Hechos 13

Yichbꞌanil Yopiso Bernabé Yetoj Saulo

1Jaꞌ xol ebꞌ creyente a conobꞌ Antioquía, ey wan ebꞌ chi yalel skꞌane Dios, ey pax wan ebꞌ chi cuywa xol ebꞌ creyente. Jaꞌton Bernabé, yetoj Simón, naj chi yij cꞌal pax Negro, yetoj Lucio a conobꞌ Cirene, yetoj Saulo. Jaꞌ pax jun Menahem, naj junne chꞌibꞌnaj yetoj Herodes, jaꞌ naj yaaw yeoc bꞌey Galilea tuꞌ. 2Jaꞌ yet junel, eyoc ebꞌ yin eyilal sattaj Naj Kaawil. Lalan pax yijle nocha sbꞌa ebꞌ, catuꞌ jix yalon Santo Espíritu tet ebꞌ jaxca tiꞌ:

—Che sicꞌ el Bernabé yetoj Saulo, catuꞌ oj oc ebꞌ yin mulnail bꞌey jix wawte oc ebꞌ an, ẍi tet ebꞌ.

3Catuꞌ jix yijle nocha sbꞌa ebꞌ, catuꞌ jix txali ebꞌ. Jix yaon atoj skꞌabꞌ ebꞌ yibꞌan sjolom Bernabé yetoj Saulo, catuꞌ jix chejletoj ebꞌ yu ebꞌ.

Jaꞌ Yet Jix Al-le El Skꞌane Dios Bꞌey Jun Lugar Chi Yij Chipre

4Jix chejletoj Bernabé yetoj Saulo yu Santo Espíritu, catuꞌ jix too ebꞌ bꞌey conobꞌ Seleucia. Jatuꞌ jix oc ebꞌ yul jun barco. Catuꞌ jix too bꞌey jun lugar chi yij Chipre, jaꞌ jun txꞌotxꞌ tuꞌ, snan jaꞌ mar ey canoj. 5Jaꞌ yet jix apni ebꞌ bꞌey jun conobꞌ chi yij Salamina, jix ecꞌ yalel skꞌane Dios ebꞌ yul-laj snail sculto ebꞌ yet Israelal tituꞌ. Jaꞌ naj Juan Marcos jix colwa yetoj ebꞌ. 6Jix too ebꞌ, catuꞌ jix kꞌaxbꞌon ebꞌ bꞌey jun lugar chi yij Chipre. Catuꞌ jix apni ebꞌ bꞌey conobꞌ Pafos. Jatuꞌ jix yil-le el sbꞌa ebꞌ yetoj jun naj a Israel, chi yij Barjesús. Jaꞌ jun winaj tuꞌ, chi yaloc sbꞌa tol tzꞌajan snaꞌbꞌal. Chi tzꞌaj yalaꞌ, tol jaꞌ Dios chi akꞌon yalel skꞌane. 7Jaꞌ jun winaj tuꞌ, yamigo sbꞌa yetoj naj Sergio Paulo, naj yaaw bꞌey Chipre tuꞌ. Caw jelan snaꞌbꞌal naj Sergio tuꞌ. Jix yawtetej naj Bernabé yetoj Saulo tuꞌ, yutol chi yoche naj chi yabꞌ skꞌane Dios tet ebꞌ.

8Jal pax naj chi yal tol tzꞌajan scꞌul tuꞌ xin, chi yij pax Elimas, jix steele sbꞌa yetoj ebꞌ, yutol cꞌam chi yoche naj jix yaoc scꞌul naj Sergio tuꞌ yin skꞌane Dios. 9-10Jaꞌ naj Saulo, chi yijon pax Pablo tuꞌ, caw eyoc Santo Espíritu yin naj, jix oc tꞌanan yin naj chi yal tol tzꞌajan scꞌul tuꞌ:

—Jaach tiꞌ, caw cha waoc ja naꞌbꞌal yin ja wetnen ánima. Cꞌam swatxꞌil ja naꞌbꞌal. Scꞌaal jaach diablo. Acꞌul jaach oc yin masanil tzetyetal watxꞌ. Jaꞌ skꞌane Dios yel cꞌal eloj, jal jaach, jaach tiꞌ, cha walaꞌ tol lekꞌtiꞌ skꞌane Dios. ¿Tzet yuxan cꞌam cha bꞌejcan ja wetnen ánima? 11Jaꞌ tinaniꞌ, ey tzet oj jul ja wibꞌan yu Naj Kaawil. Oj yakꞌ maji ja sat junoj tiempoal. Jaꞌ yajan cꞌu, ma xa skeꞌ ja wilon niꞌoj, ẍi Pablo tuꞌ tet naj.

Jaꞌ yet jun txolan tuꞌ, jix maji sat naj. Cꞌamxa niꞌoj tzet chi skeꞌ yiloni. Jix ecꞌ matxatxoj seyon ecꞌ junoj mactxequel chi quetzon ecꞌ tituꞌ. 12Jaꞌ yet jix yilon naj yaaw bꞌey Chipre jun tiꞌ, catuꞌ jix yaon oc scꞌul yin Dios. Caw jix qꞌueya scꞌul naj yet jix yabꞌen wan scuybꞌanil Naj Kaawil.

Pablo Yetoj Naj Bernabé bꞌey Conobꞌ Antioquía Yul Yet Pisidia

13Jix oc naj Pablo yul jun barco yetoj ebꞌ yetbꞌi naj. Catuꞌ jix el ebꞌ bꞌey conobꞌ Pafos tuꞌ, catuꞌ jix apni ebꞌ bꞌey conobꞌ Perge yul yet Panfilia. Jal naj Juan Marcos xin, jix bꞌejlecan ebꞌ yu naj, catuꞌ jix meltzotoj naj bꞌey Jerusalén. 14Catuꞌ jix too ebꞌ junelxa, jix el ebꞌ bꞌey Perge tuꞌ, catuꞌ jix too ebꞌ bꞌey junxa conobꞌ Antioquía#13:14 Ey junxa conobꞌ Antioquía yul yet Siria. Jaꞌ tituꞌ jix tit naj Pablo yetoj Bernabé. yul yet Pisidia tuꞌ. Jaꞌ yet scꞌual xewilal jix oc ebꞌ yul snail sculto ebꞌ yet Israelal, catuꞌ jix ey chotan ebꞌ yul tuꞌ. 15Yet jix lawi yawtele sley Moisés yetoj wan tzet tzꞌibꞌebꞌilcan yu ebꞌ ẍejabꞌ Dios yet peyxa, catuꞌ jix yakꞌon ebꞌ syaawil snail culto tuꞌ yal jun winaj tet Pablo cꞌal tet Bernabé jaxca tiꞌ:

—Jex wet conobꞌ, ta ey junoj tzetyetal chi yoche che yakꞌ scuy ebꞌ ánima, chi skeꞌ je yalon tinaniꞌ, ẍi naj tet ebꞌ.

16Jix a linan Pablo tuꞌ, catuꞌ jix yakꞌon yechel yetoj skꞌabꞌ yet watxꞌ chi tzꞌini ey ebꞌ. Catuꞌ jix yalon tet ebꞌ jaxca tiꞌ:

—Jex wet Israelal, cꞌal jex ey je xiwcꞌulal tet Dios, abꞌwej. 17Jaꞌ cu Diosal jaon Israel jon tiꞌ, jaꞌ sicꞌnen can el ebꞌ kichmam. Jaꞌ yet eyecꞌ ebꞌ snan xol ebꞌ txꞌoj conobꞌal bꞌey Egipto, jaꞌ jix akꞌon chꞌibꞌ sbꞌisil ebꞌ catuꞌ jix oc can ebꞌ yin mimej conobꞌal. Catuꞌ jix iꞌle eltej ebꞌ bꞌey Egipto tuꞌ yetoj yipal. 18Cawinaj abꞌil ecꞌnaj ebꞌ bꞌey jun cusiltaj txꞌotxꞌ. Catuꞌ jix akꞌle cꞌal techa sbꞌeybꞌal ebꞌ yu Dios tituꞌ.

19Yetoj pax oj, jix yakꞌ qꞌueyle el jujebꞌ conobꞌal ánima ebꞌ yu Dios yul yet jun lugar chi yij Canaán, catuꞌ jix akꞌle can xꞌotxꞌ ebꞌ jix qꞌueyle el tuꞌ tet ebꞌ kichmam. 20Catuꞌ jix ale oc yopiso wan ebꞌ yu Dios yin juezal, yu yakꞌon cuenta ebꞌ. Eyxam 450 abꞌil jix ecꞌtoj yibꞌan ebꞌ, masantaꞌcꞌal yet jix oc naj Samuel ẍejabꞌoj Dios. 21Jatuꞌ jix skꞌanon junoj sreyal ebꞌ tet Dios, yet watxꞌ, jaꞌ chi akꞌon cuenta ebꞌ. Yuxan jix akꞌle naj Saúl sreyaloj ebꞌ yu Dios. Jaꞌ naj Saúl tuꞌ, scꞌaal jun naj chi ijon Quis, yicꞌaal Benjamín. Cawinaj abꞌil ocnaj sreyaloj ebꞌ, 22catuꞌ jix iꞌle el yin yopiso yu Dios. Jaꞌ naj David jix oc can sqꞌuexeloj, naj bꞌey yalnajtej Dios tuꞌ jaxca tiꞌ: “Jix ilcha naj David wu an, naj scꞌaal Jesé. Jaꞌ jun winaj tiꞌ, caw chin tzala yetoj an. Oj yun masanil tzet chi yoche jin cꞌul yu naj an,” ẍi Dios. 23Ey jun yicꞌaal David tuꞌ chi yij Jesús, jaꞌ Akꞌbꞌil Yopiso cu Colomaloj, jaon Israel jon tiꞌ yu Dios, jaxca cꞌaltaꞌ jix yun yakꞌon can stiꞌ. 24Jaꞌ yet cꞌamto chi ẍaꞌel yich smulnail tuꞌ, catuꞌ jix yalon el naj Juan snan xol ebꞌ ket Israelal, tol sowalil chi snaꞌ sbꞌa ebꞌ, catuꞌ chi yakꞌon bautizar sbꞌa ebꞌ. 25Jaꞌ yet lalanxa yapni stiempoal yet chi lawi yopiso naj Juan tuꞌ, catuꞌ jix yalon jaxca tiꞌ: “Jaꞌ je naꞌoni tol Cristo* jin an, tol cꞌamaj pax oj. Ey pax jun mac tzajan sjul wintaj an, tol miman yeloc apnoj. Tol man jin moo oj woc yakꞌomaloj servil jun mactxequel tuꞌ, caxcꞌal yin jin tion el xanabꞌ, tutun man jin moo oj,” ẍi naj Juan.

26Jex wuẍtaj, jex wanabꞌ, jex yicꞌaal naj Abraham wetoj an, cꞌal jex ey je xiwcꞌulal tet Dios, jaꞌ jun skꞌaneal yet colbꞌanile tiꞌ, je yet ye wetoj an. 27Jal pax ebꞌ a Jerusalén, yetoj ebꞌ yaawil ebꞌ, cꞌam chi naꞌcha el yu ebꞌ, ta tol cu Colomal yeoc Jesús tuꞌ. Junjun cꞌal scꞌual xewilal, jix yabꞌen ebꞌ skꞌaneal tzet tzꞌibꞌebꞌilcan yu ebꞌ ẍejabꞌ Dios, ma cꞌal naꞌcha el yu ebꞌ. Yuxan, jaꞌ yet jix yaon oc camich ebꞌ yibꞌan Jesús, jix yakꞌon yun ebꞌ tzet tzꞌibꞌebꞌilcan tuꞌ. 28Cꞌam niꞌoj spenail jix ilcha el yin naj yu ebꞌ, yuxan man smoo oj jix akꞌle cam yu ebꞌ. Jix cꞌal oc ian skꞌanon ebꞌ tet Pilato tol chi cami. 29Jaꞌ yet jix yun ebꞌ masanil jaxca tzꞌibꞌebꞌil yul An Juun Tzꞌibꞌebꞌilcanoj, catuꞌ jix yiꞌon eytej smimanil ebꞌ yin culus, catuꞌ jix bꞌet smajchen can octoj ebꞌ yul jun chꞌen chꞌen. 30Jix akꞌle cꞌal pitzcꞌu a yu Dios xol ebꞌ camnaj. 31Ecꞌal tocꞌal cꞌual jix ecꞌ yetoj ebꞌ scuywom. Jaꞌ ebꞌ jix tit yetoj bꞌey Galilea catuꞌ jix apni ebꞌ yetoj bꞌey Jerusalén yet cꞌamto chi cami. Jaꞌ ebꞌ tuꞌ, lalan yalon el skꞌaneal ebꞌ snan xol ánima tinaniꞌ.

32Quey jon pax tuꞌ, jaon tiꞌ, lalan kalon el jun watxꞌ kꞌane tuꞌ ey jex, tol jaꞌ Dios yakꞌnaj can stiꞌ tet ebꞌ kichmam. 33Yakꞌnaj pax can stiꞌ ey jon, yutol yicꞌaal jon ebꞌ kichmam tuꞌ. Jaꞌ yet jix pitzcꞌu a Jesús, catuꞌ jix yunen el tzet yalnaj can tuꞌ. Jaxca tzꞌibꞌebꞌilcan bꞌey Scaabꞌ Salmos, chi yal jaxca tiꞌ: “Jaach tiꞌ, jin Cꞌaal jaach an. Jaꞌ yet jun cꞌu tiꞌ jix wakꞌ ja kꞌinal an,” ẍi Dios yul An Juun tuꞌ.#Salmos 2:7. 34Yalnaj pax can Dios yin spitzcꞌubꞌail Jesús tuꞌ xol ebꞌ camnaj, yet watxꞌ cꞌam chi kꞌaꞌtoj smimanil. Yalnaj can yul An Juun tuꞌ jaxca tiꞌ: “Oj wakꞌ wan jin watxꞌ tzetyetal ey jex, wan bꞌey jix wakꞌcan jin tiꞌ tet naj David an,” ẍi yul An Juun.#Isaías 55:3. 35Yuxan, yin eyojto jix yalon can skꞌaneal Cristo* naj David yul junxa Salmo, bꞌey chi yal jaxca tiꞌ: “Mamin, man oj ja chaꞌ kꞌaꞌtoj jin mimanil an, jain camcꞌulnebꞌil jin ja wu tiꞌ an,” ẍi yul junxa Salmo tuꞌ.#Salmos 16:10. 36Jaꞌ wan tiꞌ, cꞌam chi yal yin naj David, yutol jaꞌ naj David tuꞌ, akꞌbꞌil servil ebꞌ ánima yu naj yul stiempoal jaxca chi yoche scꞌul Dios. Jix lawi cꞌal tuꞌ catuꞌ jix cami, catuꞌ jix mujle bꞌey mujan ebꞌ yichmam. Jaꞌ smimanil naj tuꞌ, jix kꞌaꞌtoj. 37Jal pax jun jix spitzcꞌune a Dios xol ebꞌ camnaj tuꞌ xin, ma kꞌaꞌtoj smimanil. 38Yuxan chi woche che yotajne eloj, tol asan Jesús chi skeꞌ yu yakꞌon lawoj cu penail. Yu tzet jix yun Jesús, yuxan jix tit jun kꞌane tiꞌ ey jex. 39Jaꞌ sley Moisés, cꞌam chi skeꞌ cu swaꞌnen oc yin watxꞌil yul sat Dios. Jal pax mac chi yaoc scꞌul yin Jesucristo, watxꞌ ebꞌ yul sat Dios. 40Yuxan, ilwej cꞌal je bꞌa. Ta cꞌamaj, oj jul tzet tzꞌibꞌebꞌilcan yu ebꞌ ẍejabꞌ Dios je yibꞌan, yutol chi yal jaxca tiꞌ:

41Jex bꞌuchwawom, ilaꞌla, qꞌuey ojabꞌ a je cꞌul je yiloni, catuꞌ chex cami.

Yutol jain Dios jin tiꞌ an, ey tzet oj el wunen yul je tiempoal tiꞌ an.

Caxcꞌal ey mac oj alon ey jex, ma je chaꞌ pax je yabꞌe, ẍi Dios tuꞌ yul An Juun tuꞌ.#Habacuc 1:5. Queytuꞌ jix yute yalon naj Pablo tet ebꞌ.

42Jaꞌ yet lalan yeltej Pablo yetoj ebꞌ yetbꞌi yul snail sculto ebꞌ Israel tuꞌ, ey ebꞌ man Israeloj jix oc wal tean tet ebꞌ, tol chi cuywa ebꞌ junelxa tet ebꞌ yet junxa scꞌual xewilal. 43Jaꞌ yet jix lawi culto xin, ecꞌal ebꞌ Israel jix oc yetoj Pablo cꞌal Bernabé. Ey pax ebꞌ ocnaj yin scuybꞌanil ebꞌ Israel tuꞌ jix too pax ebꞌ yetoj ebꞌ. Yuxan jix iptzele ebꞌ yu Pablo cꞌal yu Bernabé, tol tecꞌan cꞌal chi yute yaon oc scꞌul ebꞌ yin scamcꞌulal Dios.

44Jaꞌ yet junxa scꞌual xewilal xin, txenxane ma yamcha oc masanil ebꞌ conobꞌ, yu yabꞌen skꞌane Dios ebꞌ. 45Jaxa yet jix yilon ebꞌ Israel jaxca tuꞌ, tol ecꞌal ebꞌ ánima jix syambꞌa sbꞌa, jix chichon oc scꞌul ebꞌ yin naj Pablo tuꞌ. Jix cꞌoli yalon ebꞌ tol lekꞌtiꞌal jun tuꞌ, catuꞌ jix bꞌuchwa ebꞌ yin. 46Jal pax naj Pablo yetoj Bernabé xin, tol jix stecꞌbꞌa sbꞌa ebꞌ, catuꞌ jix yalon ebꞌ jaxca tiꞌ:

—Sowalil oj bꞌabꞌoj kalon el skꞌane Dios ey jex jaex ket Israelal jex tiꞌ. Ilaꞌ tol cꞌam pax che yaoc yin je cꞌul. Tejan che naꞌ tol man je moo oj je chaꞌon je kꞌinal tol ey cꞌal yin tobꞌalkꞌinal. Yuxan, jaꞌ tinaniꞌ xin, chi cu too xol ebꞌ man Israeloj, catuꞌ oj kalon skꞌane Dios tet ebꞌ. 47Yutol queytuꞌ jix yute yalon can Naj Kaawil ey jon jaxca tiꞌ:

Jix waoc ja wopiso yu ja woc jin tzejtebꞌal oj an tet ebꞌ man Israeloj,

yet watxꞌ ey ebꞌ chi colcha bꞌey junjun lugar, masantaꞌcꞌal bꞌey chi lawi apnoj yul yibꞌankꞌinal tiꞌ, ẍi Naj Kaawil tuꞌ, ẍi ebꞌ.#Isaías 49:6.

48Jal ebꞌ man Israeloj xin, caw jix tzala a ebꞌ yabꞌen wan tiꞌ. Jix cꞌoli yalon ebꞌ, tol caw watxꞌ skꞌane Naj Kaawil. Jaꞌ ebꞌ sicꞌbꞌil xacꞌaltaꞌ el yu Dios yu ẍaꞌon skꞌinal tol ey cꞌal yin tobꞌalkꞌinal xin, jix yaoc scꞌul ebꞌ yin. 49Jaxca cꞌal tuꞌ jix yun sajlemtoj skꞌane Naj Kaawil bꞌey jun lugar tuꞌ masanil. 50Jal ebꞌ Israel jix akꞌon scꞌul ebꞌ yaaw bꞌey jun conobꞌ tuꞌ, cꞌal wan ebꞌ ix ix eyoc scꞌul yin Dios catuꞌ miman yeloc apnoj yul sat ánima, jix akꞌle scꞌul ebꞌ masanil yu ebꞌ. Catuꞌ jix cꞌoli yakꞌon penacꞌulal ebꞌ yin naj Pablo tuꞌ, cꞌal yin naj Bernabé tuꞌ. Catuꞌ jix ujtele el ebꞌ yu ebꞌ bꞌey jun lugar tuꞌ. 51Catuꞌ jix stzicon can el spojojal yajan Pablo cꞌal Bernabé yu xꞌoxon el ebꞌ, tol cꞌamxa yalon yet ebꞌ yin ebꞌ ánima tuꞌ. Catuꞌ jix too ebꞌ bꞌey conobꞌ Iconio. 52Jal ebꞌ creyente a Antioquía tuꞌ xin, caw chi tzala ebꞌ, caw ey pax oc Santo Espíritu yin ebꞌ.

Currently Selected:

Hechos 13: knj

Highlight

Copy