Sandane 3
3
Fe kolonna tɔnɔna
1N ma diina,
i nama ɲinan n ma xaranna xɔn,
i xa n ma yamarine suxu,
2amasɔtɔ e i ya siimayaan xɔnkuyama ayi nɛn,
i ya bɔɲɛ xunbeli ɲɛɛne yi fari sa.
3Hinanna nun lannayaan nama ɲan i yi,
e bira i kɔɛ ɲɛrɛn na,
i e sa i bɔɲɛni.
4Nayi, i marafanna nun xili faɲin sɔtɔma nɛn,
Ala nun muxune ra.
5I yigin sa Alatala yi i bɔɲɛn ma feu!
I nama la i ya xaxilimayaan na.
6I xa Ala kolon i ya feene birin yi,
a tan yi i ya kirane matinxin.
7I nama i yɛtɛ yatɛ fe kolonna ra.
Gaxu Alatala yɛɛ ra,
i masiga fe ɲaxin na.
8Na findima nɛn kɛndɛyaan na i fatini,
a yi i xɔnne sɛnbɛ so.
9Alatala binya i yii seene ra
e nun i ya bogi se xabaxi singene.
10Nayi, i ya sagane rafema nɛn kenken,
i ya kundine yi rafe manpaan nɛnɛn na
han e bɔxɔn a ma.
11N ma diina,
Alatala nɛma i xurɛ,
i nama yo na ma.
A nɛma i sɔnna yitɛ i ra,
i nama xɔlɔ.
12Amasɔtɔ Alatala a xanuntenne xuruma,
alo dii fafan nafan dii xɛmɛna.
13Sɛwan na kanna xa,
naxan na fekolonna sɔtɔ,
naxan na famunna sɔtɔ.
14Amasɔtɔ a tɔnɔn gbo
dangu gbetin na,
a seen naxanye sɔtɔma,
ne fisa xɛmaan xa.
15A fan dangu bɔxɔ bun nafunla ra,
i waxɔn se yo mi nɔɛ sɛ a ma.
16A siimaya xɔnkuyen fima muxun ma,
a nafunla nun binyen fi a ma.
17A kirane birin fan,
bɔɲɛ xunbenla nan ne ra.
18Naxanye fekolonna fenma
a findixi siimaya wudin nan na ne xa.
Naxanye a sɔtɔma,
sɛwan ne xa.
19Alatala bɔxɔn nafalaxi fe kolonna nan xɔn,
a famun yi kuyen da,
20tilinne rabixi a kolonna nan ma,
kundane yi xiila rafa.
21N ma diina,
xaxilimayaan namara,
i feene yɛ fen,
i lu na fari waxatin birin.
22Na findima nɛn siimayaan na i niin xa,
a lu alo ɲɛrɛna i kɔɛ.
23Nayi, i sigan tima nɛn xaxili sani i ya kiraan xɔn,
i mi i sanna radinɲɛ sese ra.
24I na i sa, i mi gaxuɛ.
I nɛma saxi, i ya xixɔnla ɲaxunma nɛn.
25I nama gaxu fe magaxuxi yo yɛɛ ra
naxan fɛ sanɲa ma kedenni,
hanma gbalon naxan muxu ɲaxine sɔtɔma,
26amasɔtɔ Alatala findima nɛn i ya xaxili ragidin na.
A i sanne ratanga luti ratixine birin ma.
27I nama tondi fe faɲin nabɛ muxune xa,
naxanye daxa e a sɔtɔ,
xa fɛrɛna i xa.
28Xa sena i yii iki,
i nama a fala i adamadi boden xa,
i naxa, “Siga, tila i fa,
n na a soma i yii!”
29I nama fe ɲaxini tɔn i adamadi boden xili ma,
a nɛma dɔxi i fɛma lannayani.
30I nama muxun kansun
xa yo mi i xa,
a mi fe ɲaxi ligaxi i ra.
31I nama gbalotɔɔn maxɔxɔlɔn,
i nama a kira yo sugandi.
32Amasɔtɔ muxu ɲaxin mi rafan Alatala ma,
koni Alaa wundo feene muxu faɲine nan xa.
33Alatala dangan muxu ɲaxina denbayaan fɔxɔ ra,
koni a barakan sama nɛn tinxin muxune konni.
34A magele ti wasoxine magelema nɛn,
koni a hinanma nɛn yɛtɛ magodone ra.
35Fekolonne binyen nan sɔtɔma e kɛɛn na,
koni xaxilitarene yagi gbeen nan sɔtɔma.
Currently Selected:
Sandane 3: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
