Iruka 5
5
Haga 5
Mateu 4.18-22; Maku 1.16-20 Piat Ewy
1Miꞌi hawyi wẽtup eꞌat pe miitꞌin sem tohik kahato raꞌyn Iesui pote yt tuwanetup kuap i Tupana ehay kape. Miꞌi pote tuweꞌysakpo mekewat yꞌy Kenesare hyemyiꞌa eꞌyẽpe kape. 2Miꞌi tote taꞌakasa typy yara mekewat ihyemyiꞌa eꞌyẽpe eꞌyi kyt rote. Maꞌato miꞌiria ti pira pytyk haria wesuki koho haria. 3Miꞌi hawyi Iesui teke raꞌyn yara pe mekewat Simau eꞌyara pe. Miꞌi hawyi toꞌe -Waku etiꞌapun poꞌog nan ihypya pe yꞌẽpe kai e. Miꞌi hawyi taꞌapyk taꞌyn yara pe hawyi toiꞌatumuꞌe kahato raꞌyn miitꞌin sem. 4Tehay kahu raꞌyn hawyi toꞌe raꞌyn Simau me -Etioto ro yara aiũpe ihyemyiꞌa ihy pya kahato hap kape hawyi waku en iꞌewyte ewyriaꞌin wywo eweipun no ehesuki pira pytyk hamo e. 5Mio tã e pote Simau tiwesat -Urumuꞌe hat urupotpap kaꞌap kahato pira kat hap ete wen maꞌato yt uruepira hin i maꞌato ewat ehay pyi uruipun kuap uruesuki e. 6Miꞌi hawyi taꞌatupun naꞌyn taꞌatuesuki yꞌy pe hawyi iꞌatu kahato raꞌyn taꞌatupytyk pira koꞌi. Porap pira tihiot iꞌatuesuki. 7Miꞌi hawyi taꞌatupo wo taꞌatukay kay taꞌatupowyro haria wẽtup yara piaria taꞌatupowyro suki enotem hamo hawyi tokokaꞌat iꞌatupowyro hamo hawyi taꞌatuhowopy ro typy yara pira koꞌi wo. Porap taꞌapyꞌat iꞌatueyara pira howopy pote. 8Miꞌi hap kape Simau Peteru taꞌakasa hawyi tuwepỹꞌãtutuk Iesui kape hawyi toꞌe -Uikaꞌiwat waku erepik uiꞌyatype pyi katupono uito areineꞌen iꞌaparap kahato hat pote e. 9Miꞌi hawyi Simau iꞌewyte iraniaꞌin iwywuat ieineꞌen haria teꞌeruwanetup kahato raꞌyn pira meremo iꞌatu kahato raꞌyn taꞌatupuẽti hap ete. 10Miꞌi hawyi Tiaku Iuwãu wyti Sepeteu saꞌyruꞌin. Miꞌiria ti Simau powyro haria tukupteꞌen. Miꞌiria ti iꞌewyte teꞌeruwanetup kahato miꞌi hap ete. Miꞌi hawyi Iesui toꞌe Simau me -Yt erekenꞌẽ teiꞌo uipupi. Mesuwe pyi ti aru ereineꞌen miitꞌin pytyk hanuaria wo raꞌyn. 11Miꞌi hawyi taꞌatuherep taꞌyn taꞌatueꞌyara koꞌi yꞌẽpeke hawyi taꞌatuꞌatoiat raꞌyn torannia hawyi tuwat raꞌyn Iesui upi.
Iesui Timoehãite Hepihi Pihi Rakat
Mateu 8.1-4; Maku 1.40-45 Piat Ewy
12Wẽtup eꞌat pe Iesui toineꞌen wẽtup tawa pe aiũpe toineꞌen wẽtup ok miit hepihi pihi toran ipiit etiat rakat. Miꞌi tehaꞌat Iesui kape hawyi porag e yi tote Iesui ewowi. Tewa puo tuwehik yi tote hawyi tohẽtup Iesui pe -Atikuap wyti uimoehãite teran pote uimoehãite kuap En e. 13Miꞌi hawyi Iesui topoha hawyi totemig hawyi toꞌe -Taꞌi woromoehãite teran uhyt e. Pyno koran ehãite raꞌyn. Mio tã e hawyi meremo hepihi tuweityk taꞌyn. 14Miꞌi hawyi Iesui toꞌe tomioehãite pe -Yt uwe pe teiꞌo ehenoi emoehãite uhepiat hap e. Maꞌato waku ereto paꞌi koro kape ewepiok hamo sio waku raꞌyn epihi tokãꞌã sese raꞌyn hap kuap hamo. Ereto hawyi waku etum ehũ Tupana motypot hamo aikotã Muisei e hap ewy.
15Maꞌato Iesui minug koꞌi wuatꞌi puo raꞌyn taꞌatukuap hawyi ikuap hawyi miitꞌin tõꞌẽ kahato raꞌyn taꞌatukuap iꞌahuu rakaria moehãite Iesui piat hap hawyi. 16Miꞌi pote Iesui toto raꞌyn yahig wato kape Tupana wywo ihay hamo.
Yt Hewyry Rakat I Iesui Timoehãite Raꞌyn
Mateu 9.1-8; Maku 2.1-12 Piat Ewy
17Wẽtup eꞌat pe Iesui tiꞌatumuꞌe iraniaꞌin woꞌomuꞌe haria iꞌewyte iraniaꞌin woꞌonapin haria. Miꞌiria tukupteꞌen yt pya hin i iꞌywyt pe. Iꞌewyte tõꞌẽ kahato iraniaꞌin tawa koꞌi yi Karireia piat kaipyi iꞌewyte yi Iuteia piat kaipyi iꞌewyte tawa Ierusarẽi kaipyi. Mekewat eꞌat pe toineꞌen kahato Tupana esaika hap Iesui ete miitꞌin moehãite hamuat. 18Miꞌi turan iraniaꞌin ihainiaꞌin terut ipy kĩꞌã rakat heꞌyni pe. Tuwehytꞌok teran netap we Iesui kape. 19Maꞌato typyꞌi kahato miitꞌin pote yt tuwehytꞌok kuap i ipykiã rakat wywo. Miꞌi pote taꞌatuereꞌam ywaipe hawyi taꞌatuhot netap kype hawyi taꞌatumaꞌapyk heꞌyni pe yi kape hawyi miitꞌin pyꞌasetpe taꞌatuporokpun. Miꞌi turan Iesui toineꞌen itote hawyi taꞌatuporokpun Iꞌywyt pe. 20Miꞌi hawyi Iesui tehaꞌat raꞌyn iꞌatuepiat tomohey hap hawyi toꞌe ipy kĩꞌã rakat pe -Koitywy eminug saꞌag tuweityk taꞌyn e. 21Mio tã toꞌe pote iraniaꞌin wanꞌi wanꞌi e haria Iꞌewyte woꞌonapin haria teꞌeroꞌe toꞌope -Uweĩ pyno meiẽ miit iꞌatuꞌe. Ihay saꞌag kahato Tupana ete iꞌatuꞌe. Yt uwe kuap i rat imohãpyk kuap aiminug saꞌag katupono Tupana yn wyti hesaika aiminug saꞌag moweityk hamo iꞌatuꞌe. 22Mio tã iꞌatuꞌe taꞌatuwanetup hawiat hap Iesui tikuap hawyi toꞌe -Kat poteĩ mio tã eweiꞌe eiwanetup hawe. 23-Kat are som pyno poꞌog yt niatpo i ipy kĩꞌã rakat pe sio eminug saꞌag wyti tuweityk taꞌyn are sio epoĩꞌam no hawyi ewyry ro are. 24Pyno atimoherep ehepe uito miitꞌin ykeꞌet areineꞌen hap. Miꞌi pote uhesaika hap toineꞌen kahato mesuwat yi tote miitꞌin minug saꞌag moweityk hamuat. Mio tã toꞌe hawyi toꞌe raꞌyn ipy kĩꞌã rakat pe -Epoĩꞌam no hawyi tiꞌokpoꞌi ro eꞌyni hawyi ereto ro eꞌyat kape. 25Mio tã e hawyi mekewat miit meremo ipoĩꞌam miitꞌin pyꞌasetpe hawyi totat raꞌyn teꞌyni hawyi toto iraꞌyn toꞌyat kape iwepiit kahato raꞌyn Tupana ete. 26Miꞌi hap kape teꞌerehaꞌat hawyi miitꞌin typyꞌi kahato rakaria teꞌeruwanetup kahato. Iꞌewyte teꞌerokenꞌẽ kahato hawyi teꞌeruwehum kahato Tupana ete hawyi teꞌeroꞌe -Emimoherep wakuap wyti mesup urutaꞌakasa raꞌyn iꞌatuꞌe.
Mateu 9.9-13; Maku 2.13-17 Piat Ewy
27Miꞌi hawyi itote pyi Iesui toto raꞌyn hawyi taꞌakasa wẽtup ok mekewat Irewi e hap kape miitꞌin kaipywiat saꞌup poreraꞌat hat kape. Miꞌi toineꞌen apyk pe aiũpe saꞌup atunug hap tote. Miꞌi pe Iesui toꞌe -Toꞌiro uhupi Irewi e. 28Mio tã e hawyi Irewi ipoĩꞌam naꞌyn hawyi totiat yne raꞌyn topotpap hawyi toto raꞌyn hupi.
Iesui Tenuk Yt Nakuaria I Wywo
Mateu 9.10-13; Maku 2.15-17 Piat Ewy
29Miꞌi hawyi Irewi tunug ienuk hap iwato kahato rakat Iesui wywuat tenuk hamo toꞌyat pe. Miꞌi turan itote typyꞌi kahato saꞌup poreraꞌat haria iꞌewyte iraniaꞌin tukupteꞌen iꞌatuwywo. 30Miꞌi pote woꞌonapin haria iꞌewyte wanꞌi wanꞌi e haria Irewi wyriaꞌin iꞌatupyꞌahak kahato Iesui emiitꞌin ete. Miꞌi haype apo iꞌatuꞌe -Kat poteĩ ewehenuk iꞌewyte eiweꞌyꞌu saꞌup poreraꞌat haria wywo neꞌi iꞌewyte iraniaꞌin yt nakuaria i wywo neꞌi iꞌatuꞌe. 31Mio tã iꞌatuꞌe pote Iesui tiꞌatuwesat -Uweꞌin ihãite rakaria ti yt ikat i mohag nug hat maꞌato iꞌahuu rakaria yn wyti ikat mohag nug hat e. 32-Uito wyti ariot yt nakuaria i eraꞌaipok iꞌatuminug saꞌag kaipywiat hamo yn. Yt ariot i wyti wakuaria kape neꞌi e.
Mateu 9.14-17; Maku 2.18-22 Piat Ewy
33Mio tã e pote iraniaꞌin miitꞌin teꞌeroꞌe Iesui pe -Woꞌosetꞌok hat Iuwãu emiitꞌin wyti teꞌeremosyꞌat kahato iꞌewyte iꞌatuehay kahato Tupana kape. Iꞌewyte woꞌonapin haria wyti miꞌiria ewy kahato inug wy iꞌatuꞌe. Maꞌato ewat epotmuꞌeria wyti teꞌerenuk hawyi teꞌeresapoꞌu hap yn inug iꞌatuꞌe. 34Mio tã teꞌeroꞌe hawyi Iesui tiꞌatuwesat -Waku apo eweipuẽti karãpe woꞌokyiꞌat hap mowepiit turan teꞌeremosyꞌat miwenka koꞌi karãpe heꞌaito wuat toineꞌen iꞌatuwywo raꞌyn turan. Arewanetup yt hin i e. 35-Maꞌato heꞌat putꞌok e raꞌyn mekewat heꞌaito wuat tuut raꞌyn hawyi ti aru meremo totat raꞌyn tehaytuwy iꞌatupyꞌasetpyi. Miꞌi hap eꞌat pe ti aru teꞌeremosyꞌat raꞌyn.
Mateu 9.16-17; Maku 2.21-22 Piat Ewy
36Miꞌi hawyi Iesui toꞌe iãꞌãkap wuo -Yt uwe i ti imog sokpe pak pakup wo sokpe potꞌi maꞌato miꞌi tã etunug mote meremo sokpe pakup tihiot neꞌi sokpe potꞌi. Pyno sokpe pak pakup wyti yt toꞌosat kuap i sokpe potꞌi wywo. 37Iꞌewyte yt uwe i ti ipag neran sapo hy kamuti potꞌi pe neꞌi maꞌato uwe ipag neꞌi heiam potꞌi pe pote meremo kamuti iꞌapok e neꞌi hawyi sapo hy tuwoꞌokpun naꞌyn hawyi mekewat heiam yt kat hamo i raꞌyn topyhuꞌat. 38Pyno sapo hy pakup wyti waku watopag heiam pakup we yn e. 39Yt uwe i wyti ikyꞌesat sapo hy pakup wuat teꞌyꞌu hawyi ikyꞌesat sapo hy potꞌi neꞌi hawyi yt toꞌe kuap i sapo hy potꞌi poꞌog waku yt e i.
Currently Selected:
Iruka 5: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
