet ebꞌ creyente. Tuxa chi toi, yuxan caw ey tzet jix yal can tet ebꞌ, masantaꞌcꞌal jix oc chuman akꞌbꞌal. 8Jaꞌ yul jun cuarto yibꞌan, jatuꞌ jix syambꞌa sbꞌa ebꞌ. Ecꞌal tzejtebꞌal jix yaoc ebꞌ. 9Ey jun naj achꞌe chi yij Eutico. Chotan eltoj naj stiꞌ wentana. Chi noxi ey naj sweyi, yutol miman jix yute yajan cuybꞌanile naj Pablo. Jix tit xacꞌal weyan yin naj sicꞌlebꞌil, catuꞌ jix tit pitxna naj tuꞌ. Jaꞌ bꞌey yet yox xijan bꞌey jix titqꞌuey naj. Camnajxa naj yet jix sicꞌle aoj. 10Jaꞌ yet jix apni Pablo xin, catuꞌ jix ey motzꞌan naj, catuꞌ jix lacle a naj yu. Jix yalon tet ebꞌ creyente jaxca tiꞌ:

—Manche jex xiwi, iquisto naj, ẍi naj tet ebꞌ.

11Catuꞌ jix cu atoj yul cuarto tuꞌ yetoj naj Pablo junelxa. Jix spoꞌon ecꞌ ixim pan cu xol. Catuꞌ jix cu loꞌon ixim. Ecꞌal tocꞌal tzet jix yal Pablo tuꞌ, masantaꞌcꞌal jix sajbꞌi eloj. Catuꞌ jix toi. 12Jaꞌ naj achꞌe jix pitzcꞌu a tuꞌ xin, jix iꞌletoj yu ebꞌ bꞌey sna. Caw chi tzala ebꞌ yutol iquis naj.

Jaꞌ Yet Jix Tit Ebꞌ Bꞌey Troas Catuꞌ Jix Too Ebꞌ Bꞌey Mileto

13Jaon tiꞌ, jix cu oc yul barco, catuꞌ jix cu too bꞌey conobꞌ Aso. Jatuꞌ jix kechbꞌane yapni Pablo jaxca jix yute yalon ey jon. Yutol yetoj yajan naj jix toi. 14Jaꞌ yet jix apni Pablo cu cꞌatan bꞌey conobꞌ Aso tuꞌ, jix oc yul barco ketoj, catuꞌ jix cu too yetoj bꞌey Mitilene. 15Catuꞌ jix cu toi, jaꞌ yet junxa cꞌual jix cu ecꞌ scawilal jun txꞌotxꞌ snan jaꞌ Quío sbꞌi. Yet junxa cꞌual xin, jix cu apni bꞌey junxa txꞌotxꞌ chi yij Samos. /Jaꞌ bꞌey conobꞌ Trogilio, bꞌey stiꞌ jaꞌ mar tuꞌ, jix cu xewi./ Yet junxa cꞌual jix cu kꞌaxbꞌone, catuꞌ jix cu apni bꞌey conobꞌ Mileto. 16Catuꞌ jix cu toi, yutol ma yal scꞌul Pablo chi cu ecꞌ bꞌey conobꞌ Éfeso, yutol chi yoche yin eymanil chi cu ecꞌ bꞌey Asia tuꞌ, yet watxꞌ chi cu tzaji apnoj kilon kꞌin Pentecostés bꞌey Jerusalén.

Jaꞌ Tzet Jix Yal Can Naj Pablo Tet Ebꞌ Anciano A Éfeso

17Jaꞌ yet jix cu apni bꞌey conobꞌ Mileto, catuꞌ jix yaontoj ẍejabꞌ naj Pablo scꞌatan ebꞌ anciano a Éfeso, yu bꞌet yawteletej ebꞌ. 18Jaꞌ yet jix apni ebꞌ, catuꞌ jix yalon tet ebꞌ jaxca tiꞌ:

—Jaex tiꞌ, je yotaj xa jin bꞌeybꞌal, yet tax cꞌal jix jin julecꞌ bꞌey Asia tiꞌ. 19Ey jin cꞌal oc wakꞌon servil Naj Kaawil yin eyilal tobꞌalkꞌinal. Ey bꞌey jix jin okꞌ sicꞌlebꞌil yu ebꞌ ánima. Ecꞌal el jix jin akꞌle porobꞌal yu wan tzet man watxꞌoj jix yaoc ebꞌ wet Israelal wibꞌan an. 20Je yotaj pax oj, tol ma jin bꞌej walon wan cuybꞌanile watxꞌ ey jex, tol je watxꞌilal oj chi yun yeloc apnoj. Jix wal skꞌane Dios ey jex sattaj conobꞌ, cꞌal bꞌey je na. 21Jix wal tet ebꞌ Israel an, cꞌal tet ebꞌ man Israeloj an, tol sowalil chi snaꞌ sbꞌa scꞌul ebꞌ sattaj Dios, catuꞌ chi yaon oc scꞌul ebꞌ yin Naj Kaawil Jesucristo. 22Jaꞌ tinaniꞌ, oj jin toj bꞌey Jerusalén, yutol chin iꞌletoj yu Santo Espíritu. Man wotaj oj tzet oj jul wibꞌan tituꞌ. 23Wotaj pax an, jaꞌ junjun conobꞌ bꞌey chin eqꞌui, chi yal Santo Espíritu ey jin an, tol sowalil oj jin oc preso tituꞌ, catuꞌ miman syaꞌilal oj wil an. 24Cꞌam cꞌal chin xiw pax yu wan tuꞌ. Caxcꞌal chin cam yu, cꞌam cꞌal yeloc apnoj jun camich tuꞌ yul jin sat. Asanne chi wakꞌ lawoj jun jin mulnail tiꞌ yin tzalacꞌulal. Catuꞌ chi lawi wopiso yakꞌnaj can Naj Kaawil Jesús tuꞌ ey jin an, jun opiso yin alo el skꞌaneal yet colbꞌanile yu swatxꞌcꞌulal Dios.

25Ecꞌnaj jin wal ey jex an, tzet che yunne yet chi oc Dios je Yaawiloj. Jaꞌ tinaniꞌ, wotaj an, tol cꞌamxa bꞌakꞌin oj kil-le cu bꞌa. 26Yuxan, jaꞌ tinaniꞌ, chi wal canoj, tol cꞌamxa walon wet yin junoj mactxequel. 27Yutol albꞌil masanil scuybꞌanil Dios ey jex wu an. Cꞌam junoj tzet jix webꞌa el ey jex. 28Yuxan, teynewej cꞌal je bꞌa, catuꞌ che teynen pax ebꞌ creyente masanil, yutol akꞌbꞌil je yopiso yu Santo Espíritu je yilon yiglesia Naj Kaawil. Ebꞌ jix manle yetoj ẍiqꞌuil yet jix cam ku cꞌal. 29Yutol wotaj an, tol jaꞌ yet oj jin toj, ey wan ebꞌ oj jul je cꞌatan. Oj yakꞌle ebꞌ jex yuchon sajlemoj, jaxca chi yun yujtele ecꞌ noꞌ meꞌ yu noꞌ ooj. 30Yetoj pax je xol jaex tiꞌ, ey wan ebꞌ oj txeclo aoj, catuꞌ oj yakꞌon wan lekꞌtiꞌal ebꞌ yu yakꞌle scꞌul ebꞌ creyente, yet watxꞌ chi oc ebꞌ yetoj ebꞌ. 31Yuxan, teynewej cꞌal je bꞌa. Naꞌwejtej, tol oxebꞌxa abꞌil jaxca cꞌal tiꞌ jex jin cuyon junjun jex, cꞌualil cꞌal akꞌbꞌalil. Tol ey bꞌey chin okꞌi yet chex jin cuyoni.

32Jaꞌ tinaniꞌ xin, jex wuẍtaj, chex wa can oc abꞌenal yul skꞌabꞌ Dios. Jaꞌ oj jex teynen yetoj skꞌane. Jaꞌ skꞌane tuꞌ, caw jix xꞌox swatxꞌcꞌulal ey jon, ey yipal skꞌane tuꞌ yakꞌon cu tecꞌanil, cꞌal yakꞌon cu sattaj, yutol eyxa kalon ket yetoj ebꞌ sicꞌbꞌilxa el yu. 33Jain tiꞌ, cꞌam bꞌey jix woche oc stumin junoj ánima, caxcꞌal spichil junoj ánima. 34Je yotaj, caw chin mulna yetoj jin kꞌabꞌ, yu tzet chi oc yopiso wu an, cꞌal tzet chi oc yopiso yu ebꞌ wet mulnawomal. 35Tobꞌalkꞌinal jix jin txꞌox ey jex an, tzet utbꞌil tol sowalil chi kil cu mulnail, yet watxꞌ chi skeꞌ cu colwa yin ebꞌ yaꞌey. Sowalil chi cu naꞌtej tzet yalnaj can Naj Kaawil ey jon, yet jix yalon can naj jaxca tiꞌ: “Yel watxꞌ ket yet chi cu saꞌoni yintaj pax yet chi cu chaꞌon junoj saꞌbꞌeal,” ẍi Naj, ẍi Pablo tet ebꞌ anciano tuꞌ.

36Jaꞌ yet jix lawi yalon wan tiꞌ naj Pablo, catuꞌ jix ey kaanoj. Jix txali yetoj masanil ebꞌ tuꞌ. 37Yet jix lawi xali ebꞌ yetoj Pablo xin, catuꞌ jix michꞌcha scꞌul ebꞌ yokꞌ masanil. Jix yakꞌle can scawil scꞌul yin camcꞌulalil. 38Caw jix cus ebꞌ sicꞌlebꞌil, yutol jix yal tet ebꞌ, tol cꞌamxa bꞌakꞌin oj yil-le sbꞌa ebꞌ yetoj. Jaꞌ yet jix too Pablo tuꞌ, jix bꞌet akꞌle can yu ebꞌ masantaꞌcꞌal bꞌey jix oc naj yul barco.

Currently Selected:

Hechos 20: knj

Highlight

Copy