Hechos 14

Pablo Yetoj Bernabé Bꞌey Conobꞌ Iconio

1Jaꞌ yet jix apni Pablo yetoj Bernabé bꞌey conobꞌ Iconio, jix octoj ebꞌ scawanil yul snail sculto ebꞌ Israel. Caw watxꞌ jix yute yalon el skꞌane Dios ebꞌ tituꞌ. Yuxan, ecꞌal ebꞌ Israel jix yaoc yin scꞌul, cꞌal ebꞌ man Israeloj. 2Jal pax ebꞌ Israel tol ma yaoc scꞌul yin xin, jix akꞌle scꞌul wan ebꞌ man Israeloj yu ebꞌ, yet watxꞌ chi oc ebꞌ acꞌulal yin ebꞌ creyente tuꞌ. 3Miman cꞌal tiempo jix ee ecꞌ Pablo cꞌal Bernabé yetoj ebꞌ bꞌey jun conobꞌ tuꞌ. Caw tecꞌan jix yute sbꞌa ebꞌ yalon eloj, yutol jix yaoc Naj Kaawil ebꞌ yipoj scꞌul. Jix oc Naj Kaawil yetoj ebꞌ yet jix yalon el skꞌaneal swatxꞌcꞌulal naj ebꞌ, yet watxꞌ chi txeclo eloj tol yel chi yal ebꞌ, catuꞌ jix akꞌle pax yipal ebꞌ yu naj, yet watxꞌ chi skeꞌ xꞌoxon milagro ebꞌ. 4Jal ebꞌ ánima bꞌey jun conobꞌ tuꞌ, caabꞌ poꞌoan jix eloc ebꞌ. Ey ebꞌ jix oc yetoj ebꞌ Israel, catuꞌ ey pax ebꞌ jix oc yetoj ebꞌ ẍejabꞌ Jesús tuꞌ. 5Jix syambꞌa sbꞌa ebꞌ Israel yetoj ebꞌ man Israeloj, yetoj ebꞌ syaawil conobꞌ. Catuꞌ jix snaꞌon ebꞌ tol oj yetne Pablo cꞌal Bernabé ebꞌ tuꞌ. Catuꞌ oj skꞌojchꞌenen cam ebꞌ, snaꞌoni. 6Jaꞌ yet jix yabꞌen skꞌumal ebꞌ tzet chi laatiꞌnele yin ebꞌ tuꞌ xin, jix el ebꞌ. Jix apni ebꞌ bꞌey conobꞌ Listra cꞌal bꞌey conobꞌ Derbe yul yet Licaonia. Jix ecꞌ ebꞌ bꞌey wan conobꞌlaj scawilal jun lugar tuꞌ. 7Catuꞌ jix ecꞌ yalon can el skꞌaneal yet colbꞌanile ebꞌ.

Jaꞌ Yet Jix Kꞌojchꞌennele Pablo Bꞌey Conobꞌ Listra

8Jaꞌ bꞌey conobꞌ Listra tuꞌ, ey jun winaj cꞌam chi skeꞌ sbꞌey yin tax cꞌal yalubꞌal. Cꞌam cꞌaltaꞌ bꞌey chi bꞌey niꞌoj naj. Jaꞌ yet junel, chotan ey naj yabꞌen tzet chi yal naj Pablo. 9Jix oc tꞌanan Pablo tuꞌ yin naj. Jix yiloni tol chi yaoc naj yin scꞌul, tzet utbꞌil tol chi skeꞌ swaꞌxi can naj yu Dios. 10Yuxan jix yal Pablo tet naj yin ipal jaxca tiꞌ:

—Aan linanoj, tool cha wute a linan ja bꞌa, ẍi Pablo tet naj.

Jaꞌ yet jun txolan tuꞌ, jix a jucna naj, catuꞌ jix bꞌeya naj. 11Jaꞌ yet jix yilon ebꞌ ánima tzet jix el yunen Pablo tuꞌ xin, jix a yaw ebꞌ yin ipal, catuꞌ jix yalon ebꞌ yin stiꞌ ebꞌ a Licaonia tuꞌ jaxca tiꞌ:

—Jaꞌ cawan cu diosal tiꞌ, jix yute sbꞌa ebꞌ animail, catuꞌ jix eyol ebꞌ cu xol. 12Jaꞌ Bernabé tiꞌ, jaꞌton cu diosal Zeus. Jaꞌ Pablo tiꞌ, jaꞌton cu diosal Hermes,#14:12 Zeus sbꞌi syaawil masanil sdiosal ebꞌ a Grecia yin stiꞌ ebꞌ, catuꞌ Hermes sbꞌi ẍejabꞌ sdiosal ebꞌ tuꞌ yalaꞌ. yutol jaꞌ jix kꞌanabꞌ el cu nan cu xol, ẍi ebꞌ.

13Ey jun winaj yakꞌomal xaambꞌal ebꞌ ánima tuꞌ tet Zeus, yaaw yeoc naj bꞌey stemplo Zeus stiꞌel conobꞌ. Jix bꞌet yiꞌtej wan noꞌ achꞌe wacax, cꞌal wan xumac teꞌ. Chi yoche naj yetoj masanil ebꞌ ánima tol chi yakꞌ xaambꞌal ebꞌ tet Pablo cꞌal tet Bernabé tuꞌ. 14Jaxa yet jix yabꞌen Bernabé yetoj Pablo tuꞌ, jix snicꞌ el spichil ebꞌ.#14:14 Chi snicꞌtoj spichil ebꞌ yet chi xꞌoxon syaꞌilal ma scusilal ebꞌ. Jaxca tiꞌ jix yute sbꞌa ebꞌ tituꞌ, yutol jix yabꞌ ebꞌ tol chi snaꞌ ebꞌ ánima, tol dios ebꞌ cawan tuꞌ. Jix yalon ebꞌ yin ipal snan xol ánima jaxca tiꞌ:

15—Jex wuẍtaj, ¿tzet yuxan queytuꞌ che yute je bꞌa? Jaon tiꞌ, ánima jon cꞌal jaxca jaex tiꞌ. Yuxan chi kal ey jex, bꞌejwej can je yunen wan tiꞌ, yutol caw naꞌbꞌacꞌal che yetne je bꞌa. Qꞌuexwej je bꞌeybꞌal, catuꞌ che yaon oc je naꞌbꞌal yin Dios iquis. Jaꞌ jix waꞌnen satcan, cꞌal sat txꞌotxꞌ tiꞌ, jaꞌ mar yetoj masanil tzetyetal ey. 16Jaꞌ yet peyxa jix akꞌle permiso yu Dios yu yunen ánima jaxca chi yoche scꞌul ebꞌ. Catuꞌ junjun cꞌal ebꞌ jix yun jatacꞌalaꞌ tzet chi yoche chi yun ebꞌ. 17Yin cꞌal tobꞌalkꞌinal chi yakꞌ sbꞌa Dios yotajne el ebꞌ tol ey Dios yu wan tzetyetal watxꞌ chi el yuneni. Jaꞌ chi akꞌon nabꞌ kibꞌan, yuxan chi skeꞌ masanil tzet chi kawaꞌ. Jaꞌ chi akꞌon masanil tzet chi cu loꞌ. Chi yakꞌon pax cu tzalacꞌulal, ẍi ebꞌ.

18Jaꞌ yet jix lawi yalon naj Pablo yetoj Bernabé wan tuꞌ, ian ma xa tencha oc tucan ebꞌ ánima tuꞌ yu ebꞌ. Yutol snaꞌbꞌal ebꞌ yakꞌon cam noꞌ wacax tuꞌ, catuꞌ chi yakꞌon ebꞌ yin xaambꞌalil tet ebꞌ. 19Ey jaywan ebꞌ Israel a Antioquía jix apni, cꞌal jaywan ebꞌ a Iconio. Catuꞌ jix cꞌoli yakꞌle scꞌul ebꞌ ánima tuꞌ. Yuxan, jix skꞌojchꞌene Pablo ebꞌ tuꞌ. Jaꞌ jix yute snaꞌon ebꞌ tol camnajxa, yuxan jix bꞌet jutxle can el naj yu ebꞌ stiꞌel conobꞌ. 20Jal ebꞌ creyente jix bꞌet oc joyan yin, catuꞌ jix a linan naj, catuꞌ jix oc naj Pablo yul conobꞌ junelxa. Jaꞌ yet junxa cꞌual, catuꞌ jix too Pablo yetoj Bernabé bꞌey conobꞌ Derbe.

21Jix yalel skꞌaneal yet colbꞌanile ebꞌ tituꞌ. Ecꞌal ánima jix yaoc scꞌul yin Naj Kaawil yu ebꞌ. Catuꞌ jix too ebꞌ, jix ecꞌ ebꞌ junelxa bꞌey conobꞌ Listra, yetoj bꞌey Iconio, cꞌal bꞌey Antioquía. 22Jix ecꞌ ale oc snaꞌbꞌal ebꞌ yu ebꞌ, catuꞌ jix yalon can ebꞌ tet ebꞌ jaxca tiꞌ:

—Caw tecꞌan che yute je naꞌbꞌal yin Naj Kaawil. Yutol miman syaꞌilal oj jul kibꞌan yet cꞌamto chi oc Dios yin Yaawiloj, ẍi ebꞌ.

23Jaꞌ yet jix ecꞌ Pablo yetoj Bernabé bꞌey junjun iglesia, jix ya can oc yopiso ebꞌ, ebꞌ chi oc ancianoal. Jix txali ebꞌ yu ebꞌ tet Dios, catuꞌ jix yijle nocha sbꞌa ebꞌ. Catuꞌ jix ale oc ebꞌ creyente yul skꞌabꞌ Naj Kaawil yu ebꞌ, Naj bꞌey eyoc scꞌul ebꞌ naj tuꞌ.

Jix Apni Pablo Yetoj Bernabé Bꞌey Antioquía Yul Yet Siria Junelxa

24Jix ecꞌ el Pablo yetoj Bernabé bꞌey jun lugar chi yij Pisidia, catuꞌ jix apni ebꞌ bꞌey jun lugar chi yij Panfilia. 25Jix yalel skꞌane Dios ebꞌ bꞌey conobꞌ Perge. Catuꞌ jix too ebꞌ, jix apni ebꞌ bꞌey conobꞌ Atalía. 26Jatuꞌ jix oc ebꞌ yul jun barco, catuꞌ jix too ebꞌ bꞌey conobꞌ Antioquía junelxa. Jun conobꞌ bꞌey skꞌannajtej swatxꞌcꞌulal Dios ebꞌ creyente yibꞌan Pablo yetoj Bernabé tuꞌ, yet jix too ebꞌ yalon el skꞌane Dios. 27Jaꞌ yet jix apni ebꞌ, catuꞌ jix yambꞌale oc ebꞌ creyente a lugar tuꞌ yu ebꞌ. Catuꞌ jix yalon ebꞌ tet ebꞌ jantaj tzet jix el swaꞌnen Dios yetoj ebꞌ. Catuꞌ jix yalon pax ebꞌ, tol jix ẍaꞌ Naj Kaawil ebꞌ man Israeloj, ebꞌ jix yaoc scꞌul yin. 28Miman tiempo eyecꞌ Pablo cꞌal Bernabé tituꞌ yetoj ebꞌ creyente bꞌey jun lugar tuꞌ.

Currently Selected:

Hechos 14: knj

Highlight

Copy